Bərdə Rayon Məhkəməsi Qərar — İş №3(021)-312/2022

Azərbaycan Respublikası adından QƏRAR Bərdə rayonu İş № 3(021)-312/2022 31.01.2022 BƏRDƏ RAYON MƏHKƏMƏSİ Bərdə Rayon Məhkəməsinin hakimi Əhmədov Elsun Məzahir oğlunun sədrliyi, Məhkəmə iclas katibi X4, Bərdə rayon İcra və probasiya şöbəsinin icra məmuru X1, Barəsində inzibati xəta haqqında iş üzrə icraat aparılan şəxs Şəxs iştirakları ilə, xx xxxx 1993-ci il tarixdə Tərtər rayonu, Şəhriyar kəndində doğulmuş, evli, orta təhsilli, fəhlə işləyən, Bərdə rayonu Zümürxan kəndində qeydiyyatda olmaqla yaşayan barəsində inzibati icraat aparılan Şəxs barəsində Azərbaycan Respublikasının İnzibati Xətalar Məcəlləsinin 528.1-ci maddəsi ilə olan inzibati xəta haqqında materiala Bərdə Rayon Məhkəməsinin inzibati binasında açıq məhkəmə iclasında baxaraq MÜƏYYƏN ETDİ Bərdə rayon İcra və probasiya şöbəsindən daxil olmuş MN ******* saylı inzibati xəta haqqında protokoldan görünür ki, Şəxs Kəlbəcər Rayon Məhkəməsinin 2(040)-77/2021 saylı 18 mart 2021-cı il tarixli icra sənədi üzrə 1040 manat aliment borcu yaranmışdır. Borclu Şəxs icraçının qanuni tələblərinə tabe olmamış, borcu ödəməkdən yayınmışdır. Borclu axtarış qərarı əsasında Bərdə rayon Polis Şöbəsinə təhvil verilmişdir. Məhkəmə iclasında Bərdə rayon İcra və probasiya şöbəsinin icra X2 göstərdi ki, Kəlbəcər Rayon Məhkəməsinin 2(040)-77/2021 saylı 18 mart 2021-ci il tarixli icra sənədi üzrə 24 oktyabr 2019-cu ildə doğulmuş X5 yetkinlik yaşına çatanadək saxlanması üçün Şəxs Nofel oğlundan 05 oktyabr 2020-ci il tarixdən hesablanmaqla 170 (yüz yetmiş) manat sabit pul məbləğində aylıq aliment tutularaq X3 verilməlidir. Barəsində qanunamüvafiq tədbir görülməsini məhkəmədən xahiş etdi. Məhkəmə iclasında barəsində inzibati xəta haqqında iş üzrə icraat aparılan Şəxs göstərdi ki, borcu ödəməkdən yayınmır. X3 vaxtı-vaxtında hissə-hissə alimenti ödəyir. May, iyun, avqust və sentyabr aylarında bir neçə dəfə hissə-hissə də olsa aliment borcunu ödəyib. Bundan sonra hər ay ödəniş edəcəyini söz verdiyini qeyd edərək məhkəmədən inzibati icraata xitam verilməsini xahiş etmişdir. İş materiallarında olan 31 yanvar 2022-ci il tarixli ərizədən görünür ki, Şəxs borcunu ödəməkdən boyun qaçırmır. Yanvar ayında yoldaşı xəstələnmiş və nəticədə ana bətnində olan övladı tələf oldu. Əlində olan pulu xərclədi. Bundan sonra hər ay ödəniş edəcəyini söz verdiyini qeyd edərək məhkəmədən inzibati icraata xitam verilməsini xahiş etmişdir. Məhkəmə barəsində inzibati xəta haqqında iş üzrə icraat aparılan şəxsin, icra məmurunun və inzibati materiala əlavə olunmuş sənədləri araşdıraraq hesab edir ki, Şəxs əməlində inzibati xəta tərkibi olmadığından icraata xitam verilməlidir. Azərbaycan Respublikasının İnzibati Xətalar Məcəlləsinin 3-cü maddəsinə əsasən yalnız bu Məcəllə ilə nəzərdə tutulmuş inzibati xətaların törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizlik) törətmiş şəxs inzibati məsuliyyətə cəlb olunur və tənbeh edilir. İnzibati Xətalar Məcəlləsinin 12-ci maddəsinə əsasən bu Məcəllə ilə qorunan ictimai münasibətlərə qəsd edən, hüquqa zidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Azərbaycan Respublikasının İnzibati Xətalar Məcəlləsinin 53-cü maddəsinə görə, inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Həmin Məcəllənin 105.1-ci maddəsinə görə, bu Məcəllənin 53-cü maddəsində nəzərdə tutulmuş hallardan hər-hansi biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. Belə olan halda məhkəmə hesab edir ki, Şəxs borcun ödənilməsindən qərəzli olaraq boyun qaçırmır. Belə ki, Şəxs iş materiallarından da görünür ki, may, iyun, avqust, sentyabr və noyabr aylarında mütəmadi olaraq ödənişlər etmişdir. Bu faktlar icra məmuru izahatında da məhkəmə iclas zalında öz təsdiqini tapmışdır. Belə olduğu təqdirdə məhkəmə Şəxs əməlində qərəzlilik kimi halları müşahidə etmir. Qeyd olunanlara əsasən Şəxs əməlində inzibati xəta tərkibi olmadığından inzibati xəta haqqında işin icraatına xitam verilməlidir. Yuxarıda göstərilənlərə əsasən və Azərbaycan Respublikasının İnzibati Xətalar Məcəlləsinin 43,112, 114, 115, 117, 128-130-cu maddələrini rəhbər tutaraq məhkəmə, QƏRARA ALDİ Şəxs barəsində Azərbaycan Respublikasının İnzibati Xətalar Məcəlləsinin 528.1-ci maddəsi ilə olan inzibati xəta haqqında iş üzrə icraata Şəxs əməlində inzibati xəta tərkibi olmaması əsası ilə xitam verilsin. Qərarın surəti rəsmi qaydada verildiyi vaxtdan 10 (on) gün müddətində Bərdə Rayon Məhkəməsi vasitəsi ilə Gəncə Apellyasiya Məhkəməsinə apellyasiya şikayəti və ya protesti verilə bilər. Hakim Elsun Əhmədov