Bakı Şəhəri Suraxanı Rayon Məhkəməsi Qərardad — İş №3(010)-4201/2023

Azərbaycan Respublikası adından QƏRARDAD Bakı şəhəri İş № 3(010)-4201/2023 07.09.2023 BAKI ŞƏHƏRİ SURAXANI RAYON MƏHKƏMƏSİ Mən, Suraxanı Rayon Məhkəməsinin hakimi Namiq Kərimov Həsrət oğlu, Şəxs Azərbaycan Respublikası İXM-nin 529.3-cü maddəsi ilə təqsirləndirilməsinə dair Bakı şəhəri Xətai rayon Polis İdarəsindən daxil olmuş inzibati xəta haqqında işi baxılmağa hazırlayarkən, M Ü Ə Y Y Ə N E T D İ M: Bakı şəhəri Xətai rayon Polis İdarəsi Şəxs Azərbaycan Respublikası İXM-nin 529.3cü maddəsi ilə təqsirləndirilməsinə dair 26 iyul 2023-cü il tarixli İXP seriyalı ******* nömrəli inzibati xəta haqqında protokolu ona əlavə edilmiş sənədlərlə birlikdə baxılması üçün Suraxanı Rayon Məhkəməsinə təqdim etmişdir. Məhkəmə iş üzrə materialları nəzərdən keçirib qərara alır ki, həmin inzibati xəta haqqında protokol və ona əlavə edilmiş sənədlər geri qaytarılmalıdır. Belə ki, Şəxs qeydiyyat ünvanı Ağdam rayonu, Qiyaslı kəndidir. Həmçinin 26 iyul 2023-cü il tarixli Xətai rayon DYPŞ tərəfindən qəbul edilmiş GP seriyalı 17748912 saylı qərardadla da Şəxs barəsində tərtib edilmiş İXP seriyalı ******* nömrəli inzibati xəta haqqında protokol və digər materiallar baxılması üçün aidiyyatı üzrə Ağdam Rayon Məhkəməsinə göndərilməsi qərara alınmışdır. Odur ki, Suraxanı Rayon Məhkəməsinə ünvanlanan məktubda şəxsin faktiki yaşayış yerinin “Suraxanı rayonu, Qaraçuxur qəsəbəsi, Z. Şərifov küçəsi, ev 2, mənzil 36” göstərilsə də, bu iş materiallarında heç bir faktla öz təsdiqini tapmır. Azərbaycan Respublikası İXM-nin 109.1.6-cı maddəsinə əsasən «protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda, işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması» barədə qərar qəbul edilir. Göründüyü kimi, məhkəməyə təqdim olunmuş sənədlər natamamdır. Beləliklə, inzibati xəta haqqında protokolu tərtib etmiş səlahiyyətli vəzifəli şəxs üzərinə düşən sübutetmə vəzifəsini də lazımi qaydada icra etməyib. Göstərilənlərə əsasən inzibati xəta haqqında protokol və ona edilmiş sənədlər geri qaytarılmalıdır. Yuxarıda göstərilənlərə əsasən və Azərbaycan Respublikası İXM-nin 109, 118-ci maddələrini rəhbər tutaraq, Q Ə R A R A A L D İ M: Şəxs Azərbaycan Respublikası İXM-nin 529.3-cü maddəsi ilə təqsirləndirilməsinə dair 26 iyul 2023-cü il tarixli İXP seriyalı ******* nömrəli inzibati xəta haqqında protokolu və ona əlavə edilmiş sənədlər Bakı şəhəri Xətai rayon Polis İdarəsinə qaytarılsın. Hakim Namiq Kərimov