Bakı Şəhəri Xətai Rayon Məhkəməsi Qərardad — İş №3(011)-3376/2025

Azərbaycan Respublikası adından QƏRARDAD Bakı şəhəri İş № 3(011)-3376/2025 06.05.2025 BAKI ŞƏHƏRİ XƏTAİ RAYON MƏHKƏMƏSİ Bakı şəhəri Xətai Rayon Məhkəməsinin hakimi Axundov Fuad Aydın oğlu, «Azərbaycan Respublikasının İqtisadiyyat Nazirliyi yanında Əmlak Məsələləri Dövlət Xidməti»nin barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə tərtib edilmiş inzibati xəta haqqında materialı nəzərdən keçirib MÜƏYYƏN ETDİ: Bakı şəhəri Xətai Rayon İcra Şöbəsindən daxil olmuş 24 oktyabr 2024-cü il tarixli inzibati xəta haqqında protokolda göstərilmişdir ki, «Azərbaycan Respublikasının İqtisadiyyat Nazirliyi yanında Əmlak Məsələləri Dövlət Xidməti» 1 saylı Bakı İnzibati Məhkəməsinin 2-1(81)-1852 saylı, xx.xx.2017-ci il tarixli və 2-1(81)-164 saylı, xx.xx.2015-ci il tarixli icra sənədlərinin icrasından yayınmış və icra məmurunun qanuni tələblərini yerinə yetirməmişdir. Beləliklə göstərilənlərə əsasən o, Azərbaycan Respublikası İnzibati Xətalar Məcəlləsinin 528.1-ci maddəsində nəzərdə tutulmuş inzibati xətanı törətmişdir. Bakı şəhəri Xətai Rayon Məhkəməsinin 3(011)-5696/2024 saylı, xx.xx.2024-cü il tarixli qərarına əsasən Azərbaycan Respublikasının İqtisadiyyat Nazirliyi yanında Əmlak Məsələləri Dövlət Xidməti Azərbaycan Respublikası İnzibati Xətalar Məcəlləsinin 528.1-ci maddəsində nəzərdə tutulmuş inzibati xətanı törətməkdə təqsirli bilinmiş və barəsində 3000 (üç min) manat məbləğində cərimə tənbeh tədbiri tətbiq edilmişdir. Bakı Apellyasiya Məhkəməsinin 3(103)-169/2025 saylı, xx.xx.2025-ci il tarixli qərarına əsasən Azərbaycan Respublikasının İqtisadiyyat Nazirliyi yanında Əmlak Məsələləri Dövlət Xidmətinin Azərbaycan Respublikası İnzibati Xətalar Məcəlləsinin 528.1-ci maddəsi ilə təqsirli bilinməsi və 3.000 (üç min) manat məbləğində cərimə tənbeh tədbirinin tətbiq edilməsinə dair iş üzrə Bakı şəhəri Xətai Rayon Məhkəməsinin xx.xx.2024-cü il tarixli, 3(011)-5696/2024 nömrəli qərarı və Bakı şəhəri Xətai Rayon Məhkəməsinin xx.xx.2024-cü il tarixli, 3(011)-5696/2024 nömrəli qərardadı ləğv edilməklə inzibati xəta haqqında iş yenidən baxılması üçün Bakı şəhəri Xətai Rayon Məhkəməsinə göndərilmişdir. Azərbaycan Respublikası Mülki-Prosessual Məcəlləsinin 15.2-ci maddəsinə əsasən məhkəmələrin qanuni qüvvəyə minmiş qətnaməsi, qərardadı, qərarı, əmri bütün dövlət hakimiyyəti, yerli özünüidarə orqanları, onların vəzifəli şəxsləri, ictimai birliklər, siyasi partiyalar, həmkarlar ittifaqları, onların vəzifəli şəxsləri, həmçinin fiziki və hüquqi şəxslər üçün məcburidir və Azərbaycan Respublikasının bütün ərazisində hökmən icra olunmalıdır. «İcra məmurları haqqında» Azərbaycan Respublikası Qanununun 10-cu maddəsinə əsasən icra məmurlarının öz səlahiyyətləri hüdudunda irəli sürdükləri tələblər Azərbaycan Respublikasıərazisində bütün fiziki və hüquqi şəxslər üçün məcburidir. İcra məmurlarının qanuni tələblərini yerinə yetirməyən, ona həvalə edilmiş vəzifələrin icrasına mane olan şəxslər qanunvericiliklə nəzərdə tutulmuş qaydada məsuliyyət daşıyırlar. Azərbaycan Respublikası İnzibati Xətalar Məcəlləsinin 528.1-ci maddəsinə əsasən məhkəmə və digər orqanların qərarlarının icrası ilə əlaqədar icra məmurunun qanuni tələblərinin yerinə yetirilməməsinə və ya icra məmuru tərəfindən müəyyən olunmuş müddətdə borclunu müəyyən hərəkətləri etməyə və ya müəyyən hərəkətləri etməkdən çəkinməyə məcbur edən icra sənədinin üzrsüz səbəbdən icra edilməməsinə görə fiziki şəxslər beş yüz manatdan min manatadək miqdarda cərimə edilir və ya işin hallarına görə, pozuntunu törədənin şəxsiyyəti nəzərə alınmaqla bir ayadək inzibati həbs tətbiq olunur, vəzifəli şəxslər min iki yüz manatdan iki min beş yüz manatadək məbləğdə, hüquqi şəxslər üç min manatdan beş min manatadək məbləğdə cərimə edilir. Məhkəmə təqdim olunmuş inzibati xəta haqqında protokolu və ona əlavə olunmuş sənədləri araşdıraraq hesab edir ki, material qanunvericiliyin tələbləri pozulmaqla tərtib edildiyindən səlahiyyətli orqana geri qaytarılmalıdır. Belə ki, iş materiallarına əlavə edilmiş Azərbaycan Respublikasının İqtisadiyyat Nazirliyi yanında Əmlak Məsələləri Dövlət Xidmətinin hüquqi ünvanı barədə çıxarışdan görünür ki, Azərbaycan Respublikasının İqtisadiyyat Nazirliyi yanında Əmlak Məsələləri Dövlət Xidmətinin hüquqi ünvanı Bakı şəhəri, Nizami rayonu, Heydər Əliyev prospekti 139dur. Həmçinin Azərbaycan Respublikasının İqtisadiyyat Nazirliyi yanında Əmlak Məsələləri Dövlət Xidmətinin internet səhifəsində qeyd edilmiş rəsmi məlumatdan da məlum olur ki, həmin dövlət orqanının Bakı şəhəri, Nizami rayonu, Heydər Əliyev prospekti 139 ünvanında yerləşən inzibati binası xx.xx.2023-cü il tarixdə istifadəyə verilmiş və göstərilən tarixdən etibarən hüquqi ünvanı göstərilən ünvandır. Belə olduğu təqdirdə məhkəmə belə nəticəyə gəlir ki, iş üzrə inzibati xəta haqqında protokolun Bakı şəhəri Xətai rayon İcra Şöbəsi tərəfindən tərtib olunması və həmin protokola Bakı şəhəri Xətai Rayon Məhkəməsi tərəfindən baxılaraq hüquqi qiymət verilməsi əsassızdır. Məsələ ondan ibarətdir ki, barəsində inzibati xəta haqqında protokol tərtib edilmiş Azərbaycan Respublikasının İqtisadiyyat Nazirliyi yanında Əmlak Məsələləri Dövlət Xidmətinin hüquqi ünvanı Bakı şəhəri, Nizami rayonu, Heydər Əliyev prospekti 139 ünvanı olduğuna görə həmin orqan barəsində törədilmiş inzibati xətaya görə protokol həmin orqanın yerləşdiyi ərazi üzrə müvafiq icra şöbəsində, yəni Bakı şəhəri Nizami rayon İcra Şöbəsi tərəfindən tərtib edilməli və nəticədə inzibati xəta haqqında protokola qeyd edilən mövqe nəzərə alınmaqla aidiyyəti üzrə birinci instansiya məhkəməsində baxılmalı idi. Lakin iş materiallarından görünür ki, Bakı şəhəri Xətai rayon İcra Şöbəsi Azərbaycan Respublikasının İqtisadiyyat Nazirliyi yanında Əmlak Məsələləri Dövlət Xidmətinə münasibətdə icra işini aidiyyəti üzrə Bakı şəhəri Nizami rayon İcra Şöbəsinə göndərməli olduğu halda, bunu etməmiş, nəticədə inzibati xəta haqqında protokol tərtib etməklə baxılması üçün həmin protokolu Bakı şəhəri Xətai Rayon Məhkəməsinə göndərmişdir. Həmçinin, işə əlavə edilmiş Bakı şəhəri Yasamal rayon İcra Şöbəsinin xx.xx.2019-cu il tarixli “icra sənədinin ərazi aidiyyəti üzrə göndərilməsi barədə” qərarından görünür ki, 2019cu il tarixdə qeyd edilən icra şöbəsi bilavasitə Azərbaycan Respublikasının İqtisadiyyat Nazirliyi yanında Əmlak Məsələləri Dövlət Xidmətinin hüquqi ünvanını əsas tutaraq icra işini aidiyyəti üzrə Bakı şəhəri Xətai rayon İcra Şöbəsinə göndərmişdir. Bununla da təsdiq olunur ki, Bakı şəhəri Xətai rayon İcra Şöbəsi icra işini aidiyyəti üzrə Bakı şəhəri Nizami rayon İcra Şöbəsinə göndərməli olduğu halda, bunu etməmiş, nəticədə inzibati xəta haqqında protokol tərtib etməklə baxılması üçün həmin protokolu Bakı şəhəri Xətai Rayon Məhkəməsinə göndərmişdir. “İcra haqqında” Azərbaycan Respublikasının Qanununun 10.1-ci maddəsinə əsasən, borclu hüquqi şəxsdirsə, icra hərəkətləri onun olduğu yerdə və ya əmlakının olduğu yerdə həyata keçirilir. Beləliklə, yuxarıda qeyd olunanlara əsasən məhkəmə hesab edir ki, qeyd edilən çatışmazlıqlar aradan qaldırılmadan işə mahiyyəti üzrə baxılıb tamamlanması mümkün deyildir. Odur ki, məhkəmə inzibati xəta haqqında protokolu və ona əlavə edilmiş sənədləri nəzərdən keçirib hesab edir ki, «Azərbaycan Respublikasının İqtisadiyyat Nazirliyi yanında Əmlak Məsələləri Dövlət Xidməti»nin barəsində Azərbaycan Respublikası İnzibati Xətalar Məcəlləsinin 528.1-ci maddəsində nəzərdə tutulmuş inzibati xətanı törətməsinə dair tərtib edilmiş materialda olan çatışmazlığın aradan qaldırılması mümkün olmadığından inzibati xəta haqqında protokol və digər sənədlər Bakı şəhəri Xətai rayon İcra Şöbəsinə geri qaytarılmalıdır. Qeyd olunanları və Azərbaycan Respublikası İnzibati Xətalar Məcəlləsinin 40, 43, 100, 109-cu maddələrini rəhbər tutaraq, QƏRARA ALDİ: «Azərbaycan Respublikasının İqtisadiyyat Nazirliyi yanında Əmlak Məsələləri Dövlət Xidməti»nin barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə tərtib edilmiş inzibati xəta haqqında protokol və ona əlavə edilmiş sənədlər Bakı şəhəri Xətai rayon İcra Şöbəsinə geri qaytarılsın. Qərardaddan şikayət verilə bilməz. Sədrlik edən: Fuad Axundov