Balakən Rayon Məhkəməsi Qərar — İş №3(019)-416/2021

Azərbaycan Respublikası adından QƏRAR Balakən Rayonu İş № 3(019)-416/2021 20.12.2021 BALAKƏN RAYON MƏHKƏMƏSİ Hakim Səlimov Hümbət Qamuna oğlunun sədrliyi, məhkəmə iclas katibi X1 katibliyi, inzibati xəta haqqında icraat başlamış Balakən Rayon Polis Şöbəsinin İTB-in sahə rəisi Nümayəndə oğlunun və barəsində inzibati xəta haqqında iş üzrə icraat aparılan Şəxs iştirakları ilə xx.xx.1982-ci ildə Balakən rayonun Hənifə kəndində anadan olmuş, Azərbaycan Respublikası vətəndaşı, orta təhsilli, evli, fərdi əməklə məşğul olan , əvvəllər inzibati məsuliyyətə cəlb olunmamış, Balakən rayonu Hənifə kəndində yaşayan Şəxs Aydın oğlu barəsində Balakən Rayon Polis Şöbəsi tərəfindən Azərbaycan Respublikası İnzibati Xətalar Məcəlləsinin 206 və 333.1-ci maddələri ilə icraat başlanmış inzibati xəta haqqında işə açıq məhkəmə iclasında baxaraq müəyyən etdi: Şəxs Aydın oğlu 17.12.2021-ci il tarixdə axşam saatlarında narkotik vasitə olan qurudulmuş marixuananı Balakən şəhəri ərazisində siqaret bükümünə dolduraraq istifadə etmiş, eyni zamanda həmin gün narkotik vasitə marixuanadan istifadə olunması nəticəsində sərxoş vəziyyətdə “Tofaş” markalı **-XB-*** dövlət qeydiyyat nişanlı nəqliyyat vasitəsini Balakən rayonu Hənifə kəndi ərazisində idarə etmişdir. Şəxs sözügedən inzibati xətaları törətməsi məhkəmə iclasında özünün etirafedici ifadəsi və işdə olan digər sübutlarla aşağıdakı qaydada tam sübuta yetirildi. Məhkəmə iclasında Azərbaycan Respublikası İnzibati Xətalar Məcəlləsinin 206-cı maddəsi ilə inzibati xəta haqqında protokolu tərtib etmiş Balakən Rayon Polis Şöbəsinin İTB-in sahə rəisi Nümayəndə oğlu göstərdi ki, Balakən rayon Polis Şöbəsinin TB-nin təhqiqatçısı, polis kapitanı X3 cinayət işinin başlanmasının rədd edilməsi barədə 19.12.2021-ci il tarixli qərarı əsasında inzibati xəta haqqında araşdırma aparılması ona həvalə edilmiş, onun tərəfindən araşdırma aparılmış və Balakən rayonu Hənifə kəndində yaşayan xx.xx.1982-ci il təvəllüdlü Şəxs əməlində Azərbaycan Respublikası İnzibati Xətalar Məcəlləsinin 206-cı maddələrinin tərkibi olduğundan onun barəsində həmin maddə ilə inzibati protokol tərtib etmişdir. Şəxs Aydın oğlunun barəsində həmçinin 333.1-ci maddə ilə inzibati xəta haqqında protokol tərtib olunmuşdur. Qanuni qərar qəbul edilməsini xahiş etdi. Məhkəmə iclasında barəsində inzibati xəta haqqında iş aparılan şəxs Şəxs Aydın oğlu özünü təqsirli bilərək göstərdi ki, o, Balakən rayonu Hənifə kəndində ailəsi ilə ilə birlikdə yaşayır. 17.12.2021-ci il tarixdə axşam saatlarında Balakən şəhəri ərazisində olduğu zaman , yolun kənarında bir ədəd kağız büküm görmüş və həmin bükümü götürərək açmışdır. Həmin bükümü açdıqda içərisində bir dəfə istifadə etmək üçün narkotik vasitə qurudulmuş marixuana olduğunu görmüşdür. Həmin narkotik vasitə marixuanadan istifadə etmiş və etibarnamə ilə istifadə etdiyi Tofaş markalı, **-XB-*** dövlət qeydiyyat nişanlı avtomaşına əyləşərək Balakən şəhəri ərazisində yerləşən çay evlərindən birinə getmək üçün yola çıxmışdır. Bu zaman küçədə tanışı Balakən şəhər sakini Ayaz Osmanoğlunu görərək avtomaşını saxlamışdır. Onlar birlikdə çay evinə getmək qərarına gəlmişlər. Balakən şəhəri Hənifə kəndi ərazisində Balakən RPŞ-nin YPX-nin əməkdaşları onları saxlamış və onların hər ikisinin narkotik vasitə istifadə etdiyindən şübhəli olduğundan onları rayon polis şöbəsinə gətirmişlər. Sonra onların hər ikisini Şəki şəhər Mərkəzi Xəstəxənasının narkoloji şöbəsinə aparmışlar və orada onlardan analiz götürülmüşdür. Bu zaman onun və tanışı Ayaz Osmanoğlunun narkotik vasitə marixuana istifadə etmələri müəyyən edilmişdir.Əməlindən peşmandır. Bir daha belə hərəkətlərə yol verməyəcəkdir. Barəsində yüngül tənbeh tətbiq edilməsini xahiş etdi. İşdə olan inzibati tutma haqqında protokoldan görünür ki, Şəxs Aydın oğlu 19 dekabr 2021-ci il tarixdə saat 11:04-də inzibati qaydada tutulmuş, 20 dekabr 2021-ci il tarixdə saat 11:00-da azad edilmişdir. İşdə olan 18 dekabr 2021-ci il tarixli 384A nömrəli sərxoşluq hallarının bütün növlərinin təyinatı məqsədi ilə aparılan tibbi müayinə protokolundan görünür ki, Şəxs sidiyində narkotik vasitə “marixuana” aşkar edilmişdir. Müayinə zamanı Şəxs 17 dekabr 2021-ci il tarixdə “marixuana” adlı narkotik vasitə qəbul etdiyini bildirmişdir. İşdə olan və məhkəmə iclasında tədqiq edilmiş 19 dekabr 2021-ci il tarixli cinayət işinin başlanmasının rədd edilməsi haqqında qərardan görünür ki, cinayət hadisəsi olmadığına görə Balakən RPŞ-nin DYPB-nin YPX-nin inspektoru, polis serjantı Mahir Qarayevin şöbə rəhbərliyinə yazmış olduğu raport əsasında toplanılmış HK-1-971 saylı material üzrə cinayət işinin başlanılması rədd edilmiş , qərarın surəti Şəxs Aydın oğlunun Azərbaycan Respublikası İXM-nin 333.1 və 206-cı maddələri ilə, X2 Azərbaycan Respublikası İnzibati Xətalar Məcəlləsinin 206-cı maddəsi ilə inzibati məsuliyyətə cəlb edilmələri üçün Balakən RPŞ-nin İTB-yə və DYPB-nə göndərilmişdir. Azərbaycan Respublikası İnzibati Xətalar Məcəlləsinin 1-ci maddəsinə əsasən Azərbaycan Respublikasının inzibati xətalar qanunvericiliyi bu Məcəllədən ibarətdir. Həmin Məcəllənin 2-ci maddəsinə görə Azərbaycan Respublikasının inzibati xətalar qanunvericiliyinin vəzifələri insan və vətəndaş hüquqlarını və azadlıqlarını, onların sağlamlığını,əhalinin sanitariya-epidemioloji salamatlığını,ictimai mənəviyyatı, mülkiyyəti, şəxslərin iqtisadi maraqlarını, ictimai qaydanı və ictimai təhlükəsizliyi, ətraf mühiti, idarəçilik qaydalarını qorumaqdan, qanunçuluğu möhkəmləndirməkdən və inzibati xətaların qarşısını almaqdan ibarətdir. Həmin Məcəllənin 3-cü maddəsinə görə yalnız bu Məcəllə ilə nəzərdə tutulmuş inzibati xətaların törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizlik) törətmiş şəxs inzibati məsuliyyətə cəlb olunur və tənbeh edilir. Nəqliyyat vasitəsini idarə etmək hüququ olan şəxs tərəfindən nəqliyyat vasitəsini alkoqoldan, narkotik vasitələrdən, psixotrop maddələrdən və ya güclü təsir göstərən digər maddələrdən istifadə olunması nəticəsində sərxoş vəziyyətdə idarə edilməsinə görə İnzibati Xətalar Məcəlləsinin 333.1-ci maddəsində, qanunsuz olaraq narkotik vasitələrin, psixotrop maddələrin istehlakına, satış məqsədi olmadan şəxsi istehlak miqdarında hazırlanmasına, əldə edilməsinə, saxlanılmasına, daşınmasına və ya göndərilməsinə görə Azərbaycan Respublikası İnzibati Xətalar Məcəlləsinin 206-cı maddəsində inzibati məsuliyyət nəzərdə tutulmuşdur. İşin hallarını, hüquq normalarının tələblərini nəzərə alaraq hesab edirəm ki, Şəxs Aydın oğlu Azərbaycan Respublikası İnzibati Xətalar Məcəlləsinin 206-cı maddəsində nəzərdə tutulan inzibati xətaları törətmişdir,onun əməli Azərbaycan Respublikası İnzibati Xətalar Məcəlləsinin 333.1 və 206-cı maddələri ilə düzgün tövsif edilmişdir, o həmin inzibati xətaları törətməkdə təqsirlidir və onun barəsində inzibati tənbeh tətbiq olunmalıdır. İXM-nin 21-ci maddəsinə görə, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Həmin Məcəllənin 31.2-ci maddəsinin tələbinə görə fiziki və hüquqi şəxslər barəsində inzibati tənbeh tətbiq edilərkən xətanın xarakteri, inzibati xəta törədən şəxsin şəxsiyyətini xarakterizə edən hallar,onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Barəsində inzibati xəta haqqında iş üzrə icraat aparılan şəxs Şəxs Aydın oğlunun məsuliyyətini yüngülləşdirən və ağırlaşdıran hallar yoxdur. Azərbaycan Respublikası İnzibati Xətalar Məcəlləsinin 34.2 və 34.3-cü maddələrinə görə şəxsin eyni və ya müxtəlif vaxtlarda törətdiyi bir neçə inzibati xətaya dair işlərə baxılması eyni orqanın səlahiyyətinə aiddirsə, həmin işlərə eyni vaxtda baxılmalıdır. Şəxsin eyni vaxtda öz hərəkətləri (hərəkətsizliyi) ilə törətdiyi bir neçə inzibati xətaya dair işlərə baxılması eyni orqanın səlahiyyətinə aiddirsə, həmin şəxs daha ciddi xətaya görə müəyyən edilmiş sanksiya çərçivəsində tənbeh edilir. Bu halda törədilmiş xətalardan hər hansı birinə görə nəzərdə tutulmuş əlavə tənbehlərdən biri əsas tənbehə əlavə edilə bilər. Azərbaycan Respublikası İnzibati Xətalar Məcəlləsinin 333.1-ci maddəsinin sanksiyasında dörd yüz manat miqdarında cərimə və nəqliyyat vasitələrini idarə etmə hüququnun altı aydan bir ilə kimi məhdudlaşdırılması inzibati tənbehi, Azərbaycan Respublikası İnzibati Xətalar Məcəlləsinin 206-cı maddəsinin sanksiyasında isə üç yüz manatdan dörd yüz manatadək məbləğdə cərimə və iki ayadək müddətə inzibati həbs tənbehi nəzərdə tutulmuşdur. Azərbaycan Respublikası İnzibati Xətalar Məcəlləsinin 206-cı maddəsinin sanksiyasında iki ayadək müddətə inzibati həbs tənbehi nəzərdə tutulduğundan o daha ciddi xəta hesab edilir, ona görə də Şəxs Aydın oğluna həmin maddə ilə inzibati tənbeh tətbiq edilməlidir. Barəsində inzibati xəta haqqında iş üzrə icraat aparılan Şəxs Aydın oğlunun şəxsiyyətini, törədilmiş xətanın xarakterini, məsuliyyəti yüngülləşdirən və məsuliyyəti ağırlaşdıran halların olmamasını, cərimə tənbehinin onun qanunlara əməl etmək ruhunda tərbiyyələnməsinə kifayət etməyəcəyini nəzərə alaraq hesab edir ki, o, Azərbaycan Respublikası İnzibati Xətalar Məcəlləsinin 333.1 və 206-cı maddələri ilə təqsirli bilinməli, onun barəsində İnzibati Xətalar Məcəlləsinin 206-cı maddəsinin sanksiyasında nəzərdə tutulan həddə daha ciddi inzibati həbs tənbehi tətbiq edilməlidir. İnzibati Xətalar Məcəlləsinin 30.3-cü maddəsinə əsasən inzibati qaydada tutma müddəti inzibati həbs müddətinə daxil edilir. Şəxs Aydın oğlu 19.12.2021-ci il saat 11:04-dan 20 dekabr 2021-ci il saat 11:00-a kimi inzibati qaydada tutulub saxlandığından həmin bir gün müddət inzibati həbs müddətinə hesablanmaqla tətbiq ediləcək inzibati həbs müddətindən çıxılmalıdır. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 40, 43, 49-51, 114, 128-130-cu maddələrini rəhbər tutaraq qərara aldım: Barəsində inzibati xəta haqqında iş üzrə icraat aparılan Şəxs Aydın oğlu Azərbaycan Respublikası İnzibati Xətalar Məcəlləsinin 333.1 və 206-cı maddələrində nəzərdə tutulan inzibati xətaları törətməkdə təqsirli bilinsin, İnzibati Xətalar Məcəlləsinin 206-cı maddəsi ilə 15 (on beş ) gün müddətə inzibati həbs edilsin. Onun bir gün tutulub saxlandığı müddət həmin inzibati tənbeh müddətinə hesablanmaqla həmin müddətdən çıxılsın və üzərində 14 (on dörd ) gün müddətə inzibati həbs saxlansın. İnzibati həbs müddətinin əvvəli 20 dekabr 2021-ci il tarixdən saat 13:00-dan hesablansın. Qərar dərhal icra edilsin. Qərarın icrası Balakən rayon Polis Şöbəsinə həvalə edilsin. Qərardan surəti rəsmi qaydada alındığı gündən 10 gün müddətində Balakən Rayon Məhkəməsi vasitəsi ilə və ya bilavasitə Azərbaycan Respublikası Şəki Apellyasiya Məhkəməsinə şikayət verilə bilər. Hakim Hümbət Səlimov