Bakı Şəhəri Sabunçu Rayon Məhkəməsi Qərar — İş №3(008)-5902/2025

Azərbaycan Respublikası adından QƏRAR Bakı şəhəri İş № 3(008)-5902/2025 07.10.2025 BAKI ŞƏHƏRİ SABUNÇU RAYON MƏHKƏMƏSİ Hakim Məmmədli Samirə Məhəmməd qızının sədrliyi, Axund-zadə Ayşən Elimxan qızının katibliyi, inzibati xəta haqqında protokolu tərtib edən Bakı şəhəri Sabunçu Rayon İcra Şöbəsinin icra məmuru X2, barəsində inzibati xəta haqqında iş üzrə icraat aparılan şəxs Şəxs iştirakları ilə, xx.xx.1995-ci il tarixdə Bakı şəhərində anadan olmuş, Azərbaycan Respublikasının vətəndaşı, subay, orta təhsilli, işləməyən, ünvan 1 ünvanında qeydiyyatda olan. Şəxs Azərbaycan Respublikası İnzibati Xətalar Məcəlləsinin 528.1-ci maddəsi ilə nəzərdə tutulan inzibati xətanın törədilməsi barədə Bakı şəhəri Sabunçu rayon İcra şöbəsindən daxil olmuş inzibati xəta haqqında materiala açıq məhkəmə iclasında baxaraq, Məhkəmə MÜƏYYƏN ETDİ: Bakı şəhəri Sabunçu Rayon İcra Şöbəsindən daxil olmuş 07 oktyabr 2025-ci il tarixli, MN ******* nömrəli inzibati xəta haqqında protokolda göstərilmişdir ki, 1 saylı Bakı “ASAN xidmət” mərkəzində Notariat kontorunun 8İ-51788 nömrəli, xx.xx.2024-cü il tarixli icra qeydinə əsasən Şəxs 3000 manat məbləğində pul vəsaiti və 25 manat məbləğində dövlət rüsumu tutularaq X1 ödənilməlidir. Həmin icra vərəqəsi üzrə borclunun protokol tərtib olunan tarixə 1770 manat borcu vardır. Bununla da o, AR İnzibati Xətalar Məcəlləsinin 528.1-ci maddəsində nəzərdə tutulmuş inzibati xətanı törətmişdir. Məhkəmə iclasında Bakı şəhəri Sabunçu rayon İcra şöbəsinin icra məmuru X3 inzibati xəta haqqında protokolun dəlillərinə uyğun izahat verərək əlavə olaraq bildirmişdir ki, borclunun işləməsini bildikdən sonra icra sənədinin icrası onun əmək haqqına yönəldilmişdir. 3 ay üzrə onun əmək haqqından tutulma həyata keçirilə bilmişdir. Çünki sonradan borclu işdən çıxmışdır. Tərəfimizdən rəsmi qaydada tutulma aparılana qədər baxmayaraq ki, borclu işləmişdir, lakin heç bir ödəiş etməmişdir. Bir dəfə avqust ayında barəsində protokol tərtib edilən zaman 500 manat ödəniş etmişdir. Sonrakı aylar üzrə 500 manat ödəniş olunacağını bildirmiş və borclu bununla razılaşmışdır. Ona görə protokolla məhkəməyə müraciət olunmamışdır.Lakin bundan sonra borclu ödəniş etməmiş və tələbkar da pulunun ödənilməsini tələb etdiyindən tərəfimizdən protokol tərtib olunaraq məhkəməyə təqdim olunmuşdur. Məhkəmədən Şəxs barəsində qanunauyğun tədbir görülməsini xahiş etmişdir. Məhkəmə iclasında barəsində inzibati xəta haqqında iş üzrə icraat aparılan şəxs Şəxs izahat verərək bildirmişdir ki, o, icra qeydi üzrə 1230 manat məbləğində pul ödəmişdir. Borcun 500 manat hissəsini isə dayısı oğlu ödəmişdir. Qalan ödəniş isə işləyən zaman əmək haqqından tutulmuşdur. Hazırda işsizdi, qalan borcu birdəfəlik tam şəkildə ödəməyə maddi imkanı çatmır. Qalan borcunu işə girənə kimi ayda 100 manat olaraq hissə-hissə ödəyə bilər. O, işə girmək üçün müraciətlər etmişdir, lakin hələki heç bir məlumat yoxdur. İşləyəndə icra qeydi üzrə qalan borcunun əmək haqqından tutulmasına etirazı yoxdur. Məhkəmədən qeyd edilənlərin nəzərə alınmasını xahiş etmişdir. İş materiallarında olan və məhkəmə baxışında tədqiq edilmiş: 1 saylı Bakı “ASAN xidmət” mərkəzində Notariat ofisinin 8İ-51788 nömrəli, xx.xx.2024-cü il tarixli icra qeydindən görünür ki, Şəxs 3000 manat məbləğində pul vəsaiti və 25 manat məbləğində dövlət rüsumunun tutularaq X1 ödənilməsi qeyd edilmişdir. İcraata başlamaq haqqında xx.xx.2024-cü il tarixli qərarın surətindən görünür ki, 1 saylı Bakı “ASAN xidmət” mərkəzində Notariat ofisinin 8İ-51788 nömrəli, xx.xx.2024-cü il tarixli icra qeydinə əsasən icra sənədi üzrə icraat başlanılmış və icraata başlanması haqqında qərar icra olunması üçün müvafiq bildirişlə borclu Şəxs göndərilmişdir. Borclunun axtarışı haqqında xx.xx.2024-cü il tarixli qərardan görünür ki, ünvan 1 ünvanında qeydiyyatda olan Şəxs barəsində axtarış elan olunmuşdur. Azərbaycan Respublikası İXM-in 528.1-ci maddəsinə əsasən icra sənədindəki tələbin üzrsüz səbəbdən icra məmuru tərəfindən müəyyən olunmuş müddətdə icra edilməməsi və ya icra məmurunun məhkəmə və ya başqa dövlət orqanlarının qərarlarının icrası ilə əlaqədar digər qanuni tələblərinin yerinə yetirilməməsi inzibati xəta kimi müəyyən edilmişdir. Həmin xətaya görə inzibati cərimə və ya inzibati həbs nəzərdə tutulmuşdur. Şəxs həmin inzibati xətanı törətməsi barəsində tərtib olunmuş yuxarıda qeyd edilən inzibati xəta haqqında protokol, icra vərəqəsi, bildiriş və işdə olan digər sənədlər ilə tam sübuta yetirilir. İnzibati məsuliyyəti istisna edən və icraatı rədd edən hallar yoxdur. Azərbaycan Respublikası İXM-in 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyətini xarakterizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Məhkəmə, iş üzrə sübutları qiymətləndirərək, törədilmiş inzibati xətanın xarakterini, barəsində inzibati xəta haqqında iş üzrə icraat aparılan şəxsin şəxsiyyətini, icra sənədi üzrə ödənilməyən məbləğin az olmasını, məsuliyyəti ağırlaşdıran halların olmamasını nəzərə alaraq hesab edir ki, Şəxs Azərbaycan Respublikası İnzibati Xətalar Məcəlləsinin 528.1-ci maddəsi ilə təqsirli bilinərək ona həmin maddənin sanksiyasının hədləri daxilində inzibati cərimə növündə inzibati tənbeh tətbiq edilməlidir. Həmçinin məhkəmə inzibati xəta törətmiş şəxsin nəzərinə çatdırır ki, İXM-nin 31.5-ci maddəsinə əsasən inzibati tənbehin tətbiq edilməsi həmin inzibati tənbehə səbəb olmuş öhdəliklərin yerinə yetirilməsindən onu azad etmir. Yuxarıda göstərilənlərə və Azərbaycan Respublikası İnzibati Xətalar Məcəlləsinin 40, 43, 114, 128-130-cu maddələrini rəhbər tutaraq, QƏRARA ALDİ: Şəxs Azərbaycan Respublikası İnzibati Xətalar Məcəlləsinin 528.1-ci maddəsində nəzərdə tutulmuş inzibati xətanı törətməkdə təqsirli bilinsin və barəsində 500 (beş yüz) manat məbləğində inzibati cərimə növündə inzibati tənbeh tədbiri tətbiq edilsin. Qərarın surəti təqdim edildiyi və ya alındığı gündən 10 (on) gün müddətində Bakı şəhəri Sabunçu Rayon Məhkəməsi vasitəsilə və ya birbaşa Bakı Apellyasiya Məhkəməsinə şikayət verilə bilər. Sədrlik edən: Samirə Məmmədli