Bakı Şəhəri Nizami Rayon Məhkəməsi Qərar — İş №3(007)-47/2022

Azərbaycan Respublikası adından QƏRAR Bakı şəhəri İş № 3(007)-47/2022 10.01.2022 BAKI ŞƏHƏRİ NİZAMİ RAYON MƏHKƏMƏSİ Mən, Bakı şəhəri Nizami rayon Məhkəməsinin hakimi Əhmədov Rauf Tağı oğlu, məsləhətçi İmanov Nizami Bəxtiyar oğlunun katibliyi ilə, barəsində inzibati xəta haqqında iş üzrə icraat aparılan şəxs X1 iştirakları ilə, 06 dekabr 2000-ci il tarixdə anadan olmuş, Azərbaycan Respublikasının vətəndaşı, Bakı şəhəri, Xətai rayonu, 1-ci Əhmədli küçəsi, ev 20-də yaşayan, X1 barəsində Bakı şəhəri Nizami RPİ-nin 25-ci PB tərəfindən qəbul edilmiş 22.12.2021-ci il tarixli EPQ № ******* saylı inzibati tənbeh vermə haqqında qərardan vermiş olduğu şikayətə açıq məhkəmə iclasında baxaraq, MÜƏYYƏN E T D İ M: Bakı şəhəri Nizami RPİ-nin 25-ci PB tərəfindən qəbul edilmiş 22.12.2021-ci il tarixli EPQ № ******* saylı inzibati tənbeh vermə haqqında qərardan görünür ki, X3 22.12.2021ci il tarixdə saat 11:47 radələrində Bakı şəhəri, Nizami rayonu, Q.Qarayev Metrostansiyasının yaxınlığında olan obyektdə epidemiya əleyhinə rejim, sanitariyagigiyena və karantin rejimlərinin pozulması nəticəsində Azərbaycan Respublikası İnzibati Xətalar Məcəlləsinin 211.3-cü maddəsi ilə nəzərdə tutulan inzibati xəta törədilmişdir. Həmin qərardan X3 şikayət verərək qərarın ləğv edilməsini xahiş etmiş və şikayəti onunla əsaslandırmışdır ki, 22.12.2021-ci il tarixdə günorta saat 13:30 radələrində Bakı şəhəri, Nizami rayonu, Q.Qarayev Metrostansiyasının yaxınlığında olan obyektə kompyuter avadanlıqlarını götürmək üçün daxil olmuş və obyektdə ondan başqa heç kəs olmamışdır. Təxminən 15 dəqiqə sonra sahə rəisi Şamil Həsənov obyektə daxil olmuş və ona maska taxmadığını irad tutaraq onu 200 manat cərimə etmişdir. Halbu ki obyektdə digər şəxs və ya şəxslər olmamışdır. Məhkəmə iclasında X3 şikayətə uyğun izahat verərək, 22.12.2021-ci il tarixdə günorta saat 13:30 radələrində Bakı şəhəri, Nizami rayonu, Q.Qarayev Metrostansiyasının yaxınlığında olan obyektə kompyuter avadanlıqlarını götürmək üçün daxil olduğunu bildirmişdir. Həmin vaxt obyekt müştərilərə xidmət göstərməmiş və təmir mərhələsində olmuşdur. Bununla bağlı obyektin daxili və xarici görnüşünü əks etdirən fotoşəkilləri şikayətə əlavə etmişdir. Barəsində tərtib olunmuş inzibati tənbeh vermə haqqında qərarın əsassız olduğu üçün ləğv edilməsini və iş üzrə icraata xitam verilməsini xahiş etmişdir. Məhkəmə iclasının vaxtı və yeri barədə lazımi qaydada xəbərdar edilməsinə baxmayaraq inzibati orqanın nümayəndəsi naməlum səbəbdən məhkəmə iclasına gəlməmişdir. İnzibati işə inzibati orqanın nümayəndəsinin iştirakı olmadan baxılması mümkün hesab edilmişdir. Məhkəmə şikayəti sənədlərlə əlaqəli araşdırıb hesab edir ki, şikayət qismən təmin edilməli və inzibati iş üzrə qəbul edilmiş 22.12.2021-ci il tarixli EPQ № ******* saylı inzibati tənbeh vermə haqqında qərar ləğv edilməli və inzibati xəta haqqında iş araşdırılması üçün Bakı şəhəri Nizami RPİ-nin 25-ci PB-nə göndərilməlidir. Belə ki, inzibati orqanın qəbul etdiyi 22.12.2021-ci il tarixli EPQ № ******* saylı inzibati tənbeh vermə haqqında qərara əsasən N.İ.Dəmirovun inzibati xəta törətdiyi qeyd olunsa da, sonuncu həmin qərarı mübahisələndirərək, inzibati xəta törətmədiyini və təqsirli olmadığını bildirmişdir. Məhkəmə qeyd edir ki, N.İ.Dəmirovun təqdim etdiyi fotoşəkillərdən görünür ki, inzibati xətanın baş verdiyi, yəni X1 tibbi maskadan istifadə etmədən içərisində olduğu obyektin müştərilərə xidməti göstərmədiyi və təmir prosesində olduğu müəyyən olunur ki, bu da inzibati xətanın mövcudluğuna əsaslı şübhələr yaradır. Belə olan halda həmin obyektin 22.12.2021-ci il tarixdə fəaliyyət göstərməsi və müştərilərə xidmət etməsi faktı ətraflı araşdırılmalı və araşdırmanın nəticəsindən asılı olaraq müvafiq qərar qəbul edilməlidir. Eyni zamanda məhkəmə qeyd edir ki, X1 bu Məcəllənin 211.2-ci maddəsində nəzərdə tutulan xətanı bir il ərzində təkrar törətməsi müəyyən edilmir. Belə ki, Azərbaycan Respublikası İnzibati Xətalar Məcəlləsinin 211.3-cü maddəsinə əsasən, bu Məcəllənin 211.2-ci maddəsində nəzərdə tutulmuş xətanın inzibati tənbeh almış şəxs tərəfindən inzibati tənbeh vermə haqqında qərar qüvvəyə mindiyi gündən bir il ərzində təkrar törədilməsinə görə inzibati məsuliyyət nəzərdə tutulmuşdur. Azərbaycan Respublikası İnzibati Xətalar Məcəlləsinin 8.2-ci maddəsinə əsasən inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. Bununla, Qanunvericilik inzibati xəta törətmiş şəxsin təqsirli olmasının sübut olunması vəzifəsini inzibati orqanın üzərinə qoymuş olur. Azərbaycan Respublikası İnzibati Xətalar Məcəlləsinin 8.3-cü maddəsinə əsasən inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. Həmin Məcəllənin 76.1-ci maddəsinə əsasən, inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, müvafiq icra hakimiyyəti orqanının müəyyən etdiyi orqanın (qurumun) informasiya sistemində, habelə digər dövlət informasiya sistemlərində (ehtiyatlarında) aşkar olunan məlumatlarla, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Həmin Məcəllənin 81.2-ci maddəsinə əsasən, yol hərəkəti qaydaları, yol hərəkəti təhlükəsizliyinin təmin edilməsi və avtomobil yollarından istifadə qaydaları əleyhinə olan inzibati xətaların aşkarlanmasında istifadə olunan, foto və ya video qeydiyyat funksiyalarına malik xüsusi texniki vasitələr müvafiq icra hakimiyyəti orqanının mərkəzi informasiya sisteminə inteqrasiya olunmalıdır. Həmin Məcəllənin 81.3-cü maddəsinə əsasən, xüsusi texniki vasitələrin göstəriciləri inzibati xəta haqqında iş üzrə protokolda (inzibati xəta haqqında iş üzrə qərarda) qeyd edilir. Həmin Məcəllənin 84.1-ci maddəsinə əsasən, inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Məhkəmə qeyd edir ki, sübutların kifayət etməməsi səbəbindən X1 22.12.2021-ci il tarixdə saat 11:47 radələrində Bakı şəhəri, Nizami rayonu, Q.Qarayev Metrostansiyasının yaxınlığında olan obyektdə epidemiya əleyhinə rejim, sanitariya-gigiyena və karantin rejimlərinin pozması barədə qəti nəticəyə gəlmək mümkün qeyil. Azərbaycan Respublikası İnzibati Xətalar Məcəlləsinin 4-cü maddəsinə əsasən bu Məcəllə insan və vətəndaş hüquqlarına və azadlıqlarına hörmət edilməsi, qanunçuluq, qanun qarşısında bərabərlik, təqsirsizlik prezumpsiyası, ədalətlilik və inzibati xətaların qarşısının alınması prinsiplərinə əsaslanır. Həmin Məcəllənin 6.2-ci maddəsinə əsasən inzibati xəta haqqında iş üzrə icraatın təmin olunması tədbirləri tətbiq edilərkən qanunvericiliyin tələblərinə əməl olunması yuxarı orqanların və vəzifəli şəxslərin idarə nəzarəti ilə, məhkəmə və prokuror nəzarəti ilə və şikayət etmək hüququ ilə təmin edilir. Beləliklə, məhkəmə yuxarıda qeyd olunan xüsusatları və qanunvericiliyin tələblərini nəzərə alaraq hesab edir ki, X1 barəsində qəbul edilmiş 22.12.2021-ci il tarixli EPQ № ******* saylı inzibati tənbeh vermə haqqında qərar ləğv edilməli və inzibati xəta haqqında iş araşdırılması üçün Bakı şəhəri Nizami RPİ-nin 25-ci PB-nə göndərilməlidir. Yuxarıda göstərilənləri və Azərbaycan Respublikası İnzibati Xətalar Məcəlləsinin 133-137-ci maddələrini rəhbər tutaraq, QƏRARA ALDİM: X1 şikayəti qismən təmin edilsin. Bakı şəhəri Nizami RPİ-nin 25-ci PB-nin sahə rəisi X2 tərəfindən X1 barəsində qəbul edilmiş 22.12.2021-ci il tarixli EPQ № ******* saylı inzibati tənbeh vermə haqqında qərar ləğv edilsin və inzibati xəta haqqında iş araşdırılması üçün Bakı şəhəri Nizami RPİnin 25-ci PB-nə göndərilsin. Qərarın surəti təqdim edildiyi və ya alındığı gündən 10 (on) gün müddətində qərardan Bakı şəhəri Nizami rayon məhkəməsi vasitəsilə Bakı Apellyasiya Məhkəməsinə şikayət verilə bilər. Hakim Rauf Əhmədov