Bakı Şəhəri Xətai Rayon Məhkəməsi Qərar — İş №3(011)-3445/2024

Azərbaycan Respublikası adından QƏRAR Bakı şəhəri İş № 3(011)-3445/2024 19.08.2024 BAKI ŞƏHƏRİ XƏTAİ RAYON MƏHKƏMƏSİ Hakim Məmmədov Bəxtiyar Şahfirudin oğlunun sədrliyi, Bayramova Nərmin Nizami qızının katibliyi, "xxxx" MMC-nin direktoru X1, Əmək və Əhalinin Sosial Müdafiəsi Nazirliyi yanında X13 Xidmətinin etibarnamə üzrə nümayəndəsi X9 iştirakı ilə X1 Əmək və Əhalinin Sosial Müdafiəsi Nazirliyi yanında X13 Xidməti Bakı şəhər İdarəsi tərəfindən qəbul edilmiş xx.xx.2024-cü il tarixli MN seriyalı ******* nömrəli inzibati tənbeh vermə haqqında qərarından şikayətinə açıq məhkəmə iclasında baxaraq, MÜƏYYƏNETDİ: X2 şikayət ərizəsi ilə müraciət edərək, Əmək və Əhalinin Sosial Müdafiəsi Nazirliyi yanında X13 Xidməti Bakı şəhər İdarəsi tərəfindən qəbul edilmiş xx.xx.2024-cü il tarixli MN seriyalı ******* nömrəli inzibati tənbeh vermə haqqında qərarın ləğv edilməsini və inzibati xəta haqqında iş üzrə icraata xitam verilməsini məhkəmədən xahiş etmişdir. Şikayət onunla əsaslandırılmışdır ki, "xxxx" MMC işğaldan azad olunmuş ərazilərdə qaz xətti çəkilişi ilə məşğul olur. Əmək Müfəttişliyi bildirmişdir ki, iş icazəsi alınan şəxslərin portalı (iş icazələri) bağlanmamışdır, lakin bağlanılması üçün SOCAR-a məktub göndərilmişdir. Onlar iş icazələrinin bağlandığına dair məktub yazmışlar. Onlara əmək müqaviləsinin xitam olunması üçün göndərilmiş siyahının icra olunduğunu bildirmişlər. Bu anlaşılmazlığın aradan qaldırılması üçün tədbirlər görülməsini, Əmək və Əhalinin Sosial Müdafiəsi Nazirliyi yanında X13 Xidməti Bakı şəhər İdarəsi tərəfindən qəbul edilmiş xx.xx.2024-cü il tarixli MN seriyalı ******* nömrəli qərarın ləğv olunmasını və iş üzrə icraata xitam verilməsini məhkəmədən xahiş etmişdir. Məhkəmə iclasında iştirak edən şikayətçi X2 şikayət ərizəsinə uyğun izahat verərək bildirmişdir ki, işə qəbul və işdən azad etmə prosesləri Əmək qanunvericiliyinə uyğun şəkildə, elektron sistem əsasında həyata keçirilir, Qarabağ ərazisində isə portala məlumat daxil etmək üçün icazə 9-10 gün müddətinə verilir. İşçi işdən çıxarıldıqda isə səlahiyyətli orqana xəbər verilir və portaldan çıxarılır. Qərarda qeyd olunan şəxslərin portalda işçi kimi göründüyü bildirildikdən sonra Daxili İşlər Nazirliyinin rəsmi məktubunu tələb etmişdir, lakin məktub ona təqdim olunmamışdır. Heç bir işçi əmək müqaviləsi bağlanmadan işə cəlb edilməmişdir. Bu xüsusatları nəzərə alaraq Əmək və Əhalinin Sosial Müdafiəsi Nazirliyi yanında X13 Xidməti Bakı şəhər İdarəsi tərəfindən qəbul edilmiş xx.xx.2024-cü il tarixli MN seriyalı ******* nömrəli qərarın ləğv olunmasını və iş üzrə icraata xitam verilməsini məhkəmədən xahiş etmişdir. Məhkəmə iclasında Əmək və Əhalinin Sosial Müdafiəsi Nazirliyi yanında X13 Xidmətinin etibarnamə üzrə nümayəndəsi X16 qeyd olunan şəxslər barədə portalda işçi statusu ilə icazə alındığını bildirmişdir. Həmin işçilərin əmək müqaviləsi olduğu təqdirdə işdən çıxarılan zaman portaldan adları çıxarılmalıdır. İnzibati tənbeh vermə haqqında qərarın qanuni və əsaslı olmasını nəzərə alaraq şikayətin təmin edilməməsini xahiş etmişdir. İş materiallarında olan Əmək və Əhalinin Sosial Müdafiəsi Nazirliyi yanında X13 Xidməti Bakı şəhər İdarəsi tərəfindən tərtib edilmiş xx.xx.2024-cü il tarixli MN seriyalı ******* saylı inzibati tənbeh vermə haqqında qərardan görünür ki, Daxili İşlər Nazirliyi tərəfindən təqdim edilmiş işğaldan azad olunmuş ərazilərdə icazəsi alınmış X17, X10, X8, X18, X20 Nazirliyin Əmək və Məşğulluq alt sistemində aşkar edilməmişdir. İş materiallarında olan əmək müqaviləsi bildirişlərindən görünür ki, X5 işə başlaması xx.xx.2024-cü il, əmək müqaviləsinə xitam verilməsi xx.xx.2024-cü il, X4 işə başlaması xx.xx.2024-cü il, əmək müqaviləsinə xitam verilməsi xx.xx.2024-cü il, X11 işə başlaması xx.xx.2024-cü il, əmək müqaviləsinə xitam verilməsi xx.xx.2024-cü il, X7 işə başlaması xx.xx.2024-cü il, əmək müqaviləsinə xitam verilməsi xx.xx.2024-cü il, X3 işə başlanması xx.xx.2024-cü il, əmək müqaviləsinə xitam verilməsi xx.xx.2024-cü il, X12 işə başlanması xx.xx.2024-cü il, əmək müqaviləsinə xitam verilməsi xx.xx.2024-cü il, X14 işə başlanması xx.xx.2024-cü il, əmək müqaviləsinə xitam verilməsi xx.xx.2024-cü il tarixlərində olmuşdur. İş materiallarında olan 24 iyul 2024-cü il tarixli "xxxx" MMC tərəfindən Əmək və Əhalinin Sosial Müdafiəsi Nazirliyi yanında X13 Xidməti Bakı şəhər İdarəsinə ünvanlanmış məktubdan görünür ki, X17, X10, X8, X18, X14 işə qəbul olunma, portala icazə üçün müraciət, işdən çıxma, icazə portalının bağlanması barədə məlumatlar göstərilmişdir. İş materiallarında olan 02 iyul 2024-cü il tarixli "xxxx" MMC tərəfindən Əmək və Əhalinin Sosial Müdafiəsi Nazirliyi yanında X13 Xidməti Bakı şəhər İdarəsinə ünvanlanmış məktubdan görünür ki, işdən çıxarılan işçilərin portalının ləğv edilməsi və əmək müqaviləsi olmadan işləyən işçilər olmaması barədə məlumat verilmişdir. Məhkəmə şikayət ərizəsini, məhkəmə iclasında şikayətçinin, Əmək və Əhalinin Sosial Müdafiəsi Nazirliyi yanında X13 Xidmətinin nümayəndəsinin, izahatını, və iş materiallarını araşdıraraq hesab edir ki, şikayət qismən təmin edilməlidir. Belə ki, hazırda şikayətçi tərəfindən mübahisələndirilən inzibati xəta haqqında iş üzrə qərar ilə bağlı məhkəmə aşağıdakıları qeyd etməyi zəruri hesab edir: Azərbaycan Respublikası İXM-nin 75-ci maddəsinə əsasən inzibati xəta haqqında iş üzrə aşağıdakılar müəyyən edilməlidir: 75.0.1. inzibati xəta hadisəsi (inzibati xəta törədilmişdirmi); 75.0.2. inzibati xəta törətmiş şəxs; 75.0.3. inzibati xəta törətməkdə şəxsin təqsiri; 75.0.4. inzibati məsuliyyəti ağırlaşdıran və yüngülləşdirən hallar; 75.0.5. inzibati xəta nəticəsində vurulan zərərin xarakteri və miqdarı; 75.0.6. inzibati xətalar haqqında işlər üzrə icraatı rədd edən hallar; 75.0.7. işin düzgün həlli üçün əhəmiyyətli olan digər hallar, habelə inzibati xətanın törədilməsinə kömək edən səbəblər və şərait. Həmin Məcəllənin 31.2-ci maddəsinə əsasən fiziki və ya vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakretizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Həmin Məcəllənin 32.1-ci maddəsinə əsasən inzibati tənbeh tətbiq edilərkən, məsuliyyəti yüngülləşdirən hallar aşağıdakılar hesab edilir: 32.1.1. inzibati xəta törətmiş şəxsin səmimi peşmançılığı; 32.1.2. inzibati xətanın yetkinlik yaşına çatmayanlar tərəfindən törədilməsi; 32.1.3. inzibati xətanın hamilə qadın və ya himayəsində azyaşlı uşağı olan qadın tərəfindən törədilməsi; 32.1.4. inzibati xətanın fiziki və ya psixi məcburiyyət təsiri altında, yaxud maddi, xidməti və ya sair cəhətdən asılılıq nəticəsində törədilməsi; 32.1.5. inzibati xətanın zəruri müdafiənin və ya son zərurətin bu Məcəllə ilə müəyyən edilmiş şərtlərini pozmaqla törədilməsi; 32.1.6. inzibati xətanın zərər çəkmiş şəxsin qanunsuz və ya əxlaqsız hərəkətlərinin təsiri altında və ya bu hərəkətlər nəticəsində qəflətən baş vermiş güclü ruhi həyəcan (affekt) vəziyyətində törədilməsi; 32.1.7. törədilmiş inzibati xətanın zərərli nəticələrinin inzibati xəta törətmiş şəxs tərəfindən aradan qaldırılması və ya vurulmuş zərərin əvəzinin könüllü surətdə ödənilməsi. Həmin Məcəllənin 32.2-ci maddəsinə əsasən inzibati tənbeh tətbiq edilərkən bu Məcəllənin 32.1.1-32.1.7-ci maddələrində göstərilməmiş başqa hallar da hakim tərəfindən məsuliyyəti yüngülləşdirən hal qismində nəzərə alına bilər. Həmin Məcəllənin 192.1-ci maddəsinə görə Azərbaycan Respublikasının Əmək Məcəlləsində nəzərdə tutulmuş qaydada əmək müqaviləsi (kontraktı) hüquqi qüvvəyə minmədən işəgötürən tərəfindən fiziki şəxsləri hər hansı işlərin (xidmətlərin) yerinə yetirilməsinə cəlb edilməsinə görə - fiziki şəxslər min manatdan iki min manatadək məbləğdə, vəzifəli şəxslər üç min manatdan beş min manatadək məbləğdə, hüquqi şəxslər iyirmi min manatdan iyirmi beş min manatadək məbləğdə cərimə edilir. Bakı Apellyasiya Məhkəməsinin Cinayət Kollegiyasının sədri Elmar Rəhimovun 01 avqust 2024-cü il tarixli metodiki məktubunda bildirilmişdir ki, hüquqi şəxslər barəsində inzibati xətanın törədilməsinə dair protokol tərtib olunarkən işlər üzrə icraat qanunvericiliyin tələblərinə tam riayət olunmaqla aparılmamış, iş üzrə faktiki hallar tam və hərtərəfli qaydada öyrənmək üçün lazımi tədbirlər görülməmiş, yalnız Daxili İşlər Nazirliyindən daxil olan məlumatlar əsas götürülməklə protokol tərtib edilərək baxılması üçün məhkəməyə göndərilmişdir. Birinci instansiya məhkəmələri tərəfindən başlanmış inzibati icraata əməldə inzibati xəta tərkibi olmadığı üçün xitam verilmişdir. Anoloji işlərlə bağlı apellyasiya qaydasında şikayətlərə baxılan zaman birinci instansiya məhkəmələrinin qərarı ləğv olunmuş, əlavə araşdırılmanın aparılması üçün Azərbaycan Respublikası Əmək və Əhalinin Sosial Müdafiəsi Nazirliyi yanında X13 Xidmətinə qaytarılması barədə qərar qəbul edilmişdir. Göründüyü kimi, inzibati xəta haqqında qərar Azərbaycan Respublikası İnzibati Xətalar Məcəlləsinin tələblərinə riayət edilmədən qəbul edilmişdir. Azərbaycan Respublikası İnzibati Xətalar Məcəlləsinin 134.1.2-ci maddəsinə əsasən inzibati xəta haqqında iş üzrə qərardan verilən şikayətə və ya protestə baxılaraq bu Məcəllənin 135.1.2–135.1.5-ci maddələri ilə müəyyən edilmiş hallarda qərarın dəyişdirilməsi haqqında və ya qərarı ləğv edərək yeni qərarın çıxarılması haqqında qərar qəbul edilir. Həmin Məcəllənin 135.1.5-ci maddəsinə əsasən tətbiq edilmiş tənbehin bu Məcəllənin 31 – 34-cü maddələrinin tələblərinə uyğun olmaması inzibati xəta haqqında iş üzrə qərarın ləğv edilməsi və ya dəyişdirilməsi üçün əsasdır. Beləliklə, məhkəmə yuxarı instansiya məhkəməsinin metodiki məktubunu və işin hallarını nəzərə alaraq hesab edir ki, X1 şikayəti qismən təmin edilməli, Əmək və Əhalinin Sosial Müdafiəsi Nazirliyi yanında X13 Xidməti Bakı şəhər İdarəsi tərəfindən qəbul edilmiş xx.xx.2024-cü il tarixli MN seriyalı ******* nömrəli inzibati tənbeh vermə haqqında qərarı ləğv edilməli və araşdırılması üçün Əmək və Əhalinin Sosial Müdafiəsi Nazirliyi yanında X13 Xidmətinə qaytarılmalıdır. Yuxarıdakılara əsasən və Azərbaycan Respublikası İnzibati Xətalar Məcəlləsinin 128-136-cı maddələrini rəhbər tutub, QƏRARAALDİM: X1 şikayəti qismən təmin edilsin. Əmək və Əhalinin Sosial Müdafiəsi Nazirliyi yanında X13 Xidməti Bakı şəhər İdarəsi tərəfindən qəbul edilmiş xx.xx.2024-cü il tarixli MN seriyalı ******* nömrəli inzibati tənbeh vermə haqqında qərarı ləğv edilsin və inzibati xəta haqqında iş yenidən baxılması üçün Əmək və Əhalinin Sosial Müdafiəsi Nazirliyi yanında X13 Xidmətinə qaytarılsın. Qərardan rəsmi qaydada verildiyi vaxtdan 10 (on) gün müddətində Bakı şəhəri Xətai Rayon Məhkəməsi vasitəsi ilə şikayət verilə bilər. Sədrlik edən: Bəxtiyar Məmmədov