Bakı Şəhəri Sabunçu Rayon Məhkəməsi Qərar — İş №3(008)-586/2023

Azərbaycan Respublikası adından QƏRAR Bakı şəhəri İş № 3(008)-586/2023 06.02.2023 BAKI ŞƏHƏRİ SABUNÇU RAYON MƏHKƏMƏSİ X5 İmanovanın sədrliyi, Səbinə Pərvin qızı Səfərlinin katibliyi, şikayətçi X1 iştirakı ilə, X1 Bakı şəhəri DYPİ tərəfindən qəbul edilmiş 14 dekabr 2022-ci il tarixli, TP ******* nömrəli inzibati tənbeh vermə haqqında qərarın ləğv edilməsinə dair şikayətinə açıq məhkəmə iclasında baxaraq, MÜƏYYƏN ETDİ : X2 şikayət ərizəsi ilə məhkəməyə müraciət edərək Bakı şəhəri DYPİ tərəfindən qəbul edilmiş 14 dekabr 2022-ci il tarixli, TP ******* nömrəli inzibati tənbeh vermə haqqında qərarın ləğv edilməsini xahiş etmişdir. Məhkəmə iclasında X2 şikayətini müdafiə edərək göstərmişdir ki, inzibati tənbeh vermə haqqında qərara əsasən guya o, “Mercedes Benz C200” minik markalı, **-VG-*** dövlət qeydiyyat nişanlı nəqliyyat vasitəsini idarə edərkən 1.1, 1.3, 1.11 üfüqi nişanlanma xətlərinin tələb etməyərək sola və geriyə dönmə qaydalarını pozmuşdur. Halbuki, həmin ərazidə qadağanedici nişan olmamış, yerdə çəkilmiş üfüqi nişanlanma xəttinin isə rəngi görünməyəcək dərəcədə solğun olmuşdur. Həmçinin, o, bu məsələ ilə polis idarəsində olarkən onun iştirakı ilə kamera görüntülərinə baxış keçirilərkən polis idarəsinin inzibati tənbeh vermə haqqında qərar qəbul edərkən pozuntunu törədən avtomobil kimi tamamilə başqa avtomobili göstərdiklərini və o, həmin avtomobilin ona məxsus olmadığını, başqa şəxs tərəfindən idarə olunduğunu bildirmişdir. Məhkəmə tərəfindən daha öncə səlahiyyətli orqanın inzibati tənbeh vermə haqqında qərarının ləğv edilməsinə baxmayaraq səlahiyyətli orqan heç bir araşdırma aparılmadan yenidən eyni məzmunlu qərar qəbul etmişdir.Göstərilənlərə əsasən əməlində inzibati xəta tərkibi olmadığından Bakı şəhəri DYPİ tərəfindən qəbul edilmiş 14 dekabr 2022-ci il tarixli, TP ******* nömrəli inzibati tənbeh vermə haqqında qərarın ləğv edilməsini məhkəmədən xahiş etmişdir. Məhkəmə iclasının vaxtı və yeri barədə lazımi qaydada məlumat verilməsinə baxmayaraq səlahiyyətli orqanın nümayəndəsi məhkəmə iclasına gəlməmişdir. Məhkəmə səlahiyyətli orqanın nümayəndəsinin iştirakı olmadan məhkəmə iclasının keçirilməsini mümkün hesab etmişdir. Məhkəmə şikayət ərizəsini və iş materiallarını araşdıraraq hesab edir ki, şikayət təmin edilməli, Bakı şəhəri DYPİ tərəfindən qəbul edilmiş 14 dekabr 2022-ci il tarixli, TP ******* nömrəli inzibati tənbeh vermə haqqında qərar ləğv edilməli, inzibati material yenidən baxılması üçün Bakı şəhər X7 İdarəsinə qaytarılmalıdır. İş materiallarında olan və məhkəmə baxışında tədqiq edilmiş: Bakı şəhəri Sabunçu Rayon Məhkəməsinin 22 sentyabr 2022-ci il tarixli, 3(008)- 5096/2022 saylı qərarından görünür ki, X1 AR İXM-nin 327.2-ci maddəsi ilə inzibati xəta törətməsinə dair Bakı şəhər X7 İdarəsi tərəfindən qəbul edilmiş 24 avqust 2022-ci il tarixli, TP ******* nömrəli inzibati tənbeh vermə haqqında qərar hər hansı sübuta istinad edilmədən qəbul edildiyindən ləğv edilmiş və iş yenidən baxılması üçün Bakı şəhər X7 İdarəsinə qaytarılmışdır. Bakı şəhəri DYPİ-nin polis mayoru X3 tərəfindən tərtib edilmiş qəbul edilmiş inzibati tənbeh vermə haqqında 14 dekabr 2022-ci il tarixli, TP ******* nömrəli qərarından görünür ki, X2 09 avqust 2022-ci il tarixdə, saat 11:50-də Bakı şəhəri, Sülh (Bakıxanov) küçəsində “Mercedes Benz C200” minik markalı, **-VG-*** dövlət qeydiyyat nişanlı nəqliyyat vasitəsini idarə edərkən 1.1, 1.3 və 1.11 üfüqi nişanlama xətlərinin tələblərinə riayət etməyərək sola və ya geriyə dönmə qaydalarınını pozmuş, bu səbəbdən İXM-nin 327.2-ci maddəsində nəzərdə tutulmuş xətanı törətməkdə təqsirli bilinərək 60 manat məbləğində inzibati cərimə edilməsi qərara alınmışdır. Azərbaycan Respublikasının Daxili İşlər Nazirliyi Bakı şəhər Baş Polis İdarəsi X9 İdarəsindən daxil olmuş 13 dekabr 2022-ci il tarixli məktuba əsasən, inzibati xəta haqqında işə X1 iştirakı ilə yenidən baxılması üçün vətəndaşın yaşadığı ünvana bildiriş göndərilmiş, lakin vətəndaş əlavə araşdırma müddətində DYPİ-ə gəlmədiyindən və işə baxılmanın təxirə salınması barədə hər hansı vəsatət daxil olmadığından İXM-nin 61.3-cü maddəsinə əsasən iş üzrə qərar qəbul olunmuş və həmin qərar vətəndaşın ünvanına göndərilmişdir. Azərbaycan Respublikası İnzibati Xətalar Məcəlləsinin: 8.2-ci maddəsinə əsasən inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir; 8.3-cü maddəsinə əsasən isə inzibati məsuliyyətə cəlb olunan şəxsin təqsirli olması barəsində olan şübhələr onun xeyrinə həll olunur; 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati tənbeh vermə haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati tənbeh vermə haqqında protokolla, bu Məcəllə ilə müəyyən edilmiş digər protokollarla müəyyən edilir; 81.2-ci maddəsinə əsasən yol hərəkəti qaydaları və yol hərəkəti təhlükəsizliyinin təmin edilməsi qaydaları əleyhinə olan inzibati xətaların aşkarlanmasında istifadə olunan, foto və ya video qeydiyyat funksiyalarına malik xüsusi texniki vasitələr müvafiq icra hakimiyyəti orqanının mərkəzi informasiya sisteminə inteqrasiya olunmalıdır; 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir; 327.2-ci maddəsinə əsasən svetoforun və ya nizamlayıcının qadağanedici işarəsi verilərkən hərəkətin davam etdirilməsinə, 3.1 “Giriş qadağandır” yol nişanının tələblərinin və ya sərnişin daşıma, əks istiqamətli hərəkət zolağına çıxmaqla ötmə və ya manevr etmə, yolayrıcını keçmə qaydalarının pozulmasına, ümumi istifadədə olan nəqliyyat vasitələrinin, yaxud adamlar daşınan yük avtomobillərinin sərnişinlərlə yanacaqdoldurma məntəqəsinə daxil olmasına, 1.1, 1.3 və 1.11 üfüqi nişanlanma xətlərinin tələblərinə riayət etməyərək sola və ya geriyə dönməyə, yaxud maneəni kənardan keçməyə görə - altmış manat məbləğində cərimə edilir. Yuxarıda sadalanan normalarının tələblərindən görünür ki, şəxsin inzibati məsuliyyətə cəlb edilməsi üçün sübutların məcmusu tələb olunur və heç bir sübutun, o cümlədən sübutlardan biri olan inzibati tənbeh vermə haqqında protokolun və qərarın qabaqcadan müəyyən edilmiş qüvvəsi yoxdur. Məhkəmə iclasında X2 1.1, 1.3 və 1.11 üfüqi nişanlanma xətlərinin tələblərini pozmadığını bildirmişdir. İnzibati məsuliyyətə cəlb olunmuş şəxs öz təqsirsizliyini sübut etməyə borclu olmadığından, onun təqsirli olması barəsində olan şübhələr onun xeyrinə həll olunduğundan, inzibati orqan xətanı təsdiq edən sübutları məhkəməyə təqdim etmədiyindən, 14 dekabr 2022-ci il tarixli, TP ******* nömrəli qərarda inzibati xətanın törədilməsini təsdiq edən hər hansı bir sübuta istinad edilmədiyindən, beləliklə qərar araşdırma aparılmadan, sübutlara qiymət verilmədən qəbul edildiyindən şikayət əsaslıdır. İş materiallarından görünür ki, X1 AR İXM-nin 327.2-ci maddəsi ilə inzibati xəta törətməsinə dair Bakı şəhər X7 İdarəsi tərəfindən qəbul edilmiş 24 avqust 2022-ci il tarixli, TP ******* nömrəli inzibati tənbeh vermə haqqında qərar məkəmə tərəfindən məhz qərarın qəbul edilməsi zamanı hər hansı sübuta istinad edilmədiyindən ləğv edilmiş, lakin səlahiyətli orqan məhkəmənin qərarında göstərdiyi xüsusatlara məhəl qoymadan yenidən heç bir sübuta əsaslanmadan sadəcə tarix və nömrəsi dəyişdirilməklə eyni məzmunlu qərar qəbul etmişdir. Bununla yanaşı, məhkəmənin diqqətini çəkən bir məqam da iş materiallarına əlavə edilmiş səlahiyyətli orqan tərəfindən vətəndaşa təqdim edilmiş məktubla inzibati tənbeh vermə haqqında qərarın qəbul edilməsi tarixləri arasındakı uyğunsuzluq olmuşdur. Belə ki, iş materiallarından görünür ki, inzibati tənbeh vermə haqqında qərar 14 dekabr 2022-ci il tarixdə qəbul edilmiş, lakin vətəndaşa onun iştirakı olmadan inzibati tənbeh vermə haqqında qərarın qəbul edilərək artıq onun ünvanına göndərilməsinə dair məktub 13 dekabr 2022-ci il tarixdə təqdim edilmişdir ki, bu da səlahiyyətli orqanın məhkəmə qərarında göstərilmiş qaydada işin tam və hərtərəfli araşdırılmasında maraqlı olmadığına, vətəndaşın iştirakını təmin etmək imkanları olduğu halda hələ qərar qəbul edilmədən vətəndaşa artıq iş üzrə qərarın qəbul edilməsini bildirməklə araşdırmada onun iştirakın təmin edilməsinə dair qanunvericiliyin tələblərinin pozulmasına dəlalət edir. Belə olan halda məhkəmə hesab edir ki, X2 barəsində olan 14 dekabr 2022-ci il tarixli, TP ******* nömrəli qərar heç bir sübuta istinad edilmədən qəbul edilmiş, həmçinin X1 həmin qərarla İnzibati Xətalar Məcəlləsinin 327.2-ci maddəsində nəzərdə tutulan inzibati xətanı törətməsi aydınlaşdırılmamış, onun müraciətlərinə düzgün məlumat daşımayan məktubla cavab verilmiş, qərar qəbul edilərkən səlahiyyətli orqanın (vəzifəli şəxsin) gəldiyi nəticələr üzrə mühüm əhəmiyyət kəsb edən bütün faktiki hallar araşdırılmamış və inzibati tənbeh vermə haqqında qanunvericiliyin tələbləri inzibati tənbeh vermə haqqında işin hallarının hərtərəfli, tam və obyektiv araşdırılmasına maneə törədəcək dərəcədə pozulmuşdur. Məhkəmə hesab edir ki, videogörüntüyə baxış keçirilməli, şikayətçinin iştirakı təmin edilməklə göstərdiyi dəlillər ətraflı yoxlanılmalı, həmin dəlillərin əsaslı və əsassız olmasına qiymət verilməlidir. Azərbaycan Respublikası İnzibati Xətalar Məcəlləsinin: 134.1.4-cü maddəsinə əsasən İnzibati xəta haqqında iş üzrə qərardan verilən şikayətə və ya protestə baxılarkən bu Məcəllənin 135.1.1 və 135.1.6-cı maddələri ilə müəyyən edilmiş hallarda qərarın ləğv edilməsi və inzibati tənbeh vermə haqqında işin yenidən baxılmaq üçün hakimə, səlahiyyətli orqana (vəzifəli şəxsə) göndərilməsi haqqında qərar qəbul edilir; 135.1.6-cı maddəsinə əsasən bu Məcəllə ilə müəyyən edilmiş tələblərin işin hallarının hərtərəfli, tam və obyektiv araşdırılmasına maneə törədəcək dərəcədə pozulması qərarın ləğv edilməsi və inzibati tənbeh vermə haqqında işin yenidən baxılmaq üçün hakimə, səlahiyyətli orqana (vəzifəli şəxsə) göndərilməsi haqqında qərar qəbul edilir. Beləliklə, məhkəmə hesab edir ki, X1 şikayəti təmin edilməli, Bakı şəhər X7 İdarəsi tərəfindən qəbul edilmiş 14 dekabr 2022-ci il tarixli, TP ******* nömrəli inzibati tənbeh vermə haqqında qərar ləğv edilməli və iş yenidən baxılması üçün Bakı şəhər X7 İdarəsinə qaytarılmalıdır. Yuxarıdakılara əsasən və Azərbaycan Respublikası İnzibati Xətalar Məcəlləsinin 128-136-cı maddələrini rəhbər tutub, məhkəmə QƏRARAALDİ: X1 şikayəti təmin edilsin. X2 barəsində Azərbaycan Respublikası İnzibati Xətalar Məcəlləsinin 327.2-ci maddəsi ilə inzibati tənbeh tədbirinin tətbiq edilməsinə dair Bakı şəhər X7 İdarəsi tərəfindən qəbul edilmiş 14 dekabr 2022-ci il tarixli, TP ******* nömrəli inzibati tənbeh vermə haqqında qərar ləğv edilsin və iş yenidən baxılması üçün Bakı şəhər X7 İdarəsinə qaytarılsın. Qərardan rəsmi qaydada verildiyi vaxtdan 10 (on) gün müddətində Bakı şəhəri Sabunçu Rayon Məhkəməsi vasitəsi ilə şikayət verilə bilər. Hakim Nigar İmanova