Bakı Şəhəri Səbail Rayon Məhkəməsi Qərardad — İş №3(009)-2008/2024

Azərbaycan Respublikası adından QƏRARDAD Bakı şəhəri İş № 3(009)-2008/2024 04.09.2024 BAKI ŞƏHƏRİ SƏBAİL RAYON MƏHKƏMƏSİ Bakı şəhəri Səbail Rayon Məhkəməsinin hakimi Tağıyev Azər Ramiz oğlu, Şəxs Azərbaycan Respublikası İnzibati Xətalar Məcəlləsinin 511.1.3-cü maddəsi ilə nəzərdə tutulmuş inzibati xətanı törətməsinə dair Səbail Rayon Polis İdarəsi tərəfindən tərtib edilmiş protokola və ona əlavə edilmiş materiala açıq məhkəmə iclasında baxaraq, M Ü Ə Y Y Ə N E T D İ : Şəxs tərəfindən Azərbaycan Respublikası İnzibati Xətalar Məcəlləsinin 511.1.3-cü maddəsində nəzərdə tutulmuş inzibati xətanın törədilməsi barədə Səbail Rayon Polis İdarəsindən 19 avqust 2024-ci il tarixdə tərtib edilmiş İXP seriyalı, ******* saylı və 03 sentyabr 2024-ci il tarixdə tərtib edilmiş MN seriyalı, ******* saylı inzibati xəta haqqında protokollar baxılması üçün məhkəməyə göndərilmişdir. Göstərilənləri nəzərə alaraq məhkəmə hesab edir ki, həmin inzibati xətalara dair işlər bir icraatda birləşdirilməlidir. Buna görə də 3(009)– 2008/2024 saylı inzibati xətalara dair iş bir icraatda birləşdirilməli olduğundan, 3(009)– 2008/2024 nömrəli iş 3(009)–2007/2024 nömrə altında, inzibati xəta haqqında iş üzrə icraatda birləşdirilməli və həmin nömrə altında baxılmalıdır. 3(009)–2008/2024 saylı inzibati xəta haqqında işin materialları başqa işlə birləşdiyindən həmin iş üzrə icraata xitam verilməlidir. Azərbaycan Respublikası İnzibati Xətalar Məcəlləsinin 34.2-ci maddəsinə əsasən şəxsin eyni və ya müxtəlif vaxtlarda törətdiyi bir neçə inzibati xətaya dair işlərə baxılması eyni orqanın səlahiyyətinə aiddirsə, həmin işlərə eyni vaxtda baxılmalıdır. Azərbaycan Respublikası İnzibati Xətalar Məcəlləsinin 34.3-cü maddəsinə əsasən şəxsin eyni vaxtda öz hərəkətləri (hərəkətsizliyi) ilə törətdiyi bir neçə inzibati xətaya dair işlərə baxılması eyni orqanın səlahiyyətinə aiddirsə, həmin şəxs daha ciddi xətaya görə müəyyən edilmiş sanksiya çərçivəsində tənbeh edilir. Bu halda törədilmiş xətalardan hər hansı birinə görə nəzərdə tutulmuş əlavə tənbehlərdən biri əsas tənbehə əlavə edilə bilər. Azərbaycan Respublikası İnzibati Xətalar Məcəlləsinin 111.3-cü maddəsinə görə inzibati həbs tənbeh növü nəzərdə tutan inzibati xətalar haqqında işlərə inzibati xəta haqqında protokola daxil olduğu gün baxılır. Şərh olunanlara əsasən və Azərbaycan Respublikasının İnzibati Xətalar Məcəlləsinin 34-cü maddəsinə əsasən, Q Ə R A R A A L D İ : Bakı şəhəri Səbail Rayon Məhkəməsinə daxil olmuş 3(009)–2008/2024 saylı inzibati xətalara dair iş bir icraatda birləşdirilsin. Həmin işə 3(009)–2007/2024 saylı inzibati xəta haqqında iş üzrə icraatda baxılsın və 3(009)–2008/2024 saylı inzibati xəta haqqında iş icraata xitam verilsin. HAKİM: AZƏR TAĞİYEV