Bakı Şəhəri Suraxanı Rayon Məhkəməsi Qərar — İş №3(010)-252/2021

Azərbaycan Respublikası adından QƏRAR Bakı şəhəri İş № 3(010)-252/2021 28.01.2021 BAKI ŞƏHƏRİ SURAXANI RAYON MƏHKƏMƏSİ Mən – Suraxanı Rayon Məhkəməsinin hakimi Qədimov Ceyhun Tofiq oğlu Mazanov Kamran Ramazan oğlunun katibliyi, barəsində inzibati xəta haqqında iş üzrə qərar çıxarılmış şəxs X1 iştirakı ilə Suraxanı rayon DYPŞ Yol Patrul Xidmətinin vəzifəli şəxsinin xx xxxxxx 2020-ci il tarixli TP seriyalı ******* nömrəli inzibati tənbeh vermə haqqında qərarından X2 tərəfindən verilmiş şikayətə baxaraq, MÜƏYYƏN ETDİM: xx xxxxxx 2020-ci ildə tərtib edilmiş İXP seriyalı ******* nömrəli inzibati xəta haqqında protokola əsasən Suraxanı rayon DYPŞ Yol Patrul Xidmətinin vəzifəli şəxsi tərəfindən xx xxxxxx 2020-ci ildə qəbul olunmuş TP seriyalı ******* nömrəli qərarla X2 Azərbaycan Respublikası İXM-nin 211.1-ci maddəsi ilə təqsirli bilinib cərimə edilmişdir. X2 həmin qərardan şikayət verib. X2 işin məhkəmə baxışı zamanı şikayətində göstərilənlərə uyğun məzmunlu izahat verərək bildirmişdir ki, xx xxxxxx 2020-ci ildə nəvəsini valideynlərigilə aparmaq üçün evdən çıxmış, bundan əvvəl müvafiq icazənin alınması üçün 8103 qısa nömrəsinə SMS göndərmişdir. Lakin gözü yaxşı görmədiyinə, həmçinin mobil telefonu köhnə modelli olduğuna görə ona gəlmiş imtina cavabını oxuya bilməmişdir. Bildirir ki, imtina cavabı almasının səbəbi şəxsiyyət vəsiqəsinin nömrəsinin SMS göndərilərkən düzgün yazılmaması ilə bağlı olub. Beləliklə, nəvəsini valideynlərigilə verib geri qayıdarkən saat 01:26-da Suraxanı rayonu, Yeni Günəşli qəsəbəsi, AB y/s istiqamətində yerləşən polis postunda saxlanılaraq yoxlanılmış və icazəsinin olmadığı müəyyən edilmişdir. Polis əməkdaşına vəziyyəti izah etməyə nə qədər çalışsa da nəticəsi olmamış, polis əməkdaşı onu buraxması müqabilində rüşvət istəmişdir. Göstərilənlərə əsasən barəsində olan qərarın ləğv olunmasını və inzibati xəta haqqında iş üzrə icraata xitam verilməsini məhkəmədən xahiş edir. Barəsində inzibati xəta haqqında iş üzrə qərar çıxarılmış şəxsi dinləyib iş materiallarını nəzərdən keçirərək belə qənaətə gəlirəm ki, şikayət aşağıdakı səbəblərə görə təmin olunmamalıdır. «Azərbaycan Respublikasında 2020-ci il dekabrın 14-dən xüsusi karantin rejiminin sərtləşdirilməsi haqqında» Azərbaycan Respublikası Nazirlər Kabinetinin xx xxxxxx 2020ci il tarixli 488 nömrəli qərarı ilə 2020-ci il 14 dekabr saat 00:00-dan 2021-ci il 18 yanvar saat 00:00-dək Bakı, Sumqayıt, Gəncə, Mingəçevir, Şirvan şəhərlərinin və Abşeron rayonunun ərazisində, habelə Lənkəran, Masallı, Cəlilabad, Şəki, Zaqatala, Quba, Xaçmaz, Yevlax, Bərdə, Biləsuvar və İsmayıllı rayon mərkəzlərində (kənd və qəsəbələr istisna olmaqla) hərəkət məhdudiyyətləri müəyyən edilmişdir. Həmin Qərarın 2.7-ci bəndinə əsasən «Bu Qərarın 2.6.1-ci və 2.6.2-ci yarımbəndlərində göstərilən şəxslər yaşayış yerini və olduğu yeri tərk etmək üçün icazə almaq məqsədilə 8103 nömrəsinə SMS məlumat göndərməli və ya “E-Təbib” mobil tətbiqi vasitəsilə həmin icazəni almaq üçün müraciət etməlidirlər (SMS – məlumatlar və “E- Təbib” mobil tətbiqindən istifadə ödənişsizdir). SMS məlumatın mətnində aşağıdakı iki indeksdən biri və şəxsiyyəti təsdiq edən məlumat qeyd edilməlidir: 2.7.1. 1 rəqəmi təxirəsalınmaz tibbi zərurətlə və ya qrafik üzrə müalicə almaqla əlaqədar yaşayış yerini və olduğu yeri tərk etmək üçün (icazə rayon və şəhər daxilində 3 saat müddətinə verilir, rayonlar və şəhərlərarası hərəkət zərurəti yarandıqda, olduğu ünvanla getməli olduğu ünvan arasında məsafə və müalicə prosedurunun müddəti nəzərə alınır, geri qayıtma müddəti həkim tərəfindən verilən arayışla müəyyən edilir və zərurət olduqda polis əməkdaşlarına təqdim edilir); 2.7.2. 2 rəqəmi - ərzaq və digər gündəlik tələbat mallarının və dərman vasitələrinin alınması (ərzaq mağazalarından, supermarketlərdən, bazar və aptekdən), dövlət xidmətlərinin, bank, poçt və fəaliyyətinin davam etdirilməsinə icazə verilən iş və xidmət sahələrində göstərilən digər xidmətlərdən istifadə edilməsi zərurəti, həmçinin açıq havada vaxtın keçirilməsi ilə əlaqədar yaşayış yerini və olduğu yeri tərk etmək üçün (icazə 3 saat müddətinə gündə 1 dəfə verilir, dövlət xidmətlərindən istifadə edilməsi zərurəti ilə əlaqədar yaşayış yerini və olduğu yeri tərk edən şəxslər üçün geri qayıtma müddəti müvafiq dövlət qurumu tərəfindən verilən arayışla müəyyən edilir)». X1 mobil telefonuna 8103 nömrəsindən gəlmiş məlumata işin məhkəmə baxışı zamanı baxış keçirilmişdir. Həmin məlumat aşağıdakı məzmundadır: «8103-xx.xx.2020-00:49 – Hörmətli istifadəçi, göndərmiş olduğunuz məlumatlar tam olmadığı üçün sizin müraciətinizə baxmaq mümkün deyil». Beləliklə, X1 elə özü tərəfindən bildirilənlərlə, həmçinin yuxarıda qeyd edilən məlumatın məzmunu ilə müəyyən olunur ki, onun xx xxxxxx 2020-ci ildə saat 01.26-da müvafiq icazəsi olmayıb (həmin vaxtda küçəyə çıxmaq üçün Nazirlər Kabinetinin yuxarıda istinad olunan qərarı ilə müəyyənlişdirilmiş qaydada icazə almayıb). Göstərilənlər belə qənaətə gəlməyə əsas verir ki, X1 Azərbaycan Respublikası İXM-nin 211.1-ci maddəsi ilə təqsirli bilinib cərimə edilməsinə dair Suraxanı rayon DYPŞ Yol Patrul Xidmətinin vəzifəli şəxsinin xx xxxxxx 2020-ci il tarixli TP seriyalı ******* nömrəli inzibati tənbeh vermə haqqında qərarı qanuni və əsaslıdır. Ona görə də şikayət təmin edilə bilməz. Polis əməkdaşının rüşvət istəməsi məsələsi ilə bağlı izah olunur ki, X2 həmin məsələnin araşdırılması və qanuna müvafiq tədbirlər görülməsi üçün aidiyyəti dövlət orqanlarına, o cümlədən daxili işlər və prokurorluq orqanlarına müraciət edə bilər. Yuxarıda göstərilənlərə əsasən və Azərbaycan Respublikası İXM-nin 134, 136 və 137-ci maddələrini rəhbər tutaraq, QƏRARA ALDİM: Suraxanı rayon DYPŞ Yol Patrul Xidmətinin vəzifəli şəxsinin xx xxxxxx 2020-ci il tarixli TP seriyalı ******* nömrəli inzibati tənbeh vermə haqqında qərarından X2 tərəfindən verilmiş şikayət təmin edilməsin. Suraxanı rayon DYPŞ Yol Patrul Xidmətinin vəzifəli şəxsinin xx xxxxxx 2020-ci il tarixli TP seriyalı ******* nömrəli inzibati tənbeh vermə haqqında qərarı dəyişdirilmədən saxlanılsın. Qərardan onun surəti rəsmi qaydada verildiyi vaxtdan etibarən 10 gün müddətində Suraxanı Rayon Məhkəməsi vasitəsilə Bakı Apelyasiya Məhkəməsinə apelyasiya şikayəti və protesti verilə bilər. Hakim Ceyhun Qədimov