Bakı Şəhəri Səbail Rayon Məhkəməsi Qərar — İş №3(009)-2198/2021

Azərbaycan Respublikası adından QƏRAR Bakı şəhəri İş № 3(009)-2198/2021 16.11.2021 BAKI ŞƏHƏRİ SƏBAİL RAYON MƏHKƏMƏSİ Bakı şəhəri Səbail Rayon Məhkəməsinin hakimi Qafarova Rəna Nazim qızının sədirliyi, Paşazadə Pərvin Kamandar oğlunun katibliyi, Bakı şəhəri Səbail RPİ-nin 9-cu polis bölməsinin sahə inspektoru, polis mayoru X1, Zərərçəkmiş şəxs X2, barəsində inzibati xəta haqqında icraat aparılan şəxs Şəxs iştirakları ilə, xx.xx.1999-cu il tarixdə Ağdam rayonu, Güllücə kəndində anadan olmuş, Azərbaycan Respublikasının vətəndaşı, subay, Ağdam rayonu, Güllücə kəndində qeydiyyatda olan Şəxs Azərbaycan Respublikası İnzibati Xətalar Məcəlləsinin 227-ci maddəsi ilə inzibati məsuliyyətə cəlb edilməsinə dair materiala baxaraq, məhkəmə, M Ü Ə Y Y Ə N E T D İ : Azərbaycan Respublikası Daxili İşlər Nazirliyi Səbail Rayon Polis İdarəsindən Bakı şəhəri Səbail Rayon Məhkəməsinə Şəxs Azərbaycan Respublikası İnzibati Xətalar Məcəlləsinin 227-ci maddəsi ilə inzibati məsuliyyətə cəlb edilməsinə dair material daxil olmuşdur. İş materiallarında olan 16 noyabr 2021-ci il tarixdə tərtib edilmiş MN seriyalı, ******* saylı inzibati xəta haqqında protokoldan görünür ki, Şəxs 31.10.2021-ci il tarixdə Bakı şəhəri, Səbail rayonu, Rəsulzadə küçəsində X3 məxsus “İphone XR” markalı mobil telefonu oğurlayaraq Azərbaycan Respublikası İnzibati Xətalar Məcəlləsinin 227-ci maddəsində nəzərdə tutulmuş inzibati xətanı törətmişdir. İş materiallarında olan Səbail RPİ-nin 9-cu PB-nin təhqiqatçısı, polis kapitanı E.Məmmədov tərəfindən qəbul edilmiş 16 noyabr 2021-ci il tarixli qərarla fakt üzrə cinayət işinin başlanması rədd edilmişdir. Həmin qərarın təsviri hissəsində göstərilmişdir ki, Şəxs 31.10.2021-ci il tarixdə saat təxminən 01 radələrində Bakı şəhəri, Səbail rayonu, Fəvvarələr meydanında yerləşən "xxxx" ASC ilə üzbəüz istiqamətdə yerləşən oturacaqdan “İphone XR” markalı mobil telefonu oğurlamışdır. İş materiallarında olan BB seriyalı, 005449 nömrəli, 15.11.2021-ci il tarixli inzibati qaydada tutma haqqında protokoldan görünür ki, Şəxs 15 noyabr 2021-ci il tarixdə, saat 02:35-də inzibati qaydada tutulmuşdur. Məhkəmə iclasında iştirak edən Bakı şəhəri Səbail RPİ-nin 9-cu polis bölməsinin sahə inspektoru, polis mayoru X4 inzibati xəta haqqında protokolda göstərilənləri təsdiqləyərək, Şəxs Azərbaycan Respublikası İnzibati Xətalar Məcəlləsinin 227-ci maddəsinə uyğun olaraq inzibati məsuliyyətə cəlb edilməsini məhkəmədən xahiş etmişdir. Məhkəmə iclasında iştirak edən zərərçəkmiş şəxs X5 izahatında bildirmişdir ki, 31.10.2021-ci il tarixində təxminən saat 01 radələrində tanışı Əlirza Qədirov ilə birlikdə Bakı şəhəri, Səbail rayonu, Fəvvarələr meydanında yerləşən "xxxx" ASC ilə üzbəüz istiqamətdə yerləşən oturacaqda əyləşmişlər və həmin vaxt o, özünə məxsus “İphone XR” markalı mobil telefonu oturacağın üzərində unutmuş, geri qayıdan zaman isə özünə məxsus mobil telefonun oğurlanmasını aşkar etmişdir. Daha sonra o, ərazi üzrə polis bölməsində ərizə yazaraq hadisə barədə məlumat vermiş və bir müddət sonra bölmədən ona telefonun Şəxs tərəfindən oğurlandığı bildirilmişdir. Hazırda nə ona məxsus mobil telefon qaytarılmış, nə də dəymiş ziyan ödənilmişdir. Göstərilənləri nəzərə alaraq Şəxs barəsində qanuni tədbir görülməsini xahiş etmişdir. Məhkəmə iclasında iştirak edən barəsində inzibati xəta haqqında icraat aparılan şəxs Şəxs izahatında bildirmişdir ki, 31.10.2021-ci il tarixdə saat 01 radələrində Bakı şəhəri, Səbail rayonu, Fəvvarələr meydanında “Bizon” energetik qutularını tullantı yerlərindən yığan zaman "xxxx" ASC ilə üzbəüz istiqamətdə yerləşən oturacağın üzərindən “İphone XR” markalı mobil telefon aşkarlamış, ətrafa nəzər yetirərək heç kimin olmadığını gördükdən sonra həmin mobil telefonu götürmüş və 03.11.2021-ci il tarixində Bakı şəhəri, Nizami rayonu ərazisində yelrəşən “Vosmoy bazarı” deyilən yerdə tanımadığı şəxsə 100 manata satmışdır. Məhkəmə proses iştirakçılarının izahatlarını dinləyib, toplanmış sübutlara məcmu halda hüquqi qiymət verərək hesab edir ki, Şəxs barəsində Azərbaycan Respublikasının İXM-nin 227-ci maddəsi ilə nəzərdə tutulan inzibati xəta hadisəsi olmadığından iş üzrə icraata xitam verilməlidir. Belə ki, iş materiallarında olan videogörüntüyə məhkəmə iclasında baxış keçirilərkən müəyyən edilmişdir ki, 31.10.2021-ci il tarixdə, saat 01 radələrində Bakı şəhəri, Səbail rayonu, Fəvvarələr meydanında bir nəfər şəxs əlində torba ilə keçən zaman oturacağa yaxınlaşaraq üzərində mobil telefon olduğunu görərək həmin mobil telefonu götürmüş, həmçinin həmin vaxt ətrafda heç kimin olmadığı da müəyyən olunmuşdur. Məhkəmə qeyd edir ki, Azərbaycan Respublikasının İnzibati Xətalar Məcəlləsinin 227ci maddəsinə əsasən, xırda talama, yəni oğurlama, mənimsəmə, israfçılıq, qulluq mövqeyindən sui-istifadə və ya dələduzluq yolu ilə özgəsinin əmlakını talamağa görə - yüz altmış saatdan iki yüz qırx saatadək ictimai işlər və ya işin hallarına görə, xətanı törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda isə üç ayadək müddətə inzibati həbs tətbiq edilir. Məhkəmə qeyd edir ki, talama dedikdə özgə əmlakının tamah məqsədilə, hüquqazidd, əvəzsiz götürülməsi və bu əmlakın təqsirkarın və ya başqa şəxsin xeyrinə yönəldilməsindən ibarət hərəkətlər başa düşülür. İXM-nin 227-ci maddəsinin dispozisiyasından görünür ki, məhz xırda talama, yəni oğurlama, mənimsəmə, israfçılıq, qulluq mövqeyindən sui-istifadə və ya dələduzluq yolu ilə özgənin əmlakını talamağa görə məsuliyyət müəyyən edilmişdir. Hazırki işin faktiki hallarından isə müəyyən edilir ki, İXM-nin 227-ci maddəsində nəzərdə tutulmuş inzibati xəta hadisəsi baş verməmişdir. Belə ki, işin hallardan müəyyən edilir ki, Şəxs 31.10.2021-ci il tarixdə saat 01 radələrində Bakı şəhəri, Səbail rayonu, Fəvvarələr meydanında “Bizon” energetik qutularını tullantı yerlərindən yığan zaman "xxxx" ASC ilə üzbəüz istiqamətdə yerləşən oturacağın yanından keçərkən oturacağın üzərində “İphone XR” markalı mobil telefon aşkarlamış və götürmüşdür. Məhkəmə hesab edir ki, X2 öz izahatında da qeyd etdiyi kimi 31.10.2021-ci il tarixində təxminən saat 01 radələrində Bakı şəhəri, Səbail rayonu, Fəvvarələr meydanında yerləşən "xxxx" ASC ilə üzbəüz istiqamətdə yerləşən oturacaqda əyləşib, sonradan oradan çıxıb gedərkən oturacağın üzərində unutduğu özünə məxsus “İphone XR” markalı mobil telefonun Şəxs tərəfindən 31.10.2021-ci il tarixdə saat 01 radələrində Bakı şəhəri, Səbail rayonu, Fəvvarələr meydanında “Bizon” energetik qutularını tullantı yerlərindən yığan zaman "xxxx" ASC ilə üzbəüz istiqamətdə yerləşən oturacağın üzərində aşkarlanaraq götürülməsi xırda talama, yəni oğurluq kimi qiymətləndirilə bilməz. Odur ki, məhkəmə hesab edir ki, Şəxs barəsində olan hazırki material üzrə İXM-nin 227-ci maddəsində nəzərdə tutulan inzibati xəta hadisəsi olmadığından iş üzrə icraata xitam verilməlidir. Məhkəmə qeyd edir ki, Azərbaycan Respublikasının İXM-nin 3-cü maddəsinə əsasən, yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 8.1-ci maddəsinə əsasən, barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. Həmin Məcəllənin 8.2-ci maddəsinə əsasən, inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. Həmin Məcəllənin 8.3-cü maddəsinə əsasən, inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. Azərbaycan Respublikasının İXM-nin 53.1.1-ci maddəsinə əsasən, inzibati xəta hadisəsi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Həmin Məcəllənin 105.1-ci maddəsinə əsasən, bu Məcəllənin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. Həmin Məcəllənin 109.2-ci maddəsinə əsasən, bu Məcəllənin 53 və 104.1-ci maddələrində nəzərdə tutulmuş hallar olduqda inzibati xəta haqqında iş üzrə icraata xitam verilməsi və ya inzibati xəta haqqında iş üzrə icraatın dayandırılması barədə qərar qəbul edilir. Beləliklə, məhkəmə işin faktiki hallarını və qanunvericiliyin yuxarıda qeyd edilən müddəalarının tələblərini nəzərə alaraq hesab edir ki, hazırki inzibati iş üzrə inzibati xəta hadisəsi olmadığından, Şəxs barəsində Azərbaycan Respublikasının İXM-nin 227-ci maddəsi ilə nəzərdə tutulan inzibati xətanı törətməsinə dair iş üzrə icraata xitam verilməlidir. İş materialları ilə müəyyən edilir ki, Şəxs 15 noyabr 2021-ci il tarixdə, saat 02:35-də inzibati qaydada tutulmuşdur. Məhkəmə hesab edir ki, inzibati qaydada tutulmuş Şəxs barəsində olan material üzrə icraata xitam verilməsi nəticəsinə gəlindiyindən o, məhkəmə iclas zalından dərhal azad edilməlidir. Yuxarıda göstərilənlərə əsasən və Azərbaycan Respublikasının İnzibati Xətalar Məcəlləsinin 39, 40, 43, 48-51, 53, 114-117, 128-130 və 227-ci maddələrini rəhbər tutaraq, məhkəmə Q Ə R A R A A L D İ : Şəxs Azərbaycan Respublikası İnzibati Xətalar Məcəlləsinin 227-ci maddəsi ilə nəzərdə tutulmuş inzibati xətanı törətməsinə dair iş üzrə icraata xitam verilsin. Şəxs məhkəmə iclas zalından dərhal azad edilsin. Qərarın surəti rəsmi qaydada təqdim olunduğu gündən 10 (on) gün müddətində Bakı şəhəri Səbail Rayon Məhkəməsi vasitəsilə və ya bilavasitə Bakı Apllyasiya Məhkəməsinə apellyasiya şikayəti verilə bilər. Sədrlik edən: Rəna Qafarova