Bakı Şəhəri Sabunçu Rayon Məhkəməsi Qərardad — İş №3(008)-5431/2023

Azərbaycan Respublikası adından QƏRARDAD Bakı şəhəri İş № 3(008)-5431/2023 20.09.2023 BAKI ŞƏHƏRİ SABUNÇU RAYON MƏHKƏMƏSİ Bakı şəhəri Sabunçu Rayon Məhkəməsinin hakimi Rəcəbova Elnurə Hüseyn qızı, Şəxs barəsində Azərbaycan Respublikası İnzibati Xətalar Məcəlləsinin 206, 227 və 510-cu maddələri ilə inzibati tənbeh tədbirinin tətbiq edilməsinə dair inzibati xəta haqqında materialları nəzərdən keçirib MÜƏYYƏN ETDİM: Bakı şəhəri Sabunçu rayon Polis İdarəsinin 14-cü Polis Bölməsi tərəfindən tərtib olunmuş 20 sentyabr 2023-cü il tarixli, MN ******* saylı, MN ******* saylı, MN ******* saylı, MN ******* saylı, MN ******* saylı inzibati xəta haqqında protokollar və onlara əlavə edilmiş sənədlər baxılması üçün Bakı şəhəri Sabunçu RPİ-nə göndərilmişdir. İş materiallarını araşdıraraq hesab edirəm ki, materiallar natamam olduğuna görə geri qaytarılmalıdır. Belə ki, Azərbaycan Respublikasının İnzibati Xətalar Məcəlləsinin 100.1-ci maddəsinə əsasən, bu Məcəllənin 54-cü maddəsində nəzərdə tutulmuş hallar istisna olmaqla, inzibati xətanın törədilməsi haqqında protokol tərtib edilir. İnzibati xəta haqqında protokolda aşağıdakılar göstərilir: 100.1.1. protokolun tərtib edildiyi tarix və yer; 100.1.2. protokolu tərtib etmiş şəxsin vəzifəsi, soyadı, adı, atasının adı; 100.1.3. barəsində inzibati xəta haqqında iş üzrə icraat aparılan şəxs haqqında məlumat; 100.1.4. inzibati xətanın törədildiyi yer, vaxt və bu xətanın mahiyyəti; 100.1.5. inzibati xətaya görə məsuliyyət nəzərdə tutan bu Məcəllənin müvafiq maddəsi; 100.1.6. olduğu halda, şahidlərin və zərər çəkmiş şəxslərin adı, atasının adı, soyadı və onların yaşadığı yerin ünvanı; 100.1.7. barəsində inzibati xəta haqqında iş üzrə icraat aparılan fiziki şəxsin və ya hüquqi şəxsin nümayəndəsinin izahatları; 100.1.8. inzibati xətanın aşkar edilməsində xüsusi texniki vasitələrdən istifadə olunmuşdursa, onların göstəriciləri, habelə istifadə olunmuş xüsusi texniki vasitənin tipi, markası, modeli, yerləşdiyi yer, ölçmə vasitəsinin son dəfə müqayisəli dövlət yoxlamasından keçdiyi vaxt (bunu təsdiq edən sənədin nömrəsi, tarixi) və növbəti yoxlamanın keçirilməli olduğu vaxt barədə məlumatlar; 100.1.9. inzibati xətanın törədilməsi nəticəsində şəxsin sağlamlığına yüngül zərər vurulmuşdursa və ya maddi zərər yetirilmişdirsə, bu hallar barədə qeydlər; 100.1.10. inzibati xəta haqqında iş üzrə icraat üçün zəruri olan başqa məlumatlar. Həmin Məcəllənin 100.2-ci maddəsinə əsasən, protokol tərtib edilərkən, barəsində inzibati xəta haqqında iş üzrə icraat aparılan fiziki şəxsə və ya hüquqi şəxsin nümayəndəsinə, habelə inzibati xəta haqqında iş üzrə icraatın digər iştirakçılarına bu Məcəllədə nəzərdə tutulmuş hüquqları və vəzifələri izah edilir və bu barədə protokolda müvafiq qeyd aparılır. Həmin Məcəllənin 101.1-ci maddəsinə əsasən, inzibati xətanın törədilməsi faktı aşkar edilərsə, dərhal inzibati xəta haqqında protokol tərtib edilir. Həmin Məcəllənin 109.1.6-cı maddəsinə əsasən, inzibati xəta haqqında işin baxılmağa hazırlanması zamanı protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda və işə baxılarkən tamamlamaq mümkün olmadıqda, inzibati xətalar haqqında protokolun və digər sənədlərin onu tərtib etmiş orqana,vəzifəli şəxsə geri qaytarılması barəsində qərardad qəbul edilir. Təqdim olunmuş sənədlərdən görünür ki, Şəxs barəsində tərtib olunmuş 20 sentyabr 2023-cü il tarixli, MN ******* saylı, MN ******* saylı, MN ******* saylı, MN ******* saylı, MN ******* saylı protokollar qanunun tələblərinə riayət edilmədən məhkəməyə verilmişdir. Azərbaycan Respublikası İnzibati Xətalar Məcəlləsinin 206 və 510-cu maddələri ilə tərtib edilmiş protokollarda inzibati xətanın mahiyyəti göstərilməmişdir. Bundan başqa xx.xx.2023-cü il tarixli cinayət işinin başlanmasının rədd edilməsi haqqında qərarda Şəxs tərəfindən zərərçəkmiş şəxsə məxsus Bakı şəhəri, Sabunçu rayonu, Maştağa qəsəbəsi, Albalılıq 2 ünvanında 4 metr hündürlükdə dəmir borunun oğurlanması və zərərçəkmiş şəxsə 100 manat məbləğində maddi ziyan vurulması göstərilsə də, həmin samovarların bazar qiymətinin müəyyən olunması barədə müvafiq ekspertiza rəyi və ya zərərçəkmiş şəxsin izahatı iş materiallarına əlavə olunmadıqlarından, oğurluq nəticəsində vurulmuş ziyanın məbləğini və zərərçəkmiş şəxsin oğurluq hadisəsinə olan münasibətini müəyyən etmək mümkün olmamışdır. Eyni zamanda, MN ******* saylı, MN ******* saylı 20 sentyabr 2023-cü il tarixli protokollar üzrə zərərçəkmiş şəxslərin izahatı alınmamış, onların iştirakı məhkəmə iclasında təmin olunmamışdır. Bundan başqa, MN ******* saylı, 20 sentyabr 2023-cü il tarixli protokola əsasən X2 məxsus qaz sayğacı oğurlandığı göstərilsə də, 02 avqust 2023-cü il tarixli raportda hadisə nəticəsində Azəriqaza ziyan dəydiyi göstərilmişdir. Həmçinin, oğurlanmış sayğacın dəyərinin 77 manat 64 qəpik olması qeyd edilsə də, bunu təsdiq edən sənəd iş materiallarına əlavə edilməmişdir. Bundan başqa, iş üzrə X3 tərəfindən verilmiş 18 sentyabr 2023-cü il tarixli ərizə iş materiallarına əlavə olunsa da, həmin ərizədə X1 imzası olmamışdır. Beləliklə, məhkəmə hesab edir ki, qeyd edilən çatışmazlıqlar aradan qaldırılmadan işə mahiyyəti üzrə baxılıb tamamlanması mümkün deyildir. Məhkəmə belə hesab edir ki, Şəxs barəsində Azərbaycan Respublikası İnzibati Xətalar Məcəlləsinin 206, 227 və 510-cu maddələrində nəzərdə tutulmuş inzibati xəta haqqında material natamam olduğundan və işə baxılarkən tamamlamaq mümkün olmadığından inzibati xəta haqqında protokol və digər sənədlər Bakı şəhəri Sabunçu Rayon Polis İdarəsinə geri qaytarılmalıdır. Qeyd olunanları və Azərbaycan Respublikası İnzibati Xətalar Məcəlləsinin 40, 43, 100, 109-cu maddələrini rəhbər tutaraq, məhkəmə QƏRARA ALDİ: Şəxs barəsində Azərbaycan Respublikası İnzibati Xətalar Məcəlləsinin 206, 227 və 510-cu maddələrində nəzərdə tutulmuş inzibati xəta haqqında material natamam olduğundan və işə baxılarkən tamamlamaq mümkün olmadığından inzibati xəta haqqında protokol və digər sənədlər Bakı şəhəri Sabunçu Rayon Polis İdarəsinə geri qaytarılsın. Qərardaddan şikayət verilə bilməz. Sədrlik edən: Elnurə Rəcəbova