Bakı Şəhəri Xətai Rayon Məhkəməsi Qərar — İş №3(011)-1474/2021

Azərbaycan Respublikası adından QƏRAR Bakı şəhəri İş № 3(011)-1474/2021 19.03.2021 BAKI ŞƏHƏRİ XƏTAİ RAYON MƏHKƏMƏSİ Bakı şəhəri Xətai Rayon Məhkəməsinin hakimi Axundov Fuad Aydın oğlunun sədrliyi, X1 iclas katibliyi, İnzibati xəta haqqında protokolu tərtib edən orqanın nümayəndəsi sahə inspektoru polis leytenantı Davud Soltanovun, Barəsində inzibati xəta haqqında icraat aparılan şəxs Şəxs iştirakları ilə xx.xx.1995-ci ildə Bakı şəhərində anadan olmuş, Azərbaycan Respublikası vətəndaşı, subay, ünvan 1 mənzil 5 ünvanında qeydiyyatda olan Şəxs barəsində Azərbaycan Respublikası İnzibati Xətalar Məcəlləsinin 510, 535.1-ci maddələri ilə Bakı şəhəri Xətai Rayon Polis İdarəsindən daxil olmuş inzibati xəta haqqında işə Bakı şəhəri Xətai Rayon Məhkəməsinin binasında açıq məhkəmə iclasında baxaraq, MÜƏYYƏN ETDİ: Şəxs xx.xx.2021-ci il tarixdə saat 22:00 radələrində Xətai RPİ-nin 37-ci Polis Şöbəsinə içkili vəziyyətdə gələrək, səs-küy salaraq növbətçi hissənin iş rejimini pozmuş, ona dəfələrlə xəbərdarlıq edilsə də buna məhəl qoymayaraq xidmətdə olan polis əməkdaşlarına təhqiramiz ifadələr işlətmiş, şöbənin inzibati binasının qapısını təpikləmiş, polisin qanuni əmrinə tabe olmamış, bununla da ictimai qaydanı pozaraq xırda xuliqanlıq etmiş, həmçinin polis əməkdaşlarının ictimai qaydanın mühafizə vəzifələrini icra edərkən qanuni tələblərinə tabe olmamışdır. Bununla da Şəxs İXM-in 510, 535.1-ci maddələrində nəzərdə tutulmuş inzibati xətanı törətmişdir. Onun barəsində Bakı şəhəri Xətai Rayon Polis İdarəsi tərəfindən xx.xx.2021-ci il tarixli, MN ******* saylı inzibati xəta haqqında protokol tərtib olunmuşdur. Şəxs məhkəməyə verdiyi izahatında göstərdi ki, həqiqətən də xx.xx.2021-ci il tarixdə saat 22:00 radələrində Xətai RPİ-nin 37-ci Polis Şöbəsinə içkili vəziyyətdə gələrək, səs-küy salaraq növbətçi hissənin iş rejimini pozmuş, ona dəfələrlə xəbərdarlıq edilsə də buna məhəl qoymayaraq xidmətdə olan polis əməkdaşlarına təhqiramiz ifadələr işlətmişdir. Bu zaman polis əməkdaşları onun sərxoşluq dərəcəsini müəyyən etmək məqsədilə tibbi müayinəyə aparmışlar və onun orta dərəcəli sərxoş olduğu müəyyən edilmişdir. Məhkəmə iclasında şahid qismində dindirilmiş Xətai RPİ-nin 37-ci Polis Şöbəsinin işçisi X2 izahatında bildirmişdir ki, Şəxs xx.xx.2021-ci il tarixdə saat 22:00 radələrində Xətai RPİ-nin 37-ci Polis Şöbəsinə içkili vəziyyətdə gələrək, səs-küy salaraq növbətçi hissənin iş rejimini pozmuş, ona dəfələrlə xəbərdarlıq edilsə də buna məhəl qoymayaraq xidmətdə olan polis əməkdaşlarına təhqiramiz ifadələr işlətmiş, şöbənin inzibati binasının qapını təpikləmiş, polisin qanuni əmrinə tabe olmamış, bununla da ictimai qaydanı pozaraq xırda xuliqanlıq etmiş, həmçinin polis əməkdaşlarının ictimai qaydanın mühafizə vəzifələrini icra edərkən qanuni tələblərinə tabe olmamışdır. Protokol tərtib etmiş Bakı şəhəri Xətai RPİ-nin 37-ci PŞ-nin nümayəndəsi sahə inspektoru polis leytenantı Davud Soltanov məhkəməyə verdiyi izahatında bildirdi ki, Şəxs xx.xx.2021-ci il tarixdə saat 22:00 radələrində Xətai RPİ-nin 37-ci Polis Şöbəsinə içkili vəziyyətdə gələrək, səs-küy salaraq növbətçi hissənin iş rejimini pozmuş, ona dəfələrlə xəbərdarlıq edilsə də buna məhəl qoymayaraq xidmətdə olan polis əməkdaşlarına təhqiramiz ifadələr işlətmiş, bu səbəbdən polis əməkdaşları onu səs-küy salmamasını, ünvansız nalayiq söyüşlər söyməməsini tələb etmiş, həmin əməkdaşlarla da mübahisə etmiş, onların qanuni tələblərinə tabe olmamış, bununla da ictimai qaydanı pozaraq xırda xuliqanlıq etmiş, həmçinin polis əməkdaşlarının ictimai qaydanın mühafizə vəzifələrini icra edərkən qanuni tələblərinə tabe olmamışdır. Buna görə də barəsində protokol tərtib edilmişdir. İXM-in 510-cu maddəsinə əsasən xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlər inzibati xəta kimi müəyyən edilmişdir. İXM-in 535.1-ci maddəsinə əsasən polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamaq inzibati xəta kimi müəyyən edilmişdir. İXM-in 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. İXM-nin 34.3-cü maddəsinə əsasən şəxsin eyni vaxtda öz hərəkətləri (hərəkətsizliyi) ilə törətdiyi bir neçə inzibati xətaya dair işlərə baxılması eyni orqanın səlahiyyətinə aiddirsə, həmin şəxs daha ciddi xətaya görə müəyyən edilmiş sanksiya çərçivəsində tənbeh edilir. Bu halda törədilmiş xətalardan hər hansı birinə görə nəzərdə tutulmuş əlavə tənbehlərdən biri əsas tənbehə əlavə edilə bilər. Beləliklə sadalananlara əsasən Şəxs həmin inzibati xətanı törətməsi onun barəsində tərtib olunmuş xx.xx.2021-ci il tarixli, MN ******* saylı inzibati xəta haqqında protokol, yaxıradı qeyd edilən şahid ifadəsi, Xətai RPİ-nin 37-ci PŞ-nin məsul növbətçi polis leytenantı Davud Soltanovun, Xətai RPİ-nin 37-ci PŞ-nin təhqiqatçısı polis kapitanı Budaq Budaqlının, Xətai RPİ-nin 37-ci PŞ-nin növbətçi köməkçisi Pərviz Əliyevin, Xətai RPİ-nin 37-ci PŞ-nin ə/m polis mayoru Səid Hüseynovun və Xətai RPİ-nin 37-ci PŞ-nin baş ə/m polis mayoru Ceyhun Vəliyevin imzaladığı xx.xx.2021-ci il tarixli Raportla tam sübuta yetirilir. İnzibati məsuliyyəti istisna edən və icraatı rədd edən hallar yoxdur. İş materiallarındakı xx.xx.2021-ci il tarixli tutma protokoluna əsasən Şəxs həmin tarixdə saat 22:30-da tutulmuşdur. İş materiallarında olan sərxoşluq hallarının bütün növlərinin təyini məqsədi ilə aparılan tibbi müayinə haqqında xx.xx.2021-ci il tarixli 2/3434 saylı protokoldan görünür ki, Şəxs 3,108 promilli miqdarında spirtli içki qəbul etdiyi müəyyən edilmişdir. İXM-in 89.4-cü maddəsinə əsasən barəsində inzibati həbs tənbeh növünün tətbiqini nəzərdə tutan inzibati xəta haqqında iş üzrə icraat aparılan şəxs 24 saatadək, bu Məcəllənin 157, 206, 227, 513, 517-1 və ya 535-ci maddələrində göstərilən xətaları törətmiş şəxslər isə inzibati xəta haqqında işin mürəkkəbliyi və ya xəta törətmiş şəxslərin sayının çoxluğu işin araşdırılmasını gecikdirdiyi və ya başqa formada çətinlik yaratdığı hallarda, habelə şəxsin narkomaniyadan məcburi müalicəyə ehtiyacının olub-olmamasını müəyyənləşdirmək məqsədi ilə tibbi yoxlamaya göndərildiyi hallarda 48 saatadək müddətə inzibati qaydada tutula bilər. İXM-in 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyətini xarakterizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Məhkəmə İXM-in 31.2-ci maddəsinin tələblərini nəzərə alıb, həmçinin inzibati xətanın törədildiyi yeri, vaxtı nəzərə alaraq hesab edir ki, şəxsin törətdiyi inzibati xətanın sanksiyasında nəzərdə tutulmuş inzibati cərimə növündə tənbeh edilməklə inzibati tənbehin məqsədinə nail oluna bilinməz. Belə ki, inzibati tənbehin məqsədlərindən bəhs edilən İXM-in 21-ci maddəsinə əsasən inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Məhkəmə hesab edir ki, iş üzrə inzibati xəta törətmiş şəxsə törətdiyi inzibati xətanın sanksiyasında nəzərdə tutulmuş inzibati həbs növündə inzibati tənbeh verilməsi ilə inzibati tənbehin məqsədlərinə nail oluna bilər, ona görə də həmin növündə inzibati tənbeh verilməsini məqsədəmüvafiq hesab edir. Yuxarıda göstərilənlərə və Azərbaycan Respublikası İnzibati Xətalar Məcəlləsinin 40, 43, 48-51, 114, 128-130-cu maddərini rəhbər tutaraq, QƏRARA ALDİ: Şəxs Azərbaycan Respublikası İnzibati Xətalar Məcəlləsinin 510, 535.1-ci maddələri ilə təqsirli bilinərək, 15 gün müddətinə inzibati həbs edilsin. Həbsetmənin əvvəli xx.xx.2021-ci il tarixindən, saat 22:30 dəqiqədən hesablansın. Qərar dərhal icra edilsin. Şəxsin inzibati həbsin icrası yerinə çatdırılması Bakı şəhəri Xətai rayon polis İdarəsinə həvalə edilsin. Qərarın surəti rəsmi qaydada verildiyi vaxtdan 10 (on) gün müddətində işə baxan Bakı şəhəri Xətai Rayon Məhkəməsi vasitəsilə və ya birbaşa Bakı Apellyasiya Məhkəməsinə apellyasiya şikayəti və ya protesti verilə bilər. Sədrlik edən: Fuad Axundov