Bakı Şəhəri Səbail Rayon Məhkəməsi Qərar — İş №3(009)-362/2022

Azərbaycan Respublikası adından QƏRAR Bakı şəhəri İş № 3(009)-362/2022 09.02.2022 BAKI ŞƏHƏRİ SƏBAİL RAYON MƏHKƏMƏSİ Hakim Abdullayev Şahin Zülfüqar oğlunun sədrliyi Məmmədova Narqələm Bayram qızının katibliyi ilə xx.xx.1985-ci ildə Balakən rayonu, Hənifə kəndində anadan olmuş, azərbaycanlı, subay, Balakən rayonu Heydər Əliyev prospekti, ev 48, mənzil 5-də qeydiyyatda olan, Şəxs Azərbaycan Respublikası İnzibati Xətalar Məcəlləsinin 510 və 535.1-ci maddələrində nəzərdə tutulmuş inzibati xəta törətməsinə dair Bakı şəhər Səbail rayon Polis İdarəsindən daxil olmuş materiallara baxaraq... MÜƏYYƏN ETDİ: Bakı şəhər Səbail rayon Polis İdarəsinin 9-cu PB-si tərəfindən tərtib edilmiş 09.02.2022-ci il tarixli MN№1381099 seryialı inzibati xəta haqqında protokola əsasən Şəxs 08.02.2022-ci il tarixdə saat 15:50 radələrində Səbail rayonu, Sabir bağında ünvansız nalayiq ifadələr işlədərək ictimai qaydanı pozmuş, polisin qanuni tələblərini pozaraq tabesizlik etmişdir. Bununla əlaqədar Səbail rayon Pİ-nin 9-cu PB-nin sahə inspektoru, polis baş leytenantı Qurbanəli Kərimli tərəfindən Şəxs barəsində AR İXM-nın 510 və 535.1-ci maddələrində nəzərdə tutumuş inzibati xəta haqqında protokol tərtib edilmişdir. Məhkəmə iclasında inzibati xəta törədən şəxs Şəxs özünü Azərbaycan Respublikası İXM-nin 510 və 535.1-ci maddələri ilə özünü qismən təqsirli bilərək göstərmişdir ki, 25 yanvar 2022-ci ildə anası rəhmətə getmiş, 08.02.2022-ci tarixdə Sabir bağında əsəbi olduğu üçün və əli zədələndiyi üçün ünvansız nalayiq ifadə işlətmiş, polis yaxınlaşarkən utandığından onun səbəbini deməmiş, polis bölməsinə dəvət edərkən torbası orda olduğu üçün tərəddüd etmişdir, əməlindən peşmandır. Məhkəmə iclasında şahid qismində dindirilmiş Səbail rayon 9-cu PB-nin əməliyyat müvəkkili polis baş leytenantı Nurlan Qurbanov öz ifadəsində göstərmişdir ki, 08.02.2022ci il tarixdə inzibati ərazidə xidmət apararkən Səbail rayonu, Sabir bağında bir nəfər şəxsin ünvansız nalayiq ifadələr səsləndirdiyi eşidib ona yaxınlaşmış, özünü təqdim etdikdən sonra etdiyi hərəkətin səbəbini soruşaraq buna son qoyulmasını tələb etmiş, lakin həmin şəxs əməlini davam etdirdiyindən onu polis bölməsinə dəvət etmiş, o isə polis avtomaşınana oturmaqdan imtina etmiş, tabesizlik göstərmiş və onun qanuni tələblərinə tabe olmamışdır.Həmin şəxs polis ölməsinə gətirilmiş, şəxsiyyəti müəyyən edilmiş, onun tərəfindən müvafiq raport tərtib edilmişdir. Məhkəmə toplanmış materialları araşdıraraq və iş üzrə toplanmış sübutlara hüquqi qiymət verərək hesab edir ki, Şəxs AR İXM-nın 510 və 535.1-ci maddələrində nəzərdə tutulmuş xətanın törətməkdə təqsiri tam sübuta yetirilir. İş üzrə Səbail RPİ-nin 9-cu PB tərəfindən tərtib edilmiş MN№1381099 seriyalı inzibati xəta haqqında protokola əsasən Şəxs AR İXM-nın 510 və 535.1-ci maddələri ilə inzibati xəta törətməsi faktı tam təsdiq olunur. İş üzrə 08.02.2022-ci il tarixli, inzibati qaydada tutma haqqında protokola əsasən, Şəxs 08.02.2022-ci il tarixdə saat 16:00-da tutulmuşdur. AR İXM-nın 21-ci maddəsinə əsasən inzibati tənbeh məsuliyyət tətbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Qeyd edilən Məcəllənin 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakretizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Beləliklə, məhkəmə Şəxs əməlində AR İXM-nın 510 və 535.1-ci maddələrinin tərkibinin olmasını və inzibati xəta törədən şəxsin şəxsiyyətini nəzərə alaraq hesab edir ki, o, göstərilən inzibati xətaların törədilməsində təqsirli bilinməlidir. Lakin məhkəmə hesab edir ki, Şəxs eyni vaxtda törətdiyi xətalardan birinə görə inzibati məsuliyyətə cəlb edilməlidir. Belə ki, AR İXM-nın 34.3-cü maddəsinə əsasən şəxsin eyni vaxtda öz hərəkətləri (hərəkətsizliyi) ilə törətdiyi bir neçə inzibati xətaya dair işlərə baxılması eyni orqanın səlahiyyətinə aiddirsə, həmin şəxs daha ciddi xətaya görə müəyyən edilmiş sanksiya çərçivəsində tənbeh edilir. Bu halda törədilmiş xətalardan hər hansı birinə görə nəzərdə tutulmuş əlavə tənbehlərdən biri əsas tənbehə əlavə edilə bilər. Məhkəmə qanunun bu tələblərini nəzərə alaraq qeyd edir ki, Şəxs eyni vaxtda iki inzibati xəta törətdiyinə görə onun barəsində törədilmiş daha ciddi inzibati xətaya görə tənbeh tətdiq edilməlidir. İnzibati Xətalar Məcəlləsinin 510-ci maddəsindən göründüyü kimi həmin maddənin saknsiyasında fiziki şəxslər əlli manatdan yüz manatadək məbləğdə cərimə edilir, işin hallarına görə, pozuntunu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda, on beş günədək müddətə inzibati həbs tətbiq olunur. İnzibati Xətalar Məcəlləsinin 535.1-ci maddəsindən göründüyü kimi həmin maddənin saknsiyasında fiziki şəxslər iki yüz manat məbləğində cərimə edilir və ya işin halları və pozuntu törədənin şəxsiyyəti nəzərə alınmaqla, bu tədbirlərin tətbiqi kifayət hesab edilmədikdə bir ayadək müddətə inzibati həbs tətbiq olunur. Beləliklə, məhkəmə Şəxs əməlində AR İXM-nın 510 və 535.1-ci maddələrinin tərkibinin olmasını, yəni Şəxs polisin qanuni tələblərinə riayət etməyərək öz xidməti vəzifələrini yerinə yetirən polis əməkdaşlarının qanuni tələblərinə tabe olmamaqla xırda xuliqanlıq etməsini və inzibati xəta törədən şəxsin şəxsiyyətini nəzərə alaraq hesab edir ki, ona törətmiş olduğu inzibati xətaların daha ciddi olanı ilə, yəni AR İXM-nın 535.1-ci maddəsinin sanksiyası həddində inzibati həbs növündə tənbeh tətbiq edilməlidir. Məhkəmə həmçinin hesab edir ki, Şəxs inzibati qaydada 08.02.2022-ci il tarixdə saat 16:00-da tutulduğundan, həbs etmənin əvvəli həmin tarixdən hesablanmalıdır. Göstərilənlərə əsasən və Azərbaycan Respublikası İnzibati Xətalar Məcəlləsinin 31.3, 114-115-ci maddələrini rəhbər tutaraq məhkəmə… QƏRARA ALDİ: Şəxs Azərbaycan Respublikası İnzibati Xətalar Məcəlləsinin 510 və 535.1-ci maddələrində nəzərdə tutulmuş inzibati xətaları törətməkdə təqsirli bilisin və AR İXM-nın 34.3-cü maddəsinə əsasən onun barəsində AR İXM-nın 535.1-ci maddəsində nəzərdə tutulmuş 10 (on) gün müddətində inzibati həbs növündə tənbeh tətbiq edilsin. Həbs etmənin əvvəli 08.02.2022-ci il tarixdən saat 16:00-dən hesablansın. Qərardan 10 gün müddətində Bakı Apellyasiya Məhkəməsinə şikayət verilə bilər. Hakim: Şahin Abdullayev