Bakı Şəhəri Nizami Rayon Məhkəməsi Qərardad — İş №3(007)-3137/2023

Azərbaycan Respublikası adından QƏRARDAD Bakı şəhəri İş № 3(007)-3137/2023 31.05.2023 BAKI ŞƏHƏRİ NİZAMİ RAYON MƏHKƏMƏSİ Mən, Bakı şəhəri Nizami Rayon Məhkəməsinin hakimi Mehdiyev Nəriman Hüseynqulu oğlu, Şəxs barəsində Azərbaycan Respublikası İXM-nin 528.1-ci maddəsi ilə olan inzibati materialı nəzərdən keçirərək, MÜƏYYƏN ETDİM: Bakı şəhəri Nizami rayon icra şöbəsindən daxil olmuş 31 may 2023-cü il tarixli, MN seriyalı, ******* nömrəli inzibati xəta haqqında protokola görə, Şəxs Sumqayıt Şəhər Məhkəməsinin 2(060)-2260/20 saylı xx.xx.2020-ci il tarixli icra sənədi üzrə olan 11560 manat borcunu hal-hazırda ödəməmiş, nəticədə Azərbaycan Respublikası İXM-nin 528.1ci maddəsində nəzərdə tutulmuş inzibati xətanı törətmişdir. Daxil olmuş materialı nəzərdən keçirib, hesab edirəm ki, inzibati xəta haqqında protokola dair material protokolu tərtib etmiş orqana geri qaytarılmalıdır. Azərbaycan Respublikası İnzibati Xətalar Məcəlləsinin 12.1-ci maddəsinə əsasən bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıqdan törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Həmin Məcəllənin 100.1.4, 100.1.5 və 100.1.6-cı maddələrinə əsasən inzibati xəta haqqında protokolda inzibati xətanın törədildiyi yer, vaxt və bu xətanın mahiyyəti; inzibati xətaya görə məsuliyyət nəzərdə tutan bu Məcəllənin müvafiq maddəsi; olduğu halda, şahidlərin və zərər çəkmiş şəxslərin adı, atasının adı, soyadı və onların yaşadığı yerin ünvanı göstərilir. İlk növbədə qeyd olunmalıdır ki, təqdim edilmiş inzibati xəta haqqında protokolda inzibati xətanın mahiyyəti düzgün göstərilməmiş, tövsifedici əlamətlər (icra sənədindəki tələbin üzrsüz səbəbdən icra məmuru tərəfindən müəyyən olunmuş müddətdə icra edilməməsi və ya icra məmurunun məhkəmə və ya başqa dövlət orqanlarının qərarlarının icrası ilə əlaqədar digər qanuni tələblərinin yerinə yetirilməməsi), xətanın törədildiyi vaxt və zərərçəkmiş şəxs, onun ünvanı barədə məlumatlar ümumiyyətlə qeyd edilməmiş, icra sənədi üzrə ödənilməmiş borcun məbləği isə fərqli, yəni 11252 manat və 11560 manat kimi göstərilmişdir. Bundan başqa, 12 yanvar 2023-cü il tarixdə qüvvəyə minmiş 02 dekabr 2022-ci il tarixli 664-VİQD nömrəli Azərbaycan Respublikasının Qanununa əsasən İnzibati Xətalar Məcəlləsinə yeni məzmunda 528.1-1-ci maddə əlavə edilmişdir, həmin maddənin tələbinə əsasən 528.1-1-ci maddəsinə əsasən bu Məcəllənin 528.1-ci maddəsində nəzərdə tutulmuş xətanın inzibati tənbeh almış şəxs tərəfindən inzibati tənbeh vermə haqqında qərarın qanuni qüvvəyə mindiyi gündən bir il ərzində eyni icra sənədinə münasibətdə təkrar törədilməsi həmin maddədə nəzərdə tutulmuş inzibati məsuliyyətə səbəb olur. Materiala əlavə edilmiş Sumqayıt Şəhər Məhkəməsinin 01 mart 2023-cü il tarixli 3(060)-572/2023 nömrəli qərarının surətindən görünür ki, Şəxs Sumqayıt Şəhər Məhkəməsinin 21 iyul 2020-ci il tarixli 2(060)-2260/20 nömrəli icra sənədindəki tələbi üzrsüz səbəbdən icra məmuru tərəfindən müəyyən olunmuş müddətdə icra etməməyə, icra məmurunun məhkəmə qərarının icrası ilə əlaqədar qanuni tələblərini yerinə yetirməməyə görə Azərbaycan Respublikası İXM-nin 528.1-ci maddəsi ilə barəsində 08 gün müddətinə inzibati qaydada həbs tətbiq edilmişdir. Bununla da, müəyyən olunur ki, hazırkı 31 may 2023-cü il tarixli, MN seriyalı, ******* nömrəli inzibati xəta haqqında protokol Şəxs Sumqayıt Şəhər Məhkəməsinin 21 iyul 2020ci il tarixli 2(060)-2260/20 nömrəli icra sənədindəki tələbi üzrsüz səbəbdən icra məmuru tərəfindən müəyyən olunmuş müddətdə icra etməməyə, icra məmurunun məhkəmə qərarının icrası ilə əlaqədar qanuni tələblərini yerinə yetirməməyə görə tərtib edilmişdir. Hansı ki, belə halda şəxsin əməli Azərbaycan Respublikası İXM-nin 528.1-ci maddəsinin deyil, 528.1-1-ci maddəsinin təsiri altına düşməklə, inzibati icraat həmin maddə ilə başlanılmalı, müvafiq əsasların olması müəyyən edildikdə İXM-nin 528.1-1-ci maddəsi ilə inzibati xəta haqqında protokol tərtib edilməli idi. Bu zaman isə nəzərə alınmalıdır ki, istinad olunan maddənin “528.1-ci maddədə nəzərdə tutulmuş xətanın inzibati tənbeh almış şəxs tərəfindən inzibati tənbeh vermə haqqında qərarın qanuni qüvvəyə mindiyi gündən bir il ərzində eyni icra sənədinə münasibətdə təkrar törədilməsi” kimi tövsifedici əlamətinin düzgün müəyyən edilməsi üçün Sumqayıt Şəhər Məhkəməsinin 01 mart 2023cü il tarixli 3(060)-572/2023 nömrəli qərarının qanuni qüvvəyə minib-minməməsi müəyyən edilməli, buna dair sübut əldə olunmalıdır. Materialda isə belə sübutlar aşkar edilməmişdir. Qeyd olunanlardan başqa, Şəxs inzibati xəta haqqında protokolun surəti almaq hüququ təmin edilməmiş, izahat verməkdən imtina etdiyi qeyd olunsa da, bu, müvafiq qaydada sənədləşdirilməmiş, izahat blankında şəxsə dair məlumatlar qeyd olunmamış, boş saxlanılmış, aidiyyəti hissələrdə Azərbaycan Respublikası İXM-nin 61 və 100-cü maddələrinin tələbləri pozulmuşdur. Eyni zamanda nəzərə alınmalıdır ki, icra məmuru digər icra qurumundan aidiyyəti üzrə daxil olmuş icra sənədi üzrə icra hərəkətlərinin davam etdirilməsi barədə 25 may 2023-cü il tarixli qərar qəbul etdikdən sonra həyata keçirilmiş icra hərəkətlərini özündə əks etdirən, icra sənədini qəbul etdikdən 6 gün sonra borclunun barəsində məhz inzibati təsir tədbiri görülməli olduğu qənaətinə gəlməsinə əsas verən sübutları materiala əlavə etməmiş, müvafiq qaydada əsaslandırmamışdır. Azərbaycan Respublikası İXM-nin 106-cı maddəsinə əsasən hakim, səlahiyyətli orqan (vəzifəli şəxs) inzibati xətalar haqqında işlərə baxarkən həmin maddədə imperativ formada sadalanmış digər məsələlərlə yanaşı həmçinin işin baxılmasının onun səlahiyyətinə aid olub-olmadığını, eləcə də işin digər materiallarının bu Məcəllənin tələblərinə müvafiq tərtib edilib-edilmədiyini həll etməlidir. Həmin Məcəllənin 109.1.6-cı maddəsinə əsasən inzibati xəta haqqında işin baxılmağa hazırlanması zamanı protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda, işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması barədə qərardad qəbul edilir. Azərbaycan Respublikası Konstitusiya Məhkəməsinin Plenumunun “Azərbaycan Respublikası İnzibati Xətalar Məcəlləsinin 128-ci maddəsi baxımından həmin Məcəllənin 109-cu maddəsinin şərh edilməsinə dair” 3 may 2019-cu il tarixli qərarına əsasən inzibati protokolu tərtib etmək səlahiyyəti olan orqan (vəzifəli şəxs) həmin protokolu tərtib edərkən Azərbaycan Respublikası İnzibati Xətalar Məcəlləsinin tələblərinə ciddi riayət etməlidir. Eyni zamanda həmin qərara əsasən Azərbaycan Respublikası İnzibati Xətalar Məcəlləsinin 128-ci maddəsinin tələbləri baxımından həmin Məcəllənin 109-cu maddəsində nəzərdə tutulmuş inzibati xətalar haqqında işin baxılmasına hazırlanması zamanı qəbul edilən qərardadlardan apelyasiya şikayəti vermək hüququ istisna edilir. Qeyd olunanlara əsasən hesab edirəm ki, inzibati araşdırma və protokolun tərtib olunması zamanı göstərilən qaydada inzibati xətalar qanunvericiliyinin müvafiq tələbləri pozulduğu, əməl düzgün tövsif edilmədiyi, təqdim edilmiş materiallar natamam olduğu və işə baxılarkən tamamlamaq mümkün olmadığı üçün Şəxs barəsində tərtib olunmuş inzibati xəta haqqında protokola dair material geri qaytarılmalıdır. Şərh olunanlara əsaslanaraq və Azərbaycan Respublikası İXM-nin 106, 109 və 118-ci maddələrini rəhbər tutaraq, QƏRARA ALDİM: Şəxs barəsində Azərbaycan Respublikası İXM-nin 528.1-ci maddəsi ilə tərtib edilmiş 31 may 2023-cü il tarixli, MN seriyalı, ******* nömrəli inzibati xəta haqqında protokola dair material Bakı şəhəri Nizami rayon icra şöbəsinə geri qaytarılsın. Qərardaddan şikayət verilə bilməz. Hakim Nəriman Mehdiyev