Bakı Şəhəri Xətai Rayon Məhkəməsi Qərar — İş №3(011)-4523/2024

Azərbaycan Respublikası adından QƏRAR Bakı şəhəri İş № 3(011)-4523/2024 20.09.2024 BAKI ŞƏHƏRİ XƏTAİ RAYON MƏHKƏMƏSİ Hakim Axundov Fuad Aydın oğlunun sədrliyi, X5 iclas katibliyi, inzibati xəta haqqında protokolu tərtib edən Bakı şəhəri Xətai RPİ-nin 37-ci Polis Şöbəsinin sahə rəisi, polis mayoru X2, zərərçəkmiş şəxs X3, barəsində inzibati xəta haqqında iş üzrə icraat aparılan şəxs Nuriyeva (Manafova) Şövkət Abuzər qızının iştirakları ilə xx.xx.1959-cu il tarixdə Göyçay rayonu, Göyçay şəhərində anadan olmuş, Azərbaycan Respublikası vətəndaşı, subay, orta təhsilli, işləməyən, ünvan 1 ünvanında qeydiyyatda olmaqla yaşayan Nuriyeva (Manafova) Şövkət Abuzər qızının barəsində Azərbaycan Respublikası İnzibati Xətalar Məcəlləsinin 510-cu maddəsi ilə Bakı şəhəri Xətai RPİ-nin 37-ci Polis Şöbəsindəm daxil olmuş inzibati xəta haqqında işə Bakı şəhəri Xətai Rayon Məhkəməsinin binasında açıq məhkəmə iclasında baxaraq, məhkəmə MÜƏYYƏN ETDİ: Bakı şəhəri Xətai RPİ-nin 37-ci Polis Şöbəsinin sahə rəisi, polis mayoru X6 tərəfindən Nuriyeva (Manafova) Şövkət Abuzər qızının Azərbaycan Respublikası İXM-in 510-cu maddəsində nəzərdə tutulmuş inzibati xətanı törətməsi əsas gətirilərək barəsində xx.xx.2024-cü il tarixli, MN seriyalı ******* saylı inzibati xəta haqqında protokol tərtib olunmuşdur. Məhkəmə iclasında Nuriyeva (Manafova) Şövkət Abuzər qızı özünü təqsirli bilməyərək izahatında göstərmişdir ki, 20 ildən artıqdır ki, o və bacısının uşaqları ünvan 2 ünvanında yaşayırlar. 2019-cu ildən Xalidə adlı qonşu ilə aralarında səbəbsiz münaqişələr baş verir, heç bir səbəb olmadan onu və ailə üzvlərini mütəmadi olaraq nalayiq ifadələrlə təhqir edir və onlara bildirir ki, onları dəlixanaya göndərəcək, onları yaşadıqları yerdən sürgün edəcək, yuxarı çıxıb onları susduracaq. Xalidə adlı qonşuları nəşə çəkərək özündə olmur və onlara qarşı nalayiq ifadələr işlədir. Dəfələrlə xəbərdarlıq etməsinə baxmayaraq o, öz əməllərinə son qoymur. Beləliklə o, inzibati xəta törətmədiyini, barəsində əsassız olaraq protokol tərtib olunduğunu, X7 təhqir etmədiyini bildirərək barəsində başlanmış inzibati xəta haqqında iş üzrə icraata xitam verilməsini xahiş etmişdir. Məhkəmə iclasında zərərçəkmiş şəxs X8 izahatında bildirmişdir ki, Şövkət Manafova və Aybəniz Manafova tərəfindən təhqir olunur. Belə ki, həmin şəxslər ona qarşı nalayiq və əxlaqsız ifadələr işlədirlər. Yaşadıqları ünvandan onun yaşadığı evə tüpürürlər. Özünün və ailəsinin təhlükəsizliyini təmin etmək üçün yaşadığı evin qapısına kamera quraşdırmışdır. Həmin şəxslər müxtəlif günlərdə və saatlarda kameranın qarşısında əxlaqsız əl hərəkətləri edirlər və nalayiq ifadələrdən istifadə edirlər. Dəfələrlə onlara xəbərdarlıq etməsinə baxmayaraq onlar öz əməllərinə məhəl qoymayaraq öz qanunsuz hərəkətlərini davam etdirirlər. Aybənizin balaca qızı Məryəm qapılarının yanından keçəndə söyüş söydüyündən qızı qapını açıb ona irad bildirir, lakin daha sonra anası və qızı yenidən öz hərəkətlərini davam etdirirlər. Həmin binada 6 ailə yaşayır və 5 ailəni onlar narahat edirlər. Dəfələrlə bu barədə polisə şikayət ərizəsi ilə müraciət etmişdir. O, özü müəllimədir, ziyalı ailələrdə uşaq baxıcısı kimi işləyir və protokolda göstərildiyi kimi heç kimi təhqir etməmişdir. Beləliklə o, göstərilənləri nəzərə alaraq Şövkət Manafovanın barəsində ağır inzibati tənbeh tədbirinin tətbiq edilməsini xahiş etmişdir. Məhkəmə iclasında inzibati xəta haqqında protokolu tərtib edən Bakı şəhəri Xətai RPİ-nin 37-ci Polis Şöbəsinin sahə rəisi, polis mayoru X1 (Manafova) Şövkət Abuzər qızının barəsində tərtib olunmuş xx.xx.2024-cü il tarixli, MN seriyalı ******* saylı inzibati xəta haqqında protokolun məzmununa uyğun izahat verərək Nuriyeva (Manafova) Şövkət Abuzər qızının barəsində müvafiq inzibati tənbeh tədbirinin tətbiq edilməsini xahiş etmişdir. İş materiallarında olan və məhkəmə baxışında tədqiq edilmiş: Bakı şəhəri Xətai RPİ-nin 37-ci Polis Şöbəsinin sahə rəisi, polis mayoru X6 tərəfindən tərtib olunmuş xx.xx.2024-cü il tarixli, MN seriyalı ******* saylı inzibati xəta haqqında protokolda göstərilmişdir ki, Nuriyeva (Manafova) Şövkət Abuzər qızı qonşusu Xalidə Həsənovaya qarşı nalayiq söyüşlər söyərək təhqir etdiyindən barəsində Azərbaycan Respublikası İXM-nin 510-cu maddəsində nəzərdə tutulmuş inzibati xətanı törətməsinə dair protokol tərtib olunmuşdur. Zərərçəkmiş şəxs X8 tərəfindən məhkəməyə təqdim olunmuş bir ədəd diskdə olan videogörüntülərə baxış keçirdikdə, hər hansı bir münaqişənin baş verməsinə rast gəlinməmişdir. Azərbaycan Respublikası İnzibati Xətalar Məcəlləsinin: 3-cü maddəsinə əsasən yalnız bu Məcəllə ilə nəzərdə tutulmuş inzibati xətaların törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizlik) törətmiş şəxs inzibati məsuliyyətə cəlb olunur və tənbeh edilir. 8.1-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. 8.2-ci maddəsinə əsasən inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. 8.3-cü maddəsinə əsasən inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. 12-ci maddəsinə əsasən bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. 53.2-ci maddəsinə əsasən hər hansı şəxs barəsində başlanılmış inzibati xətalar haqqında işlər üzrə icraata, həmçinin onun inzibati xəta törədilməsinə aidiyyəti olmadıqda və ya təqsirliliyi sübuta yetirilmədikdə, o cümlədən təqsirliliyin sübuta yetirilməsində qanuna zidd olaraq əldə edilmiş sübutlardan istifadə edildikdə xitam verilir. 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktiki məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. 105.1-ci maddəsinə əsasən bu Məcəllənin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. 510-cu maddəsinə əsasən xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlərə görə - əlli manatdan yüz manatadək məbləğdə cərimə edilir, işin hallarına görə, pozuntunu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda, on beş günədək müddətə inzibati həbs tətbiq olunur. İnzibati xəta haqqında protokolu, zərərçəkmiş şəxsin və barəsində inzibati xəta haqqında iş üzrə icraat aparılan şəxsin izahatlarını, eləcədə inzibati materialda olan sənədləri nəzərə alıb iş üzrə sübutları qiymətləndirərək məhkəmə hesab edir ki, Azərbaycan Respublikası İnzibati Xətalar Məcəlləsinin 510-cu maddəsində nəzərdə tutulmuş inzibati xətanın Nuriyeva (Manafova) Şövkət Abuzər qızı tərəfindən törədilməsi məhkəmə iclasında öz təsdiqini tapmamışdır. Belə ki, iş materiallarında olan xx.xx.2024-cü il tarixli, MN seriyalı ******* saylı inzibati xəta haqqında protokolda Nuriyeva (Manafova) Şövkət Abuzər qızının qonşusu Xalidə Həsənovaya qarşı nalayiq söyüşlər söyərək təhqir etməsi qeyd edilsə də, onun xırda xuliqanlıq əməlinin tərkibini yaradan hərəkətlərə yol verməsi, bununla da ictimai qaydanı pozması və Azərbaycan Respublikası İnzibati Xətalar Məcəlləsinin 510-cu maddəsində nəzərdə tutulmuş inzibati xətanı törətməsinə dair heç bir mötəbər sübut məhkəməyə təqdim olunmamışdır. Həmçinin, zərərçəkmiş şəxs X8 tərəfindən məhkəməyə təqdim olunmuş bir ədəd diskdə olan videogörüntülərə baxış keçirdikdə inzibati xəta haqqında protokolda qeyd olunan inzibati xətanın törədilməsi öz əksini tapmamışdır. Beləliklə, məhkəmə hesab edir ki, inzibati xəta hadisəsi olmadığından barəsində inzibati xəta haqqında iş üzrə icraat aparılan şəxs Nuriyeva (Manafova) Şövkət Abuzər qızının Azərbaycan Respublikasının İXM-nin 510-cu maddəsində nəzərdə tutulmuş inzibati xətanı törətməsinə dair inzibati iş üzrə icraata xitam verilməlidir. Belə olan halda, məhkəmə işin obyektiv hallarını və yuxarıda sadalanan qanunun imperativ tələblərini nəzərə alıb belə qənaətə gəlir ki, Nuriyeva (Manafova) Şövkət Abuzər qızı barəsində İnzibati Xətalar Məcəlləsinin 510-cu maddəsi ilə nəzərdə tutulan inzibati iş üzrə icraata şəxsin təqsirliliyi sübuta yetirilmədiyindən xitam verilməli və o, dərhal məhkəmə iclas zalından azad edilməlidir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 32, 33 və 53-cü maddələrini rəhbər tutaraq, məhkəmə QƏRARA ALDİ: Barəsində inzibati xəta haqqında iş üzrə icraat aparılan şəxs Nuriyeva (Manafova) Şövkət Abuzər qızının Azərbaycan Respublikası İnzibati Xətalar Məcəlləsinin 510-cu maddəsində nəzərdə tutulan inzibati xətanı törətməsinə dair iş üzrə icraata təqsirliliyi sübuta yetirilmədiyindən xitam verilsin. Qərardan, rəsmi qaydada verildiyi vaxtdan 10 (on) gün müddətində Bakı şəhəri Xətai Rayon Məhkəməsinin vasitəsilə və ya birbaşa Bakı Apellyasiya Məhkəməsinə şikayət verilə bilər. Sədrlik edən: Fuad Axundov