Bərdə Rayon Məhkəməsi Qərar — İş №3(021)-619/2022

Azərbaycan Respublikası adından QƏRAR Bərdə rayonu İş № 3(021)-619/2022 06.05.2022 BƏRDƏ RAYON MƏHKƏMƏSİ Məhkəmənin hakimi Elsun Məzahir oğlu Əhmədovun sədrliyi ilə, Məhkəmə iclas katibi Orxan Elşən oğlu Bayramovun katibliyi, X11 Polis Şöbəsinin polis baş inspektoru X3, Barəsində inzibati icraat aparılan Şəxs iştirakları ilə, 15 avqust 1962-ci il tarixdə Bərdə rayonunda doğulmuş, orta təhsilli, fərdi əməklə məşğul olan, Bərdə rayonu, Məmmədli kəndində yaşayan Şəxs Azərbaycan Respublikasının İnzibati Xətalar Məcəlləsinin 327.8-ci maddəsində müəyyən olunmuş inzibati xəta törətməsinə dair Bərdə rayon Polis Şöbəsindən daxil olmuş inzibati xəta haqqında materiala Bərdə Rayon Məhkəməsinin inzibati binasında açıq məhkəmə iclasında baxaraq, məhkəmə MÜƏYYƏN ETDİ Bərdə Rayon Polis Şöbəsindən daxil olmuş İXP ******* saylı inzibati xəta haqqında protokoldan görünür ki, Şəxs 05 aprel 2022-ci il tarixdə Şəxs idarə etdiyi “Vaz 21074 Minik” markalı **-BO-*** dövlət qeydiyyat nişanlı minik avtomobili ilə piyada X6 vurmuşdur. Bununla Şəxs Azərbaycan Respublikasının İnzibati Xətalar Məcəlləsinin 327.8-ci maddəsində nəzərdə tutulan inzibati xətanı törətmişdir. Məhkəmə iclasında X11 Polis Şöbəsinin polis baş inspektoru X5 ifadəsində göstərdi ki, 05 aprel 2022-ci il tarixdə sürücü Şəxs idarə etdiyi “Vaz 21074 Minik” markalı **-BO-*** dövlət qeydiyat nişanlı avtomobili ilə Bərdə şəhəri İ.Qayibov küçəsində yerləşən “İki dost” restoranının sağ tərəfindən keçən şəhərdaxili avtomobil yol hissəsi ilə Bərdə şəhər mərkəzinə doğru hərəkətdə olarkən, piyada X6 vuraraq yol-nəqliyyat hadisəsini törətmişdir. X2 yolun sağ tərəfində yıxılıb qalmışdır. Hadisə baş verən yerdə yol asfalt örtüklü olmaqla düzdür, qurudur, hamardır, görmə məsafəsi hər iki tərəfdən qeyriməhduddur. Məhkəmədən onun barəsində qanunamüvafiq tətbir görülməsini xahiş etdi. Məhkəmə iclasında barəsində inzibati icraat aparılan Şəxs bildirdi ki, o, özünə məxsus “Vaz 21074 Minik” markalı **-BO-*** dövlət qeydiyyat nişanlı avtomobili ilə 05 aprel 2022-ci il tarixdə saat 17-30 radələrində heç bir spirtli içki gəbul etmədən, avtomobilində hər hansı bir yük və sərnişin olmadan Bərdə şəhəri İ.Qayibov küçəsində yerləşən “İki dost” restoranının sağ tərəfindən keçən şəhərdaxili avtomobil yol hissəsi ilə Bərdə şəhər mərkəzinə doğru hərəkətdə olarkən, təxminən saat 20-30 km saat sürəti ilə hərəkətdə olarkən, hadisədən sonra adını bildiyi Ayşən xanım yolun sağ tərəfindən sol tərəfinə onun avtomobilinin qarşısından keçdiyini gördü. Ayşə xanım yolu keçərkən yolun sağ tərəfinə baxdığını lakin yolun sol tərəfinə yeni onun hərəkətdə olduğu istiqamətə baxmadığını görmüşdür. Həmin an avtomobilə tormoz verib onu vurmamağa çalışmışdır. Ancaq xanım onun avtomobilinin qabaq sağ qanadının sağ tərəfdən olan güzgüsünə dəymişdir. Həmin andaca qız aşağı əyilib oturmuşdur. Dərhal maşını saxlayıb maşından düşərək onu maşınına qoyub Bərdə Rayon Mərkəzi Xəstəxanasına gətirmişdir.Hadisə ərafəsində heç bir spirtli içki qəbul etməmişdir. Barəsində cərimə növündə inzibati tənbeh tətbiq edilməsini xahiş etdi. İş materiallarında olan Bərdə Rayon Polis Şöbəsinin 19 aprel 2022-ci il tarixli cinayət işinin başlanılmasının rədd edilməsi haqqında qərardan görünür ki, Şəxs əməlində Azərbaycan Respublikası Cinayət Məcəlləsinin 263.1-ci maddəsinin tərkib əlamətləri olmamasına və zərərçəkmiş şəxslə barışdığından və onlara dəymiş ziyanı tam ödəməklə törətmiş olduğu cinayət əməlinin səmimi etiraf edib peşmançılıq çəkməsini nəzərə alıb, onun barəsində həmin maddə ilə cinayət tərkibi olmadığı üçün toplanmış material üzrə cinayət işinin başlanması rədd edilmişdir. Məhkəmə iş materiallarını araşdırıb hesab edir ki, Şəxs Azərbaycan Respublikasının İnzibati Xətalar Məcəlləsinin 327.8-ci maddəsində nəzərdə tutulan inzibati xətanı törətməsi Bərdə rayon Polis şöbəsinin istintaq bölməsinin müstəntiqi polis mayoru X1 cinayət işinin başlanmasının rədd edilməsi barədə 19 aprel 2022-ci il tarixli qərarı, habelə inzibati xəta haqqında 26 aprel 2022-ci il tarixli İXP ******* protokolla sübuta yetirilir. Məhkəmə hesab edir ki, inzibati xəta törətmiş Şəxs şəxsiyyətini nəzərə alaraq onun barəsində təqsirli bilindiyi Azərbaycan Respublikasının İnzibati Xətalar Məcəlləsinin 327.8ci maddəsinin sanksiyasında nəzərdə tutulan cərimə növündə inzibati tənbeh tədbiri tətbiq edilməlidir. Azərbaycan Respublikası İnzibati Xətalar Məcəlləsinin 2-ci maddəsinə əsasən inzibati xətalar qanunvericiliyinin vəzifələri insan və vətəndaş hüquqlarını və azadlıqlarını, onların sağlamlığını, əhalinin sanitariya-epidemioloji salamatlığını, ictimai mənəviyyatı, mülkiyyəti, şəxslərin iqtisadi maraqlarını, ictimai qaydanı və ictimai təhlükəsizliyi, ətraf mühiti, idarəçilik qaydalarını qorumaqdan, qanunçuluğu möhkəmləndirməkdən və inzibati xətaların qarşısını almaqdan ibarətdir. Həmin Məcəllənin 3-cü maddəsində isə göstərilir ki, yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 9.1-ci maddəsinə əsasən, inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır. Həmin Məcəllənin 21-ci maddəsində isə göstərilmişdir ki, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Həmin Məcəllənin 31.2-ci maddəsində göstərilmişdir ki, fiziki və ya vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakretizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Azərbaycan Respublikasının İnzibati Xətalar Məcəlləsinin 32-ci maddəsinə əsasən Şəxs məsuliyyətini yüngülləşdirən hallar müəyyən edilmədi. Azərbaycan Respublikasının İnzibati Xətalar Məcəlləsinin 33-cü maddəsinə əsasən Şəxs məsuliyyətini ağırlaşdıran hallar müəyyən edilmədi. Bundan başqa məhkəmə həmçinin onu da xüsusi olaraq qeyd edir ki, barəsində inzibati icraat aparılan şəxsə tətbiq edilən tənbeh tədbirinin əsas fəlsəfəsi onu yenidən inzibati xəta törətməkdən çəkindirməkdir. Tənbehin məqsədi şəxsdən hər hansısa bir formada qisas almaq və ya onun ağır olan maddi vəziyyətini daha da ağırlaşdırmaq deyildir. Azərbaycan Respublikası İnzibati Xətalar Məcəlləsinin 150.11-ci maddəsində qeyd olunmuşdur ki, yol hərəkəti qaydaları əleyhinə olan inzibati xətaların törədilməsinə görə barəsində inzibati cərimə tənbeh növü tətbiq edilən şəxs qərarı dərhal və ya qərarın qanuni qüvvəyə mindiyi gündən 5 iş günü müddətində icra edərsə tətbiq olunan cərimənin məbləğinin 10 faizi miqdarından ödənişindən azad edilir. Yuxarıda göstərilənlərə əsasən Azərbaycan Respublikasının İnzibati Xətalar Məcəlləsinin 327.8, 360, 362-365, 425, 430-432-ci maddələrini rəhbər tutaraq QƏRARA ALDİ İnzibati xəta törətmiş Şəxs Azərbaycan Respublikasının İnzibati Xətalar Məcəlləsinin 327.8-ci maddəsi ilə təqsirli bilinərək barəsində 200 (iki yüz) manat məbləğində inzibati cərimə tənbeh tədbiri tətbiq edilsin. Qərarın icrası Bərdə rayon İcra və probasiya Şöbəsinə həvalə edilsin. Qərarın surətindən təqdim edildiyi və ya alındığı gündən 10 gün müddətində Gəncə Apellyasiya Məhkəməsinə şikayət və protest verilə bilər. HakimElsun Əhmədov