Abşeron Rayon Məhkəməsi Qərar — İş №3(012)-1068/2020

Azərbaycan Respublikası adından QƏRAR Xırdalan şəhəri İş № 3(012)-1068/2020 18.08.2020 ABŞERON RAYON MƏHKƏMƏSİ Nəcəfova Şövkət Hüseyn qızının sədrliyi, X4 katibliyi, Şikayət verən X1 iştirakı ilə, İnzibati xəta haqqında qərardan şikayət vermiş şəxs X1 3-cü taqım yol inspektoru polis kiçik serjantı X2 xx.xx.2020-ci il tarixli, İXP ******* saylı inzibati tənbeh vermə haqqında qərarının ləğvi barədə şikayətinə xx xxxxxx 2020-cu il tarixdə, Abşeron rayonu, Xırdalan şəhərində Abşeron rayon Məhkəməsinin inzibati binasında açıq məhkəmə iclasında baxaraq, MÜƏYYƏN ETDİM: X3 şikayət ərizəsi ilə məhkəməyə müraciət edərək 3-cü taqım yol inspektoru polis kiçik serjantı X2 xx.xx.2020-ci il tarixli, İXP ******* saylı inzibati tənbeh vermə haqqında qərarının ləğv edilməsini xahiş etmişdir. Məhkəmə iclasında dindirilmiş şikayətçi X3 bildirdi ki, Bakı şəhər BDYPİ-nin əməkdaşları tərəfindən Bakı-Şamaxı yolu Pirəkəşkül post buraxılış məntəqəsində saxlanaraq xx.xx.2020-ci il tarixli, İXP ******* saylı İnzibati xəta haqqında protokol tərtib edilmişdir. Onu da bildirir ki, Azərbaycan Respublikası İnzibati Xətalar Məcəlləsinin 211-ei maddəsində nəzərdə tutulmuş inzibati xətanın törədilməsində təqsirli bilinmiş və barəsində 200 manat cərimə növündə inzibati tənbeh tətbiq edilmişdir. O, xx.xx.2020-ci il tarixdə bibisi oğlunun idarə etdiyi "'Saipa” markalı **-CB-*** dövlət qeydiyyat nişanlı avtomobildə sərnişin kimi qeydiyyatda olduğu, eyni zamanda yaşadığı Pirəkəşkül kəndinə gedən zaman Bakı-Şamaxı yolunda iki saat müddətində tıxacda qaldığı üçün sms icazə müddətində gedəcəyi ünvana çata bilmədi. Belə ki, həftənin cümə günü olduğundan insanlar rayona getdiklərinə görə 15 dəqiqə müddətinə çalacağı məsafəyə iki saat ərzində çata bilmədi. Bu barədə polis əməkdaşlarına məlumat verərək sms icazənin müddətini göstərərək tıxacı nəzərə almalarını istədi. Polis əməkdaşı da onlara rayona gedənlər arasında olmaqlarına, öz qeydiyyatda olduğu ünvana getməyinə görə protokol tərtib etməyəcəyini bildirdi. Bir neçə gün sonra özü DYP-nin portalından baxarkən onlara həmin vaxt üçün inzibati xəta haqqında protokol tərtib edilərək 200 manat cərimə tətbiq olunduğunu gördü. DYP-nin polis əməkdaşı ona yerindəcə hər hansı protokol tərtib etmədiyinə görə, o da idarəyə yaxınlaşaraq tərtib olunan protokolla tanış olmaq istədiyini və ona verilməsini istədi. Lakin karantin rejimini bəhanə edərək tərtib olunmuş protokolu ona verməkdən yayındılar. Bu səbəblə hesab edir ki, Bakı şəhər BDYPİ-nin xx.xx.2020-ci il tarixli qərarı ilə Azərbaycan Respublikası İnzibati Xətalar Məcəlləsinin 211.1 -ci maddəsində nəzərdə tutulmuş inzibati xəta haqqında qərar ləğv edilməlidir. Məhkəmədən 3-cü taqım yol inspektoru polis kiçik serjantı X2 xx.xx.2020-ci il tarixli, İXP ******* saylı inzibati tənbeh vermə haqqında qərarının ləğvi barədə şikayətinin təmin edilməsini xahiş edir. Məhkəmə iclasının vaxtı və yeri barədə qanunla müəyyən olunmuş qaydada məlumat verilməsinə baxmayaraq Bakı şəhər BDYPİ-nin nümayəndəsi məhkəmə iclasına gəlməmişdir. Azərbaycan Respublikası İXM-nin 61.3-cü maddəsinin tələblərinə əsasən məhkəmə hesab edir ki, şikayətə Bakı şəhər BDYPİ-nin nümayəndəsinin iştirakı olmadan baxılması mümkündür. Azərbaycan Respublikası İnzibati Xətalar Məcəlləsinin 133.1-ci maddəsinə əsasən inzibati xəta haqqında iş üzrə qərardan verilən şikayət və ya protest hakim və ya vəzifəli şəxs tərəfindən təkbaşına baxılır. Həmin Məcəllənin 133.2.4-ci maddəsinə görə, inzibati xəta haqqında iş üzrə icraatın iştirakçılarının gəlməməsi səbəbləri aydınlaşdırılır, şikayətin və ya protestin həmin şəxslərin iştirakı olmadan baxılması məsələsi həll edilir, yaxud şikayətin və ya protestin baxılması təxirə salınır, zəruri hallarda şikayətin baxılması üçün zəruri hesab edilən şəxslərin gətirilməsi barədə qərardad qəbul edilir. Qəbul edilmiş qərarın qanuniliyini və əsaslılığını iş üzrə olan materiallar əsasında yoxlayaraq hesab edirəm ki, şikayətin təmin edilməməsi haqqında qərar qəbul edilməlidir. Belə ki, iş materiallarında olan X3 barəsində tərtib olunmuş 3-cü taqım yol inspektoru polis kiçik serjantı X2 xx.xx.2020-ci il tarixli, İXP ******* saylı inzibati tənbeh vermə haqqında qərarından görünür ki, o, karantin rejim qaydalarını pozduğuna görə inzibati xətanın törədilməsində Azərbaycan Respublikası İXM-nin 211.1 maddəsi ilə təqsirli bilinərək 200 manat məbləğində inzibati cərimə növündə inzibati tənbeh tətbiq edilmişdir. İşin müəyyən edilmiş hallarından görünür ki, inzibati xəta haqqında qərardan şikayət vermiş şəxs X3 Azərbaycan Respublikası İXM-nin 211.1 maddəsinin tələblərini pozmaqla inzibati məsuliyyətə cəlb olunmuşdur. Azərbaycan Respublikası İnzibati Xətalar Məcəlləsinin 12-ci maddəsinə əsasən bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Azərbaycan Respublikası İXM-in 21-ci maddəsinə görə inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Həmin Məcəllənin 9.1-ci maddəsinin tələblərinə görə inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına uyğun, qanuni və əsaslı olmalıdır. Yenə həmin Məcəllənin 32.2-ci maddəsinə görə isə, fiziki və ya vəzifəli şəxslər barəsində inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyəti, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Azərbaycan Respublikası İnzibati Xətalar Məcəlləsinin 211.1 -ci maddəsinə əsasən epidemiya əleyhinə rejimin, sanitariya-gigiyena və karantin rejimlərinin pozulmasına görə fiziki şəxslər iki yüz manatdan dörd yüz manatadək məbləğdə, vəzifəli şəxslər üç min manatdan dörd min manatadək məbləğdə cərimə edilir, yaxud işin hallarına görə, xətanı törədənin şəxsiyyəti nəzərə alınmaqla, bir ayadək müddətə inzibati həbs tətbiq olunur, hüquqi şəxslər dörd min manatdan on min manatadək məbləğdə cərimə edilir. Yuxarıdakılara əsasən hesab edirəm ki, X3 haqlı olaraq səlahiyyətli orqan tərəfindən düzgün olaraq inzibati qaydada məsuliyyətə cəlb olunmuşdur. Azərbaycan Respublikası İXM-in 134.1 və 134.1.1-ci maddələrinə görə inzibati xəta haqqında iş üzrə qərardan verilən şikayət baxıldıqda qərarın dəyişdirilmədən saxlanılması haqqında qərar qəbul edilə bilər. Beləliklə, istinad olunan maddi və prosessual hüquq normalarına və işin faktiki hallarına əsasən məhkəmə hesab edir ki, şikayətini əsaslandıran sübutları, o cümlədən inzibati protokol tərtib edilərkən icazəsinin olmasını təsdiq edən sənədiməhkəməyə təqdim etmədiyi üçün X3 tərəfindən verilmiş şikayət təmin edilməməli, 3-cü taqım yol inspektoru polis kiçik serjantı X2 xx.xx.2020-ci il tarixli, İXP ******* saylı inzibati tənbeh vermə haqqında qərarı dəyişdirilmədən saxlanılmalıdır. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 128-129 və134-cü maddələrini rəhbər tutaraq, QƏRARA ALDİM: X1 3-cü taqım yol inspektoru polis kiçik serjantı X2 xx.xx.2020-ci il tarixli, İXP ******* saylı inzibati tənbeh vermə haqqında qərarının ləğv edilməsinə dair şikayəti təmin edilməsin. Qərardan surətinin təqdim edildiyi və ya alındığı gündən 10 (on) gün müddətində Abşeron Rayon Məhkəməsi vasitəsilə Sumqayıt Apellyasiya Məhkəməsinə şikayət verilə bilər. Hakim:Şövkət Nəcəfova