Bakı Şəhəri Suraxanı Rayon Məhkəməsi Qərardad — İş №3(010)-4188/2023

Azərbaycan Respublikası adından QƏRARDAD Bakı şəhəri İş № 3(010)-4188/2023 21.09.2023 BAKI ŞƏHƏRİ SURAXANI RAYON MƏHKƏMƏSİ Hakimi Kərimov Namiq Həsrət oğlunun sədrliyi, Hacıyev Gündüz Nizami oğlunun katibliyi ilə, "xxxx" MMC-nin Azərbaycan Respublikası Əmək və Əhalinin Sosial Müdafiəsi Nazirliyi yanında X2 Xidmətinin Bakı şəhər İdarəsinin xx.xx.2023-cü il tarixli, MN seriyalı ******* saylı inzibati tənbeh vermə haqqında qərarından verilmiş şikayət ərizəsinə baxaraq, M Ü Ə Y Y Ə N E T D İ M: Azərbaycan Respublikası Əmək və Əhalinin Sosial Müdafiəsi Nazirliyi yanında X2 Xidmətinin Bakı şəhər İdarəsinin xx.xx.2023-cü il tarixli, MN seriyalı ******* saylı qərarı ilə "xxxx" MMC-nin direktoru vəzifəsini müvəqəti icra edən X1 İXM-nin 192.1-ci maddəsi ilə təqsirli bilinərək 4000 (dörd min) manat məbləğində cərimə edilmişdir. «Şikayət ərizəsi»-nin giriş hissəsi aşağıdakı məzmundadır: «Suraxanı Rayon Məhkəməsinə "xxxx" MMC tərəfindən». Azərbaycan Respublikası İXM-nin 106.0.3, 106.0.4, 106.0.5 və 106.0.6-cı maddələrinin tələblərinə görə hakim inzibati xəta haqqında işi baxılmağa hazırlayarkən inzibati xəta haqqında protokolun və işin digər materiallarının bu Məcəllənin tələblərinə müvafiq olaraq tərtib edilib-edilmədiyini, işin icraatını rədd edən halların mövcud olubolmadığını, mahiyyəti üzrə baxılması üçün işdə kifayət qədər sübutların toplanıbtoplanmadığını və işə baxılmasının yeri və vaxtı barədə işdə iştirak edən şəxslərin məlumatlandırılıb-məlumatlandırılmadığını araşdırmalıdır. Həmin Məcəllənin 109.1.6-cı maddəsinə əsasən «protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda, işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması» barədə qərardad qəbul olunur. «Şikayət ərizəsi»ni və ona əlavə edilmiş iş materiallaını nəzərdən keçirərək hesab edirəm ki, o, aşağıda göstərilənlərə əsasən geri qaytarılmalıdır. Belə ki, şikayət ərizəsinin məzmunundan görünür ki, "xxxx" MMC-nin məhkəməyə təqdim etdiyi şikayət ərizəsi hüquqi şəxs tərəfindən ünvanlanıb, sonda isə "xxxx" MMC-nin vəzifəli şəxsi (direktoru vəzifəsini müvəqəti icra edən X1) tərəfindən imzalanıb. Lakin məhkəmə baxışı zamanı iş materialları tədqiq edilərkən məlum olmuşdur ki, Azərbaycan Respublikası Əmək və Əhalinin Sosial Müdafiəsi Nazirliyi yanında X2 Xidmətinin Bakı şəhər İdarəsinin xx.xx.2023-cü il tarixli, MN seriyalı ******* saylı qərarı "xxxx" MMC-nin vəzifəli şəxsi (direktoru vəzifəsini müvəqəti icra edən X1) barəsində tərtib olunub, o, İXMnin 192.1-ci maddəsi ilə təqsirli bilinərək 4000 (dörd min) manat məbləğində cərimə edilmişdir. Odur ki, məhkəmə hesab edir ki, Azərbaycan Respublikası Əmək və Əhalinin Sosial Müdafiəsi Nazirliyi yanında X2 Xidmətinin Bakı şəhər İdarəsinin xx.xx.2023-cü il tarixli, MN seriyalı ******* saylı qərarı "xxxx" MMC-nin vəzifəli şəxsi barəsində tərtib edildiyi üçün həmin qərardan şikayət vermək hüququ da məhz həmin vəzifəli şəxsə məxsusdur. Ona görə də, müvafiq müraciətə Azərbaycan Respublikası İXM ilə müəyyən edilmiş qaydalara uyğun formada baxıla bilməz. Yuxarıda göstərilənlərə əsasən, Q Ə R A R A A L D İ M: "xxxx" MMC-nin Azərbaycan Respublikası Əmək və Əhalinin Sosial Müdafiəsi Nazirliyi yanında X2 Xidmətinin Bakı şəhər İdarəsinin xx.xx.2023-cü il tarixli, MN seriyalı ******* saylı inzibati tənbeh vermə haqqında qərarından verilmiş şikayət ərizəsi geri qaytarılsın. Hakim Namiq Kərimov