Bakı Şəhəri Nizami Rayon Məhkəməsi Qərardad — İş №3(007)-1815/2025

Azərbaycan Respublikası adından QƏRARDAD Bakı şəhəri İş № 3(007)-1815/2025 18.04.2025 BAKI ŞƏHƏRİ NİZAMİ RAYON MƏHKƏMƏSİ Mən, Bakı şəhəri Nizami Rayon Məhkəməsinin hakimi Mehdiyev Nəriman Hüseynqulu oğlu, Şəxs barəsində Azərbaycan Respublikası İXM-nin 529.3-cü maddəsi ilə tərtib edilmiş inzibati xəta haqqında protokola dair materialı nəzərdən keçirərək, MÜƏYYƏN ETDİM: Şəxs barəsində Azərbaycan Respublikası İXM-nin 529.3-cü maddəsi ilə tərtib edilmiş inzibati xəta haqqında protokola dair material baxılması üçün məhkəməyə göndərilmişdir. Daxil olmuş materialı nəzərdən keçirib, hesab edirəm ki, inzibati xəta haqqında protokol və ona əlavə olunmuş sənədlər protokolu tərtib etmiş orqana geri qaytarılmalıdır. Belə ki, Azərbaycan Respublikası İXM-nin 529.3-cü maddəsinin mənasına görə, yol hərəkəti qaydaları əleyhinə olan inzibati xətaların, yaxud bu Məcəllənin 353.2-ci maddəsində nəzərdə tutulan inzibati xətanın törədilməsinə görə inzibati cərimə növündə inzibati tənbeh tətbiq etmə haqqında qərarın qanuni qüvvəyə mindiyi gündən 3 ay müddətində qanunla müəyyən edilmiş əsaslar olmadan icra edilməməsi – həmin maddədə nəzərdə tutulan inzibati məsuliyyətə səbəb olur. Həmin Məcəllənin 126.1-ci maddəsinə əsasən barəsində inzibati xəta haqqında iş üzrə qərar qəbul edilmiş şəxs yol hərəkəti qaydaları, yol hərəkəti təhlükəsizliyinin təmin edilməsi və avtomobil yollarından istifadə qaydaları əleyhinə olan inzibati xətaların törədilməsinə görə inzibati tənbeh tətbiq etmə haqqında qərar ona bu Məcəllənin 57-ci maddəsində nəzərdə tutulmuş rəsmi qaydada verildiyi vaxtdan 20 (iyirmi) gün müddətində yuxarı səlahiyyətli orqana (vəzifəli şəxsə) və ya məhkəməyə şikayət edə bilər. Şikayət şəxsən verilə və ya poçt, yaxud internet vasitəsilə göndərilə bilər. Təqdim olunan materiallarla müəyyən edilir ki, iş üzrə 25 dekabr 2024-cü il tarixli, EQ seriyalı, 25223933 nömrəli inzibati tənbeh vermə haqqında elektron qərar, Şəxs 25 dekabr 2024-cü il tarixdə yol hərəkəti qaydaları əleyhinə olan xətanı törətməsi ilə əlaqədar qəbul olunmuşdur. Lakin qanunla müəyyən edilmiş (həmin qərardan şikayət verilməsi üçün nəzərdə tutulan, eləcə də qərarın qanuni qüvvəyə mindiyi gündən etibarən onun icra edilməsi üçün nəzərdə tutulan 3 ay müddət birlikdə olmaqla) müddət tamam olmadan, 26 mart 2025-ci il tarixdə Şəxs barəsində Azərbaycan Respublikası İXM-nin 529.3-cü maddəsi ilə inzibati xəta haqqında protokol tərtib edilməklə o, inzibati məsuliyyətə məruz qalmışdır. Bakı Apellyasiya Məhkəməsindən daxil olmuş, qanunvericiliyin tələblərinə əməl olunması vəziyyətinin öyrənilərək ararılmış ümumiləşdirilmə üzrə 14 aprel 2025-ci il tarixli, 3-6-1/2-6512/2025 nömrəli “İcmal məktubu”nda da bu kimi məsələlərə diqqət yetirilərək, yol hərəkəti qaydaları əleyhinə olan inzibati xətaların törədilməsinə görə inzibati cərimə növündə tənbeh tətbiq etmə haqqında qərarların qanuni qüvvəyə mindiyi gündən 3 ay müddətində icra olunması müddəti gözlənilmədən İXM-nin 529.3-cü maddəsi ilə inzibati xəta haqqında protokol tərtib edilərək baxılması üçün məhkəməyə göndərilməsi və şəxs barəsində inzibati tənbeh tədbirinin tətbiq edilməsi qanunsuz olmaqla yanaşı həm də, şəxslərin hüquqlarının pozulması, onların əsassız məhrumiyyətlərə məruz qalmaları ilə nəticələnir. Azərbaycan Respublikası İXM-nin 106-cı maddəsinə əsasən hakim, səlahiyyətli orqan (vəzifəli şəxs) inzibati xətalar haqqında işlərə baxarkən həmin maddədə imperativ formada sadalanmış digər məsələlərlə yanaşı həmçinin işin baxılmasının onun səlahiyyətinə aid olub-olmadığını, eləcə də işin digər materiallarının bu Məcəllənin tələblərinə müvafiq tərtib edilib-edilmədiyini həll etməlidir. Həmin Məcəllənin 109.1.6-cı maddəsinə əsasən inzibati xəta haqqında işin baxılmağa hazırlanması zamanı protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda, işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması barədə qərardad qəbul edilir. Beləliklə, hesab edirəm ki, yuxarıda göstərilən əsaslarla Şəxs barəsində inzibati xəta haqqında protokol düzgün tərtib olunmadığına, məhkəmədə işə baxılarkən bu halın aradan qaldırılması mümkün olmadığına görə material inzibati xəta haqqında protokolu tərtib etmiş orqana geri qaytarılmalıdır. Eyni zamanda hesab edirəm ki, nöqsanlar aradan qaldırıldıqdan sonra, materialın təkrarən məhkəməyə göndərilməsi zərurəti yarandıqda, hazırda geri qaytarılan protokolun qanunla müəyyən edilmiş müddət tamam olmadan tərtib edildiyi nəzərə alınmaqla, protokol yenidən tərtib edilməlidir. Şərh olunanlara əsaslanaraq və Azərbaycan Respublikası İXM-nin 106, 109 və 118ci maddələrini rəhbər tutaraq, QƏRARA ALDİM: Şəxs barəsində Azərbaycan Respublikası İXM-nin 529.3-cü maddəsi ilə tərtib edilmiş 26 mart 2025-ci il tarixli, İXP seriyalı, ******* nömrəli inzibati xəta haqqında protokola dair material Bakı şəhəri Nizami rayon polis idarəsinin dövlət yol polis şöbəsinə geri qaytarılsın. Qərardaddan şikayət verilə bilməz. Hakim Nəriman Mehdiyev