Beyləqan Rayon Məhkəməsi Qərar — İş №3(020)-190/2024

Azərbaycan Respublikası adından QƏRAR Beyləqan rayon İş № 3(020)-190/2024 04.03.2024 BEYLƏQAN RAYON MƏHKƏMƏSİ Beyləqan rayon məhkəməsinin hakimi Nurullayev Ramiz Vəliş oğlunun sədrliyi, Quliyev Zaur Qulu oğlunun katibliyi İnzibati xəta əməlini törətmiş şəxs Şəxs iştirakı ilə xx.xx.1975-ci ildə Beyləqan rayonunda anadan olmuş, Azərbaycan Respublikası vətəndaşı, azərbaycanlı, evli, orta təhsilli, fərdi əməklə məşğul olan, Beyləqan şəhəri, R.Axundov küçəsi ev 71-də qeydiyyatda olan və yaşayan Şəxs barəsində Beyləqan rayon Polis şöbəsindən daxil olmuş inzibati xəta haqqında materiala baxaraq Müəyyən etdim: Şəxs xx.xx.2024-cü il tarixdə, saat 10 radələrində Beyləqan şəhəri R.Axundov küçəsində ictimai yerdə ucadan ünvansız nalayiq söyüşlər söyərək xırda xuliqanlıq hərəkətləri etmişdir. İnzibati xəta əməlini törətmiş şəxs Şəxs məhkəmə iclasında özünü təqsirli bilmədi və izahat verərək göstərdi ki, xx.xx.2024-cü il tarixdə, saat 10 radələrində Beyləqan şəhəri R.Axundov küçəsində yerləşən yaşadığı evin həyətində olan zaman bacısının işlətdiyi balaca mağazanın qarşısında bacısına mağazanı boşaltmasını və həmin yerdə təzədən böyük mağaza tikəcəyini bildirmiş, bu zaman bacısı ilə aralarında mübahisə yaranmışdır. Mübahoisə zamanı əsəbi vəziyyətdə olduğundan ucadan danışmağa başlamış və özündən aslı olmadan bir dəfə ucadan nalayiq söyüş söymüşdür. Bu zaman rayon ərazisində xidmətdə olan rayon PŞ-nin əməkdaşları ona yaxınlaşaraq özlərini təqdim etmiş və ona söyüş söyməməyi bildirmişdir. O, həmin vaxt polis əməkdaşına əsəbi olduğundan ağzından söyüş çıxdığını bildirmiş, lakin polis əməkdaşı ona dəfələrlə söyüş söydüyün irad bildirərək onu polis şöbəsinə dəvət etmişdir. O, polis əməkdaşları ilə polisin xidməti maşınına minərək rayon polis şöbəsinə gəlmişdir. Hadisə zamanı əsəbi vəziyyətdə olduğundan özündə olmamışdır. Göstərilənlərin nəzərə alınmasını və barəsində qanuni qərar verilməsini xahiş etdi. Məhkəmə iclasında şahid qismində dindirilən Beyləqan rayon PŞ-nin İTB-nin polis sahə nəfəri polis serjantı X5 izahatında göstərdi ki, xx.xx.2024-cü il tarixdə, saat 10 radələrində RPŞ-nin İTB-nin sahə nəfəri X6 rayon R.Axundov küçəsində xidmətdə olduqları zaman bir nəfər şəxsin həmin ünvanda, ictimai yerdə ünvansız nalayiq ifadələr işlətdiyini görərək həmin şəxsə yaxınlaşmışlar. Onlar həmin şəxsə özlərini təqdim edərək onu nizam-intizama dəvət etmişlər, lakin həmin şəxs onların qanuni tələblərinə tabesizlik edərək onlara məhəl qoymamış, qanunsuz hərəkətlərini davam etdirərək küçədə ucadan nalayiq ifadələr işlədərək oradan keçən insanları narahat etmişdir. Bu səbəbdən də onlar həmin şəxsi rayon PŞ-nə gətirmişlər. Polis şöbəsində həmin şəxsin Beyləqan rayon sakini Şəxs olduğu məlum olmuşdur. Məhkəmə iclasında şahid qismində dindirilən Beyləqan rayon PŞ-nin İTB-nin polis sahə nəfəri polis serjantı X1 rayon PŞ-nin İTB-nin polis sahə nəfəri polis serjantı X5 ilə eyni məzmunda izahat verərək R.Bayramovun izahatında göstərdiyi xüsusatların doğruluğunu təsdiq etdi. İş materiallarına əlavə olunmuş inzibati xəta haqqında protokoldan görünür ki, Şəxs xx.xx.2024-cü il tarixdə, saat 10 radələrində Beyləqan şəhəri R.Axundov küçəsində ictimai yerdə ucadan ünvansız nalayiq söyüşlər söyərək xırda xuliqanlıq hərəkətləri etmişdir. İş materiallarına əlavə edilmiş Beyləqan rayon PŞ-nin İTB-nin polis sahə nəfəri polis serjantı X3 Beyləqan rayon PŞ-nin rəisi Rüstəm Cəfərova ünvanladığı raportdan görünür ki, Şəxs xx.xx.2024-cü il tarixdə, saat 10 radələrində Beyləqan şəhəri R.Axundov küçəsində ucadan ünvansız nalayiq söyüşlər söyərək xırda xuliqanlıq hərəkətləri etmişdir. Şəxs xırda xuliqanlıq hərəkətləri etməsi iş materialları və şahidlərin izahatları ilə kifayət qədər sübuta yetmişdir. Hesab edirəm ki, Şəxs həmin hərəkətlərində Azərbaycan Respublikası İXM-nin 510cu maddəsinin tərkibi vardır. Ona görə də Şəxs həmin maddə ilə təqsirli bilinib barəsində inzibati tənbeh tədbirləri görülməlidir Azərbaycan Respublikası İXM-nin 21-ci maddəsində deyilir ki, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Azərbaycan Respublikası İXM-nin 31.2-ci maddəsinə əsasən fiziki və vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakterizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Törədilmiş xətanın xarakterini, inzibati xəta törədən Şəxs şəxsiyyətini, əsəbi vəziyyətdə xırda xuliqlanlıq hərəkətləri etməsini, onun təqsirinin dərəcəsini nəzərə alaraq ona Azərbaycan Respublikası İXM-nin 510-cu maddəsinin sanksiyasına uyğun olaraq həbs növündə inzibati tənbehin tətbiq edilməsini məqsədə müvafiq hesab edirəm. Yuxarıda göstərilənlərə əsasən və Azərbaycan Respublikası İXM-nin 112, 114, 115, 117, 128-130-cu maddələrini rəhbər tutaraq məhkəmə adından Qərara aldım: Şəxs Azərbaycan Respublikası İnzibati Xətalar Məcəlləsinin 510-cu maddəsi ilə nəzərdə tutulmuş inzibati xəta əməlini törətməkdə təqsirli bilinib 7 (yeddi) gün müddətində inzibati qaydada həbs edilsin. Həbs etmənin əvvəli 04 mart 2024-cü il tarixdən, saat 12:51-dən hesablansın. Qərardan onun surəti rəsmi qaydada verildiyi vaxdan 10 gün müddətində Şirvan Apellyasiya Məhkəməsinə şikayət və ya protest verilə bilər. Hakim Ramiz Nurullayev