Bakı Şəhəri Xətai Rayon Məhkəməsi Qərar — İş №3(011)-4501/2024

Azərbaycan Respublikası adından QƏRAR Bakı şəhəri İş № 3(011)-4501/2024 10.10.2024 BAKI ŞƏHƏRİ XƏTAİ RAYON MƏHKƏMƏSİ Hakim Sadıxov Rəfail Adil oğlunun sədrliyi, Cəfərova Səltənət Ələsgər qızının katibliyi ilə Hüquqi şəxs Şəxs MMC-nin (VÖEN: **********) barəsində Azərbaycan Respublikası İnzibati Xətalar Məcəlləsinin 485.2-ci maddəsi ilə tərtib olunmuş inzibati xəta haqqında materiala açıq məhkəmə iclasında baxaraq, MÜƏYYƏN ETDİ: Azərbaycan Respublikası Dövlət Gömrük Komitəsi Bakı Baş Gömrük İdarəsi tərəfindən ünvan 1 ünvanında qeydiyyatda olan Şəxs MMC-nin Azərbaycan Respublikasının İnzibati Xətalar Məcəlləsinin 485.2-ci maddəsi ilə inzibati xəta törətməsinə dair material baxılması üçün Bakı şəhəri Xətai Rayon Məhkəməsinə göndərilmişdir. Məhkəmə iclasının yeri və vaxtı barədə qanuna müvafiq qaydada məlumat verilməsinə baxmayaraq, barəsində inzibati xəta haqqında iş üzrə icraat aparılan hüquqi şəxs Şəxs MMC və Azərbaycan Respublikası Dövlət Gömrük Komitəsi Bakı Baş Gömrük İdarəsi məhkəmə iclasında səlahiyyətli nümayəndələrinin iştirakını təmin etməmiş, bunun səbəbləri barədə məhkəməyə məlumat verməmişdirlər. Göstərilənlərə əsasən, məhkəmə onların səlahiyyətli nümayəndələrinin iştirakı olmadan işə baxılmasını mümkün hesab etdi. Azərbaycan Respublikası Dövlət Gömrük Komitəsi Bakı Baş Gömrük İdarəsi tərəfindən daxil olmuş 28 avqust 2024-cü il tarixli, 00100-02321/24 saylı inzibati xəta haqqında protokoldan görünür ki, ünvan 1 ünvanında qeydiyyatda olan Şəxs MMC-nin (VÖEN **********) ünvanına Rusiyadan 91587949 nömrəli nəqliyyat vasitələri ilə idxal edilmiş **********0513 sorğu nömrəli xx.xx.2024-cü il tarixli gömrük bəyannaməsi tərtib edilərək gömrük orqanına bəyan edilmiş mallara dair gömrük bəyannaməsi və digər sənədlərin araşdırılması zamanı məlum olmuşdur ki, Şəxs MMC-nin ünvanına Rusiyadan idxal edilmiş yüklərə dair Azərbaycan Respublikası Gömrük Məcəlləsinin 113.1-ci maddəsi ilə müəyyən edilmiş qaydada qısa idxal bəyannaməsi təqdim edilməmişdir. Nəticədə, gömrük qaydaları əleyhinə inzibati xəta baş vermişdir. Araşdırmadan görünür ki, Şəxs MMC-nin ünvanına Rusiyadan idxal edilmiş malların daşındığı 91587949 nömrəli nəqliyyat vasitələri Azərbaycan Respublikasının gömrük ərazisinə xx.xx.2024-cü il tarixdə daxil olmuş, lakin həmin nəqliyyat vasitəsilə ölkə ərazisinə gətirilən mallara dair **********7092 sorğu nömrəli qısa idxal bəyannaməsi xx.xx.2024-cü il tarixdə saat 14:23-də gömrük orqanına təqdim edilmişdir. Şəxs MMC-nin qanuni təmsilçisi X2 izahatı alınmışdır. İzahatdan görünür ki, X3 Şəxs MMC-nin qanuni təmsilçisi olmaqla yanaşı direktor vəzifəsində çalışır. MMC-nin fəaliyyəti taxta materialların müxtəlif ölkələrdən idxalı və yerli bazarda satışından ibarətdir. Şəxs MMC-nin ünvanına daxil olan Rusiya mənşəli taxta materialları yükü üçün qısa idxal və gömrük bəyannamələri "xxxx" MMC ilə bağlanmış xidmət müqaviləsi əsasında həmin MMC tərəfindən tərtib olunmuşdur. Şəxs MMC-nin ünvanına 91587949 nömrəli nəqliyyat vasitəsi ilə Rusiyadan ölkə ərazisinə daxil olmuş xx.xx.2024-cü il tarixli **********0513 sorğu nömrəli gömrük bəyannaməsi ilə bəyan olunan mallara dair qısa idxal bəyannaməsinin tərtib olunması üçün tələb olunan 1404.2024-cü il tarixli 8 nömrəli invoys, 36016336 nömrəli nəqliyyat sənədləri Rusiyada fəaliyyət göstərən "xxxx" Şirkəti tərəfindən göndərilmiş sənədlər əsasında **********7092 sorğu nömrəli xx.xx.2024-cü il tarixli qısa idxal bəyannaməsi tərtib olunmuşdur. Qısa idxal bəyannaməsinin tərtib edilməsi üçün nəzərdə tutulan 35.40 AZN dövlət rüsumu xx.xx.2024-cü il tarixdə saat 14:21 radələrində ödənilmiş və həmin tarixdə, yəni xx.xx.2024-cü il tarixdə qısa idxal bəyannaməsi “rəsmiləşdirmək üçün göndərildi” əməliyyatı həyata keçirməklə təsdiqlənmişdir. Qısa idxal bəyannaməsinin malların gömrük sərhəddini keçməsindən ən azı 1 (saat) əvvəl verilməli olduğundan məlumatım var. Rusiyadan idxal olunan taxta yükləri xx.xx.2024-cü il tarixdə saat 05:19 radələrində “Yalama” gömrük postundan keçərək ölkə ərazisinə daxil olsa da, xx.xx.2024-cü il tarixdən etibarən həmin mala dair qısa idxal bəyannaməsinin tərtib edilməsinə cəhd etmişlər. Lakin sistemdə texniki nasazlıq baş verdiyindən **********7092 sorğu nömrəli qısa idxal bəyannaməsi xx.xx.2024-cü il tarixdə saat 14:23 radələrində rəsmiləşdirilmək üçün göndərilmişdir. Bu halın nəzərə alınmasını xahiş etmişdir. Dövlət Gömrük Komitəsinin Rəqəmsal İdarəetmə Baş İdarəsinə ünvanlanmış 3-33- 1100/2-005023/2024 nömrəli xx.xx.2024-cü il tarixli sorğu məktubuna xx.xx.2024-cü il tarixli 3-33-1100/1-022559/2024 nömrəli cavab məktubundan görünür ki, X1 Sistemində 29 aprel 2024-cü il tarixində texniki səbəbdən dayanmalar müşahidə edilməmişdir. Azərbaycan Respublikası İnzibati Xətalar Məcəlləsinin: 3-cü maddəsinə əsasən yalnız həmin Məcəllə ilə nəzərdə tutulmuş inzibati xətaların törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizlik) törətmiş şəxs inzibati məsuliyyətə cəlb olunur və tənbeh edilir; 4-cü maddəsinə əsasən, bu Məcəllə insan və vətəndaş hüquqlarına və azadlıqlarına hörmət edilməsi, qanunçuluq, qanun qarşısında bərabərlik, təqsirsizlik prezumpsiyası, ədalətlilik və inzibati xətaların qarşısının alınması prinsiplərinə əsaslanır; 6.1-ci maddəsinə əsasən, inzibati xətalara görə inzibati tənbeh həmin Məcəlləyə uyğun olaraq tətbiq edilir; 9.1-ci maddəsinə əsasən, İnzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır; 12.1-ci maddəsində göstərilir ki, həmin Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur; 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. 485.2-ci maddəsinə əsasən, Azərbaycan Respublikasının Gömrük Məcəlləsi ilə müəyyən edilmiş hallarda qısa idxal bəyannaməsinin mallar gömrük ərazisinə gətirilməzdən əvvəl elektron formada verilməməsinə görə vəzifəli şəxslər min manat məbləğində, hüquqi şəxslər min beş yüz manat məbləğində cərimə edilir. “Malların və nəqliyyat vasitələrin gömrük sərhəddindən keçirilməsi üçün “Yaşıl dəhliz” və “digər buraxılış sistemlərində istifadə qaydaları”nın təsdiq edilməsi haqqında Azərbaycan Respublikası Prezidentinin 920 saylı, 21 may 2016-cı il tarixli fərmanının 2.2 bəndinə əsasən qısa idxal bəyannaməsində risklərin təhlili, gömrük nəzarətinin düzgün aparılması üçün zəruri olan məlumatlar əks etdirilməli və malların gömrük sərhədini keçməsindən ən azı 1 (bir) saat əvvəl verilməlidir. Məhkəmə inzibati material üzrə araşdırılan sübutların məcmusunu hərtərəfli, tam və obyektiv qiymətləndirərək hesab edir ki, Şəxs MMC tərəfindən Azərbaycan Respublikası İXM-nin 485.2-ci maddəsində nəzərdə tutulan inzibati xətanın törədilməsi araşdırılmış sübutlarla öz təsdiqini tapır. Belə ki, Şəxs MMC-nin (VÖEN: **********) ünvanına göndərilmiş yüklərə dair Azərbaycan Respublikası Gömrük Məcəlləsinin 113.1-ci maddəsi ilə müəyyən edilmiş qaydada mallar gömrük sərhəddini keçənədək elektron qaydada qısa idxal bəyannaməsi təqdim edilməmişdir. Beləliklə, məhkəmə iş üzrə sübutları qiymətləndirərək hesab edir ki, Şəxs MMC Azərbaycan Respublikası İnzibati Xətalar Məcəlləsinin 485.2-ci maddəsi ilə nəzərdə tutulmuş inzibati xətanı törətdiyinə görə, barəsində 1500 (min beş yüz) manat məbləğində cərimə inzibati tənbeh tədbiri tətbiq edilməlidir. Şərh olunanlara əsasən və Azərbaycan Respublikası İXM-nin 25, 40.0.1, 43, 48-51, 55, 114, 115,128-130 maddələrini rəhbər tutaraq, məhkəmə QƏRARA ALDİ: Şəxs MMC (VÖEN: **********) Azərbaycan Respublikası İnzibati Xətalar Məcəlləsinin 485.2-ci maddəsi ilə nəzərdə tutulmuş inzibati xətanı törətdiyinə görə, barəsində 1500 (min beş yüz) manat məbləğində cərimə inzibati tənbeh tədbiri tətbiq edilsin. Qərarın surəti rəsmi qaydada verildiyi vaxtdan 10 (on) gün müddətində Bakı şəhəri Xətai Rayon Məhkəməsinin vasitəsilə Bakı Apellyasiya Məhkəməsinə verilə bilər. Hakim: Rəfail Sadıxov