Balakən Rayon Məhkəməsi Qərar — İş №3(019)-148/2021

Azərbaycan Respublikası adından QƏRAR Balakən Rayonu İş № 3(019)-148/2021 28.05.2021 BALAKƏN RAYON MƏHKƏMƏSİ Hakim Səlimov Hümbət Qamuna oğlunun sədrliyi, məhkəmə iclas katibi Qədirov İbadullah Şamil oğlunun katibliyi, barəsində inzibati xəta haqqında iş üzrə icraat aparılan şəxs Şəxs oğlunun iştirakı ilə 03.10.1994-cü ildə Gürcüstanın Laqodexi rayonunda anadan olmuş, Gürcüstan vətəndaşı, orta təhsilli, evli, işləməyən, əvvəllər inzibati məsuliyyətə cəlb olunmamış, Balakən şəhəri M.Maqomayev küçəsi 5 nömrəli evdə müvəqqəti yaşayan Şəxs oğlu barəsində Balakən Rayon Polis Şöbəsi tərəfindən Azərbaycan Respublikası İnzibati Xətalar Məcəlləsinin 510 və 535.1-ci maddələri ilə tərtib olunmuş inzibati xəta haqqında materiala açıq məhkəmə iclasında baxaraq müəyyən etdi: Şəxs oğlu 28 may 2021-ci il tarixdə saat 01:30 radələrində Balakən rayon Polis Şöbəsinin inzibati binasında ucadan nalayiq sözlərlə söyüş söyərək Balakən rayon Polis Şöbəsinin iş rejimini pozmuş və həmin vaxt onu intizama dəvət edən Balakən rayon Polis Şöbəsinin əməkdaşları Şahid1 və Şahid2 qanuni tələblərinə qəsdən tabe olmamışdır. Şəxs oğlunun sözügedən inzibati xətaları törətməsi məhkəmə iclasında şahid ifadələri və işdə olan digər sübutlarla aşağıdakı qaydada tam sübuta yetirildi. Məhkəmə iclasında barəsində inzibati xəta haqqında iş aparılan şəxs Şəxs oğlu özünü təqsirli bilməyərək göstərdi ki, Gürcüstan vətəndaşıdır, lakin 2001-ci ildən Balakən rayonunda yaşayır. 27 may 2021-ci il tarixdə saat 14:07-də o Gürcüstana getmək üçün Qazax rayonunun Şıxlı sərhəd nəzarət şöbəsindən keçərkən sərhəd naryadı tərəfindən saxlanılmış və Balakən rayon Polis Şöbəsinin əməkdaşları tərəfindən Balakən rayon Polis Şöbəsinə gətirilmişdir. 28 may 2021-ci il tarixdə gecə saat 01:30 radələrində Balakən rayon Polis Şöbəsində olmuşlar. Həmin vaxt o polis əməkdaşlarına söyməmişdir, hər hansı qanunsuz hərəkət etməmişdir. Barəsində qanuni qərar qəbul edilməsini xahiş etdi. Məhkəmə iclasında şahid qismində dindirilən Şahid1 göstərdi ki, Balakən Rayon Polis Şöbəsinin PPXB-nin manqa komandiri vəzifəsində xidmət edir. Balakən rayon Polis Şöbəsinin İB-də istintaq edilən cinayət işi ilə bağlı “İAMAS”-da DİN tərəfindən 15.05.2021ci il tarixdə barəsində “saxla” statusu qoyulmuş Gürcüstan vətəndaşı olan Şəxs 27.05.2021-ci il tarixdə Şıxlı sərhəd nəzarət Şöbəsindən sərhədi keçən zaman saxlanıldığı üçün o və Balakən rayon PŞ-in CAB-in əməliyyat müvəkkili polis mayoru Şahid2 Qazax rayonuna gedib Şəxs Balakən rayon Polis Şöbəsinə gətirərkən Şəxs yolda xidməti maşında onların ünvanına nalayiq ifadələr işlətmişdir. Onlar Şəxs dəfələrlə intizama dəvət etsələr də o onların qanuni tələbinə tabe olmamışdır. Həmçinin 28 may 2021-ci il tarixdə saat 01:30 radələrində Balakən rayon Polis Şöbəsinin inzibati binasında olarkən Şəxs yenə də öz hərəkətlərini davam etdirərək onların ünvanına nalayiq sözlər işlətmiş, onlar onu intizama dəvət etdikdə yenə də onların qanuni tələbinə qəsdən tabe olmamışdır. Buna görə də Balakən Rayon Polis Şöbəsinin rəhbərliyinə bu barədə raportla müraciət etmişdir. Məhkəmə iclasında şahid qismində dindirilən Şahid2 Şahid1 ilə eyni məzmunlu ifadə verərək onun göstərdiklərini təsdiq etdi. İşdə olan və məhkəmə iclasında tədqiq edilmiş 27 may 2021-ci il tarixli 17 nömrəli saxlanılmış şəxsin təhvil-təslimi barədə protokoldan görünür ki, Şəxs 27 may 2021-ci il tarixdə saat 14:07-də Qazax rayonunun Şıxlı sərhəd nəzarət şöbəsindən keçərkən “İAMAS”-da DİN tərəfindən 15.05.2021-ci il tarixdə “saxla” statusu ilə nəzarətə qoyulduğundan sərhəd naryadı tərəfindən saxlanılmışdır. İşdə olan və məhkəmə iclasında tədqiq edilmiş 28 may 2021-ci il tarixli inzibati qaydada tutma haqqında protokoldan görünür ki, Şəxs 28 may 2021-ci il tarixdə saat 01:30-da inzibati qaydada tutulmuş, 28 may 2021-ci il tarixdə saat 11:10-da azad edilmişdir. Azərbaycan Respublikası İnzibati Xətalar Məcəlləsinin 1-ci maddəsinə əsasən Azərbaycan Respublikasının inzibati xətalar qanunvericiliyi bu Məcəllədən ibarətdir. Həmin Məcəllənin 2-ci maddəsinə görə Azərbaycan Respublikasının inzibati xətalar qanunvericiliyinin vəzifələri insan və vətəndaş hüquqlarını və azadlıqlarını, onların sağlamlığını, əhalinin sanitariya-epidemioloji salamatlığını, ictimai mənəviyyatı, mülkiyyəti, şəxslərin iqtisadi maraqlarını, ictimai qaydanı və ictimai təhlükəsizliyi, ətraf mühiti, idarəçilik qaydalarını qorumaqdan, qanunçuluğu möhkəmləndirməkdən və inzibati xətaların qarşısını almaqdan ibarətdir. Həmin Məcəllənin 3-cü maddəsinə görə yalnız bu Məcəllə ilə nəzərdə tutulmuş inzibati xətaların törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli(hərəkət və ya hərəkətsizlik) törətmiş şəxs inzibati məsuliyyətə cəlb olunur və tənbeh edilir. Xırda xuliqanlıq, yəni ictimai qaydanı pozan, lakin fiziki şəxslər üzərində zor tətbiq olunması ilə və ya belə zorun tətbiq edilməsi hədəsi ilə, yaxud özgənin əmlakının məhv edilməsi və ya zədələnməsi ilə müşayiət edilməyən hərəkətlərə görə Azərbaycan Respublikası İnzibati Xətalar Məcəlləsinin 510-cu maddəsində, polis işçisi və ya hərbi qulluqçu ictimai qaydanın mühafizə vəzifələrini icra edərkən, onların qanuni tələblərinə qəsdən tabe olmamağa görə isə həmin Məcəllənin 535.1-ci maddəsində inzibati məsuliyyət nəzərdə tutulmuşdur. İşin hallarını, hüquq normalarının tələblərini nəzərə alaraq hesab edirəm ki, Şəxs oğlu Azərbaycan Respublikası İnzibati Xətalar Məcəlləsinin 510 və 535.1-ci maddələrində nəzərdə tutulan inzibati xətanı törətmişdir, onun əməlləri Azərbaycan Respublikası İnzibati Xətalar Məcəlləsinin 510 və 535.1-ci maddələri ilə düzgün tövsif edilmişdir, o həmin inzibati xətaları törətməkdə təqsirlidir və onun barəsində inzibati tənbeh tətbiq olunmalıdır. İXM-nin 21-ci maddəsinə görə, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Həmin Məcəllənin 31.2-ci maddəsinin tələbinə görə fiziki və hüquqi şəxslər barəsində inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyətini xarakterizə edən hallar,onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Barəsində inzibati xəta haqqında iş üzrə icraat aparılan şəxs Şəxs oğlunun məsuliyyətini yüngülləşdirən və ağırlaşdıran hallar yoxdur. Azərbaycan Respublikası İnzibati Xətalar Məcəlləsinin 34.2 və 34.3-cü maddələrinə görə şəxsin eyni və ya müxtəlif vaxtlarda törətdiyi bir neçə inzibati xətaya dair işlərə baxılması eyni orqanın səlahiyyətinə aiddirsə, həmin işlərə eyni vaxtda baxılmalıdır. Şəxsin eyni vaxtda öz hərəkətləri (hərəkətsizliyi) ilə törətdiyi bir neçə inzibati xətaya dair işlərə baxılması eyni orqanın səlahiyyətinə aiddirsə, həmin şəxs daha ciddi xətaya görə müəyyən edilmiş sanksiya çərçivəsində tənbeh edilir. Bu halda törədilmiş xətalardan hər hansı birinə görə nəzərdə tutulmuş əlavə tənbehlərdən biri əsas tənbehə əlavə edilə bilər. Azərbaycan Respublikası İnzibati Xətalar Məcəlləsinin 510-cu maddəsinin sanksiyasında 15 günədək inzibati həbs, 535.1-ci maddəsinin sanksiyasında isə bir ayadək müddətə inzibati həbs tənbehi nəzərdə tutulur. Azərbaycan Respublikası İnzibati Xətalar Məcəlləsinin 535.1-ci maddəsinin sanksiyasında bir ayadək müddətə inzibati həbs tənbehi nəzərdə tutulduğundan o daha ciddi xəta hesab edilir, ona görə də Şəxs həmin maddə ilə inzibati tənbeh tətbiq edilməlidir. Barəsində inzibati xəta haqqında iş üzrə icraat aparılan şəxs Şəxs şəxsiyyətini, törədilmiş xətanın xarakterini, cərimə tənbehinin onun qanunlara əməl etmək ruhunda tərbiyyələnməsinə kifayət etməyəcəyini nəzərə alaraq hesab edirəm ki, Şəxs oğlu Azərbaycan Respublikası İnzibati Xətalar Məcəlləsinin 510 və 535.1-ci maddələri ilə təqsirli bilinməli, barəsində İnzibati Xətalar Məcəlləsinin 535.1-ci maddəsinin sanksiyasında nəzərdə tutulan həddə inzibati həbs tənbehi tətbiq edilməlidir. İş materiallarından görünür ki, barəsində inzibati xəta haqqında iş üzrə icraat aparılan şəxs Şəxs oğlu 27 may 2021-ci il tarixdə saat 14:07- də Qazax rayonunun Şıxlı sərhəd nəzarət şöbəsində sərhəd naryadı tərəfindən saxlanılmış, Balakən rayon Polis Şöbəsinin əməkdaşları tərəfindən Balakən Rayon Polis Şöbəsinə gətirilmiş və 28 may 2021-ci il tarixə saat 11:10-a kimi tutulub saxlanmışdır. Azərbaycan Respublikası İnzibati Xətalar Məcəlləsinin 30.3-cü maddəsinə əsasən inzibati qaydada tutma müddəti inzibati həbs müddətinə daxil edilir. Odur ki, hesab edirəm Şəxs tutulub saxlandığı bir gün ona təyin ediləcək inzibati həbs müddətindən çıxılmalıdır. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 40, 43, 49-51, 114, 128-130-cu maddələrini rəhbər tutaraq qərara aldım: Barəsində inzibati xəta haqqında iş üzrə icraat aparılan şəxs Şəxs Azərbaycan Respublikası İnzibati Xətalar Məcəlləsinin 510 və 535.1-ci maddələrində nəzərdə tutulan inzibati xətaları törətməkdə təqsirli bilinsin, İnzibati Xətalar Məcəlləsinin 535.1-ci maddəsi ilə 08 (səkkiz) gün müddətə inzibati həbs edilsin. Onun 27 may 2021-ci il tarixdə saat 14:07 –dən 28.05.2021-ci il saat 11:10-a kimi tutulub saxlandığı 1(bir) gün müddət həmin müddətdən çıxılsın və üzərində 07 (yeddi ) gün müddətə inzibati həbs tənbehi saxlansın. İnzibati həbs müddətinin əvvəli 28 may 2021-ci il tarixdən saat 12:15-dən hesablansın. Qərar dərhal icra edilsin. Qərarın icrası Balakən rayon Polis Şöbəsinə həvalə edilsin. Qərardan surəti rəsmi qaydada alındığı gündən 10 gün müddətində Balakən Rayon Məhkəməsi vasitəsi ilə və ya bilavasitə Azərbaycan Respublikası Şəki Apellyasiya Məhkəməsinə şikayət verilə bilər. Hakim Hümbət Səlimov