Ağdaş Rayon Məhkəməsi Qərardad — İş №3(014)-352/2024

Azərbaycan Respublikası adından QƏRARDAD Ağdaş rayonu İş № 3(014)-352/2024 26.07.2024 AĞDAŞ RAYON MƏHKƏMƏSİ Ağdaş Rayon Məhkəməsi Hakim Sultanov Cavid Rizvan oğlunun sədrliyi, Məhkəmə iclasının katibi X2 iclas katibliyi, İnzibati xəta haqqında protokolu tərtib etmiş şəxs X4, Zərərçəkmiş şəxs, Barəsində inzibati xəta haqqında iş üzrə icraat aparılan şəxs Şəxs, X1 iştirakları ilə xx xxxxx 1994-cü ildə ünvan 1ində doğulmuş, Azərbaycan Respublikasının vətəndaşı, evli, ünvan 1i ünvanında qeydiyyatda olan Şəxs barəsində Azərbaycan Respublikası İnzibati Xətalar Məcəlləsinin 157-ci maddəsi ilə Ağdaş rayon Polis şöbəsindən daxil olmuş inzibati xəta haqqında işə baxaraq, MÜƏYYƏN ETDİ: Şəxs barəsində Ağdaş rayon Polis şöbəsi tərəfindən 26 iyul 2024-cü il tarixdə, MN № ******* nömrəli inzibati xəta haqqında protokol tərtib edilərək baxılması üçün məhkəməyə göndərilmişdir. İnzibati xəta haqqında protokolda qeyd edilir ki, Şəxs xx.xx.2024-cü il tarixdə Zərərçəkmiş şəxs şillə ilə vuraraq Azərbaycan Respublikası İnzibati Xətalar Məcəlləsinin 157ci maddəsinin tələbini pozmuşdur. Məhkəmə inzibati xəta haqqında protokolu və ona əlavə olunmuş sənədləri tədqiq edərək hesab edir ki, inzibati xəta haqqında protokol və ona əlavə olunmuş sənədlər geri qaytarılmalıdır. Belə ki, Elektron Məhkəmə İnformasiya sistemindən çıxarışdan görünür ki, Zərərçəkmiş şəxs 3-cü qrup ümumi xəstə kimi qeydiyyatdadır. İşin materiallarında olan Mingəçevir şəhər Rayonlararası Psixo-Nevroloji Dispanserinin 16 iyul 2001-ci il tarixli anamnezdən görünür ki, xəstənin intellektual səviyyəsi zehni və fiziki əməklə məşğul olmağa imkan vermir, maraq dairəsi məhduddur, ətrafa qarşı laqeyddir, zaman və məkan haqqında təsəvvürü səthidir, bilik ehtiyatı kasaddır. Eyni zamanda məhkəmə iclasında Zərərçəkmiş şəxs ona verilən sualları başa düşməkdə çətinlik çəkməsi, əvvəlcə onun fəaliyyət qabiliyyəti və qanuni nümayəndənin iştirakı ilə bağlı məsələnin həllini zəruri etmişdir. Həmçinin, müəyyən edilmişdir ki, nə təhqiqat zamanı, nə də inzibati xəta haqqında protokol tərtib edilərkən onun izahatı alınmamışdır. Zərərçəkmiş şəxsin hadisənin mahiyyətini dərk etməsi və buna uyğun mövqeyini bildirməsi, onun öz hüquqları ilə yanaşı barəsində inzibati xəta haqqında iş üzrə icraat aparılan şəxsin vəziyyətinə də təsir edir. Belə ki, zərərçəkmiş şəxsin ona qarşı şikayət və tələbinin olmaması qanunvericilikdə iş üzrə icraata xitam verilməsinin əsası kimi müəyyən edilmişdir. Azərbaycan Respublikası İnzibati Xətalar Məcəlləsinin 39.1-ci maddəsinə əsasən bu Məcəllənin 157 və 158-ci maddələrində nəzərdə tutulmuş inzibati xəta haqqında iş üzrə icraat yalnız zərər çəkmiş şəxsin ərizəsinə əsasən başlanır, zərər çəkmiş şəxslə barəsində inzibati icraat aparılan şəxs barışdıqda isə həmin iş üzrə icraata xitam verilir. Azərbaycan Respublikası İnzibati Xətalar Məcəlləsinin 62.2.2-ci maddəsinə əsasən zərər çəkmiş şəxsin izahat vermək hüququ vardır. Azərbaycan Respublikası İnzibati Xətalar Məcəlləsinin 109.1.6-cı maddəsinə əsasən inzibati xəta haqqında işin baxılmağa hazırlanması zamanı protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda, işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması barədə qərardad qəbul edilir. Beləliklə, məhkəmə hesab edir ki, təqdim edilmiş materiallar natamam olduğundan və işə baxılarkən tamamlamaq mümkün olmadığından onu tərtib etmiş orqana geri qaytarılmalıdır. Azərbaycan Respublikası İnzibati Xətalar Məcəlləsinin 129.1.3-cü maddəsinin şərh olunmasına dair Azərbaycan Respublikası Konstitusiya Məhkəməsi Plenumunun 04 noyabr 2020-ci il tarixli qərarına əsasən Azərbaycan Respublikası İnzibati Xətalar Məcəlləsinin tələbləri baxımından inzibati xəta haqqında iş üzrə qərardan verilən şikayətə və ya protestə baxmağa hazırlıq zamanı qəbul edilən qərardaddan apellyasiya şikayəti vermək hüququ istisna edilir. Yuxarıda göstərilənlərə və Azərbaycan Respublikası İnzibati Xətalar Məcəlləsinin 40, 43, 114, 128-130-cu maddərini rəhbər tutaraq, QƏRARA ALDİ: Şəxs barəsində Azərbaycan Respublikası İnzibati Xətalar Məcəlləsinin 157-ci maddəsi ilə tərtib edilmiş inzibati xəta haqqında protokola əlavə edilmiş materiallar natamam olduğundan və işə baxılarkən tamamlamaq mümkün olmadığından inzibati xəta haqqında protokol və ona əlavə edilmiş sənədlər Ağdaş rayon Polis şöbəsinə geri qaytarılsın. Hakim Cavid Sultanov