Bakı Şəhəri Sabunçu Rayon Məhkəməsi Qərar — İş №3(008)-1020/2023

Azərbaycan Respublikası adından QƏRAR Bakı şəhəri İş № 3(008)-1020/2023 23.02.2023 BAKI ŞƏHƏRİ SABUNÇU RAYON MƏHKƏMƏSİ X3 İmanovanın sədrliyi, Səbinə Pərvin qızı Səfərlinin katibliyi, Zərərçəkmiş şəxs, barəsində inzibati xəta haqqında iş üzrə icraat aparılan şəxs Şəxs iştirakı ilə, Şəxs barəsində Azərbaycan Respublikasının İnzibati Xətalar Məcəlləsinin 327.8-ci maddəsi ilə Bakı şəhər Sabunçu Rayon Polis İdarəsindən daxil olmuş inzibati xəta haqqında materiala açıq məhkəmə iclasında baxaraq MÜƏYYƏN ETDİ: Bakı şəhər Sabunçu Rayon Polis İdarəsindən daxil olmuş 09 fevral 2023-cü il tarixli, AP ******* saylı inzibati xəta haqqında protokoldan görünür ki, Şəxs 18 yanvar 2023-cü il tarixdə, saat 08:15 radələrində etibarnamə əsasında idarə etdiyi «Khazar LX» markalı, **- PN-*** dövlət qeydiyyat nişanlı avtomobillə Bakı şəhəri, Sabunçu rayonu, Pirşağı-Sovxoz yolunda üzü Pirşağı qəsəbəsi istiqamətində hərəkətdə olarkən ötmə əməliyyatı aparıb qarşı yola çıxmaqla manevr qaydasını pozub əks istiqamətdə hərəkət edən “Toyota Prius” markalı, **-GF-*** dövlət qeydiyyat nişanlı avtomobilin qabaq sol hissəsində vuru toqquşmuş, zərbədən idarəetməni itirərək yerində fırlanıb onunla eyni istiqamətdə sağda hərəkət edən “opel Astra” markalı, **-FB-*** dövlət qeydiyyat nişanlı avtomobilin qabaq hissəsinə çırpılmış, hadisə zamanı hər üç avtomobil ciddi zədələnmiş və “Toyota Prius” markalı, **-GF-*** dövlət qeydiyyat nişanlı avtomobilin sürücüsü Zərərçəkmiş şəxs yüngül bədən xəsaərti almışdır. Barəsində inzibati xəta haqqında icraat aparılan Şəxs məhkəmə iclasında özünü AR İXM-nin 327.8-ci maddəsi ilə təqsirli bilərək qeyd etmişdir ki, maddi imkansızlıq səbəbindən zərərçəkmişə dəymiş ziyanı ödəyə bilməmişdir. Törətdiyi əməldən səmimi peşmandır. Məhkəmə iclasına iştirak edən Zərərçəkmiş şəxs barəsində inzibati qaydada icraat aparılan şəxsin hadisədən sonra onunla maraqlanmadığını, ona dəymiş ziyanı ödəmədiyini, ilk öncə telefon zənglərinə cavab verməsinə və bir dəfə yanına gələrək ona 200 manat məbləğində pul verməsinə baxmayaraq sonradan onun telefon zənglərinə cavab vermədiyi hazırda Şəxs şikayətçi olduğunu bildirmişdir. Sədrlik edənin sualına cavab olaraq zərərçəkmiş şəxs onun avtomobilinə 6000 manatdan çox ziyan dəydiyini, qarşı tərəfin avtomobilinin icbari sığortası olmadığından sığortanın da müvafiq məbləği verməkdən imtina etdiyini, Şəxs isə ona 200 manatdan savayı heç bir məbləğ ödəmədiyini, onun sağlamlıq vəziyyəti ilə maraqlanmadığını bildirmişdir. Səlahiyyətli orqana məhkəmə iclasının vaxtı və yeri barədə lazımi qaydada məlumat verilsə də məhkəmə iclasında iştirak etməmiş və iştirak etməməsinin səbəbi barədə hər hansı məlumat verməmişdir. Məhkəmə işə səlahiyyətli orqanın nümayəndəsinin iştirakı olmadan baxılması mümkün hesab etmişdir. İş materiallarında olan və məhkəmə baxışında tədqiq edilmiş: «Cinayət işinin başlanmasının rədd edilməsi haqqında» 28 yanvar 2023-cü il tarixli qərardan görünür ki, Şəxs əməlində Azərbaycan Respublikası Cinayət Məcəlləsi ilə müəyyən edilmiş cinayət tərkibi olmadığından soncunun İnzibati Xətalar Məcəlləsinin 327.8-ci maddəsi ilə məsuliyyətə cəlb edilməsi üçün tədbirlərin görülməsi məqsədi ilə toplanmış materiallar Bakı şəhəri Sabunçu RPİ-nin DYPŞ-nə göndərilmişdir. Azərbaycan Respublikası Səhiyyə Nazirliyinin Məhkəmə-Tibbi Ekspertiza və X1 Publik Hüquqi şəxsin canlı şəxsin ekspertizasının 21 yanvar 2023-cü il tarixli, 131 saylı ekspert rəyindən görünür ki, Zərərçəkmiş şəxs baş beyin silkələnməsi ilə müşatiət olunan sol təpə-gicgah nahiyyəsinin əzilmiş yarası, sol qaş və sol diz oynağı nahiyyələrinin sıyrıqları müəyyən edilmişdir. Xəsarətlər bərk küt əşyanın təsirindən törənmişdir, törənmə müddəti qərarda göstərilmiş 18 yanvar 2023-cü il tarixə və şəraitə uyğun gəlir, yol-nəqliyyat hadisəsi nəticəsində törənə bilər, dərəcəsinə görə ümumilikdə sağlamlığın qısa müddətə pozulmasına səbəb olan sağlamlığa yüngül zərərvurmaya aiddir. Bakı şəhəri Sabunçu RPİ-nin DYPŞ-nin polis leytenantı X2 tərəfindən tərtib edilmiş 09 fevral 2023-cü il tarixli, AP ******* saylı inzibati xəta haqqında protokoldan görünür ki, Şəxs 18 yanvar 2023-cü il tarixdə, saat 08:15 radələrində etibarnamə əsasında idarə etdiyi «Khazar LX» markalı, **-PN-*** dövlət qeydiyyat nişanlı avtomobillə Bakı şəhəri, Sabunçu rayonu, Pirşağı-Sovxoz yolunda üzü Pirşağı qəsəbəsi istiqamətində hərəkətdə olarkən ötmə əməliyyatı aparıb qarşı yola çıxmaqla manevr qaydasını pozub əks istiqamətdə hərəkət edən “Toyota Prius” markalı, **-GF-*** dövlət qeydiyyat nişanlı avtomobilin qabaq sol hissəsində vuru toqquşmuş, zərbədən idarəetməni itirərək yerində fırlanıb onunla eyni istiqamətdə sağda hərəkət edən “opel Astra” markalı, **-FB-*** dövlət qeydiyyat nişanlı avtomobilin qabaq hissəsinə çırpılmış, hadisə zamanı hər üç avtomobil ciddi zədələnmiş və “Toyota Prius” markalı, **-GF-*** dövlət qeydiyyat nişanlı avtomobilin sürücüsü Zərərçəkmiş şəxs yüngül bədən xəsaərti almışdır. Azərbaycan Respublikası İnzibati Xətalar Məcəlləsinin: 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. 12-ci maddəsinə əsasən bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur; 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. 327.8-ci maddəsinə əsasən bu Məcəllənin 327.1 - 327.6, 328 və 330-cu maddələrində nəzərdə tutulmuş xətalar nəticəsində zərər çəkmiş şəxsin sağlamlığına yüngül bədən xəsarətinin yetirilməsinə görə - iki yüz manat məbləğində cərimə edilir və ya nəqliyyat vasitəsini idarə etmək hüququ bir ilədək müddətə məhdudlaşdırılır. Məhkəmə qanunvericiliyin normalarını rəhbər tutub, iş materiallarını tədqiq edərək belə qənaətə gəlir ki, Şəxs Azərbaycan Respublikası İXM-nin 327.8-ci maddəsində nəzərdə tutulmuş inzibati xətanı törətməsi barəsində inzibati qaydada icraat aparılan şəxsin özünün izahatı, zərərçəkmiş şəxsin iş materiallarında olan və məhkəmə iclasında verdiyi izahatı, inzibati materialda olan müvafiq ekspert rəyi ilə tam sübuta yetirilmişdir. Azərbaycan Respublikası İnzibati Xətalar Məcəlləsinin: 9.1-ci maddəsinə əsasən inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır. 21-ci maddəsinə əsasən inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakretizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Məhkəmə, törədilmiş inzibati xətanın xarakterini, habelə inzibati xətanı törətmiş şəxsin şəxsiyyətini, məsuliyyəti yüngülləşdirən hal kimi Şəxs əməlindən peşman olmasını, məsuliyyəti ağırlaşdıran halların müəyyən edilməməsini nəzərə alaraq hesab edir ki, Şəxs Azərbaycan Respublikası İnzibati Xətalar Məcəlləsinin 327.8-ci maddəsi ilə təqsirli bilinməli və barəsində həmin maddənin sanksiyasının hədləri daxilində nəqliyyat vasitələrini idarə etmə hüququnun məhdudlaşdırılması növündə inzibati tənbeh tədbiri tətbiq edilməlidir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 43, 114 və 115-ci maddələrini rəhbər tutaraq QƏRARA ALDİ: Şəxs Azərbaycan Respublikası İnzibati Xətalar Məcəlləsinin 327.8-ci maddəsində nəzərdə tutulmuş inzibati xətanı törətməkdə təqsirli bilinərək barəsində 02 ay müddətə nəqliyyat vasitələrini idarə etmə hüququnun məhdudlaşdırılması növündə inzibati tənbeh tədbiri tətbiq edilsin. Qərarın surəti təqdim edildiyi və ya alındığı gündən 10 (on) gün müddətində Azərbaycan Respublikası İnzibati Xətalar Məcəlləsinin 129-cu maddəsində müəyyən edilmiş qaydada Bakı Apellyasiya Məhkəməsinə şikayət verilə bilər. Hakim Nigar İmanova