Ağdam Rayon Məhkəməsi Qərar — İş №3(013)-567/2025

Azərbaycan Respublikası adından QƏRAR Ağdam rayonu İş № 3(013)-567/2025 22.08.2025 AĞDAM RAYON MƏHKƏMƏSİ Hakim Niftəliyev Mahir Şamil oğlunun sədrliyi, Əliyev Anar İsmayıl oğlunun katibliyi, Barəsində inzibati xəta haqqında iş üzrə icraat aparılan Şəxs iştirakı ilə, xx.xx.1982-ci ildə Ağdam rayonunda anadan olmuş, Azərbaycan Respublikası vətəndaşı, orta təhsilli, evli, işləməyən, Ağdam rayonunun Sarıcalı ərazi dairəsi üzrə nümayəndəliyinin Sarıcalı kəndində yaşayan Şəxs barəsində Azərbaycan Respublikasının İnzibati Xətalar Məcəlləsinin 510 və 535.1-ci maddələri ilə Ağdam Rayon Polis Şöbəsindən daxil olmuş inzibati xəta haqqında materiala baxaraq, m ü ə y y ə n e t d i: Məhkəmənin icraatına Şəxs Azərbaycan Respublikasının İnzibati Xətalar Məcəlləsinin 510 və 535.1-ci maddələri ilə inzibati xəta törətməsi barədə material daxil olmuşdur. xx.xx.2025-ci il tarixli MN № ******* nömrəli inzibati xəta haqqında protokolda qeyd olunmuşdur ki, Şəxs xx.xx.2025-ci ildə Ağdam rayonunun Evoğlu kənd stasionar postunda polisin qanuni tələbinə tabe olmamışdır. Barəsində inzibati xəta haqqında iş üzrə icraat aparılan şəxs qismində məhkəmədə izahat verən Şəxs özünü təqsirli bilməyərək göstərmişdir ki, dövlət tərəfindən Ağdam rayonunun işğaldan azad olunmuş Sarıcalı kəndində yeni salınmış qəsəbədə ona və ailəsinə ev verilərək həmin evə köçürülmüşdür. Yaşadığı evə gəlib-getmək üçün müvafiq icazəsi olmuşdur. xx.xx.2025-ci ildə səhər vaxtı yaşadığı evdən çıxaraq Qaradağlı kəndinə gəlmiş və gecə vaxtı evinə qayıdarkən polis əməkdaşı onu işğaldan azad edilmiş əraziyə getmək üçün icazəsinin vaxtının bitdiyini deyərək kəndə buraxmamışdır. Dövlət tərəfindən ona verilərək köçürüldüyü evdən başqa yatmağa yerinin olmadığını bildirərək polisə etirazını bildirmişdir. Arvadının qardaşının Qarabağ Müharibəsində şəhid olduğunu qeyd etməklə qanuni və ədalətli qərar çıxarılmasını xahiş etmişdir. Şahid qismində məhkəmədə izahat verən Ağdam Rayon Polis Şöbəsinin Postr- Patrul Xidməti Bölüyünün polis nəfəri X1 göstərmişdir ki, 21 avqust 2025-ci ildə səhər vaxtı xidmətdə olduğu vaxt Şəxs Ağdam rayonunun işğaldan azad edilmiş Sarıcalı kəndində dövlət tərəfindən verilmiş evdən Qaradağlı kəndinə gəlmiş, həmin vaxt portal icazəsi olmuş və gecə vaxtı postdan geri qayıdarkən ona verilmiş işğaldan azad edilmiş əraziyə gəlib-getmək üçün müvafiq icazənin vaxtının bitdiyini görmüşdür. Bu səbəbdən Muradı postdan buraxmamış, Murad isə onunla mübahisə etmişdir. Məhkəmə araşdırılmış sübutlara obyektiv qiymət verərək belə hesab edir ki, Şəxs əməlində Azərbaycan Respublikasının İnzibati Xətalar Məcəlləsinin 510 və 535.1-ci maddələrinin tərkibi olmadığından həmin Məcəllənin 53.0.2 və 105.1-ci maddələrinə əsasən iş üzrə icraata xitam verilməsi barədə qərar qəbul edilməlidir. Belə ki, Azərbaycan Respublikasının İnzibati Xətalar Məcəlləsinin 510-cu maddəsi xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlərə görə məsuliyyət nəzərdə tutmuşdur. Həmin Məcəllənin 535.1-ci maddəsi polis işçisi və ya hərbi qulluqçu ictimai qaydanın mühafizə qaydalarını icra edərkən, onların qanuni tələblərinə qəsdən tabe olmamağa görə məsuliyyət nəzərdə tutmuşdur. İşə baxılarkən məlum olmuşdur ki, Şəxs ictimai qaydanı pozmamış, həmçinin ictimai qaydanın mühafizə qaydalarını icra edən polis əməkdaşlarının qanuni tələblərinə qəsdən tabe olmama halına yol verməmişdir. Şəxs 22 avqust 2025-ci ildə ictimai qaydanı pozmaması, ictimai qaydanın mühafizə qaydalarını icra edən polis əməkdaşlarının qanuni tələblərinə qəsdən tabe olmama halına yol verməməsi onun özünün məhkəmədə verdiyi izahat, həmçinin şahid qismində məhkəmədə dindirilmiş Ağdam Rayon Polis Şöbəsinin əməkdaşının izahatı ilə təsdiq olunmuşdur. Şəxs yaşamaq üçün ona verilmiş Ağdam rayonunun işğaldan azad edilmiş Sarıcalı kəndində yerləşən evə getmək məqsədi ilə stasionar polis postuna gəlmiş və orada saxlanılmış, onun yaşamağa başqa yeri olmamış və yaşadığı evə getmək üçün onu Ağdam rayonunun işğaldan azad edilmiş ərazisinə buraxmayan polis əməkdaşına etiraz etmişdir. Şəxs barəsində Azərbaycan Respublikasının İnzibati Xətalar Məcəlləsinin 510-cu maddəsi ilə xx.xx.2025-ci il tarixli MN № ******* nömrəli inzibati xəta haqqında protokol tərtib edilməsinə baxmayaraq, sözügedən protokolda onun ictimai qaydanı pozması barədə hər hansı bir qeyd aparılmamışdır. Azərbaycan Respublikasının İnzibati Xətalar Məcəlləsinin 76.1-ci maddəsində göstərilmişdir ki, inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində İnzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Həmin Məcəllənin 6.1-ci maddəsində qeyd edilmişdir ki, inzibati xətaya görə inzibati tənbeh bu Məcəlləyə uyğun olaraq tətbiq edilir. Həmin Məcəllənin 6.2-ci maddəsinə əsasən inzibati xəta haqqında iş üzrə icraatın təmin olunması tədbirləri tətbiq edilərkən qanunvericiliyin tələblərinə əməl olunması yuxarı orqanların və vəzifəli şəxslərin idarə nəzarəti ilə, məhkəmə və prokuror nəzarəti ilə və şikayət etmək hüququ ilə təmin edilir. Həmin Məcəllənin 8.1-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. Həmin Məcəllənin 8.3-cü maddəsində göstərilmişdir ki, inzibati məsuliyyətə cəlb olunan şəxsin təqsirli olması barəsində şübhələr onun xeyirinə həll edilir. Azərbaycan Respublikasının İnzibati Xətalar Məcəlləsinin 53.0.2-cu maddəsinə əsasən inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Həmin Məcəllənin 105.1-ci maddəsində göstərilmişdir ki, bu Məcəllənin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. Yuxarıda göstərilənlərə əsasən, Azərbaycan Respublikasının İnzibati Xətalar Məcəlləsinin 40, 43, 48-51,53.0.9, 105.1, 128-130-cu maddələrini rəhbər tutub, məhkəmə q ə r a r a a l d ı: Şəxs barəsində Azərbaycan Respublikasının İnzibati Xətalar Məcəlləsinin 510 və 535.1-ci maddələri ilə olan inzibati xəta haqqında iş üzrə icraata xitam verilsin. Qərarın surəti rəsmi qaydada verildiyi vaxtdan on gün müddətində Ağdam Rayon Məhkəməsi vasitəsi ilə və ya birbaşa Gəncə Apelyasiya Məhkəməsinə apelyasiya şikayəti verilə bilər. Sədrlik edən Mahir Niftəliyev