Bakı Şəhəri Xətai Rayon Məhkəməsi Qərar — İş №3(011)-3148/2021

Azərbaycan Respublikası adından QƏRAR Bakı şəhəri İş № 3(011)-3148/2021 24.08.2021 BAKI ŞƏHƏRİ XƏTAİ RAYON MƏHKƏMƏSİ Hakim Hüseyn Cavid Vaqif oğlunun sədrliyi, Səfərov Orxan Novruz oğlunun katibliyi, barəsində inzibati xəta haqqında iş üzrə icraat aparılan şəxs Şəxs, inzibati xəta haqqında protokolu tərtib etmiş Bakı şəhəri Xətai Rayon Polis İdarəsinin 34-cü polis şöbəsinin polis sahə inspektoru, polis leytenantı X3 iştirakları ilə, xx.xx.1984-ci il tarixdədə Qazax rayonu Ağköynək kəndində doğulmuş, Azərbaycan Respublikasının vətəndaşı, subay, orta təhsilli, işləməyən, Qazax rayonu Ağköynək Ərazi Dairəsi Ağköynək kəndində qeydiyyatda olmaqla, ünvan 1 ünvanında yaşayan Şəxs Azərbaycan Respublikası İnzibati Xətalar Məcəlləsinin 510 və 535.1-ci maddəsi ilə nəzərdə tutulmuş inzibati xəta törətməsi haqqında materiala açıq məhkəmə iclasında baxaraq, MÜƏYYƏN ETDİ : Bakı şəhəri Xətai Rayon Polis İdarəsinin 34-cü Polis Şöbəsindən daxil olmuş 23.08.2021-ci il tarixli, MN ******* nömrəli və 23.08.2021-ci il tarixli, MN ******* nömrəli inzibati xəta haqqında protokollarda göstərilmişdir ki, Şəxs 23.08.2021-ci il tarixdə Bakı şəhəri Xətai RPİ-nin 34-cü PŞ-nə gələrək inzibati binada polis əməkdaşlarının qanuni tələblərinə tabe olmamış, onların ünvanına nalayiq söyüşlər işlədərək xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlər etmişdir. Barəsində inzibati xəta haqqında iş üzrə icraat aparılan şəxs Şəxs məhkəmə iclasında özünü təqsirli bilərək izahatında göstərmişdir ki, 23 avqust 2021-ci il tarixdə Bakı şəhəri Xətai RPİ-nin 34-cü PŞ-nə gedib orada polis əməkdaşlarını istəmədən söymüş, həmçinin, polis əməkdaşının ictimai qaydanı pozmamaq barədə qanuni tələblərinə tabe olmamışdır. Törətdiyi əməldən səmimi peşmançılıq çəkməsini, hadisə zamanı özündə olmamasını və həyacanlı olmasını, bir daha belə hərəkətlər etməyəcəyinə söz verməsini, himayəsində biri azyaşlı olmaqla üç övladının olmasını nəzərə alaraq barəsində yüngül tənbeh tədbirinin tətbiq edilməsini xahiş etmişdir. Məhkəmə iclasında inzibati xəta haqqında protokolu tərtib etmiş Bakı şəhəri Xətai Rayon Polis İdarəsinin 34-cü Polis Şöbəsinin sahə inspektoru, polis leytenantı Tələt Abbaslı protokolların məzmununa uyğun izahat verərək barəsində inzibati xəta haqqında iş üzrə icraat aparılan şəxs Şəxs barəsində qanunamüvafiq qaydada qərar qəbul edilməsini xahiş etmişdir. İş materiallarında olan və məhkəmə baxışında tədqiq edilmiş: Bakı şəhər Xətai RPİ-nin 34-cü polis şöbəsinin rəisi vəzifəsini müvəqqəti icra edən polis polkovnik–leytenentı X1 tərəfindən Xətai Rayon Polis İdarəsinin rəisi polis polkovniki İlqar Məmmədova ünvanlanmış raportdan görünür ki, Şəxs mütəmadi olaraq Bakı şəhəri Xətai RPİ-nin 34-cü PŞ-nə gələrək müraciət etdiyi şikayətindən razı olmadığı üçün polis şöbəsinin daxilində işin gedişatına maneçilik törədərək polis əməkdaşlarının ünvanına nalayiq ifadələr işlədərək polisin qanuni tələbinə riayət etməmiş, polis əməkdaşına tabesizlik göstərmişdir; Bakı şəhər Xətai RPİ-nin TİQ-in baş inspektoru, polis mayoru X11, 34-cü PŞ-nin rəis müavini, polis polkovnik–leytenentı X1, İTŞ-nin rəisi, polis polkovnik–leytenentı X4, İŞ-nin rəisi polis polkovnik–leytenentı X15, RPİ-nin dəftərxanasının kiçik inspektoru, polis serjantı X6, dəftərxananın mülki operatoru X2, 34-cü PŞ-nin CA üzrə əməliyyat müvəkkili, polis leytenantı X5 iştirakı ilə tərtib edilmiş 23.08.2021-ci il tarixli protokoldan görünür ki, Şəxs Azərbaycan Respublikası Prezident Aparatının qarşısına gedərək müraciət etməsi ilə əlaqədar olaraq Xətai RPİ-nin rəisi İ.Məmmədov tərəfindən qəbul olunub dinlənilərkən polis əməkdaşlarının ünvanına nalayiq ifadələr işlətməklə yanaşı uca səslə danışaraq, səs-küy yaradaraq, şikayətinin məzmunundan kənar sözlər işlədərək, polisin işgüzar nüfuzuna xələl gətirən ifadələr işlədərək təhqir etmişdir. 23.08.2021-ci il tarixli, MN ******* nömrəli inzibati xəta haqqında protokoldan görünür ki, Şəxs 23.08.2021-ci il tarixdə Bakı şəhəri Xətai RPİ-nin 34-cü PŞ-nə gələrək inzibati binada polis əməkdaşlarının qanuni tələblərinə tabe olmamışdır. Bu səbəbdən barəsində İnzibati Xətalar Məcəlləsinin 535.1-ci maddəsində nəzərdə tutulmuş inzibati xətanı törətməsi ilə bağlı inzibati xəta haqqında protokol tərtib edilmişdir; 23.08.2021-ci il tarixli, MN ******* nömrəli inzibati xəta haqqında protokoldan görünür ki, Şəxs 23.08.2021-ci il tarixdə Bakı şəhəri Xətai RPİ-nin 34-cü PŞ-nə gələrək inzibati binada polis əməkdaşlarının qanuni tələblərinə tabe olmamış, onların ünvanına nalayiq söyüşlər işlədərək təhqir etmiş, nəticədə ictimai qaydanı pozaraq xırda xuliqanlıq etmişdir. Bu səbəbdən barəsində İnzibati Xətalar Məcəlləsinin 510-cu maddəsində nəzərdə tutulmuş inzibati xətanı törətməsi ilə bağlı inzibati xəta haqqında protokol tərtib edilmişdir; inzibati qaydada tutma haqqında 23.08.2021-ci il tarixli protokoldan görünür ki, Şəxs həmin tarixdə, saat 22:00-da inzibati qaydada tutulmuşdur; “AZEMİS” Elektron məhkəmə informasiya sistemindən çıxarışın surətindən görünür ki, Şəxs himayəsində 06.08.2009-cu il təvəllüdlü X7 adlı azyaşlı uşağı vardır. Azərbaycan Respublikası İnzibati Xətalar Məcəlləsinin: 12-ci maddəsinə əsasən bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur; 30.2-ci maddəsinə əsasən hamilə qadınlar və ya himayəsində on dörd yaşınadək uşağı olan qadınlar, on dörd yaşına çatmamış uşağını təkbaşına böyüdən kişilər, on səkkiz yaşına çatmayan şəxslər, birinci və ya ikinci dərəcə əlilliyi olan şəxslər, sağlamlıq imkanları məhdud 18 yaşınadək uşaqlar, altmış yaşına çatmış qadınlar və altmış beş yaşına çatmış kişilər, habelə bu Məcəllənin 41-ci fəslində nəzərdə tutulmuş inzibati xətalar istisna olmaqla digər inzibati xətalara görə hərbi qulluqçular barəsində inzibati həbs tətbiq edilə bilməz. 31.4-1-ci maddəsinə əsasən inzibati qaydada tutulmuş şəxs barəsində inzibati həbs istisna olmaqla tətbiq edilən digər inzibati tənbehin həddi, bu Məcəllənin Xüsusi hissəsində inzibati xətanın törədilməsinə görə müəyyən edilən inzibati tənbehin yuxarı həddinin dörddə üçündən çox ola bilməz. 32.1.3-cü maddəsinə əsasən inzibati xətanın hamilə qadın və ya himayəsində azyaşlı uşağı olan qadın tərəfindən törədilməsi İnzibati tənbeh tətbiq edilərkən məsuliyyəti yüngülləşdirən hal hesab edilir. 32.2-ci maddəsinə əsasən inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyəti, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınmalıdır. 34.2-ci maddəsinə əsasən şəxsin eyni və ya müxtəlif vaxtlarda törətdiyi bir neçə inzibati xətaya dair işlərə baxılması eyni orqanın səlahiyyətinə aiddirsə, həmin işlərə eyni vaxtda baxılmalıdır. 34.3-cü maddəsinə əsasən şəxsin eyni vaxtda öz hərəkətləri (hərəkətsizliyi) ilə törətdiyi bir neçə inzibati xətaya dair işlərə baxılması eyni orqanın səlahiyyətinə aiddirsə, həmin şəxs daha ciddi xətaya görə müəyyən edilmiş sanksiya çərçivəsində tənbeh edilir. Bu halda törədilmiş xətalardan hər hansı birinə görə nəzərdə tutulmuş əlavə tənbehlərdən biri əsas tənbehə əlavə edilə bilər. 510-cu maddəsinə əsasən xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlərə görə - əlli manatdan yüz manatadək məbləğdə cərimə edilir, işin hallarına görə, pozuntunu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda, on beş günədək müddətə inzibati həbs tətbiq olunur. 535.1-ci maddəsinə əsasən polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamağa görə - fiziki şəxslər iki yüz manat məbləğində cərimə edilir və ya işin halları və pozuntu törədənin şəxsiyyəti nəzərə alınmaqla, bu tədbirlərin tətbiqi kifayət hesab edilmədikdə bir ayadək müddətə inzibati həbs tətbiq olunur. Məhkəmə iclasında tədqiq edilmiş inzibati xəta haqqında protokoları, barəsində inzibati xəta haqqında iş üzrə icraat aparılan şəxsin etirafedici izahatı və inzibati materialda olan digər sənədlərlə sübuta yetirilmişdir ki, Şəxs 23.08.2021-ci il tarixdə Xətai RPİ-nin 34-cü PŞ-nə gələrək inzibati binada ictimai qaydanı pozaraq polis əməkdaşlarının ünvanına nalayiq ifadələr işlədərək xırda xuliqanlıq etmiş, həmçinin, polis əməkdaşının ictimai qaydanı pozmamaq barədə qanuni tələblərinə qəsdən tabe olmamışdır. Bununla da, Əsədzadə X10 Xətalar Məcəlləsinin 510 və 535.1-ci maddəsində nəzərdə tutulmuş inzibati xətanı törətmişdir. Məhkəmə törədilmiş inzibati xətanın xarakterini, məsuliyyəti yüngülləşdirən hal kimi barəsində inzibati xəta haqqında iş üzrə icraat aparılan şəxsin səmimi peşmançılığını, himayəsində bir azyaşlı uşağının olmasını məsuliyyəti ağırlaşdıran halların müəyyən edilməməsini nəzərə alaraq, iş üzrə sübutları qiymətləndirərək hesab edir ki, Əsədzadə X10 Xətalar Məcəlləsinin 510 və 535.1-ci maddəsində nəzərdə tutulmuş inzibati xətaları törətməkdə təqsirli bilinməli və Azərbaycan Respublikası İXM-nin 34.3-cü maddəsinin tələbi baxımından İXM-nin 535.1-ci maddəsinin sanksiyasının hədləri daxilində müəyyən məbləğdə cərimə növündə inzibati tənbeh tətbiq edilməli, dərhal məhkəmə iclas zalından azad edilməlidir. Göstərilənlərə əsasən və Azərbaycan Respublikası İnzibati Xətalar Məcəlləsinin 43- 48, 106-115, 117-ci maddələrini rəhbər tutaraq, QƏRARA ALDİ: Barəsində inzibati xəta haqqında iş üzrə icraat aparılan şəxs - Şəxs Azərbaycan Respublikası İnzibati Xətalar Məcəlləsinin 510 və 535.1-ci maddəsində nəzərdə tutulmuş inzibati xətanı törətməkdə təqsirli bilinsin. Azərbaycan Respublikası İnzibati Xətalar Məcəlləsinin 34.3-cü maddəsinin tələbinə uyğun olaraq daha ciddi xətaya görə - İXM-nin 535.1-ci maddəsində nəzərdə tutulmuş inzibati xətanı törətməkdə təqsirli bilinərək Azərbaycan Respublikası İnzibati Xətalar Məcəlləsinin 31.4-1-ci maddəsinə əsasən 150 (bir yüz əlli) manat məbləğində inzibati cərimə edilsin. Şəxs dərhal məhkəmə iclas zalından azad edilsin. Qərardan, rəsmi qaydada verildiyi vaxtdan 10 (on) gün müddətində Bakı Apellyasiya Məhkəməsinə şikayət və protest verilə bilər. Sədrlik edən: Cavid Hüseyn