Bakı Şəhəri Suraxanı Rayon Məhkəməsi Qərar — İş №3(010)-6217/2025

Azərbaycan Respublikası adından QƏRAR Bakı şəhəri İş № 3(010)-6217/2025 09.12.2025 BAKI ŞƏHƏRİ SURAXANI RAYON MƏHKƏMƏSİ Hakim Rzayeva Nərminə Cahangir qızının sədrliyi, Ələmşahova Aytəkin Aqil qızının katibliyi, Protokol tərtib edilmiş şəxs Suraxanı RPİ-nin 30-cu Polis Şöbəsinin sahə inspektoru polis mayoru X3, Zərərçəkmiş şəxs Quliyeva (Alxasova) Zülfiyyə Niyazi qızının, Barəsində inzibati xəta haqqında iş üzrə icraat aparılan şəxs Şəxs iştirakları ilə, Şəxs xx.xx.1993-cü il tarixdə Babək rayonunda anadan olmuş, evli, orta təhsilli, taksi fəaliyyəti ilə məşğul olan, Naxçıvan MR, Babək rayonu, Vayxır ərazi dairəsi, Xalxal kəndində qeydiyyatda olmaqla ünvan 1 ünvanında yaşayan, Azərbaycan Respublikası İnzibati Xətalar Məcəlləsinin 157-ci maddəsində nəzərdə tutulan inzibati xətanı törətməsi barədə Suraxanı RPİ-nin 30-cu Polis Şöbəsindən daxil olmuş inzibati xəta haqqında materiala məhkəmənin inzibati binasında açıq məhkəmə iclasında baxaraq, məhkəmə MÜƏYYƏN ETDİ: Şəxs xx.xx.2025-ci il tarixdə Quliyeva (Alxasova) Zülfiyyə Niyazi qızını münaqişə zəmnində döyərək dərəcəsi təyin edilməyən xəsarət yetirmişdir. Bununla da, Şəxs Azərbaycan Respublikası İXM-İn 157-ci maddəsində nəzərdə tutulmuş inzibati xətanı törətmişdir. Onun barəsində Suraxanı RPİ-nin 30-cu Polis Şöbəsinin sahə inspektoru polis mayoru X5 tərəfindən 09 dekabr 2025-ci il tarixli MN ******* nömrəli inzibati xəta haqqında protokol tərtib olunmuş və inzibati xəta haqqında işin aidiyyəti üzrə məhkəməyə göndərilməsi barədə 09 dekabr 2025-ci il tarixli qərardad qəbul edilmişdir. Məhkəmə iclasında protokol tərtib edilmiş şəxs Suraxanı RPİ-nin 30-cu Polis Şöbəsinin sahə inspektoru polis mayoru X5 protokola uyğun izahat verərək bildirdi ki, xx.xx.2025-ci il tarixdə X2 102 xidmətinə döyülməsi ilə bağlı müraciət edir. Onun müraciəti əsasında 30-cu PB-nin Təhqiqat şöbəsində araşdırma aparılır, ekspertiza keçirilir və İXMnin 157-ci maddəsinin tərkibi yarandığından onun icraatına verilir. Bununla bağlı hər iki tərəf dəvət olunur, hüquq və vəzifələri izah edilir və iş üzrə protokol tərtib edilərək məhkəməyə göndərilir. Məhkəmə iclasında barəsində inzibati xəta haqqında iş üzrə icraat aparılan şəxs Şəxs izahat verərək bildirdi ki, hadisə qısqanclıq zəminində baş vermiş, o qısqanclıq etmiş və zərərçəkmiş şəxsi maşına oturtmaq istəyəndə zərərçəkmiş şəxs özünü dartmış və yıxılmış, dizləri sıyrılmışdır. O, zərərçəkmişə əl qaldırmamış, yəni yumruq şillə vurmamış, zərərçəkmiş ondan qorxub qaçmaq istəmişdir. Daha əvvəllər də onu vurmuş, bu səbəbdən qorxmuşdur. Ancaq məqsədi onu vurmaq olmamışdır, sadəcə dartmışdır, buna dair kamera görüntüləri də var. O, ailəsində belə məsələ baş verməsinə görə əməlindən peşmandır. Məhkəmə iclasında zərərçəkmiş şəxs Quliyeva (Alxasova) Zülfiyyə Niyazi qızı izahat verərək bildirdi ki, şəxs çox qısqanclıq edir, boşandığı qadının - uşağının anasının yanına gedəndə həmin qadını təqsirkar çıxardır, onun yanına gələndə isə onu təqsirkar çıxardır, güya mərd kişi özüdür. Onun oğlu evə usta çağırmış, usta da onun qızı yaşında - 22 yaşında cavan oğlandır. Şəxs gəlib onu görüb qısqanclıq etmiş, güya o evə başqa kişi gətirmişdir. Gecə vaxtı hərəkətlərinə görə polisə getmişlər. 3 ildə onu çox bezdirmiş, hər dəfə bağışlamasını istəmiş, onu dartışdırır, üstünə maşın sürür. Hətta ekspertizadan gələndən 2-3 gün sonra bədənində göyərtilər olmasa da ağrısı üzə çıxmışdır. Hadisə günü onu maşına salıb vururmuş, telefonuna baxmaq istəyirmiş, güya o evə kişi salıb. 26 sentyabrda ona 1 şillə vurmuş, 29 sentyabrda maşına zorla mindirməyə çalışmış, təpiklə vurmuş, başı maşına dəymiş şişmişdir, 30u günü isə ekspertizaya getmişdir. Hər gün onun qarşısına çıxır, onu hədələyir, onu qızı işə aparıb gətirir. O,,3 ildirki onu bağışlayır, ancaq belə davam edir, hazırda barışmaq fikri yoxdur, 3 ildir belə davam edir, avtobusda qarşısına çıxır kk, sənin başını kəsəcəm. O, şəxsin cərimə cəzası ilə cəzalandırılmasını, onu bir daha narahat etməyəcəyinə, qarşısına çıxmayacağına söz verməsini istəyir. Barəsində inzibati xəta haqqında iş üzrə icraat aparılan şəxsin, inzibati xəta haqqında protokol tərtib etmiş şəxsin, zərərçəkmiş şəxsin izahatlarını dinləyərək, habelə inzibati xəta haqqında işin materiallarını nəzərdən keçirərək məhkəmə hesab edir ki, təhqiqat orqanı tərəfindən düzgün olaraq Şəxs barəsində Azərbaycan Respublikası İnzibati Xətalar Məcəlləsinin 157-ci maddəsi ilə inzibati xəta haqqında protokol tərtib edilmişdir. İş materiallarında olan və məhkəmə iclasında tədqiq edilmiş: 20 oktyabr 2025-ci il tarixli “cinayət işi başlanmasının rədd edilməsi haqqında” qərardan görünür ki, vətəndaş X1 DİN-in 102 Suraxanı RPl-nin 30-cu PŞ-nə etdiyi müraciəti əsasında toplanmış material üzrə cinayət işi başlanması rədd edilməsi, hadisəni törətmiş Şəxs Azərbaycan Respublikası İXM-nin 157-ci maddəsi ilə inzibati məsuliyyətə cəlb edilməsi üçün toplanmış rədd materialı qəbul edilmiş qərarın surəti ilə birlikdə icra edilməsindən ötrü inzibati ərazidə xidmət aparan sahə inspektoruna həvalə olunması, qəbul edilmiş qərarın surəti məlumat üçün qanunla müəyyən edilmiş maraqlı tərəflərə və ibtidai araşdırmaya prosessual rəhbərliyi həyata keçirən Suraxanı rayon prokuroruna göndərilməsi qərara alınmışdır. Azərbaycan Respublikası Səhiyyə Nazirliyi Məhkəmə-Tibbi Ekspertiza və Pataloji Anatomiya Birliyi Publik Hüquqi şəxsi tərəfindən verilmiş xx.xx.2025-ci il tarixli 748 №-li rəyindən görünür ki, X1 bədənində aşkar edilmiş xəsarətlər - başın sağ alın, sol qulaq və sağ baldır nahiyələrində qançırlar, sol yanaq və sol diz oynağı nahiyələrində sıyrıqlar küt əşyanın (əşyaların) təsirindən törənmişlər, qərarın təsviri hissəsində göstərilən xx.xx.2025-ci il tarixdə və şəraitdə, yəni kənar şəxs tərəfindən yetirilə bilərdilər, ümumilikdə və ayrı-ayrılıqda sağlamlığa zərər vurmayan xəsarətlərə aid olduqları üçün dərəcələri təyin edilmir. Quliyeva (Alxasova) Zülfiyyə Niyazi qızının bədənində müəyyən edilmiş xəsarətlərin sayına, xarakterinə və lokalizasiyasına görə həmin xəsarətlərin şəxsin öz-özünə yetirməsi inandırıcı deyil. Beləliklə, Şəxs Azərbaycan Respublikası İXM-nin 157-ci maddəsi ilə nəzərdə tutulan inzibati xətanı törətməsi işdə olan sübutlarla tam sübuta yetirildi. Azərbaycan Respublikası İXM-nin 157-ci maddəsinə əsasən döymə və sair zorakı hərəkətlərlə qəsdən fiziki ağrı yetirməyə görə - üç yüz manatdan beş yüz manatadək məbləğdə cərimə edilir və ya işin hallarına görə, xətanı törədənin şəxsiyyəti nəzərə alınmaqla, iki ayadək müddətə inzibati həbs tətbiq olunur. Qeyd: Bu maddədə nəzərdə tutulmuş əməl sağlamlığa ağır, az ağır və ya yüngül zərər vurmaqla törədildikdə, Azərbaycan Respublikasının Cinayət Məcəlləsinin müvafiq maddələrinə əsasən cinayət məsuliyyətinə səbəb olur. Azərbaycan Respublikası İnzibati Xətalar Məcəlləsinin 2-ci maddəsinə əsasən Azərbaycan Respublikasının inzibati xətalar qanunvericiliyin vəzifələri inasan və vətəndaş hüquqlarını və azadlıqlarını, onun sağlamlığını, əhalinin sanitariyaepidemioloji salamatlığını, ictimai mənəviyyatı, mülkiyyəti, şəxslərin iqtisadi maraqlarını, ictimai qaydanı və ictimai təhlükəsizliyi, ətraf mühiti, idarəçilik qaydalarını qorumaqdan, qanunçuluğu möhkəmləndirməkdən və inzibati xətaların qarşısını almaqdan ibarətdir. Azərbaycan Respublikası İnzibati Xətalar Məcəlləsinin 3-cü maddəsinə əsasən yalnız bu Məcəllə ilə nəzərdə tutulmuş inzibati xətaların törədilməsində təqsirli hesab edilən və inzibati xəta tərkibinin bütün digər əlamətlərini daşıyan (hərəkət və hərəkətsizlik) törətmiş şəxs inzibati məsuliyyətə cəlb olunur və tənbeh edilir. Azərbaycan Respublikası İnzibati Xətalar Məcəlləsinin 9.1-ci maddəsinə əsasən inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına uyğun, qanuni və əsaslı olmalıdır. Azərbaycan Respublikası İXM-nin 12.1-ci maddəsinə əsasən bu məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıqdan törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Azərbaycan Respublikası İXM-nin 21-ci maddəsində göstərilir ki, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Azərbaycan Respublikası İXM-nin 30-cu maddəsinə əsasən hamilə qadınlar və ya himayəsində on dörd yaşınadək uşağı olan qadınlar, on dörd yaşına çatmamış uşağını təkbaşına böyüdən kişilər, on səkkiz yaşına çatmayan şəxslər, orqanizmin funksiyalarının 61-80 faiz və ya 81-100 faiz pozulmasına görə əlilliyi müəyyən edilmiş şəxslər, 18 yaşınadək əlilliyi müəyyən edilmiş şəxslər, altmış yaşına çatmış qadınlar və altmış beş yaşına çatmış kişilər, habelə bu Məcəllənin 41-ci fəslində nəzərdə tutulmuş inzibati xətalar istisna olmaqla digər inzibati xətalara görə hərbi qulluqçular barəsində inzibati həbs tətbiq edilə bilməz. Azərbaycan Respublikası İXM-nin 32.2-ci maddəsinə əsasən inzibati tənbeh tətbiq edilərkən bu Məcəllənin 32.1.1 - 32.1.7-ci maddələrində göstərilməmiş başqa hallar da hakim tərəfindən məsuliyyəti yüngülləşdirən hal qismində nəzərə alına bilər. Məhkəmə Şəxs xx.xx.2020-ci il təvəllüdlü X4 adında övladının olması məsuliyyətini yüngülləşdirən haldır, məsuliyyətini ağırlaşdıran hallar müəyyən edilmədi. Şəxs şəxsiyyətini, məsuliyyətini ağırlaşdıran halın olmamasını, törətmiş olduğu inzibati xətanın xarakterini və inzibati tənbehin məqsədlərinə nail olmasını nəzərə alaraq, ona inzibati cərimə növündə tənbehin təyin edilməsini məqsədə müvafiq hesab edir. Qeyd olunanları nəzərə alaraq və Azərbaycan Respublikası İnzibati Xətalar Məcəlləsinin 40, 43, 48, 48-51, 61, 73, 114, 128-130-cu maddələrini rəhbər tutaraq, məhkəmə QƏRARA ALDİ: Şəxs Azərbaycan Respublikası İnzibati Xətalar Məcəlləsinin 157-ci maddəsi ilə təqsirli bilinib, 500 (beş yüz) manat məbləğində inzibati cərimə edilsin. Qərarın surəti təqdim edildiyi və ya alındığı gündən 10 (on) gün müddətində Suraxanı Rayon Məhkəməsi vasitəsi ilə Bakı Apelyasiya Məhkəməsinə şikayəti və ya apelyasiya protesti verilə bilər. Sədrlik edən: Nərminə Rzayeva