Abşeron Rayon Məhkəməsi Qərardad — İş №3(012)-850/2022

Azərbaycan Respublikası adından QƏRARDAD Xırdalan şəhəri İş № 3(012)-850/2022 02.06.2022 ABŞERON RAYON MƏHKƏMƏSİ Mən, Abşeron Rayon Məhkəməsinin hakimi Həsənov Vaqif İskəndər oğlu, X1 barəsində Azərbaycan Respublikası Dövlət Yol Polisinin 15 avqust 2021-ci il tarixli, İXP ******* saylı inzibati xəta haqqında protokoldan verdiyi şikayət ərizəsinə 02.06.2022-ci il tarixdə, Abşeron rayonu, Xırdalan şəhərində, Abşeron Rayon Məhkəməsinin inzibati binasında açıq məhkəmə iclasında baxaraq, MÜƏYYƏN ETDİM: X1 barəsində Azərbaycan Respublikası Dövlət Yol Polisinin 15 avqust 2021-ci il tarixli, İXP ******* saylı inzibati xəta haqqında protokolun ləğv edilməsi və inzibati xəta haqqında işə yenidən baxılması üçün səlahiyyətli orqana göndərilməsi barədə ərizə ilə məhkəməyə müraciət etmişdir. Ərizəni və təqdim edilmiş sənədləri nəzərdən keçirərək hesab edirəm ki, şikayətə baxılması qeyri-mümkündür, ona görə də geri qaytarılmalıdır. Belə ki, X1 ərizəsində inzibati xəta haqqında protokolun ləğv edilməsini xahiş edir. Ərizənin dəlilləri ilə əlaqədar qeyd etməyi zəruri hesab edirəm ki, inzibati xəta haqqında protokoldan şikayət verilməsi Azərbaycan Respublikasının İnzibati Xətalar Məcəlləsində nəzərdə tutulmamışdır. Məhkəmə hesab edir ki, inzibati xəta haqqında protokol qərar deyildir, Azərbaycan Respublikası İnzibati Xətalar Məcəlləsinin 101.1-ci maddəsinə əsasən inzibati xətanın törədilməsini əks edərək tərtib edilir və həmin Məcəllənin 103.1-ci maddəsinə əsasən tərtib edildiyi vaxtdan 48 saatadək müddətində baxılması üçün hakimə, səlahiyyətli orqana (vəzifəli şəxsə) göndərilməlidir. Qeyd edilən baxış nəticəsində İnzibati Xətalar Məcəlləsinin 114-cü maddəsində göstərilən qərarlardan biri çıxarılır və yalnız bundan sonra həmin Məcəllənin 33-cü fəsli ilə müəyyən edilmiş qaydada şikayət (və ya protest) etmə hüququ yaranır. Azərbaycan Respublikasının İnzibati Xətalar Məcəlləsinin 109.1.6-cı maddəsinə əsasən inzibati xəta haqqında işin baxılmağa hazırlanması zamanı protokol və digər materiallar səlahiyyəti olmayan şəxslər tərəfindən tərtib olunmadıqda, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması barəsində qərardad qəbul edilir. Həmin Məcəllənin 106.0 və 106.0.3-cü maddələrinə əsasən hakim inzibati xətalar haqqında işlərə baxarkən digər məsələlərlə yanaşı inzibati xəta haqqında protokol və işin digər materiallarının bu Məcəllənin tələblərinə müvafiq olaraq tərtib edilib-edilməməsi məsələsini həll edir. Həmin Məcəllənin 130.1-ci maddəsinə əsasən Bu Məcəllənin 126.1-ci maddəsində nəzərdə tutulmuş hallar istisna olmaqla, qərarın surəti bu Məcəllənin 57.1–57.5-ci maddələrində nəzərdə tutulmuş rəsmi qaydada verildiyi vaxtdan on gün müddətində inzibati xəta haqqında iş üzrə qərardan şikayət və ya protest verilə bilər. Həmin Məcəllənin 130.2-ci maddəsinə əsasən Bu Məcəllənin 130.1-ci maddəsində nəzərdə tutulmuş müddət üzrlü səbəbdən buraxıldıqda, şikayət və ya protest verən şəxsin vəsatəti ilə bu müddət hakim, səlahiyyətli orqan (vəzifəli şəxs) tərəfindən bərpa edilir. Həmin Məcəllənin 130.3-cü maddəsinə əsasən Buraxılmış müddətin bərpası qeyri-mümkün hesab edildikdə, bu halda vəsatəti rədd etmə haqqında qərardad qəbul edilir. Beləliklə, mövcud qanunvericiliyə görə, protokol tərtib edildikdən sonra, hakimə (yaxud digər səlahiyyətli orqana) göndərilir və protokola (işin digər materialları və halları ilə birlikdə) baxılmasının nəticəsi üzrə şəxsin inzibati xətanın törədilməsində təqsirli olubolmaması müəyyən edilir, qərarla razı olmayan şəxsə onun şikayət etmək hüququ izah edilir. Hesab edirəm ki, həmin protokol ona əlavə edilmiş sənədlərlə birlikdə məhkəməyə və ya müvafiq səlahiyyətli orqana göndərildikdən sonra, protokola baxılarkən ərizəçi protokolda qeyd edilənlərə etirazını bildirə bilər. Hazırkı vəziyyətdə protokoldan şikayətə baxılması və ya protokolun ləğv edilməsi istisna edilir. Ona görə də ərizə geri qaytarılmalıdır. Yuxarıda göstərilənlərə əsasən və Azərbaycan Respublikasının İXM-nin 43, 53, 100, 106-111-ci maddələrini rəhbər tutaraq, QƏRARA ALDİM: X1 barəsində Azərbaycan Respublikası Dövlət Yol Polisinin 15 avqust 2021-ci il tarixli, İXP ******* saylı inzibati xəta haqqında protokoldan verdiyi şikayət ərizəsi geri qaytarılsın. Qərardaddan apellyasiya şikayəti verilə bilməz. Hakim: Vaqif Həsənov