Bakı Şəhəri Nizami Rayon Məhkəməsi Qərar — İş №3(007)-3926/2023

Azərbaycan Respublikası adından QƏRAR Bakı şəhəri İş № 3(007)-3926/2023 21.07.2023 BAKI ŞƏHƏRİ NİZAMİ RAYON MƏHKƏMƏSİ Bakı şəhəri Nizami Rayon Məhkəməsinin hakimi Qədirli Nigar Aftandil qızının sədrliyi, X2 iclas katibliyi, barəsində inizbati xəta haqqında iş üzrə icraat aparılan şəxs Şəxs, onun müdafiəçisi Bakı şəhəri 06 saylı vəkil bürosunun vəkili – X3, Bakı şəhəri Nizami rayon Polis İdarəsi 23-cü Polis Bölməsinin sahə rəisi X1 iştirakları ilə, xx.xx.1998-ci ildə Biləsuvar rayonunda anadan olmuş, Azərbaycan Respublikası vətəndaşı, evli, orta təhsilli, işsiz, ünvan 1 ünvanında qeydiyyatda olan və yaşayan Şəxs barəsində Azərbaycan Respublikası İnzibati Xətalar Məcəlləsinin 535.1-ci maddəsi ilə Bakı şəhəri Nizami Rayon Polis İdarəsi 23-ci Polis Bölməsindən daxil olmuş inzibati xəta haqqında işə Bakı şəhəri Nizami Rayon Məhkəməsinin binasında açıq məhkəmə iclasında baxaraq, məhkəmə MÜƏYYƏN ETDİ: Bakı şəhəri Nizami Rayon Polis İdarəsi 23-cü Polis Bölməsi tərəfindən Şəxs barəsində İXM-in 535.1-ci maddəsi ilə xx.xx.2023-cü il tarixdə, MN № ******* saylı inzibati xəta haqqında protokol tərtib edilmişdir ondan ötəri ki, iki nəfər şəxs – X8 və Şəxs xx.xx.2023-cü il tarixdə, saat 19:05 radələrində Bakı şəhəri, Nizami rayonu, M.Əliyev küçəsində özlərini şübhəli apardıqları üçün polis əməkdaşları tərəfindən saxlanılmış, polis əməkdaşları şəxsiyyət vəsiqələrini tələb etdikdə Şəxs qaçmağa başlamış, polis əməkdaşı onun arxasıyca qaçdıqda o, yıxılmış, polis əməkdaşı ona yaxınlaşdıqda isə o və yanındakı digər şəxs polis əməkdaşlarına tabe olmamışlar. Bununla da protokol tərtib etmiş səlahiyyətli orqan hesab etmişdir ki, Şəxs bu hərəkətləri ilə polis əməkdaşlarının ictimai qaydanın mühafizə vəzifələrini icra edərkən qanuni tələblərinə tabe olmamışdır. Protokol tərtib etmiş şəxs Bakı şəhəri Nizami Rayon Polis İdarəsi 23-cü Polis Bölməsinin sahə rəisi X4 bildirdi ki, xx.xx.2023-cü il tarixdə, saat 19:05 radələrində o və sahə rəisi Səid İsmayılov xidmətdə olarkən Bakı şəhəri, Nizami rayonu, M.Əliyev küçəsində iki nəfər şəxs özlərini şübhəli apardıqları üçün tərəflərindən saxlanılmış, özlərini təqdim edərək onların şəxsiyyət vəsiqələrini tələb etmiş, bu zaman həmin şəxslərdən biri - Şəxs qaçmağa başlamış, o da onun arxasıyca qaçmış, həmin şəxs yıxılmış, o, ona yaxınlaşdıqda isə Şəxs qalxıb üzərinə hücum çəkmiş, nalayiq ifadələr işlədərək onu döymək istəmişdir. Hər iki şəxs onlara tabe olmamış, polis əməkdaşlarının qanuni tələblərini yerinə yetirməmişdir. Bu səbəbdən tərəflərindən xüsusi fiziki fəndlərdən istifadə edilərək onlar zərərsizləşdirib 23-cü Polis Bölməsinə gətirilmişdir. PB-də həmin şəxslərin X8 və Şəxs olduqları məlum olmuşdur. Bundan sonra onun tərəfindən hər iki şəxs barəsində İXM-nin 535.1-ci maddəsi ilə protokol tərtib olunmuşdur. Məhkəmə iclasında barəsində inizbati xəta haqqında iş üzrə icraat aparılan şəxsin müdafiəçisi X6 bildirdi ki, barəsində inizbati xəta haqqında iş üzrə icraat aparılan şəxsin əməlində inzibati xəta tərkibi yoxdur, polis əməkdaşlarının qanuni tələblərinə tabesizlik göstərməmişdir. Polis tərəfindən tərtib edilmiş protokol əsassız və qanunsuzdur. Odur ki, inzibati iş üzrə icraata xitam verilməsini məhkəmədən xahiş etdi. Məhkəmə iclasında barəsində inizbati xəta haqqında iş üzrə icraat aparılan şəxs Şəxs bildirdi ki, xx.xx.2023-cü il tarixdə, saat 19:05 radələrində polis Nizami rayonu, M.Əliyev küçəsində dostu Orxan Mayıllı ilə birlikdə maşında oturarkən heç bir səbəb olmadan polis əməkdaşları onlara yaxınlaşaraq şəxsiyyət vəsiqələrini tələb etmiş, lakin şəxsiyyət vəsiqələri üzərilərində olmadığı üçün təqdim edə bilməmişlər. Bu zaman o, yeni ailə qurduğu üçün qorxmuş və həyəcanlandığı üçün qaçmağa başlamış, polis əməkdaşı da onun arxasıyca qaçmış, o yıxıldıqda isə polis əməkdaşı onu tutaraq saxlamışdır. Daha sonra onları 23-cü PB-nə aparmış və orada barələrində protokol tərtib olunmuşdur. Lakin o, polis əməkdaşlarına qarşı heç bir tabesizlik nümayiş etdirməmiş, müqavimət göstərməmişdir. Məhkəmədən barəsində ədalətli qərar çıxarılmasını xahiş etdi. Məhkəmə tərəfləri dinləyib, iş materiallarını nəzərdən keçirdərək hesab edir ki, aşağıdakı əsaslara görə inzibati xəta haqqında iş üzrə icraata xitam verilməlidir. Belə ki, iş materiallarında olan xx.xx.2023-cü il tarixli Bakı şəhəri Nizami Rayon Polis İdarəsi 23-cü Polis Bölməsinin sahə rəisləri X4 və X7 tərəfindən Bakı şəhəri Nizami Rayon Polis İdarəsi 23-ci Polis Bölməsinin ünvanına tərtib etdikləri raportda göstərilir ki, xx.xx.2023-cü il tarixdə, saat 19:05 radələrində onlar xidmətdə olarkən Bakı şəhəri, Nizami rayonu, M.Əliyev küçəsində iki nəfər şəxs özlərini şübhəli apardıqları üçün tərəflərindən saxlanılmış, özlərini təqdim edərək onların şəxsiyyət vəsiqələrini tələb etmiş, bu zaman həmin şəxslərdən biri - Şəxs qaçmağa başlamış, Elvin Qasımzadə onun arxasıyca qaçmış, həmin şəxs yıxılmış, Elvin Qasımzadə ona yaxınlaşdıqda isə Şəxs qalxıb üzərinə hücum çəkmiş, nalayiq ifadələr işlədərək onu döymək istəmişdir. Hər iki şəxs onlara tabe olmamış, polis əməkdaşlarının qanuni tələblərini yerinə yetirməmişdir. Bu səbəbdən tərəflərindən xüsusi fiziki fəndlərdən istifadə edilərək onlar zərərsizləşdirib 23-cü Polis Bölməsinə gətirilmişdir. PB-də həmin şəxslərin X8 və Şəxs olduqları məlum olmuşdur. Lakin raportda və protokolda qeyd olunan hərəkətlərin şəxs tərəfindən törədilməsinə dair hər hanısa sübut məhkəməyə təqdim edilməmiş, həmçinin iş üzrə şahidlər cəlb edilməmişdir. Məhkəmə qeyd edir ki, protokol tərtib etmiş şəxsin müəyyən etdiyi və protokolda göstərdiyi hərəkətlər İXM-in 535.1-ci maddəsinin tərkibini yaratmır. Çünki İXM-nin 535.1-ci maddəsinə əsasən polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamaq inzibati xəta kimi müəyyən edilmişdir. Lakin şəxsin təqsirləndirildiyi əməl kimi göstərilmiş və şəxsə qarşı İXM-nin 535.1-ci maddəsi üzrə tərtib edilmiş protokolda, göstərilmiş əməldə inzibati xəta tərkibi yoxdur. İş materiallarında olan protokoldan, raportdan, Şəxs izahatından, məhkəməyə verdiyi ifadəsindən bəlli olur ki, Şəxs polis əməkdaşlarına tabesizlik nümayiş etdirməmiş, fiziki olaraq heç bir zərər yetirməmiş, onları təhqir etməmişdir. Bununla da protokolda göstərilən əməldə İXM-nin 535.1-ci maddəsində müəyyən edilmiş inzibati xəta tərkibi mövcud deyildir. Belə olduğu təqdirdə İXM-in 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. İnzibati xətanın anlayışından bəhs edilən İXM-in 12-ci maddəsinə əsasən həmin Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıqdan törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. İXM-in 8.1-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. İXM-in 8.2-ci maddəsinə əsasən inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. İXM-in 8.3-cü maddəsinə əsasən inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. İXM-in 53.1.1-ci maddəsinə əsasən inzibati xəta hadisəsi olmadıqda, həmçinin İXM-in 53.1.2-ci maddəsinə əsasən inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. İnzibati xətalar haqqında işlərə baxılarkən çıxarılan qərarlardan biri də İXM-in 114.1.4-cü maddəsinə əsasən inzibati xəta haqqında iş üzrə icraata xitam verilməsi haqqında qərardır. İXM-in 114.2.1-ci maddəsinə əsasən həmin Məcəllənin 53-cü maddəsində nəzərdə tutulan hallardan biri mövcud olduqda inzibati xəta haqqında iş üzrə icraata xitam verilməsi haqqında qərar çıxarılır. Beləliklə, məhkəmə hesab edir ki, Şəxs inzibati xətanın törədilməsində təqsirli hesab edilməsi və inzibati xəta tərkibinin əlamətlərini daşıyan əməli (hərəkət və ya hərəkətsizliyi) sübuta yetirilmədiyindən, bununla da onun hərəkətlərində Azərbaycan Respublikası İXM-nin 535.1-ci maddəsində nəzərdə tutulmuş inzibati xəta tərkibi olmadığından, tərtib edilmiş inzibati protokol əsasında o, inzibati məsuliyyətə cəlb edilə bilməz, ona görə onun barəsində başlanmış inzibati xəta haqqında iş üzrə icraata xitam verilməlidir. Məhkəmə hesab edir ki, vəkilin məhkəmədə iştirak etdiyi müddət 03 iş saatı müddətinə bərabər olduğundan, hər iş saatı üçün Azərbaycan Respublikası Nazirlər Kabinetinin xx.xx.2018-ci il tarixli, 202 saylı qərarına əsasən hüquqi yardım haqqı 6 (altı) manat miqdarında ödənilməsi nəzərə alınmaqla 18 (on səkkiz) manat (3x6) məbləğində əmək haqqı Bakı şəhəri 6 saylı Vəkil Bürosu vasitəsi ilə müdafiəçi X5 dövlət büdcəsi hesabına ödənilməlidir. Yuxarıda göstərilənlərə və Azərbaycan Respublikası İnzibati Xətalar Məcəlləsinin 40, 43, 48-51, 114, 128-130-cu maddərini rəhbər tutaraq, məhkəmə QƏRARA ALDİ: Şəxs barəsində İnzibati Xətalar Məcəlləsinin 535.1-ci maddəsində nəzərdə tutulmuş inzibati xəta haqqında iş üzrə icraata xitam verilsin. Şəxs dərhal azad edilsin. Barəsində inzibati xətalar haqqında iş üzrə icraat aparılan şəxs Şəxs məhkəmədə 03 saat göstərdiyi pulsuz hüquqi yardıma görə iş üzrə dəvət olunmuş müdafiəçi X5 18 (on səkkiz) manat (3x6) məbləğində əmək haqqı Bakı şəhəri 6 saylı Vəkil Bürosu vasitəsi ilə Azərbaycan Respublikasının dövlət büdcəsi vəsaiti hesabına ödənilsin. Qərarın surəti rəsmi qaydada verildiyi vaxtdan 10 (on) gün müddətində işə baxan Bakı şəhəri Nizami Rayon Məhkəməsi vasitəsilə və ya birbaşa Bakı Apellyasiya Məhkəməsinə apellyasiya şikayəti və ya protesti verilə bilər. Hakim Nigar Qədirli