Bakı Şəhəri Xətai Rayon Məhkəməsi Qərar — İş №3(011)-2772/2025

Azərbaycan Respublikası adından QƏRAR Bakı şəhəri İş № 3(011)-2772/2025 30.04.2025 BAKI ŞƏHƏRİ XƏTAİ RAYON MƏHKƏMƏSİ Hakim Sadıxov Rəfail Adil oğlunun sədrliyi, Bayramova Nərmin Nizami qızının katibliyi, Barəsində inzibati protokol tərtib edilmiş şəxs Şəxs iştirakı ilə, Şəxs barəsində Azərbaycan Respublikasının İnzibati Xətalar Məcəlləsinin 327.8-ci maddəsi ilə Bakı şəhəri Xətai Rayon Polis İdarəsindən daxil olmuş inzibati xəta haqqında materiala baxaraq, MÜƏYYƏN ETDİ: Bakı şəhəri Xətai Rayon Polis İdarəsindən daxil olmuş Cinayət işinin başlanmasının rədd edilməsi haqqında Bakı şəhəri Xətai RPİ-nin Təhqiqat şöbəsinin baş təhqiqatçısı, polis polkovnik-leytenantı Teymur Ağamirovun 12 fevral 2025-ci il tarixli qərardan və həmin qərara əsasən tərtib edilmiş 13 mart 2025-ci il tarixli, İXP ******* nömrəli inzibati xəta haqqında protokoldan görünür ki, Şəxs xx.xx.2025-ci il tarixdə saat 19:45 radələrində idarə etdiyi «Mercedes Benz E220 CDİ Minik» markalı **-LV-*** dövlət qeydiyyat nişanlı avtomobili ilə Xətai rayonu, 8 Noyabr prospekti ilə Nargilə dairəsi istiqamətində hərəkətdə olan yolun sağında yerləşən Socar YDM-ə daxil olmaq üçün saatda 5 km surətlə hərəkətinə davam edərkən 8 Noyabr prospekti ilə düzünə eyni istiqamətdə olun velosipedlərin hərəkəti üçün nəzərdə tutulan yerində velosipedlə hərəkətdə olan Suslova Lidiianın qarşısına çıxmış və sonuncu avtomobilin sağ orta hissəsi ilə toqquşaraq yıxılıb xəsarət almışdır. Daha sonra sürücü xəsarət alan şəxsə yardım etməyərək hadisə yerindən yayınmışdır. Məhkəmə iclasında barəsində inzibati xəta haqqında iş üzrə icraat aparılan Şəxs bildirdi ki, xx.xx.2025-ci il tarixdə saat 19:45 radələrində idarə etdiyi «Mercedes Benz E220 CDİ Minik» markalı **-LV-*** dövlət qeydiyyat nişanlı avtomobili ilə Xətai rayonu, 8 Noyabr prospekti ilə Nargilə dairəsi istiqamətində hərəkətdə olan zaman yolun sağında yerləşən Socar YDM-ə daxil olmaq üçün saatda 5 km surətlə hərəkətinə davam edib yanacaq doldurma məntəqəsinə daxil olarkən sağında hərəkətdə olan velosipedçi avtomobilin sağ qabaq və arxa qapının ortasından dəyərək yıxılmışdır. O və yanındakı tanışı avtomobildən düşərək velosipedçiyə yaxınlaşmış və hər hansı bir xəsarət almadığını görmüşdür. Sonra velosipedçi zəng vurmuş və zəng vurduğu şəxslə danışmış, həmin şəxs velosipedçinin xəsarət almadığını soruşmuş və onlar bildirmişdirlər ki salamatçılıqdır, xəsarət almamışdır. Sonra velosipedçiylə sağollaşmış və çıxıb getmişdirlər. Velosipedçi isə onların sağı ilə yoluna davam etmişdir. O velosipedçini toqquşma anında gördüyünü bildirmişdir.Qeyd edilənlərə əsasən onun barəsində yüngül inzibati tənbeh tədbirinin görülməsini xahiş etmişdir. Müvafiq qaydada işə baxılmasının yeri və vaxtı barədə xəbərdar olunmuş Bakı şəhəri Xətai Rayon Polis İdarəsi nümayəndəsi vasitəsi ilə məhkəmə iclasında təmsil olunmamışdır. Məhkəmə işə onların iştirakı olmadan baxılmasını mümkün hesab etdi. İş materiallarında olan və məhkəmə baxışında tədqiq edilmiş: 12 fevral 2025-ci il tarixli “Cinayət işinin başlanmasının rədd edilməsi barədə” Bakı şəhəri Xətai RPİ-nin Təhqiqat şöbəsinin baş təhqiqatçısı, polis polkovnik-leytenantı Teymur Ağamirovun qərarından görünür ki, material üzrə cinayət işinin başlanması rədd edilmiş, «Mercedes Benz E220 CDİ Minik» markalı **-LV-*** dövlət qeydiyyat nişanlı avtomobilin sürücüsü Şəxs barəsində Azərbaycan Respublikası İXM-nin 327.8-ci maddəsi ilə inzibati qaydada tədbir görülməsindən ötrü qərarın surəti Xətai DYPŞ-nə göndərilmişdir. 12 fevral 2025-ci il tarixli “Məhkəmə-Tibbi Ekspertiza və X1” Publik hüquqi şəxsin 126 nömrəli canlı şəxsin məhkəmə-tibb müayinəsi rəyindən görünür ki, Suslova Lidiiada sağ diz oynağının yumşaq toxumalarının şişkinliyi halında əzilməsi, dərialtı hematoması və hərəkət məhdudluğu, sol əlin dərialtı hematoması, sol bazu, sağ dirsək oynağı, sol sağrı, sağ qalça nahiyələrinin qançırları və sol baldırın sıyrıqları müəyyən edildi. Xəsarətlər bərk küt əşya təsirindən törənmişlər, qərarda göstərildiyi kimi xx.xx.2025-ci il tarixdə YNH zamanı törənə bilərdi, dərəcəsinə görə sağlamlığın qısa müddətə pozulmasına səbəb olan sağlamlığa YÜNGÜL zərərvurmaya aid edilmişdir. Xətai RPİ-nin DYPŞ-nin 13 mart 2025-ci il tarixli, İXP ******* nömrəli inzibati xəta haqqında protokoldan görünür ki, Şəxs xx.xx.2025-ci il tarixdə saat 19:45 radələrində idarə etdiyi «Mercedes Benz E220 CDİ Minik» markalı **-LV-*** dövlət qeydiyyat nişanlı nəqliyyat vasitəsini idarə edərkən Azərbaycan Respublikasının İnzibati Xətalar Məcəlləsinin 327.8-ci maddəsində nəzərdə tutulmuş inzibati xəta törədilmişdir. Azərbaycan Respublikası İnzibati Xətalar Məcəlləsinin 327.8-ci maddəsinə əsasən, bu Məcəllənin 327.1-327.6, 328 və 330-cu maddələrində nəzərdə tutulmuş xətalar nəticəsində zərərçəkmiş şəxsin sağlamlığına yüngül bədən xəsarətinin yetirilməsinə görə inzibati məsuliyyət nəzərdə tutulmuşdur. Həmin Məcəllənin 34.3-cü maddəsinə əsasən, şəxsin eyni vaxtda öz hərəkətləri (hərəkətsizliyi) ilə törətdiyi bir neçə inzibati xətaya dair işlərə baxılması eyni orqanın səlahiyyətinə aiddirsə, həmin şəxs daha ciddi xətaya görə müəyyən edilmiş sanksiya çərçivəsində tənbeh edilir. Bu halda törədilmiş xətalardan hər hansı birinə görə nəzərdə tutulmuş əlavə tənbehlərdən biri əsas tənbehə əlavə edilə bilər. Beləliklə, İnzibati Xətalar Məcəlləsinin 327.8-ci maddəsində nəzərdə tutulmuş inzibati xətanın Şəxs tərəfindən törədilməsi məhkəmə iclasında tədqiq edilmiş inzibati materialda olan sənədlərlə sübuta yetirilmişdir. Azərbaycan Respublikası İnzibati Xətalar Məcəlləsinin 3-cü maddəsinin tələbinə görə yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Azərbaycan Respublikası İnzibati Xətalar Məcəlləsinin 12.1-ci maddəsinə əsasən, bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıqdan törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Həmin Məcəllənin 31.2-ci maddəsinə əsasən, inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyəti, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınmalıdır. Məhkəmə törədilmiş inzibati xətanın xarakterini, barəsində inzibati xəta haqqında iş üzrə icraat aparılan şəxsin təqsirinin dərəcəsini nəzərə alaraq hesab edir ki, Şəxs Azərbaycan Respublikası İnzibati Xətalar Məcəlləsinin 327.8-ci maddəsində nəzərdə tutulmuş inzibati xətanı törətməkdə təqsirli bilinməli və həmin maddənin sanksiyasının hədləri daxilində cərimə növündə inzibati tənbeh tətbiq edilməlidir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 43, 114 və 115-ci maddələrini rəhbər tutaraq QƏRARA ALDI: Şəxs Azərbaycan Respublikası İnzibati Xətalar Məcəlləsinin 327.8-ci maddəsində nəzərdə tutulmuş inzibati xətanı törətməkdə təqsirli bilinərək, 300 (üç yüz) manat məbləğində cərimə edilsin. Qərarın surəti təqdim edildiyi və ya alındığı gündən 10 (on) gün müddətində Azərbaycan Respublikası İnzibati Xətalar Məcəlləsinin 129-cu maddəsində müəyyən edilmiş qaydada Bakı Apellyasiya Məhkəməsinə şikayət verilə bilər. Sədrlik edən: Rəfail Sadıxov