Bakı Şəhəri Xətai Rayon Məhkəməsi Qərar — İş №3(011)-2384/2024

Azərbaycan Respublikası adından QƏRAR Bakı şəhəri İş № 3(011)-2384/2024 20.06.2024 BAKI ŞƏHƏRİ XƏTAİ RAYON MƏHKƏMƏSİ Hakim Sadıxov Rəfail Adil oğlunun sədrliyi, Əliyeva Nailə Namiq qızının katibliyi, X1 iştirakı ilə, Bakı Şəhər Baş Polis İdarəsinin X8i İdarəsi tərəfindən 19 oktyabr 2023-cü il tarixli, İXP ******* nömrəli inzibati xəta haqqında protokol əsasında qəbul edilmiş inzibati tənbeh vermə haqqında qərarından barəsində inzibati xəta haqqında iş üzrə qərar qəbul edilən X5 tərəfindən verilmiş şikayətə açıq məhkəmə iclasında baxaraq, MÜƏYYƏN ETDİ : Barəsində inzibati xəta haqqında iş üzrə qərar qəbul olunan X5 şikayət ərizəsi ilə məhkəməyə müraciət edərək, Bakı Şəhər Baş Polis İdarəsinin X8i İdarəsi tərəfindən 19 oktyabr 2023-cü il tarixli, İXP ******* nömrəli inzibati xəta haqqında protokol əsasında qəbul edilmiş inzibati tənbeh vermə haqqında qərarın ləğv edilməsini və iş ürə icraata xitam verilməsini xahiş etmişdir. Şikayəti onunla əsaslandırılmışdır ki, X2 Yol Polis İdarəsinin əməkdaşı tərəfindən İXP5774304 saylı xx.xx.2023-cü il tarixli protokolu və onun əsasında çıxarılmış qərarı ilə 80 manat məbləğində cərimə edilmişdir. Həmin protokol və qarərdan verdiyi şikayət üzrə Xətai rayon Məhkəməsində qəbul edilmiş xx.xx.2023-cü il tarixdə qərara əsasən inzibati tənbeh haqqında qərar yenidən baxılması üçün geri qaytarılmışdır. Bundan sonra onun iştirakı və xəbəri olmadan həmin qərar yenidən baxılmış və İXMnin 327.2-ci maddəsilə yenidən cərimə edilməsi barədə 04.05.24-cü il tarixdə email vasitəsilə göndərilən şikayətə əlavə etdiyi məktubda bilmiş, qərar isə yenə də göndərilməmişdir. Hal-hazırda həmin cəriməyə görə dəbbə pulu yığılmış və avtomobili haqqında həbs qərarı verilmişdir. Həmin qərar qanunsuz və əsassız çıxarılmışdır. Həmin qərardan Xətai rayon Məhkəməsinə 10 may 2024-cü tarixdə verdiyi şikayətə baxılaraq geri qaytarılmış, lakin indiyə qədər qərardadı rəsmi qaydada almadığına görə şikayətini nöqsanları aradan qaldırmaqla yenidən göndərmişdir. Qeyd edirəm ki, geri qaytarılan sənədləri rəsmi qaydada almadığına görə şikayət etmə müddətinin axımı dayanmışdır. Odur ki, həmin müddət X5 tərəfindən ötürülməmişdir. Qeyd edir ki, DYP əməkdaşı 19 oktyabr tarixində onu bravo market yaxınlığında saxladaraq qayda pozduğunu bildirmiş və heç nə demədən çıxıb getmişdir. Bundan bir müddət sonra sms radar vasitəsilə cərimə olunmağı barədə bildiriş gəlmişdir. Protokol elektron tərtib edilmişdir. Qeyd edir ki, əgər inzibati xəta törətməyi DYP əməkdaşı tərəfindən bilavasitə aşkar edilmişdirsə, nə səbəbə ona yerindəcə protokol tərtib edilməmiş və qeydlər aparmaq, imza etmək kimi hüquqları pozulmuşdur. Hazırki vaxta qədər inzibati xətanı törətməyi ilə bağlı sübutlar yəni foto, video materiallar istifadəsində olan elektron kabinetə yerləşdirilməmişdir. İnzibati Xətalar Məcəlləsinin 38.6-ci maddəsinə əsasən Bu Məcəllənin 122.1-ci maddəsində nəzərdə tutulmuş inzibati tənbeh vermə haqqında elektron qərar və onun əlavəsi (foto və ya video materiallar) inzibati xətanın törədildiyi gündən bir gün müddətində hər bir nəqliyyat vasitəsinin istifadəçisi üçün internet informasiya resursunda yaradılan elektron kabinetdə yerləşdirilmədikdə, şəxs inzibati məsuliyyətə cəlb oluna bilməz. Göründüyü kimi ona İXM-nin 327.2-ci maddəsilə protokol və qərar elektron formada yazılmış lakin elektron informasiya sisteminə inzibati tənbeh vermə haqqında elektron qərar və onun əlavəsi (foto və ya video materiallar) indiyə qədər yerləşdirilməmişdir, ona görə də əsassız və qanunsuz qəbul edilən qərar mütləq qaydada ləğv olunmalıdır. Yuxarıda göstərilənlərə əsasən və Azərbaycan Respublikasının İnzibati Xətalar Məcəlləsinin 3, 38.6, 40, 48, 122.1-ci maddələrinə əsasən, Bakı Şəhər Baş Polis İdarəsi X8 İdarəsinin xx.xx.2023-cü il tarixli Xətai rayon Məhkəməsinin qərarına yenidən baxmaqla qəbul etdiyi inzibati tənbeh vermə haqqında qərarın ləğv edilməsi və inzibati xəta haqqında iş üzrə icraata xitam verilməsinə dair yeni qərar qəbul edilməsi xahiş edilmişdir. Məhkəmə iclasında barəsində inzibati xəta haqqında iş üzrə qərar qəbul edilən X5 şikayətin məzmununa uyğun izahat verərək, şikayətin təmin olunması və barəsində tərtib edilmiş 19 oktyabr 2023-cü il tarixli, İXP ******* nömrəli inzibati xəta haqqında protokol əsasında qəbul edilmiş qərarın ləğv edilərək işə xitam verilməsini xahiş etdi. Müvafiq qaydada işə baxılmasının yeri və vaxtı barədə xəbərdar olunmuş Bakı Şəhər Baş Polis İdarəsinin X8i İdarəsi nümayəndəsi vasitəsilə məhkəmə iclasında təmsil olunmamışdır. Məhkəmə işə onların iştirakı olmadan baxılmasını mümkün hesab etdi. Məhkəmə barəsində inzibati xəta haqqında iş üzrə qərar qəbul edilən şəxsi dinləyib, iş materiallarını araşdıraraq hesab edir ki, şikayət qismən təmin edilməlidir. İş materiallarında olan və məhkəmə baxışında tədqiq edilmiş: 19 oktyabr 2023-cü il tarixli, İXP ******* nömrəli inzibati xəta haqqında protokol əsasında qəbul edilmiş 20 fevral 2024-cü il tarixli inzibati tənbeh vermə haqqında qərardan görünür ki, X5 Azərbaycan Respublikası İnzibati Xətalar Məcəlləsinin 327.2-ci maddəsində nəzərdə tutulmuş inzibati xətanın törədilməsində təqsirli bilinərək, barəsində 80 manat inzibati tənbeh tədbiri tətbiq edilmişdir. Həmçinin cərimənin üzərinə əlavə olaraq 48 manat məbləğində dəbbə pulu hesablanmışdır və X3 ödəməli olduğu ümumi məbləğ 128 manat olmuşdur. Azərbaycan Respublikasının İnzibati Xətalar Məcəlləsinin: 327.2-ci maddəsinə əsasən, svetoforun və ya nizamlayıcının qadağanedici işarəsi verilərkən hərəkətin davam etdirilməsinə, 3.1 “Giriş qadağandır” yol nişanının tələblərinin və ya sərnişin daşıma, əks istiqamətli hərəkət zolağına çıxmaqla ötmə və ya manevr etmə, yolayrıcını keçmə qaydalarının pozulmasına, ümumi istifadədə olan nəqliyyat vasitələrinin, yaxud adamlar daşınan yük avtomobillərinin sərnişinlərlə yanacaqdoldurma məntəqəsinə daxil olmasına, 1.1, 1.3 və 1.11 üfüqi nişanlanma xətlərinin tələblərinə riayət etməyərək sola və ya geriyə dönməyə, yaxud maneəni kənardan keçməyə görə inzibati məsuliyyət nəzərdə tutulmuşdur. 3-cü maddəsinə əsasən, yalnız bu Məcəllə ilə nəzərdə tutulmuş inzibati xətaların törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizlik) törətmiş şəxs inzibati məsuliyyətə cəlb olunur və tənbeh edilir. 12-ci maddəsinə əsasən, bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. 8.2-ci maddəsinə əsasən, inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. 8.3-cü maddəsinə əsasən, inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. 76.1-ci maddəsinə əsasən, inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktiki məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. 84.1-ci maddəsinə əsasən, inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. 84.2-ci maddəsinə əsasən, heç bir sübutun qabaqcadan müəyyən edilmiş qüvvəsi yoxdur. 126.1-ci maddəsinə əsasən, barəsində inzibati xəta haqqında iş üzrə qərar qəbul edilmiş şəxs inzibati xəta törətməsi barədə bu Məcəllənin 125.2.2-ci maddəsində və ya 125.2.3-cü maddəsində (elektron kabinetdə mobil telefon nömrəsi olmadığı halda) müəyyən olunmuş qaydada məlumatlandırıldığı vaxtdan 20 gün müddətində yuxarı səlahiyyətli orqana (vəzifəli şəxsə) və ya məhkəməyə şikayət edə bilər. 134.1.4-cü maddəsinə əsasən, inzibati xəta haqqında iş üzrə qərardan verilən şikayətə və ya protestə baxılaraq bu Məcəllənin 135.1.1 və 135.1.6-cı maddələri ilə müəyyən edilmiş hallarda qərarın ləğv edilməsi və inzibati xəta haqqında işin yenidən baxılmaq üçün hakimə, səlahiyyətli orqana (vəzifəli şəxsə) göndərilməsi haqqında qərar qəbul edilir. 135.1.6-cı maddəsinə əsasən, bu Məcəllə ilə müəyyən edilmiş tələblərin işin hallarının hərtərəfli, tam və obyektiv araşdırılmasına maneə törədəcək dərəcədə pozulması, inzibati xəta haqqında iş üzrə qərarın ləğv edilməsi və ya dəyişdirilməsi üçün əsasdır. Yuxarıda sadalanan normaların tələblərindən göründüyü kimi, şəxsin inzibati məsuliyyətə cəlb edilməsi üçün sübutların məcmusu tələb olunur və heç bir sübutun, o cümlədən sübutlardan biri olan inzibati xəta haqqında protokolun və qərarın qabaqcadan müəyyən edilmiş qüvvəsi yoxdur. Məhkəmə hesab edir ki, barəsində inzibati xəta haqqında iş üzrə qərar qəbul edilən X3 iştirakı ilə şikayət ərizəsində göstərilən dəlillər hərtərəfli, tam və obyektiv surətdə araşdırılmalı, şikayətin dəlillərinin əsaslı və ya əsassız olmasına qiymət verilməlidir. Göstərilənlərə əsasən məhkəmə hesab edir ki, şikayət qismən təmin edilməli, Bakı Şəhər Baş Polis İdarəsinin X8i İdarəsi tərəfindən 19 oktyabr 2023-cü il tarixli, İXP ******* nömrəli inzibati xəta haqqında protokol əsasında qəbul edilmiş inzibati tənbeh vermə haqqında qərar ləğv edilməli və inzibati xəta haqqında iş yenidən baxılması üçün Bakı Şəhər Baş Polis İdarəsinin X8i İdarəsinə göndərilməlidir. Şərh olunanlara əsasən və Azərbaycan Respublikası İnzibati Xətalar Məcəlləsinin 32, 33, 114, 115, 117-ci maddələrini rəhbər tutaraq, məhkəmə q ə r a r a a l d ı: X5 tərəfindən verilmiş şikayət qismən təmin edilsin. Bakı Şəhər Baş Polis İdarəsinin X8i İdarəsi tərəfindən 19 oktyabr 2023-cü il tarixli, İXP ******* nömrəli inzibati xəta haqqında protokol əsasında qəbul edilmiş qərar ləğv edilsin. İnzibati xəta haqqında iş yenidən baxılması üçün Bakı Şəhər Baş Polis İdarəsinin X8i İdarəsinə göndərilsin. Qalan hissədə şikayət təmin edilməsin. Qərarın surəti təqdim edildiyi və ya alındığı gündən 10 (on) gün müddətində Bakı Apellyasiya Məhkəməsinə şikayət verilə bilər. Sədrlik edən: Rəfail Sadıxov