Balakən Rayon Məhkəməsi Qərardad — İş №3(019)-221/2024

Azərbaycan Respublikası adından QƏRARDAD Balakən Rayonu İş № 3(019)-221/2024 17.05.2024 BALAKƏN RAYON MƏHKƏMƏSİ Hakim Tahirov Zamin Cəbrayıl oğlu, Balakən rayonu Xalatala kənd sakini Şəxs barəsində Balakən rayon İcra və Probasiya şöbəsi tərəfindən Azərbaycan Respublikası İnzibati Xətalar Məcəlləsinin 528.1-ci maddəsi ilə tərtib olunmuş inzibati xəta haqqında protokola ona əlavə edilmiş sənədlərlə birlikdə baxaraq, m ü ə y y ə n e t d i m: Balakən rayon İcra və Probasiya Şöbəsi tərəfindən Balakən rayonu Xalatala kənd sakini Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə 17 may 2024-cü il tarixli MN ******* №-li inzibati xəta haqqında protokol tərtib olunmuşdur ona görə ki, o, Balakən Rayon Məhkəməsinin xx.xx.2020-ci il tarixli 2(019)-163/2020 nömrəli icra sənədi üzrə 4560 manat aliment borcunu tələbkara ödəməkdən imtina etmiş, bununla da icra məmurunun qanuni tələblərini yerinə yetirməmişdir. Məhkəməyə təqdim edilmiş sənədləri nəzərdən keçirib hesab edirəm ki, Şəxs barəsində Balakən rayon İcra və Probasiya Şöbəsi tərəfindən Azərbaycan Respublikası İnzibati Xətalar Məcəlləsinin 528.1-ci maddəsi ilə tərtib olunmuş hazırki inzibati xəta haqqında protokol və ona əlavə edilmiş sənədlər onu tərtib etmiş orqana qaytarılmalıdır. Belə ki, Azərbaycan Respublikası İnzibati Xətalar Məcəlləsinin 100.1-ci maddəsinə görə bu Məcəllənin 54-cü maddəsində nəzərdə tutulmuş hallar istisna olmaqla, inzibati xətanın törədilməsi haqqında protokol tərtib edilir. İnzibati xəta haqqında protokolda aşağıdakılar göstərilir: - protokolun tərtib edildiyi tarix və yer; - protokolu tərtib etmiş şəxsin vəzifəsi, soyadı, adı, atasının adı; - barəsində inzibati xəta haqqında iş üzrə icraat aparılan şəxs haqqında məlumat; - inzibati xətanın törədildiyi yer, vaxt və bu xətanın mahiyyəti; - inzibati xətaya görə məsuliyyət nəzərdə tutan bu Məcəllənin müvafiq maddəsi; - olduğu halda, şahidlərin və zərər çəkmiş şəxslərin adı, atasının adı, soyadı və onların yaşadığı yerin ünvanı; - barəsində inzibati xəta haqqında iş üzrə icraat aparılan fiziki şəxsin və ya hüquqi şəxsin nümayəndəsinin izahatları; - inzibati xətanın aşkar edilməsində xüsusi texniki vasitələrdən istifadə olunmuşdursa, onların göstəriciləri, habelə istifadə olunmuş xüsusi texniki vasitənin tipi, markası, modeli, yerləşdiyi yer, ölçmə vasitəsinin son dəfə müqayisəli dövlət yoxlamasından keçdiyi vaxt (bunu təsdiq edən sənədin nömrəsi, tarixi) və növbəti yoxlamanın keçirilməli olduğu vaxt barədə məlumatlar; - inzibati xətanın törədilməsi nəticəsində şəxsin sağlamlığına yüngül zərər vurulmuşdursa və ya maddi zərər yetirilmişdirsə, bu hallar barədə qeydlər; - inzibati xəta haqqında iş üzrə icraat üçün zəruri olan digər məlumatlar. İş materiallarından görünür ki, Şəxs barəsində Balakən Rayon İcra və Probasiya şöbəsi tərəfindən Azərbaycan Respublikası İnzibati Xətalar Məcəlləsinin 528.1-ci maddəsi ilə tərtib olunmuş 17 may 2024-cü il tarixli MN ******* nömrəli inzibati xəta haqqında protokol düzgün tərtib edilməmiş; protokolda inzibati xətanın törədildiyi tarix və yer, inzibati xətanın mahiyyəti, şahidlərin, həmçinin zərərçəkmiş şəxsin adı, atasının adı, soyadı və onların yaşadığı yerin ünvanı göstərilməmişdir. Bu səbəbdən də hesab edirəm ki, inzibati xəta haqqında protokol düzgün tərtib edilməmişdir. Bundan başqa iş materiallarından görünür ki, Balakən Rayon Məhkəməsinin xx.xx.2020ci il tarixli 2(019)-163/2020 nömrəli icra sənədinin icra sənədinin icra edilməməsi və icra sənədinin icra edilməsi ilə bağlı icra məmurunun qanuni tələblərini yerinə yetirməməsinə görə Şəxs barəsində Balakən rayon İcra və Probasiya Şöbəsi tərəfindən xx.xx.2023-cü il tarixli inzibati xəta haqqında protokol tərtib olunmuş və həmin inzibati xəta haqqında protokol əsasında işə baxan Balakən Rayon Məhkəməsinin xx.xx.2023-cü il tarixli 3(019)- 66/2023 saylı qərarı ilə Şəxs Azərbaycan Respublikası İXM-nin 528.1-ci maddəsində nəzərdə tutulmuş inzibati xətanın törədilməsində təqsirli bilinərək 08 gün müddətə inzibati qaydada həbs edilmişdir. Lakin hazırki inzibati xəta haqqında protokolda xx.xx.2023-cü il tarixli inzibati xəta haqqında protokol tərtib olunan tarixdən sonra Balakən Rayon Məhkəməsinin xx.xx.2020ci il tarixli 2(019)-163/2020 nömrəli icra sənədi üzrə hansı məbləğin ödənilməməsi göstərilməmişdir. Bunun göstərilməsi isə şəxsin eyni əmələ görə təkrar məsuliyyətə cəlb edilə bilinib-bilinməməsi, yəni non bis idem prinsipinin mövcud olub-olmamasının müəyyənlədirilməsi üçün mühüm əhəmiyyət kəsb edir. Bundan başqa qanunvericiliyin tələbinə, həmçinin Azərbaycan Respublikası Konstitusiya Məhkəməsi Plenumunun «Azərbaycan Respublikası Cinayət Məcəlləsinin 306.1-ci maddəsinin şərh edilməsinə dair» 2 oktyabr 2012-ci il tarixli qərarında ifadə etdiyi hüquqi mövqeyə görə məhkəmə aktını icra etməməsinə görə inzibati məsuliyyətə cəlb edildikdən sonra şəxs tərəfindən həmin icra sənədinin icra edilməməsi qərəzli olaraq icra etməmə kimi CM-nin 306-cı maddəsində nəzərdə tutulmuş cinayət məsuliyyəti yaradır. İş materiallarından görünür ki, Hudulov X1 Rayon Məhkəməsinin xx.xx.2020-ci il tarixli 2(019)-163/2020 nömrəli icra sənədinin icra edilməməsinə və icra sənədinin icra edilməsi ilə bağlı icra məmurunun qanuni tələblərini yerinə yetirməməyə görə Balakən Rayon Məhkəməsinin xx.xx.2023-cü il tarixli 3(019)-66/2023-cü il qərarı ilə Azərbaycan Respublikası İXM-nin 528.1-ci maddəsilə inzibati məsuliyyətə cəlb edilərək, 08 gün müddətə inzibati qaydada həbs edilmiş, ona yeni icra müddəti təyin edilmiş, lakin həmin müddət ərzində də Balakən Rayon Məhkəməsinin xx.xx.2020-ci il tarixli 2(019)-163/2020 nömrəli icra sənədini icra etməmişdir. Bu hal da onun əməlinə qanunun tələblərinə uyğun hüquqi qiymət verilməsinə (əməlində CM-nin 306.1-ci maddəsinin təkib əlamətlərinin olubolmamasının müəyyən edilməsinə) əsas yaradır. Lakin icra məmuru tərəfindən inzibati xəta haqqında protokol tərtib edilərkən bu halların heç biri nəzərə alınmamışdır. İnzibati xəta haqqında potokola məhkəmədə baxılması zamanı da işin baxılmasına maneçilik törədən həmin halları aradan qaldırmaq və natamam olan materialları tamamlamaq qeyri-mümkündür. Göstərilənlər də hazırki inzibati xəta haqqında protokolun və ona əlavə olunmuş sənədlərin geri qaytarılması üçün əsasdır. Belə ki, Azərbaycan Respublikası İnzibati Xətalar Məcəlləsinin 109.1.6-cı maddəsinə görə protokol və digər materiallar səlahiyyəti olmayan şəxslər tərəfindən tərtib edildikdə, protokol və digər sənədlər düzgün tərtib olunmadıqda, yaxud təqdim edilmiş materiallar natamam olduqda, işə baxılarkən tamamlamaq mümkün olmadıqda, inzibati xətalar haqqında protokolun və ya digər sənədlərin onu tərtib etmiş orqana, vəzifəli şəxsə geri qaytarılması barədə qərardad qəbul edilir. Azərbaycan Respublikası İnzibati Xətalar Məcəlləsinin 128-ci maddəsi baxımından həmin Məcəllənin 109-cu maddəsinin şərh edilməsinə dair 3 may 2019-cu il tarixli qərarında Azərbaycan Respublikası Konstitusiya Məhkəməsinin Plenumu qərara almışdır ki, Azərbaycan Respublikası İnzibati Xətalar Məcəlləsinin 128-ci maddəsinin tələbləri baxımından həmin Məcəllənin 109-cu maddəsində nəzərdə tutulmuş inzibati xətalar haqqında işin baxılmasına hazırlanması zamanı qəbul edilən qərardadlardan apellyasiya şikayəti vermək hüququ istisna edilir. Qeyd edilənlərə əsasən hesab edirəm ki, Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə tərtib olunmuş 17 may 2024-cü il tarixli MN1062172 №-li inzibati xəta haqqında protokol və ona əlavə edilmiş sənədlər onu tərtib etmiş Balakən rayon İcra və Probasiya Şöbəsinə qaytarılmalıdır. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 109.1.6-cı maddəsini rəhbər tutub qəraraaldım: Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə tərtib olunmuş 17 may 2024-cü il tarixli MN1062172 №-li inzibati xəta haqqında protokol və ona əlavə edilmiş sənədlər onu tərtib etmiş Balakən rayon İcra və Probasiya Şöbəsinə qaytarılsın. Bu qərardaddan şikayət verilə bilməz. Hakim: Z.C.Tahirov