Bakı Şəhəri Xətai Rayon Məhkəməsi Qərar — İş №3(011)-2091/2022

Azərbaycan Respublikası adından QƏRAR Bakı şəhəri İş № 3(011)-2091/2022 23.06.2022 BAKI ŞƏHƏRİ XƏTAİ RAYON MƏHKƏMƏSİ Hakim Yaqubov Fərid Murtuza oğlununn sədrliyi, Güləliyev Rahil Oqtay oğlunun katibliyi, X1 iştirakı ilə, Bakı şəhəri Xətai RPİ-nin 37-ci Polis Bölməsinin inzibati tənbeh vermə haqqında 26 mart 2022 il tarixli, EPQ ******* nömrəli qərarından X3 tərəfindən verilmiş şikayətə açıq məhkəmə iclasında baxaraq, MÜƏYYƏN ETDİ : Barəsində inzibati xəta haqqında iş üzrə qərar qəbul olunan X3 şikayət ərizəsi ilə məhkəməyə müraciət edərək, Bakı şəhəri Xətai RPİ-nin 37-ci Polis Bölməsinin inzibati tənbeh vermə haqqında 26 mart 2022 il tarixli, EPQ ******* nömrəli qərarın ləğv edilməsini və inzibati icraata xitam verilməsini xahiş etmişdir. Şikayət onunla əsaslandırılmışdır ki, xx.xx.2022-ci il tarixində AZURE Park Biznes mərkəzinin birinci mərtəbəsində olarkən mülki geyimdə bir nəfər ona yaxınlaşaraq ad və soyadını soruşmuşdur. O, bu məlumatı verdikdən sonra üzünü çevirərək getmişdir. O, həmin şəxsi çağıraraq kim olduğunu və bu məlumatları niyə istədiyini soruşanda isə maskaya görə cərimə edildiyini bildirmişdir. Halbuki həmin vaxt o, maskadan istifadə edirdi və onun maskanın olduğunu, onun əvvəlcə özünü təqdim etməli olduğunu və onun etirazını protokola qeyd etməli olduğunu bildirdikdə isə ona məhəl qoymayaraq saymazyana şəkildə çıxıb getmişdir. xx.xx.2022-ci il tarixində isə onun adına MYGOV elektron məlumatlar bazasında EXP1265942 saylı Protokol yerləşdirildiyini görmüşdür. Bu barədə DİN elektron şikayət ünvanlamış və xx.xx.2022-ci il tarixində şikayətinin qeydə alındığı barədə SMS məlumat almışdır. Lakin iki ay ərzində onun şikayətinə baxılmadığı üçün xx.xx.2022-ci il tarixində AR Baş Prokurorluğuna müraciət etmiş, yalnız bu şikayətindən sonra Xətai rayon Polis İdarəsi tərəfindən onun şikayətinə münasibət bildirilmişdir. xx.xx.2022-ci il tarixində ona EPQ ******* saylı İnzibati tənbeh vermə haqqında qərar göndərilmiş və şikayətinin araşdırıldığı bildirilərək məhkəməyə müraciət etməyi tövsiyyə olunmuşdur. xx.xx.2022-ci il tarixində vermiş olduğu şikayət ərizəsi 001- 10803Q-4122 nömrəsi ilə qeydiyyata alınmış, elektron şikayətə baxılması isə xx.xx.2022ci il tarixədək davam etmiş və AR İXM-nin 131.1-ci maddəsinin tələbləri əsaslı şəkildə pozularaq müddət buraxılmışdır. Bundan əlavə, AR DİN əməkdaşları tərəfindən təqsirli sübuta yetirilə bilməmişdir. AR DİN-yə ünvanladığı müraciətdə, səs və ya video qeydiyyat funksiyalarına malik xüsusi texniki vasitələrlə şikayətə baxılacağı təqdirdə işə baxılmanın yeri və vaxtı barədə əlavə məlumat verilməmişdir. Bu barədə heç bir məlumat verilməməsi onu göstərir ki, Xətai Rayon Polis İdarəsinin İctimai Təhlükəsizlik Şöbəsi işin halları barədə heç bir araşdırma aparmadan qərar qəbul edilmişdir. Bundan başqa bildirmək istərdi ki, onun barəsində protokol tərtib etmiş polis nəfəri nəinki onun müdafiə hüququnu pozmuş əksinə ona məhəl qoymayaraq tərtib etdiyi protokol barəsində belə heç bir məlumat verməmiş və bununla da İnzibati Xətalar Məcəlləsinin 78.2-ci maddəsinin tələblərini pozmuşdur. Əlavə olaraq bildirmək istərdi ki, tibbi maskadan istifadə etdiyi halda barəsində cərimə tətbiq edilməsi əsassızdır və inzibati tənbeh tətbiq edən orqan tərəfindən təqsirli olmağı barədə heç bir sübut təqdim edilməmişdir. AR Nazirlər kabinetinin Xüsusi karantin rejimində tənəffüs yollarını qoruyan fərdi vasitələrdən istifadə ilə bağlı əlavə tədbirlər haqqında 19.1 1.2020-ci il tarixli 451 -saylı qərarı xx.xx.2022-ci il tarixində qüvvədən düşmüşdür və bu səbsəbdən də onun barəsində başlanmış inzibati işə xitam verilməlidir. Qeyd edilənlərə əsasən Bakı şəhəri Xətai RPİ-nin 37-ci Polis Bölməsinin inzibati tənbeh vermə haqqında 26 mart 2022 il tarixli, EPQ ******* nömrəli qərarın ləğv edilməsini və inzibati icraata xitam verilməsini xahiş etmişdir. Məhkəmə iclasında barəsində inzibati xəta haqqında iş üzrə qərar qəbul edilən X3 izahat verərək, Bakı şəhəri Xətai RPİ-nin 37-ci Polis Bölməsi tərəfindən sübut edilməsini istəmiş, təqdim edilə bilmədiyi təqdirdə şikayətinin təmin edilməsini xahiş etdi. Səlahiyyətli orqana (nümayəndəsinə) məhkəmə iclasının vaxtı və yeri barədə lazımi qaydada məlumat verilsə də, məhkəmə iclasında iştirak etməmiş və iştirak etməməsinin səbəbləri barədə hər hansı məlumat verməmişdir. Məhkəmə işə Azərbaycan Respublikası İnzibati Xətalar Məcəlləsinin 61.3-cü maddəsinə əsasən səlahiyyətli orqanın nümayəndəsinin iştirakı olmadan baxılmasını mümkün hesab etmişdir. Məhkəmə işə onların iştirakı olmadan baxılmasını mümkün hesab etdi. Məhkəmə barəsində inzibati xəta haqqında iş üzrə qərar qəbul edilən şəxsi dinləyib, iş materiallarını araşdıraraq hesab edir ki, şikayət qismən təmin edilməlidir. Belə ki, hazırda şikayətçi tərəfindən mübahisələndirilən inzibati xəta haqqında iş üzrə qərar ilə bağlı məhkəmə aşağıdakıları qeyd etməyi zəruri hesab edir: Azərbaycan Respublikası İnzibati Xətalar Məcəlləsinin 8.3-cü maddəsinə əsasən, inzibati məsuliyyətə cəlb olunan şəxsin təqsirli olması barəsində olan şübhələr onun xeyrinə həll olunur. Həmin Məcəllənin 84.1-ci maddəsinə əsasən inzibati xətalar haqqında işlərə baxan hakim, kollegial orqanın üzvü, vəzifəli şəxs işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Azərbaycan Respublikası İnzibati Xətalar Məcəlləsinin yuxarıda sadalanan normalarının tələblərindən görünür ki, şəxsin inzibati məsuliyyətə cəlb edilməsi üçün sübutların məcmusu tələb olunur və heç bir sübutun, o cümlədən sübutlardan biri olan inzibati xəta haqqında protokolun və qərarın qabaqcadan müəyyən edilmiş qüvvəsi yoxdur. Azərbaycan Respublikası İnzibati Xətalar Məcəlləsinin 211.2-ci maddəsinə əsasən epidemiya əleyhinə rejim, sanitariya-gigiyena və karantin rejimləri dövründə fərdi qoruyucu vasitələrdən istifadə ilə bağlı müvafiq icra hakimiyyəti orqanı tərəfindən müəyyən edilən tələblərin pozulmasına, habelə vəzifəli şəxslər və hüquqi şəxslər tərəfindən həmin tələblərin pozulmasının qarşısının alınmamasına görə inzibati məsuliyyət nəzərdə tutulmuşdur. Belə ki, məhkəməyə təqdim edilmiş və iş materiallarına əlavə edilmiş Bakı şəhəri Xətai RPİ-nin 37-ci Polis Bölməsinin inzibati tənbeh vermə haqqında 26 mart 2022 il tarixli, EPQ ******* nömrəli qərarın surətindən görünür ki, X3 26 mart 2022 il tarixdə Azərbaycan Respublikası İnzibati Xətalar Məcəlləsinin 211.2-ci maddəsi ilə nəzərdə tutulmuş inzibati xətanı törətdiyinə görə, barəsində MN ******* nömrəli inzibati xəta haqqında protokol tərtib edilməklə 100 (bir yüz) manat məbləğində cərimə inzibati tənbeh tədbiri tətbiq edilmişdir. Azərbaycan Respublikası İnzibati Xətalar Məcəlləsinin 3-cü maddəsinə əsasən, yalnız bu Məcəllə ilə nəzərdə tutulmuş inzibati xətaların törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizlik) törətmiş şəxs inzibati məsuliyyətə cəlb olunur və tənbeh edilir. Həmin Məcəllənin 6.1-ci maddəsinə əsasən, inzibati xətalara görə inzibati tənbeh bu Məcəlləyə uyğun olaraq tətbiq edilir. Həmin Məcəllənin 6.2-ci maddəsinə əsasən, inzibati xətalar haqqında işlər üzrə icraatın təmin edilməsi tədbirləri tətbiq edilərkən qanunvericiliyin tələblərinə əməl olunması yuxarı orqanların və vəzifəli şəxslərin idarə nəzarəti ilə, məhkəmə və prokuror nəzarəti ilə və şikayət etmək hüququ ilə təmin edilir. Həmin Məcəllənin 9.1-ci maddəsinə əsasən inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına uyğun, qanuni və əsaslı olmalıdır. Azərbaycan Respublikası İnzibati Xətalar Məcəlləsinin 8.2-ci maddəsində göstərilir ki, inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. Normanın mənasından aydın olur ki, şəxsin təqsirli olmasını sübuta yetirmək vəzifəsi qanunla inzibati orqanın, hazırki halda Bakı şəhəri Xətai RPİ-nin 37-ci Polis Bölməsinin üzərinə qoyulsa da, adı çəkilən orqan X2 Azərbaycan Respublikası İnzibati Xətalar Məcəlləsinin 211.2-ci maddəsi ilə nəzərdə tutulmuş inzibati xətanı törətməkdə təqsirli olmasını sübut edə bilməmişdir. Belə olan halda məhkəmə hesab edir ki, X3 barəsində qəbul edilmiş inzibati tənbeh vermə haqqında qərar bütün sübutlara istinad edilmədən və qiymət verilmədən, həmçinin barəsində inzibati xəta haqqında iş üzrə icraat aparılan şəxsin iştirakı təmin olunmadan qəbul edilmiş, həmçinin X2 həmin qərarla İnzibati Xətalar Məcəlləsinin 211.2-ci maddəsində nəzərdə tutulan inzibati xətanı törətməsi tam araşdırılmamış və qərar qəbul edilərkən səlahiyyətli orqanın (vəzifəli şəxsin) gəldiyi nəticələr üzrə mühüm əhəmiyyət kəsb edən bütün faktiki hallar araşdırılmamış və inzibati xəta haqqında qanunvericiliyin tələbləri inzibati xəta haqqında işin hallarının hərtərəfli, tam və obyektiv araşdırılmasına maneə törədəcək dərəcədə pozulmuşdur. Azərbaycan Respublikası İnzibati Xətalar Məcəlləsinin 135.1-ci maddəsinə əsasən, inzibati xəta haqqında iş üzrə qərarın ləğv edilməsi və ya dəyişdirilməsi üçün əsaslar aşağıdakılardır: 135.1.1. hakimin, səlahiyyətli orqanın (vəzifəli şəxsin) gəldiyi nəticələr üzrə mühüm əhəmiyyət kəsb edən bütün faktiki halların araşdırılmaması; 135.1.2. hakimin, səlahiyyətli orqanın (vəzifəli şəxsin) gəldiyi nəticələrin işin faktiki hallarına uyğun olmaması; 135.1.3. hakim, səlahiyyətli orqan (vəzifəli şəxs) tərəfindən müəyyən edilmiş iş üçün əhəmiyyətli olan halların sübuta yetirilməməsi; 135.1.4. inzibati məsuliyyət müəyyən edən qanunun normasının düzgün tətbiq edilməməsi; 135.1.5. tətbiq edilmiş tənbehin bu Məcəllənin 31–34-cü maddələrinin tələblərinə uyğun olmaması; 135.1.6. bu Məcəllə ilə müəyyən edilmiş tələblərın işin hallarının hərtərəfli, tam və obyektiv araşdırılmasına maneə törədəcək dərəcədə pozulması. Həmin Məcəllənin 129.1.3-cü maddəsinə əsasən, səlahiyyətli orqanın (vəzifəli şəxsin) qərarından məhkəməyə verilən şikayət, şikayət verən şəxsin yaşayış yeri və ya hüquqi şəxsin ünvanının olduğu yer üzrə rayon (şəhər) məhkəməsinə verilir. Həmin Məcəllənin 130.1-ci maddəsinə əsasən, qərarın surəti bu Məcəllənin 57-ci maddəsində nəzərdə tutulmuş rəsmi qaydada verildiyi vaxtdan on gün müddətində inzibati xəta haqqında iş üzrə qərardan şikayət verilə bilər. Beləliklə, məhkəmə hesab edir ki, X2 şikayəti qismən təmin edilməli, Bakı şəhəri Xətai RPİ-nin 37-ci Polis Bölməsinin inzibati tənbeh vermə haqqında 26 mart 2022 il tarixli, EPQ ******* nömrəli qərarı ləğv edilməli və inzibati xəta haqqında iş yenidən baxılması üçün Bakı şəhəri Xətai RPİ-nin 37-ci Polis Bölməsinə göndərilməlidir. Şərh olunanlara əsasən və Azərbaycan Respublikası İnzibati Xətalar Məcəlləsinin 128-137-ci maddələrini rəhbər tutaraq, məhkəmə QƏRARA ALDİ: X3 tərəfindən verilmiş şikayət qismən təmin edilsin. Bakı şəhəri Xətai RPİ-nin 37-ci Polis Bölməsinin inzibati tənbeh vermə haqqında 26 mart 2022 il tarixli, EPQ ******* nömrəli qərarı ləğv edilsin. İnzibati xəta haqqında iş yenidən baxılması üçün Bakı şəhəri Xətai RPİ-nin 37-ci Polis Bölməsinə göndərilsin. Qərardan, rəsmi qaydada verildiyi vaxtdan 10 (on) gün müddətində Bakı Apellyasiya Məhkəməsinə şikayət verilə bilər. Sədrlik edən: Fərid Yaqubov