Bakı Şəhəri Suraxanı Rayon Məhkəməsi Qərardad — İş №3(010)-5682/2024

Azərbaycan Respublikası adından QƏRARDAD Bakı şəhəri İş № 3(010)-5682/2024 10.12.2024 BAKI ŞƏHƏRİ SURAXANI RAYON MƏHKƏMƏSİ Mən, Suraxanı Rayon Məhkəməsinin hakimi Kərimov Namiq Həsrət oğlu Şəxs Azərbaycan Respublikası İXM-nin 510-cu maddəsi ilə təqsirləndirilməsinə dair Suraxanı Rayon Polis İdarəsinin 30-cu polis şöbəsindən daxil olmuş inzibati xəta haqqında işi baxılmağa hazırlayarkən, M Ü Ə Y Y Ə N E T D İ M: Suraxanı Rayon Polis İdarəsinin 30-cu polis şöbəsinin sahə inspektoru Cahid Qasımov Şəxs barəsində Azərbaycan Respublikası İXM-nin 510-cu maddəsi ilə tərtib olunmuş 06 dekabr 2024-cü il tarixli MN № ******* nömrəli inzibati xəta haqqında protokolu ona əlavə edilmiş sənədlərlə birlikdə baxılması üçün Suraxanı Rayon Məhkəməsinə təqdim etmişdir. İş materiallarını nəzərdən keçirib qərara alıram ki, həmin inzibati xəta haqqında protokol və ona əlavə edilmiş sənədlər geri qaytarılmalıdır. Qeyd olunur ki, eyni sənədlər daha əvvəl də Suraxanı Rayon Məhkəməsinə daxil olmuş, 3(010)-5601/2024 nömrəli iş açılmış, müvafiq protokolun və sənədlərin qüvvədə olan qanunvericiliyin tələblərinə cavab vermədiyi müəyyən edilərək onlar Suraxanı Rayon Məhkəməsinin müvafiq olaraq 06 dekabr 2024-ci il tarixli qərardadı ilə geri qaytarılmışdır. Suraxanı Rayon Polis İdarəsinin 30-cu polis şöbəsi göstərilən inzibati xəta haqqında protokolu eyni sənədlərlə birlikdə, heç bir əlavə tədbir görmədən yenidən məhkəməyə təqdim edib. Belə ki, iş üzrə zərərçəkmiş şəxs X2 iş materiallarında olan ərizəsini və izahatını rus dilində yazmışdır. Araşdırma zamanı iş üzrə zərərçəkmiş şəxs X1 hüquqları pozulmuş və o, tərcüməçi ilə təmin olunmamışdır. Azərbaycan Respublikası İXM-nin 49.2-ci maddəsinə əsasən işdə iştirak edən, inzibati xətalar haqqında işlər üzrə icraatın aparıldığı dili bilməyən şəxslər ana dilində və ya bildiyi hər hansı başqa dildə məlumat, izahatlar, şikayət və ya vəsatət vermək hüququ ilə, habelə bu Məcəllə ilə müəyyən edilmiş qaydada tərcüməçinin xidmətlərindən istifadə etmək hüququ ilə təmin olunurlar. İXM-nin 62.1-ci maddəsinə əsasən inzibati xəta nəticəsində mənəvi, fiziki və ya maddi zərər dəymiş şəxs zərər çəkmiş şəxs sayılır. İş materialından göründüyü kimi X3 İXM-nin 510-cu maddəsi ilə zərərçəkmiş şəxs sayılır. İXM-nin 62-ci maddəsinə əsasən zərərçəkmiş şəxsin hüquqları sırasında həmçinin 62.2.7-də ana dilində çıxış etmək və icraatın aparıldığı dildə danışa bilmirsə, tərcüməçinin xidmətlərindən pulsuz istifadə etmək hüququnun olması qeyd edilmişdir. Lakin araşdırma zamanı həmin şəxs tərcüməçi ilə təmin olunmayaraq prosessual qaydalar pozulmuşdur. Azərbaycan Respublikası İXM-nin 43.1-ci maddəsinə əsasən həmin Məcəllənin 510-cu maddəsi ilə bağlı işlərə baxılması rayon (şəhər) məhkəmələrinin səlahiyyətinə aid edilmişdir. Azərbaycan Respublikası İXM-nin 106.0, 106.0.1-106.0.3-cü maddələrinə əsasən hakim, səlahiyyətli orqan (vəzifəli şəxs) inzibati xətalar haqqında işlərə baxarkən işin baxılması onun səlahiyyətinə aiddirmi, işin hakim, kollegial orqanın üzvü, vəzifəli şəxs tərəfindən baxılmasını istisna edən hallar mövcuddurmu, inzibati xəta haqqında protokol və işin digər materialları bu Məcəllənin tələblərinə müvafiq olaraq tərtib edilmişdirmi kimi məsələləri həll edir. Azərbaycan Respublikası İnzibati Xətalar Məcəlləsinin 109.1.6-cı maddəsi ilə müəyyən edilmişdir ki, inzibati xəta haqqında işin baxılmağa hazırlanması zamanı işə baxan hakim, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda inzibati xəta haqqında protokolu onu tərtib etmiş orqana, vəzifəli şəxsə geri qaytarılması barədə qərardad qəbul edir. Azərbaycan Respublikası İnzibati Xətalar Məcəlləsinin 128-ci maddəsi baxımından həmin Məcəllənin 109-cu maddəsinin şərh edilməsinə dair Azərbaycan Respublikası Konstitusiya Məhkəməsi Plenumunun 03 may 2019-cu il tarixli Qərarına əsasən İXM-nin 109-cu maddəsində nəzərdə tutulmuş inzibati xətalar haqqında işin baxılmasına hazırlanması zamanı qəbul edilən qərardadlardan apellyasiya şikayəti vermək hüququ istisna edilir. Göründüyü kimi iş üzrə zərərçəkmiş şəxs X2 iş materiallarında olan ərizəsini və izahatını rus dilində yazmışdır. İstintaq zamanı iş üzrə zərərçəkmiş şəxs X1 hüquqları pozulmuş və o, tərcüməçi ilə təmin olunmamışdır. Göstərilənlərə əsasən inzibati xəta haqqında protokol və ona edilmiş sənədlər geri qaytarılmalıdır. Qeyd olunan nöqsanlar aradan qaldırıldıqdan sonra yenidən məhkəməyə müraciət etmək hüququnun olması izah edilməlidir. Yuxarıda göstərilənlərə əsasən və Azərbaycan Respublikası İXM-nin 109, 118-ci maddələrini rəhbər tutaraq, Q Ə R A R A A L D İ M: Şəxs Azərbaycan Respublikası İXM-nin 510-cu maddəsi ilə təqsirləndirilməsinə dair 06 dekabr 2024-cü il tarixli MN № ******* nömrəli inzibati xəta haqqında protokol və ona əlavə edilmiş sənədlər Suraxanı Rayon Polis İdarəsinin 30-cu polis şöbəsinə qaytarılsın. Qeyd olunan nöqsanlar aradan qaldırıldıqdan sonra yenidən məhkəməyə müraciət etmək hüququnun olması izah edilsin. Hakim Namiq Kərimov