Ağdam Rayon Məhkəməsi Qərar — İş №3(013)-57/2025

Azərbaycan Respublikası adından QƏRAR Ağdam rayonu İş № 3(013)-57/2025 27.01.2025 AĞDAM RAYON MƏHKƏMƏSİ Hakim Niftəliyev Mahir Şamil oğlunun sədrliyi, Əliyev Anar İsmayıl oğlunun katibliyi, Barəsində inzibati xəta haqqında iş üzrə icraat aparılan Şəxs iştirakı ilə, xx.xx.1977-ci ildə Ağcabədi rayonunun Mirzəhaqverdi kəndində anadan olmuş, Azərbaycan Respublikası vətəndaşı, orta təhsilli, evli, Ağdam rayonunun işğaldan azad edilmiş hissəsində fəaliyyət göstərən «Frend» şirkətində usta işləyən, Bakı şəhəri Xətai rayonu Sadıqcan küçəsi ev 52-də yaşayan Şəxs barəsində Azərbaycan Respublikasının İnzibati Xətalar Məcəlləsinin 535.1-cı maddəsi ilə Ağdam Rayon Polis Şöbəsindən daxil olmuş inzibati xəta haqqında materiala baxaraq, m ü ə y y ə n e t d i: Şəxs 26 yanvar 2025-ci ildə saat 15 radələrində Ağdam rayonunun işğaldan azad edilmiş hissəsinə keçmək üçün müvafiq icazəsinin olmamasına baxmayaraq həmin əraziyə keçmək istəyərək Ağdam Rayon Polis Şöbəsinin əməkdaşının qanuni tələblərinə qəsdən tabe olmamışdır. Barəsində inzibati xəta haqqında iş üzrə icraat aparılan şəxs qismində məhkəmədə izahat verən Şəxs təqsirini etiraf edərək bildirmişdir ki, Ağdam rayonunun işğaldan azad edilmiş hissəsində fəaliyyət göstərən «Frend» şirkətində usta işləyir. İşğaldan azad edilmiş əraziyə gedib-gəlmək üçün müvafiq icazəsi olmuşdur. Həmin icazə müddətinin başa çatmasından məlumatı olmadığından 26 yanvar 2025-ci ildə özünə mobil telefon almaq üçün Quzanlı qəsəbəsinə gəlmiş və saat 15 radələrində geri qayıdarkən polis postundan ona işğaldan azad edilmiş əraziyə getmək üçün müvafiq icazəsinin müddətinin bitdiyi bildirilmişdir. Təcili iş yerində olmaq üçün postdan kənar işğaldan azad edilmiş əraziyə getmək istəmişdir. Həmin vaxt polis əməkdaşları onu saxlamışlar. İlk dəfə olaraq inzibati xəta törətdiyini və tutduğu əməldən peşmançılıq hissi keçirdiyini qeyd etməklə ona köməklik göstərilməsini məhkəmədə xahiş etmişdir. Şahid qismində məhkəmədə ifadə verən Ağdam Rayon Polis X2 Xidməti Bölüyünün polis nəfəri X1 göstəmişdir ki, 26 yanvar 2025-ci ildə saat 15 radələrində Ağdam rayonunun işğaldan azad edilmiş hissəsində xidmətdə olduğu vaxt Şəxs polis postundan kənar şəhər ərazisinə keçmək istəməsi barədə daxili qoşunun əməkdaşlarından məlumat almışdır. Sonra Namiqin olduğu yerə gedərək sonuncuya yaxınlaşmış və məlum olmuşdur ki, Namiqin işğaldan azad edilmiş əraziyə getmək üçün icazəsinin müddəti bitmişdir. Namiq işğaldan azad edilmiş əraziyə postdan kənar getmək istəmiş, lakin gedə bilməmişdir. Şəxs Azərbaycan Respublikasının İnzibati Xətalar Məcəlləsinin 535.1-ci maddəsində nəzərdə tutulan inzibati xətanı törətməsi özünün etirafı, iş materiallarında olan və məhkəmə baxışında tədqiq edilmiş xx.xx.2025-ci il tarixli MN № ******* saylı inzibati xəta haqqında protokol, şahidin ifadəsi və digər iş materialları ilə təsdiq olunur. Şəxs Azərbaycan Respublikasının İnzibati Xətalar Məcəlləsinin 33-cü maddəsində nəzərdə tutulan məsuliyyətini ağırlaşdıran hallar müəyyən edilməmişdir. Onun ilk dəfə olaraq inzibati xəta törətməsi və təqsirini etiraf edərək tutduğu əməldən peşmançılıq hissi keçirməsi məsuliyyətini yüngülləşdirən hallar kimi nəzərə alınmalıdır. İş materiallarında olan xx.xx.2025-ci il tarixli MN № ******* saylı protokoldan görünür ki, Şəxs xx.xx.2025-ci ildə saat 17:00-da inzibati qaydada tutulmuş və xx.xx.2025ci ildə saat 11:00-da azad olunmuşdur. Azərbaycan Respublikasının İnzibati Xətalar Məcəlləsinin 31.4-1-ci maddəsində göstərilmişdir ki, inzibati qaydada tutulmuş şəxs barəsində inzibati həbs istisna olmaqla, tətbiq edilən digər inzibati tənbehin həddi, bu Məcəllənin xüsusi hissəsində inzibati xətanın törədilməsinə görə müəyyən edilən inzibati tənbehin yuxarı həddinin dörddə üçündən çox ola bilməz. Məhkəmə belə hesab edir ki, Şəxs barəsində inzibati cərimə növündə tənbeh tətbiq etməklə, onu qanunlara əməl edilməsi ruhunda tərbiyələndirmək, həm onun özü, həm də başqa şəxslər tərəfindən yeni inzibati xəta törədilməsinin qarşısını almaq kimi Azərbaycan Respublikasının İnzibati Xətalar Məcəlləsinin 21-ci maddəsində göstərilən inzibati tənbehin məqsədlərinə nail olmaq mümkün olacaqdır. Məhkəmə Şəxs barəsində inzibati tənbeh tətbiq edərkən onun törətdiyi xətanın xarakteri, şəxsiyyəti, təqsirinin dərəcəsi, əmlak vəziyyətini, habelə məsuliyyəti yüngülləşdirən halları nəzərə almışdır. Yuxarıda göstərilənlərə əsasən, Azərbaycan Respublikasının İnzibati Xətalar Məcəlləsinin 21,30-31, 40,43,48-51,128-130-cu maddələrini rəhbər tutub, q ə r a r a a l d ı: Şəxs Azərbaycan Respublikasının İnzibati Xətalar Məcəlləsinin 535.1-ci maddəsi ilə təqsirli bilinib, yüz əlli manat məbləğində inzibati cərimə edilsin. Qərarın surəti rəsmi qaydada verildiyi vaxtdan on gün müddətində Ağdam Rayon Məhkəməsi vasitəsi ilə və ya birbaşa Gəncə Apelyasiya Məhkəməsinə apelyasiya şikayəti verilə bilər. Sədrlik edən Mahir Niftəliyev