Bakı Şəhəri Suraxanı Rayon Məhkəməsi Qərar — İş №3(010)-1590/2021

Azərbaycan Respublikası adından QƏRAR Bakı şəhəri İş № 3(010)-1590/2021 20.11.2021 BAKI ŞƏHƏRİ SURAXANI RAYON MƏHKƏMƏSİ Hakim Mahmudova Təranə Nəriman qızının sədrliyi, Hakim köməkçisi Məmmədli Əbülfəz Namiq oğlunun katibliyi, Bakı şəhəri Suraxanı Rayon Polis İdarəsinin polis şöbəsinin sahə rəisi, polis kapitanı X1, barəsində inzibati xəta haqqında iş üzrə icraat aparılan şəxs Şəxs iştirakları ilə xx.xx.1984-cü ildə Dəvəçi şəhərində doğulmuş, Azərbaycan Respublikasının vətəndaşı, usta işləyən, orta təhsilli, ünvan 1 ünvanında qeydiyyatda olan və Bakı şəhəri, Suraxanı rayonu, Hövsan qəsəbəsi, fərdi evdə yaşayan Şəxs Azərbaycan Respublikası İnzibati Xətalar Məcəlləsinin 510-cu maddəsi ilə təqsirləndirilməsinə dair Bakı şəhəri Suraxanı rayon polis idarəsinin 30-cu polis şöbəsi tərəfindən daxil olmuş inzibati xəta haqqında materiala Bakı şəhəri Suraxanı Rayon Məhkəməsinin binasında açıq məhkəmə iclasında baxaraq, məhkəmə müəyyən etdi: Bakı şəhəri Suraxanı rayon polis idarəsinin 30-cu polis şöbəsi tərəfindən təqdim olunmuş 20 noyabr 2021-ci il tarixli MN seriyalı ******* nömrəli inzibati xəta haqqında protokoldan və ona əlavə edilmiş sənədlərdən görünür ki, Şəxs 20 noyabr 2021-ci ildə, saat 00.10 radələrində 30-cu PŞ-də olan zaman ictimai qaydanı pozmuş, xırda xuliqanlıq etmişdir. Məhkəmədə izahat vermiş Bakı şəhəri Suraxanı Rayon Polis İdarəsinin polis şöbəsinin sahə rəisi, polis kapitanı X2 göstərdi ki, Şəxs 30-cu PŞ-nə gələrək orada onun müraciətinə dərhal baxılmayacağı təqdirdə özünü doğrayacağını bildirərək, cibindən lezva çıxarıb ağzına atmış, polis əməkdaşları ona sakit olmağı, nizam-intizamlı olmağı bildirsələr də, Şəxs küçə söyüşləri ilə hamını təhqir edib durmadan nalayiq ifadələr işlədərək, başını divara vurmuşdur. Beləliklə də, Şəxs günün nizam tələblərini kobud şəkildə pozaraq xidmətin düzgün təşkil edilməsinə imkan verməmişdir. Buna görə də göstərilənləri nəzərə alaraq barəsində inzibati xəta haqqında iş üzrə icraat aparılan şəxsə qanunla nəzərdə tutulan tənbeh tətbiq olunmasını xahiş etdi. Məhkəmədə izahat vermiş borclu Şəxs bildirdi ki, həmin zaman içkili olduğu üçün öz hərəkətlərini idarə edə bilməmişdir. Hazırda etdiyi əməldən peşmandır və bir daha belə bir hərəkət etməyəcəkdir. Buna görə də qeyd olunanların nəzərə alınaraq ona yüngül inzibati tənbeh verilməsini məhkəmədən xahiş etdi. İş materiallarında olan Bakı şəhəri Suraxanı rayon polis idarəsinin 30-cu polis şöbəsi tərəfindən tərtib olunmuş 20 noyabr 2021-ci il tarixli MN seriyalı ******* nömrəli inzibati xəta haqqında protokoldan və ona əlavə edilmiş sənədlərdən görünür ki, Şəxs 20 noyabr 2021-ci ildə saat 00:10-da 30-cu PŞ-də olan zaman ictimai qaydanı pozmuş, xırda xuliqanlıq etmişdir. İş materiallarında olan 20.11.2021-ci il tarixli 1/2241 saylı Sərxoşluq hallarının bütün növlərinin təyini məqsədi ilə aparılan tibbi müayinə protokolundan görünür ki Şəxs orta alkoqol sərxoşluğu üəyyən olunmuşdur. Göründüyü kimi Şəxs Azərbaycan Respublikasının İnzibati Xətalar Məcəlləsinin 510-cu maddəsində nəzərdə tutulan inzibati xətanı törətməsi sübuta yetir. Ona görə də o, həmin maddə ilə təqsirli bilinərək, məsuliyyətə cəlb olunmalıdır. Azərbaycan Respublikası İXM-nin 31.2-ci maddəsinə əsasən «Fiziki və ya vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakretizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır». Şəxs himayəsində bir uşağının olması iş üzrə məsuliyyəti yüngülləşdirən hal kimi qiymətləndirilməlidir. İş üzrə məsuliyyəti ağırlaşdıran hal müəyyən edilməmişdir. Göstərilənlərə əsasən Şəxs Azərbaycan Respublikası İnzibati Xətalar Məcəlləsinin 510-cu maddəsi ilə təqsirli bilinməli və ona həmin maddənin sanksiyası çərçivəsində tənbeh tətbiq olunmalıdır. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 114, 115, 117, 128 – 130-cu maddələrini rəhbər tutaraq, qərara aldı: Şəxs Azərbaycan Respublikası İnzibati Xətalar Məcəlləsinin 510-cu maddəsində nəzərdə tutulmuş inzibati xətanı törətməkdə təqsirli bilinərək 50 (əlli) manat miqdarında cərimə edilsin. Qərarın surəti rəsmi qaydada verildiyi gündən 10 gün müddətində qərardan Bakı şəhəri Suraxanı Rayon Məhkəməsi vasitəsi ilə və ya bilavasitə Bakı Apelyasiya Məhkəməsinə apellyasiya şikayəti verilə bilər.