Bakı Şəhəri Suraxanı Rayon Məhkəməsi Qərar — İş №3(010)-4323/2023

Azərbaycan Respublikası adından QƏRAR Bakı şəhəri İş № 3(010)-4323/2023 08.09.2023 BAKI ŞƏHƏRİ SURAXANI RAYON MƏHKƏMƏSİ Mən, Bakı şəhəri Suraxanı rayon Məhkəməsinin hakimi Rzayeva Nərminə Cahangir qızı, məhkəmə iclas katibi Ələmşahova Aytəkin Aqil qızının katibliyi ilə, barəsində inzibati xəta haqqında iş üzrə icraat aparılan şəxs Şəxs, inzibati xəta haqqında protokol tərtib etmiş şəxs Bakı şəhəri Suraxanı rayon İcra və Probasiya Şöbəsinin icra məmuru X4, tələbkar X1 iştirakı ilə, Şəxs, xx xxxxxxxx 1984-cü ildə Türkiyə Respublikasında anadan olmuş, Türkiyə Respublikasının vətəndaşı, orta təhsilli, subay, fərdi əməklə məşğul olan, ünvan 1 ünvanında yaşayan, barəsində Bakı şəhəri Suraxanı rayon İcra və Probasiya Şöbəsindən daxil olmuş inzibati xəta haqqında materiala açıq məhkəmə iclasında baxaraq, MÜƏYYƏN ETDİM: 07 sentyabr 2023-cü il tarixdə Bakı şəhəri Suraxanı rayon İcra və Probasiya Şöbəsinin icra məmuru X5 tərəfindən Bakı şəhər Binəqədi Rayon Məhkəməsinin 2(001)- 5371/2022-ci il saylı, 28 noyabr 2022-cü il tarixli qətnaməsinə dair icra sənədini üzrsüz səbəbdən icra etməməsinə görə Şəxs barəsində Azərbaycan Respublikası İXM-nin 528.1ci maddəsi ilə nəzərdə tutulmuş inzibati xəta törədilməsi haqqında protokol tərtib edilmişdir. İnzibati xəta törədilməsi haqqında protokol tərtib etmiş icra məmuru X5 məhkəmədə bildirdi ki, Bakı şəhər Binəqədi Rayon Məhkəməsinin 2(001)-5371/2022-ci il saylı, 28 noyabr 2022-cü il tarixli qətnaməsi ilə cavabdeh Şəxs 12 iyun 2020-ci il tarixli kredit müqaviləsi üzrə 20000 (iyirmi min) manat məbləğində pul tutularaq iddiaçı X2 ödənilməsi qət edilmişdir. Borclu qətnamənin icrası ilə bağlı göstərişləri yerinə yetirmir. Odur ki, borclunun inzibati qaydada tədbir görülməsini xahiş etmişdir. Məhkəmə iclasında Şəxs izahatında 2000 manat məbləğində pulu tələbkara ödədiyini, aylıq qazancının təqribi 3000 manat məbləğində olduğunu, hissə-hissə tələbkara pulu ödəyəcəyini, borcdan yayınmadığını, həmçinin bildirir ki, ailəsi və uşağı olduğunu, onların da maddi dolanacağının özü tərəfindən həyata keçirdiyini bildirmiş, barəsində tərtib edilmiş protokolun ləğv edilməsini məhkəmədən xahiş etmişdir. Məhkəmə iclasında tələbkar X3 izahatında borclunun qərəzli olaraq borcdan yayındığını, belə ki, aylıq gəlirinin yeddi-səkkiz min manat arası olmasına baxmayaraq borcunu ödəmədiyini, hazırda ödəmək istədiyi iki min manat məbləğlə də razılaşmadığını, belə ki, həmin məbləği ödədikdən sonra yenə borcdan yayınacağını, yalnız ona on beş min manat məbləğində pul ödənilməsi təqdirdə onunla razılaşacağını, sonra da qalan beş min manat məbləğin də hisssə-hissə ödəməyinə şərait yarada biləcəyini bildirərək, inzibati protokol tərtib edilmiş şəxsin inzibati qaydada məsuliyyətə cəlb edilməsini məhkəmədən xahiş etmişdir. İnzibati xəta haqqında işin materiallarını tədqiq edərək, barəsində inzibati xəta haqqında iş üzrə icraat aparılan şəxsi və inzibati xəta haqqında protokol tərtib etmiş şəxsi dinləyərək, məhkəmə hesab edir ki, Şəxs əməlində Azərbaycan Respublikası İXM-nin 528.1-ci maddəsi ilə nəzərdə tutulmuş inzibati xətanın tərkibi olmadığına görə Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə başlanılmış inzibati xəta haqqında iş üzrə icraata xitam verilməlidir. Belə ki, iş materiallarında olan Bakı şəhər Binəqədi Rayon Məhkəməsinin 2(001)- 5371/2022-ci il saylı, 28 noyabr 2022-cü il tarixli qətnaməsi ilə cavabdeh Şəxs 12 iyun 2020-ci il tarixli kredit müqaviləsi üzrə 20000 (iyirmi min) manat məbləğində pul tutularaq iddiaçı X2 ödənilməsi qət edilmişdir. 07 sentyabr 2023-cü il tarixli, MN seriyalı, ******* nömrəli inzibati xəta haqqında protokoldan görünür ki, Bakı şəhər Suraxanı Rayon Məhkəməsinin 2(001)-5371/2022-ci il saylı, 28 noyabr 2022-cü il tarixli qətnaməsinə dair icra məmurunun qanuni tələblərini yerinə yetirmir. İş materiallarında olan 08 sentyabr 2023-cü il tarixli qəbzlərə əsasən, Şəxs 2000 manat məbləğində pulu tələbkarın xeyrinə ödəmişdir. Azərbaycan Respublikası İXM-nin 528.1-ci maddəsinin dispozisiyasından görünür ki, məhkəmə və digər orqanların qərarlarının icrası ilə əlaqədar icra məmurunun qanuni tələblərinin yerinə yetirilməməsinə və ya icra məmuru tərəfindən müəyyən olunmuş müddətdə borclunu müəyyən hərəkətləri etməyə və ya müəyyən hərəkətləri etməkdən çəkinməyə məcbur edən icra sənədinin üzürsüz səbəbdən icra edilməməsinə görə inzibati məsuliyyət nəzərdə tutulmuşdur. Məhkəmə borclu Şəxs Bakı şəhər Binəqədi Rayon Məhkəməsinin 2(001)-5371/2022ci il saylı, 28 noyabr 2022-cü il tarixli qətnaməsinə dair icra sənədi üzrə yaranmış borcundan icra sənədi üzrə tələbkar X1 xeyrinə 2000 manat ödədiyini nəzərə alaraq hesab edir ki, Şəxs borcunun azaldılması üçün real hərəkətlər etdiyi halda, maddi imkansızlıq ucbatından bir müddət icra sənədini icra edə bilməməsinə görə Şəxsəməlinin sözügedən icra sənədinin icrasından qərəzli olaraq boyun qaçırması kimi tövsif edilməsi və Azərbaycan Respublikası İnzibati Xətalar Məcəlləsinin 528.1-ci maddəsi ilə nəzərdə tutulmuş inzibati xəta tərkibinin bütün əlamətlərini daşıyan əməli (hərəkət və ya hərəkətsizliyi) törətmiş şəxs qismində təqsirli hesab edilməsi yol verilməzdir. Bununla da Şəxs Bakı şəhər Binəqədi Rayon Məhkəməsinin 2(001)-5371/2022-ci il saylı, 28 noyabr 2022-cü il tarixli qətnaməsinə dair icra sənədini üzrsüz səbəbdən icra etməməsi sübuta yetirilmir. Beləliklə, işdə olan sübutlarla Şəxs əməlində inzibati xəta tərkibi olmadığı müəyyən edildiyindən onun barəsində başlanılmış inzibati xəta haqqında iş üzrə icraata xitam verilməlidir. Azərbaycan Respublikası İnzibati Xətalar Məcəlləsinin 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Azərbaycan Respublikası İnzibati Xətalar Məcəlləsinin 4-cü maddəsinə əsasən bu Məcəllə insan və vətəndaş hüquqlarına və azadlıqlarına hörmət edilməsi, qanunçuluq, qanun qarşısında bərabərlik, təqsirsizlik prezumpsiyası, ədalətlilik və inzibati xətaların qarşısının alınması prinsiplərinə əsaslanır. Azərbaycan Respublikası İnzibati Xətalar Məcəlləsinin 114.1.4, 114.2 və 114.2.1-ci maddələrinə əsasən bu Məcəllənin 53-cü maddəsində nəzərdə tutulan hallardan biri mövcud olduqda inzibati xəta haqqında iş üzrə icraata xitam verilməsi haqqında qərar çıxarılır. Həmin Məcəllənin 53.0 və 53.0.2-ci maddəsinə əsasən inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilməlidir. Həmin Məcəllənin 105.1-ci maddəsinə əsasən bu Məcəllənin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 40, 43, 105.1, 114, 115, 128-130-cu maddələrini rəhbər tutaraq, QƏRARA ALDİM: Şəxs əməlində inzibati xəta tərkibi olmadığına görə Azərbaycan Respublikası İnzibati Xətalar Məcəlləsinin 528.1-ci maddəsi ilə başlanılmış inzibati xəta haqqında işin icraatına xitam verilsin. Qərarın surəti təqdim edildiyi və ya alındığı gündən 10 (on) gün müddətində qərardan Bakı şəhəri Suraxanı rayon məhkəməsi vasitəsilə Bakı Apelyasiya Məhkəməsinə şikayət verilə bilər. Sədrlik edən Nərminə Rzayeva