Ağsu Rayon Məhkəməsi Qərar — İş №3(016)-139/2024

Azərbaycan Respublikası adından QƏRAR Ağsu rayonu İş № 3(016)-139/2024 13.03.2024 AĞSU RAYON MƏHKƏMƏSİ Hakim Əsgərov Anar Əlifağa oğlunun sədrliyi, Xalıqov Cavanşir Fayıq oğlunun katibliyi, İnzibati xəta haqqında protokol tərtib edən şəxs X1, Barəsində inzibati xəta haqqında iş üzrə icraat aparılan Şəxs iştirakları ilə, xx.xx.1990-cı ildə İsmayıllı şəhərində anadan olan, Azərbaycan Respublikasının vətəndaşı, orta təhsilli, işsiz, subay, İsmayıllı rayonu, İvanovka kəndində qeydiyyatda olan və yaşayan, Şəxs Azərbaycan Respublikası İnzibati Xətalar Məcəlləsinin (bundan sonra mətndə - İXM) 510 və 535.1-ci maddələri ilə inzibati xəta törətməsinə dair Ağsu rayon Polis Şöbəsindən daxil olmuş materiala baxaraq, məhkəmə MÜƏYYƏN ETDİ: Şəxs polisin qanuni tələbinə qəsdən tabe olmamış, ictimai qaydanı kobud şəkildə pozmuşdur. Barəsində inzibati xəta haqqında iş üzrə icraat aparılan Şəxs izahat verərək göstərdi ki, xx.xx.2024-cü il tarixdə təxminən saat 11-12 radələrində Kürdəmir rayonundan Ağsu rayonuna, öz yeni aldığı avtomobillə hərəkət edən zaman Ağsu rayonu ərazisində körpüyə çatan vaxt yolun kənarında xidməti polis maşını dayanmışdır, sayrışan işıq siqnalları yanmırdı. Qarşıya baxanda qrajdanski avtomobillərin dayandığını görmüş, polis maşınının yanında saxlamış, bu zaman polis maşınında olan polis nəfəri ona hərəkət etməyini bildirmişdir. O, körpünün üzərinə hərəkət etmiş, hərəkət etdikdən sonra qarşıdan üzərinə hücum olduğunu görmüş, hücum edənlərin içərisində polis nəfərləri və sıravi vətəndaşlar da olmuşdur. Ona dayan əmri verilmədən üzərinə hücum edilib və sənəd verilmədən, özlərini təqdim etmədən heç bir əsas olmadan ona vəhşicəsinə Azərbaycan polisinə, Konstitusiyasına zidd olan qaydada hücum çəkilmişdir. Bu halı görərkən o cibində pulu olduğundan və avtomobilinə ziyan vurduqlarından həmin yerdən uzaqlaşmışdır. Barəsində yüngül inzibati tənbeh tədbiri tətbiq edilməsini xahiş etdi. Məhkəmə iclasında şahid qismində dindirilmiş X2 izahatında göstərdi ki, o, xx.xx.2024-cü il tarixdə təxminən 23:30 radələrində PPXB-nin komandiri, polis baş leytenantı Aqil Tağıyev və polis manqa komandiri polis serjantı Emil Əzizovla birlikdə “Fiat Doblo” markalı, **-PF-*** dövlət qeydiyyat nişanlı avtomaşınla Ağsu rayonu, Qaraqaşlı kənd ərazisində xidmət apararkən “Mercedes Benz” markalı, **-SU-*** dövlət qeydiyyat nişanlı avtomobilin sürücüsü sonradan adı və soyadı onlara məlum olan Şəxs özünü şübhəli apardığı üçün tərəflərindən həmin avtomobilin sürücüsünə nəzarət qaydasında saxla işarəsi vermişlər. X6 idarə etdiyi avtomobili yolun kənarına çəkib saxlamış, onlar avtomaşından düşüb sürücüyə yaxınlaşıb özlərini təqdim etmişlər. Sürücünün özünə və avtomaşına aid sənədləri istədikdə X6 avtomobilin şüşəsini aşağı endirib onları təhqir etmiş və avtomobili sürüb ərazidən uzaqlaşmışdır. Məhkəmə iclasında şahid qismində dindirilmiş X5 izahatında göstərdi ki, o, xx.xx.2024-cü il tarixdə təxminən 23:30 radələrində PPXB-nin polis nəfəri sürücüMəhəmməd Qədirli və polis manqa komandiri polis serjantı Emil Əzizovla birlikdə “Fiat Doblo” markalı, **-PF-*** dövlət qeydiyyat nişanlı avtomaşınla Ağsu rayonu, Qaraqaşlı kənd ərazisində xidmət apararkən “Mercedes Benz” markalı, **-SU-*** dövlət qeydiyyat nişanlı avtomobilin sürücüsü sonradan adı və soyadı onlara məlum olan Şəxs özünü şübhəli apardığı üçün tərəflərindən həmin avtomobilin sürücüsünə nəzarət qaydasında saxla işarəsi vermişlər. X6 idarə etdiyi avtomobili yolun kənarına çəkib saxlamış, onlar avtomaşından düşüb sürücüyə yaxınlaşıb özlərini təqdim etmişlər. Sürücünün özünə və avtomaşına aid sənədləri istədikdə X6 avtomobilin şüşəsini aşağı endirib onları təhqir etmiş və avtomobili sürüb ərazidən uzaqlaşmışdır. Məhkəmə, inzibati xəta haqqında toplanmış materialları araşdıraraq hesab edir ki, Şəxs İXM-in 510 və 535.1-ci maddələri ilə qeyd olunan inzibati xətaları törətməkdə təqsiri tam sübut olunur. “İnzibati xəta haqqında” 12 mart 2024-cü il tarixli, MN ******* nömrəli protokoldan görünür ki, Şəxs 27 fevral 2024-cü il tarixdə polisin qanuni tələbinə qəsdən tabe olmamış, ictimai qaydanı kobud şəkildə pozmuşdur. İnzibati qaydada tutma haqqında 12 mart 2024-cü il tarixli, 189 nömrəli protokoldan görünür ki, Şəxs 12 mart 2024-cü il tarixdə saat 20:30-da tutulmuşdur. Göründüyü kimi, Şəxs ictimai qaydanı pozması və eyni zamanda, polis əməkdaşlarının qanuni tələblərinə qəsdən tabe olmaması özünün etirafı, şahid ifadəsi, “İnzibati xəta haqqında” protokol və digər iş materialları ilə təsdiq edilir. İXM-in 510-cu maddəsinə əsasən, xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlərə görə - əlli manatdan yüz manatadək məbləğdə cərimə edilir, işin hallarına görə, pozuntunu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda, on beş günədək müddətə inzibati həbs tətbiq olunur. İXM-in 535.1-ci maddəsinə əsasən, polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamağa görəfiziki şəxslər iki yüz manat məbləğində cərimə edilir və ya işin halları və pozuntu törədənin şəxsiyyəti nəzərə alınmaqla, bu tədbirlərin tətbiqi kifayət hesab edilmədikdə bir ayadək müddətə inzibati həbs tətbiq olunur. Məhkəmə hesab edir ki, barəsində inzibati xəta haqqında iş üzrə icraat aparılan Şəxs İXM-in 510 və 535-ci maddələri ilə nəzərdə tutulmuş inzibati xəta törətməsi iş materialları əsasında sübuta yetirilmiş və onun barəsində həmin maddələrin sanksiyası həddində inzibati tənbeh tətbiq edilməlidir. İXM-in 31.2-ci maddəsinə əsasən, fiziki və ya vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakretizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Şəxs səmimi peşmançılığı inzibati məsuliyyəti yüngülləşdirən haldır. Şəxs əməlində inzibati məsuliyyəti ağırlaşdıran hal yoxdur. Sadalanan xüsusatlara əsasən məhkəmə hesab edir ki, Şəxs törətdiyi inzibati xətaların hallarını, inzibati xəta törətmiş şəxsin şəxsiyyətini, inzibati xətanın xarakterini və törədilmə şəraitini nəzərə alaraq, İXM-in 34.3-cü maddəsinə əsasən Şəxs barəsində İXMin 535.1-ci maddəsinin sanksiyasında nəzərdə tutulan inzibati tənbeh tədbiri – inzibati həbs tətbiq olunmalıdır. İXM-in 34.3-cü maddəsinə əsasən, şəxsin eyni vaxtda öz hərəkətləri (hərəkətsizliyi) ilə törətdiyi bir neçə inzibati xətaya dair işlərə baxılması eyni orqanın səlahiyyətinə aiddirsə, həmin şəxs daha ciddi xətaya görə müəyyən edilmiş sanksiya çərçivəsində tənbeh edilir. Bu halda törədilmiş xətalardan hər hansı birinə görə nəzərdə tutulmuş əlavə tənbehlərdən biri əsas tənbehə əlavə edilə bilər. Beləliklə, məhkəmə hesab edir ki, Şəxs İXM-in 510 və 535.1-ci maddələrində nəzərdə tutulmuş inzibati xətaları törətməkdə təqsirli bilinərək, İXM-in 34.3-cü maddəsinə əsasən, daha ciddi xəta hesab edilən İXM-in 535.1-ci maddəsinin sanksiyası çərçivəsində barəsində inzibati həbs tənbeh tədbiri tətbiq edilməlidir. Yuxarıda göstərilənlərə və İXM-in 40, 43, 48-51, 114, 128-130-cu maddələrinə əsasən, məhkəmə QƏRARA ALDİ: Şəxs İXM-in 510 və 535.1-ci maddələrində nəzərdə tutulmuş inzibati xətaları törətməkdə təqsirli bilinsin, həmin Məcəllənin 34.3-cü maddəsinə əsasən, daha ciddi xəta hesab edilən İXM-in 535.1-ci maddəsinin sanksiyası çərçivəsində 10 (on) gün müddətində həbs edilsin. İnzibati qaydada həbsetmənin əvvəli 12 mart 2024-cü il tarixdən, saat 20:30-dan hesablansın. Qərarın icrası Ağsu rayon Polis Şöbəsinə həvalə edilsin. Qərarın surəti rəsmi qaydada verildiyi vaxtdan 10 gün müddətində Şəki Apellyasiya Məhkəməsinə şikayət verilə bilər. Sədrlik edən Anar Əsgərov