Ağsu Rayon Məhkəməsi Qərar — İş №3(016)-185/2025

Azərbaycan Respublikası adından QƏRAR Ağsu rayonu İş № 3(016)-185/2025 25.06.2025 AĞSU RAYON MƏHKƏMƏSİ Hakim Əsgərov Anar Əlifağa oğlunun sədrliyi, Əzizov Nemət Qamət oğlunun katibliyi, İnzibati xəta haqqında protokolu tərtib edən şəxs X2, Barəsində inzibati xəta haqqında iş üzrə icraat aparılan Şəxs iştirakları ilə, xx.xx.1991-ci ildə Ağsu rayonu, Abasxanlı kəndində anadan olan, Azərbaycan Respublikası vətəndaşı, orta təhsilli, işləməyən, subay, Ağsu rayonu, Abasxanlı kəndində qeydiyyatda olan və yaşayan Şəxs Azərbaycan Respublikası İnzibati Xətalar Məcəlləsinin (bundan sonra mətndə - İXM) 510 və 535.1-ci maddələri ilə inzibati xəta törətməsinə dair Ağsu Rayon Polis Şöbəsindən daxil olmuş materiala baxaraq, məhkəmə MÜƏYYƏN ETDİ: Şəxs polisin qanuni tələbinə qəsdən tabe olmamış, ictimai qaydanı kobud şəkildə pozmuşdur. İnzibati xəta haqqında protokol tərtib etmiş şəxs X4 məhkəmə iclasında çıxış edərək bildirdi ki, İlahə Əsədova tərəfindən Şəxs onun evindən oğurluq etməsi barəsində Ağsu RPŞ-nə məlumat daxil olmuşdur. Onlar xx.xx.2025-ci il tarixdə vətəndaşın ünvanına getmişlər, lakin o qaçmış, polis şöbəsinə gətirilməsi mümkün olmamışdır. Bir aydır ki, vətəndaş axtarışdadır. Yenidən onun ünvanına getmişlər, vətəndaş yenidən qaçmağa cəhd etmiş, lakin polis əməkdaşları tərəfindən qaçmasının qarşısı alınmışdır. O, polisin qanuni tələblərinə riayət etməyərək ictimai asayişi pozmuşdur. Bu səbəbdən barəsində qanuni tədbir görülməsini xahiş etdi. Barəsində inzibati xəta haqqında iş üzrə icraat aparılan Şəxs izahat verərək göstərdi ki, Rayon Polis şöbəsi tərəfindən dəfələrlə izahatının alınması üçün RPŞ-nə çağırılmış, lakin getməkdən boyun qaçırmışdır. Anası ona gizlənməsini getsə onu tutacaqlarını bildirmiş, o da gizlənmişdir. xx.xx.2025-ci il tarixdə barəsində olunan şikayətlə əlaqədar olaraq polis əməkdaşları ünvanına yaxınlaşıb Polis şöbəsinə getməsini bildirsələr də, o, polis əməkdaşlarının ünvanına nalayiq ifadələrlə işlətməyə başlamışdır. Onu dəfələrlə nizam-intizama dəvət etsələr də o, polis əməkdaşlarının qanuni tələblərinə məhəl qoymamışdır. Bir qədər sonra polis əməkdaşları onu sakitləşdirmiş və RPŞ-nə gətirmişlər. Əməlindən peşmandır, barəsində yüngül inzibati tədbir görülməsini xahiş etdi. Məhkəmə iclasında şahid qismində dindirilmiş X1 izahatında göstərdi ki, Ağsu rayon sakini İlahə Əsədovanın DİN-nin 102 xidmətinə etdiyi müraciət əsasında oğurluq hadisəsini törətməkdə şübhəli bilinən Ağsu rayonu, Abasxanlı kənd sakini Şəxs Maqsud oğlunun izahatının alınması üçün bir neçə dəfə RPŞ-nə dəvət olunsa da gəlməkdən imtina etmiş və daha sonra telefon zənglərinə cavab vermədiyi üçün Ağsu RPŞ-nin polis əməkdaşları onun ünvanına yaxınlaşıb izahatının alınması üçün RPŞ-nə dəvət etsə də X3 yaşadığı evindən qaçmış və gizlənmişdir. xx.xx.2025-ci il tarixdə RPŞ-nin PPXB-nin bölük komandirinin müavini polis kapitanı Gülhüseyin Rüstəmov və RPŞ-nin İTB-nin polis nəfəri polis baş serjantı Cəbrail Hacıyev ilə birlikdə birlikdə Ağsu rayonu, Abasxanlı kəndinə gedib Şəxs izahatının alınması üçün RPŞ-nə dəvət etmişlər, lakin Maşllah Əsədov onlara RPŞ-nə getməyəcəyini bildirib uca səslə nalayiq ifadələr işlətməyə başlamışdır. Onlar həmin şəxsə irad bildirib dəfələrlə intizama dəvət etsələr də həmin şəxs onları nalayiq küçə söyüşləri ilə söyməyə davam etmiş, bundan sonra onlar həmin şəxsi Ağsu rayon polis şöbəsinə gətirmişlər. Məhkəmə inzibati xəta haqqında toplanmış materialları araşdıraraq hesab edir ki, Şəxs İXM-in 510 və 535.1-ci maddələri ilə qeyd olunan inzibati xətaları törətməkdə təqsiri tam sübut olunur. İş materiallarında olan və məhkəmə tərəfindən tədqiq edilmiş: - “İnzibati xəta haqqında” 25 iyun 2025-ci il tarixli, MN ******* nömrəli protokoldan görünür ki, Şəxs polisin qanuni tələbinə qəsdən tabe olmamış, ictimai qaydanı kobud şəkildə pozmuşdur. - “İnzibati qaydada tutma haqqında” 23 iyun 2025-ci il tarixli protokoldan görünür ki, Şəxs xx.xx.2025-ci il tarixdə, saat 14:00-da inzibati qaydada tutulmuşdur. Göründüyü kimi, Şəxs ictimai qaydanı pozması və eyni zamanda, polis əməkdaşlarının qanuni tələblərinə qəsdən tabe olmaması özünün etirafı, şahid ifadəsi, “İnzibati xəta haqqında” protokol və digər iş materialları ilə təsdiq edilir. İXM-in 510-cu maddəsinə əsasən, xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlərə görə - əlli manatdan yüz manatadək məbləğdə cərimə edilir, işin hallarına görə, pozuntunu törədənin şəxsiyyəti nəzərə alınmaqla, bu tədbirlərin tətbiqi kifayət sayılmadıqda, on beş günədək müddətə inzibati həbs tətbiq olunur. İXM-in 535.1-ci maddəsinə əsasən, polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamağa görəfiziki şəxslər iki yüz manat məbləğində cərimə edilir və ya işin halları və pozuntu törədənin şəxsiyyəti nəzərə alınmaqla, bu tədbirlərin tətbiqi kifayət hesab edilmədikdə bir ayadək müddətə inzibati həbs tətbiq olunur. Məhkəmə hesab edir ki, barəsində inzibati xəta haqqında iş üzrə icraat aparılan Şəxs İXM-in 510 və 535.1-ci maddələri ilə nəzərdə tutulmuş inzibati xəta törətməsi iş materialları əsasında sübuta yetirilmiş və onun barəsində həmin maddələrin sanksiyası həddində inzibati tənbeh tətbiq edilməlidir. İXM-in 31.2-ci maddəsinə əsasən, fiziki və ya vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakretizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Şəxs səmimi peşmanlığı inzibati məsuliyyəti yüngülləşdirən haldır. Şəxs əməlində inzibati məsuliyyəti ağırlaşdıran hal yoxdur. Sadalanan xüsusatlara əsasən məhkəmə hesab edir ki, Şəxs törətdiyi inzibati xətaların hallarını, inzibati xəta törətmiş şəxsin şəxsiyyətini, inzibati xətanın xarakterini və törədilmə şəraitini nəzərə alaraq, İXM-in 34.3-cü maddəsinə əsasən Şəxs barəsində İXMin 535.1-ci maddəsinin sanksiyasında nəzərdə tutulan inzibati tənbeh tədbiri – inzibati həbs tətbiq olunmalıdır. İXM-in 34.3-cü maddəsinə əsasən, şəxsin eyni vaxtda öz hərəkətləri (hərəkətsizliyi) ilə törətdiyi bir neçə inzibati xətaya dair işlərə baxılması eyni orqanın səlahiyyətinə aiddirsə, həmin şəxs daha ciddi xətaya görə müəyyən edilmiş sanksiya çərçivəsində tənbeh edilir. Bu halda törədilmiş xətalardan hər hansı birinə görə nəzərdə tutulmuş əlavə tənbehlərdən biri əsas tənbehə əlavə edilə bilər. Beləliklə, məhkəmə hesab edir ki, Şəxs İXM-in 510 və 535.1-ci maddələrində nəzərdə tutulmuş inzibati xətaları törətməkdə təqsirli bilinərək, İXM-in 34.3-cü maddəsinə əsasən, daha ciddi xəta hesab edilən İXM-in 535.1-ci maddəsinin sanksiyası çərçivəsində barəsində inzibati həbs tənbeh tədbiri tətbiq edilməlidir. Yuxarıda göstərilənlərə və İXM-in 40, 43, 48-51, 114, 128-130-cu maddələrinə əsasən, məhkəmə QƏRARA ALDİ: Şəxs İXM-in 510 və 535.1-ci maddələrində nəzərdə tutulmuş inzibati xətaları törətməkdə təqsirli bilinsin, həmin Məcəllənin 34.3-cü maddəsinə əsasən, daha ciddi xəta hesab edilən İXM-in 535.1-ci maddəsinin sanksiyası çərçivəsində 15 (on beş) gün müddətində həbs edilsin. İnzibati qaydada həbsetmənin əvvəli 23 iyun 2025-ci il tarixdən, saat 14:00-dan hesablansın. Qərarın icrası Ağsu rayon Polis şöbəsinə həvalə edilsin. Qərarın surəti rəsmi qaydada verildiyi vaxtdan 10 gün müddətində Şəki Apellyasiya Məhkəməsinə şikayət verilə bilər. Sədrlik edən Anar Əsgərov