Ağsu Rayon Məhkəməsi Qərar — İş №3(016)-531/2024

Azərbaycan Respublikası adından QƏRAR Ağsu rayonu İş № 3(016)-531/2024 24.10.2024 AĞSU RAYON MƏHKƏMƏSİ Hakim Əsgərov Anar Əlifağa oğlunun sədrliyi, Xalıqov Cavanşir Fayıq oğlunun katibliyi, İnzibati xəta haqqında protokol tərtib etmiş şəxs X4, Zərərçəkmiş şəxs X1, Barəsində inzibati xəta haqqında iş üzrə icraat aparılan Şəxs Fərda oğlunun iştirakları ilə, xx.xx.1984-ci ildə Ağsu rayonu, Nuran kəndində anadan olan, Azərbaycan Respublikası vətəndaşı, orta təhsilli, işləməyən, subay, Ağsu rayonu, Nuran kəndində qeydiyyatda olan və yaşayan, Şəxs Fərda oğlunun Azərbaycan Respublikası İnzibati Xətalar Məcəlləsinin (bundan sonra mətndə - İXM) 528.1-ci maddəsi ilə inzibati məsuliyyətə cəlb edilməsinə dair Ağsu rayon İcra və Probasiya Şöbəsindən daxil olmuş inzibati xəta haqqında protokola və ona əlavə edilmiş materiallara baxaraq, məhkəmə MÜƏYYƏN ETDİ: Heydərov X7 Rayon Məhkəməsinin 2(016)-58/2023 nömrəli, xx.xx.2023-ci il tarixli icra sənədinin icrası ilə əlaqədar icra məmurunun qanuni tələblərini yerinə yetirməyərək icra sənədlərini üzrsüz səbəbdən icra etməmişdir. Ağsu rayon İcra və Probasiya Şöbəsinin icra məmuru X5 məhkəmə iclasında verdiyi izahatında bildirdi ki, Şəxs Fərda oğlundan Ağsu Rayon Məhkəməsinin 2(016)-58/2023 nömrəli, xx.xx.2023-ci il tarixli icra sənədinə əsasən iki uşağın saxlanması üçün hər ay 200 manat məbləğində alimentin alınaraq X2 verilməsi barədə icra sənədi icraata daxil olmuşdur. İcraata başlamaq haqqında qərar qəbul edilmiş və borcun ödənilməsi üçün bildiriş və digər aidiyyəti sənədlər borcluya göndərilmişdir. Yaranmış borcun ödənilməsi məqsədi ilə borclunun adına əmlakının olub-olmaması barədə aidiyyəti təşkilatlara sorğu ilə müraciət edilmiş və borclunun adına borcun yönəldilə biləcəyi əmlak aşkar edilməmişdir. Borclu dəfələrlə şöbəyə çağırılmış, izahatı alınmışdır. Borclu barəsində mart ayında da protokol tərtib olunmuş və 1.300 borcu olduğu bildirilmişdir, borclu 1.300 manat ödənişin hamısını ödəyərək borcunu bağlamış və onun işinə xitam verilmişdir. Lakin mart ayında borcunu bitirdikdən sonra alimenti vaxtında ödəməmiş və sadəcə hissə-hissə 370 manat məbləğində pul ödəmişdir. Hal-hazırda borclunun yenidən 1.030 manat məbləğində aliment borcu var. Barəsində İXM-in 528.1-ci maddəsində nəzərdə tutulmuş tədbir görülməsini xahiş etdi. Barəsində inzibati xəta haqqında iş üzrə icraat aparılan Şəxs Fərda oğlu məhkəmə iclasında izahat verərək bildirdi ki, o, Ağsu Rayon Məhkəməsinin 2(016)-58/2023 nömrəli, xx.xx.2023-ci il tarixli icra sənədinə əsasən hər ay 200 manat məbləğində alimenti X2 ödəməlidir. O, bir dəfə iddiaçıya 200 manat nəğd ödəniş etmişdir, lakin bu məbləğ borcundan çıxarılmır. İmkanı olmadığı üçün ödəniş edə bilməmişdir, o, xəstədir və işləyə bilmir. Hal-hazırda 200 manat məbləğində ödəniş edə bilir. Ona vaxt verilməsini, hər ay 300 manat olmaqla hissə-hissə ödəyəcəyini bildirmişdir. Barəsində yüngül inzibati tənbeh tədbirinin tətbiq edilməsini xahiş etdi. Məhkəmə iclasında zərərçəkmiş şəxs X3 izahat verərək göstərdi ki, Şəxs Fərda oğlundan Ağsu Rayon Məhkəməsinin 2(016)-58/2023 nömrəli, xx.xx.2023-ci il tarixli icra sənədinə əsasən hər ay 200 manat məbləğində aliment alınaraq ona verilməlidir. Borclunun borcunu hissə-hissə ödəməsinə razı deyil. Bu səbəbdən, barəsində İXM-in 528.1-ci maddəsində nəzərdə tutulmuş tədbir görülməsini xahiş etdi. Barəsində inzibati xəta haqqında iş üzrə icraat aparılan şəxsin, zərərçəkmiş şəxsin və icra məmurunun izahatları, 24 oktyabr 2024-cü il tarixli, MN ******* nömrəli protokol ilə müəyyən olunur ki, Şəxs Fərda oğlu icra məmurunun qanuni tələblərini yerinə yetirməmiş və İXM-in 528.1-ci maddəsində nəzərdə tutulan inzibati xətanı törətmişdir. İXM-in 528.1-ci maddəsinə əsasən, məhkəmə və ya digər orqanların qərarlarının icrası ilə əlaqədar icra məmurunun qanuni tələblərinin yerinə yetirilməməsinə və ya icra məmuru tərəfindən müəyyən olunmuş müddətdə borclunu müəyyən hərəkətləri etməyə və ya müəyyən hərəkətləri etməkdən çəkinməyə məcbur edən icra sənədinin üzrsüz səbəbdən icra edilməməsinə görə - fiziki şəxslər beş yüz manatdan min manatadək məbləğdə cərimə edilir və ya işin hallarına görə, pozuntunu törədənin şəxsiyyəti nəzərə alınmaqla, bir ayadək müddətə inzibati həbs tətbiq olunur, vəzifəli şəxslər min iki yüz manatdan iki min beş yüz manatadək məbləğdə, hüquqi şəxslər üç min manatdan beş min manatadək məbləğdə cərimə edilir. Normanın tələbinə əsasən, məhkəmə hesab edir ki, inzibati xəta hadisəsi olduğundan barəsində inzibati xəta haqqında iş üzrə icraat aparılan şəxs barəsində İXM-in 528.1-ci maddəsinin sanksiyası çərçivəsində inzibati tənbeh təyin edilməlidir. Məhkəmə, Şəxs Fərda oğluna inzibati tənbeh tətbiq edərkən, İXM-in 32.2-ci maddəsinə əsasən xətanın xarakterini, inzibati xəta törədən şəxsin şəxsiyyətini, onun təqsirinin dərəcəsini, əmlak vəziyyətini, habelə məsuliyyəti yüngülləşdirən və ağırlaşdıran hallar nəzərə alınır. Barəsində inzibati xəta haqqında iş üzrə icraat aparılan şəxsin əməlində inzibati məsuliyyəti yüngülləşdirən və ağırlaşdıran hallar müəyyən olunmadı. Şəxs Fərda oğlu tərəfindən törədilən inzibati xətanın xarakterini, törədilmə şəraitini, habelə əmlak vəziyyətini nəzərə alaraq məhkəmə hesab edir ki, onun barəsində inzibati həbs növündə tənbeh tətbiq edilməlidir. Yuxarıda göstərilənlərə və İXM-in 40, 43, 50, 51, 114, 128-130-cu maddələrinə əsasən, məhkəmə QƏRARA ALDİ: Şəxs Fərda oğlu İXM-in 528.1-ci maddəsində nəzərdə tutulmuş inzibati xətanın törədilməsində təqsirli bilinib, 08 (səkkiz) gün müddətində inzibati qaydada həbs edilsin. İnzibati qaydada həbsetmənin əvvəli 23 oktyabr 2024-cü il tarixdən, saat 18:00-dan hesablansın. Qərarın icrası Ağsu rayon Polis şöbəsinə həvalə edilsin. Qərarın surəti rəsmi qaydada verildiyi vaxtdan 10 gün müddətində Şəki Apellyasiya Məhkəməsinə şikayət verilə bilər. Sədrlik edən Anar Əsgərov