Abşeron Rayon Məhkəməsi Qərardad — İş №3(012)-1069/2025

Azərbaycan Respublikası adından QƏRARDAD Xırdalan şəhəri İş № 3(012)-1069/2025 02.05.2025 ABŞERON RAYON MƏHKƏMƏSİ Mən Abşeron rayon Məhkəməsinin hakim Qasımov Abusət Sahib oğlunun sədrliyi ilə, «Azərbaycan Respublikası Ekologiya və Təbii Sərvətlər Nazirliyinin Nəqliyyat İdarəsi»nin Azərbaycan Respublikası İnzibati Xətalar Məcəlləsinin 469.3-cü maddəsində nəzərdə tutulmuş inzibati xətanı törətməsinə dair Abşeron rayon Polis İdarəsi tərəfindən tərtib edilmiş protokol və ona əlavə olunmuş sənədlərə baxılmağa hazırlanması zamanı nəzərdən keçirərək, müəyyən etdim: Abşeron Rayon Məhkəməsinin xx.xx.2025-ci il tarixli, 3(012)-796/2025 saylı qərardadı ilə həmin protokol və ona əlavə edilmiş sənədlər geri qaytarılmışdır. Lakin məhkəmənin qeyd olunan qərardadında göstərilən, iş üzrə yol verilmiş kobud qanun pozuntuları aradan qaldırılmadan protokol yenidən məhkəməyə göndərilmişdir. Bu hal da isə qanunvericiliyin normalarına əsasən yolverilməzdir. Belə ki, Azərbaycan Respublikası Konstitusiyanın 129-cu maddəsinə görə məhkəmənin qəbul etdiyi qərarlar dövlətin adından çıxarılır və onların icrası məcburidir. Eyni zamanda qeyd olunur ki, Azərbaycan Respublikası məhkəmələrinin fəaliyyəti yalnız ədalət mühakiməsinin və qanunvericiliklə müəyyən edilmiş hallarda və qaydada məhkəmə nəzarətinin həyata keçirilməsinə yönəldilmişdir. Məhkəmələrin üzərinə başqa vəzifələr qoyulması yolverilməzdir. Azərbaycan Respublikası İnzibati Xətalar Məcəlləsinin: 106.0.3 və 106.0.5-ci maddələrinə əsasən hakim, səlahiyyətli orqan (vəzifəli şəxs) inzibati xətalar haqqında işlərə baxarkən inzibati xəta haqqında protokol və işin digər materialları bu Məcəllənin tələblərinə müvafiq olaraq tərtib edilib-edilməməsini və mahiyyəti üzrə baxılması üçün işdə kifayət qədər sübutların toplanıb-toplanmaması məsələlərini həll edir. 109.1.6-cı maddəsinə görə inzibati xəta haqqında işin baxılmağa hazırlanması zamanı protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda, işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması barəsində qərardad qəbul edilir. Beləliklə, Abşeron Rayon Məhkəməsinin xx.xx.2025-ci il tarixli, 3(012)-796/2025 saylı qərardadında göstərilən nöqsanların aradan qaldırılması üçün müəyyən edilmiş tələblər səlahiyyətli orqan tərəfindən yerinə yetirilmədiyindən təkarən məhkəmənin icraatına daxil olmuş inzibati xəta haqqında material ona əlavə edilmiş sənədlərlə birlikdə Abşeron rayon Polis İdarəsinə geri qaytarılmalıdır. “Azərbaycan Respublikası İnzibati Xətalar Məcəlləsinin 129.1.3-cü maddəsinin şərh olunmasına dair” Azərbaycan Respublikası Konstitusiya Məhkəməsi Plenumunun 22 noyabr 2020-ci il tarixli Qərarına əsasən inzibati xətalar qanunvericiliyinin ümumi və xüsusi normalarında məhkəmə qərardadlarından şikayət verilməsi nəzərdə tutulmamışdır. Azərbaycan Respublikasının İnzibati Xətalar Məcəlləsinin 128-ci maddəsinin tələbləri baxımından həmin Məcəllənin 109-cu maddəsində nəzərdə tutulmuş inzibati xətalar haqqında işin baxılmasına hazırlanması zamanı qəbul edilən qərardadlardan apellyasiya şikayəti vermək hüququ istisna edilir. Yuxarıda göstərilənlərə əsasən və Azərbaycan Respublikasının İnzibati Xətalar Məcəlləsinin 106 və 109-cu maddələrini rəhbər tutaraq, Qərara aldım: «Azərbaycan Respublikası Ekologiya və Təbii Sərvətlər Nazirliyinin Nəqliyyat İdarəsi»nin Azərbaycan Respublikası İnzibati Xətalar Məcəlləsinin 469.3-cü maddəsi ilə tərtib edilmiş 17 mart 2025-ci il tarixli AP seriyalı ******* saylı inzibati xəta haqqında protokol və ona əlavə edilmiş sənədlər məhkəmənin qanuni tələblərini təkrar olaraq, yəni - üçüncü dəfə yerinə yetirmədiyindən geri qaytarılsın. Azərbaycan Respublikası İnzibati Xətalar Məcəlləsinin 43.3-cü maddəsinin tələblərinə əməl olunması inzibati xəta haqqında protokolu tərtib etmiş şəxsin diqqətinə çatdırılsın. Qərardaddan şikayət verilə bilməz. Sədrlik edən Abusət Qasımov