Biləsuvar Rayon Məhkəməsi Qərar — İş №3(022)-644/2024

Azərbaycan Respublikası adından QƏRAR Biləsuvar rayonu İş № 3(022)-644/2024 22.07.2024 BİLƏSUVAR RAYON MƏHKƏMƏSİ Mən Biləsuvar Rayon Məhkəməsinin hakimi X1, məsləhətçi (iclas katibi) Abdullazadə Həsən Abulla oğlunun katibliyi ilə, inzibati xəta haqqında protokol tərtib etmiş Biləsuvar Rayon İcra və Probasiya Şöbəsinin rəisi X2, barəsində inzibati xəta haqqında iş üzrə icraat aparılan şəxs Şəxs iştirakları ilə, xx xxxx 1989-cü il tarixdə Biləsuvar rayonu Səmədabad kəndində anadan olmuş, Azərbaycan Respublikası vətəndaşı, evli, ailə təhsilli, fərdi əməklə məşğul olan, bir il ərzində inzibati məsuliyyətə cəlb edilməmiş, Biləsuvar rayonu Səmədabad kəndində qeydiyyatda olmaqla yaşayan Şəxs barəsində Azərbaycan Respublikası İnzibati Xətalar Məcəlləsinin (İXM) 528.1-ci maddəsi ilə Biləsuvar Rayon İcra və Probasiya Şöbəsindən daxil olmuş inzibati xəta haqqında işə baxaraq MÜƏYYƏN ETDİM: Biləsuvar rayon Notariat Ofisinin 8İ-5109 saylı icra qeydinə əsasən Şəxs 10000 (on min) manat və dövlət rüsümu olaraq 25 (iyirmi beş) manat, cəmi 10025 manat tutularaq tələbkar Zərərçəkmiş şəxs1 verilməli və Biləsuvar rayon Notariat Ofisinin 8İ-1693 saylı icra qeydinə əsasən Şəxs 9000 (doqquz min) manat və dövlət rüsümu olaraq 25 (iyirmi beş) manat, cəmi 9025 pul tutularaq Zərərçəkmiş şəxs2 verilməlidir. Borclu icra vərəqəsində göstərilən tələbləri və icra qeydlərinin icrası ilə bağlı icra məmurunun qanuni tələblərini yerinə yetirməmiş, icra qeydini üzrsüz səbəbdən icra etməmişdir. Buna görə də Şəxs barəsində Biləsuvar Rayon İcra və Probasiya Şöbəsinin icra məmuru tərəfindən 22 iyul 2024-cü il tarixli inzibati xəta haqqında protokol tərtib olunmuşdur. İnzibati xəta haqqında protokolu tərtib etmiş Biləsuvar Rayon İcra və Probasiya Şöbəsinin rəisi X4 məhkəməyə verdiyi izahatında bildirdi ki, Biləsuvar rayon Notariat Ofisinin 8İ-5109 saylı icra qeydinə əsasən Şəxs 10000 (on min) manat və dövlət rüsmu olaraq ödənilmiş 25 (iyirmi beş) manat məbləğində pul tutularaq tələbkar Zərərçəkmiş şəxs1 verilməli və Biləsuvar rayon Notariat Ofisinin 8İ-1693 saylı icra qeydinə əsasən Şəxs 9000 (doqquz min) manat və dövlət rüsumu olaraq ödənilmiş 25 (iyirmi beş) manat məbləğdə pul tutularaq Zərərçəkmiş şəxs2 verilməsi barədə icra qeydləri vardır. İcra qeydləri Biləsuvar Rayon İcra və Probasiya Şöbəsinə daxil olduqdan sonra icraata başlamaq haqqında qərar qəbul etməklə icra qeydləri icraata götürülmüş və həmin tarixdə tələbin könüllü icrası barədə bildiriş Şəxs ünvanına göndərilmişdir. Borclu borcundan bu vaxta kimi heç bir ödəniş etməmişdir. Borclu Şəxs hər iki icra qeydi üzrə tələbkarlara hazırda 19050 (on doqquz min əlli) manat məbləğdə borcu vardır. Hazırda icra sənədi tam şəkildə icra olunmadığına görə Şəxs barəsində İXM-in 528.1-ci maddəsi ilə inzibati xəta haqqında protokol tərtib edilmişdir. Biləsuvar Rayon İcra və Probasiya Şöbəsinin rəisi X4 borclu Şəxs barəsində qanuna müvafiq inzibati tənbeh tədbirinin tətbiq olunmasını məhkəmədən xahiş etdi. Məhkəmə iclasında barəsində inzibati xəta haqqında iş üzrə icraat aparılan şəxs Şəxs izahatında göstərmişdir ki, Biləsuvar rayon Notariat Ofisinin 8İ-5109 saylı və 8İ-1693 saylı icra qeydlərinin icra edilməli olmasını və icra qeydlərinin icra olunmamasına görə məsuliyyətini dərk edir. O, Vətən müharibəsi iştirakçısı olduğuna görə ona təyin edilmiş pensiya məbləğindən hər ay müvafiq qaydada tutularaq tələbkara ödənilir. Lakin onun barəsində Azərbaycan Respublikası Cinayət Məcəlləsinin 178.2.2 və 178.2.4-cü maddələri ilə başlanmış cinayət işi yekunlaşaraq Biləsuvar rayon məhkəməsinin icraatına verilmişdir. Eyni zamanda həmin cinayət işi ilə bağlı onun barəsində Biləsuvar rayon məhkəməsinin 27 iyun 2024-cü il tarixli qərarı ilə stasionar məhkəmə-psixiatrik ekspertizası təyin edilmişdir və hazırda xəstəxanada stasionar şəraitdə müalicə alır. Ona görə də barəsində olan inzibati xəta haqqında iş üzrə icraata xitam verilməsini xahiş etdi. Tələbkar Zərərçəkmiş şəxs2 məhkəmə iclasında ona olan borcun tam şəkildə ödənilməsini xahiş etdi. İnzibati xəta haqqında işin materiallarını tədqiq edərək barəsində inzibati xəta haqqında iş üzrə icraat aparılan şəxsi, tələbkarı və inzibati xəta haqqında protokolu tərtib etmiş şəxsi dinləyərək hesab edirəm ki, toplanmış sübutlarla Şəxs İXM-in 528.1-ci maddəsində nəzərdə tutulan inzibati xəta törətməsində təqsiri müəyyən olunmur. İş materiallarından görünür ki, Biləsuvar rayon Notariat Ofisinin 8İ-5109 saylı və 8İ- 1693 saylı icra qeydlərinə əsasən icra məmuru tərəfindən 07 aprel 2023-cü il tarixli və 31 iyul 2023-cü il tarixli qərarlarla icraata başlanılmışdır. Azərbaycan Respublikası İnzibati Xətalar Məcəlləsinin 12.1-ci maddəsinin tələbinə grə bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıqdan törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Həmin Məcəllənin 13-cü maddəsinin tələbinə görə inzibati xəta törətmiş şəxs öz əməlinin (hərəkətinin və ya hərəkətsizliyinin) hüquqzidd xarakterini dərk etmiş, onun zərərli nəticələrini qabaqcadan görmüş və bunları arzu etmişdirsə, yaxud belə nəticələrin baş verməsinə şüurlu surətdə yol vermişdirsə, bu xəta qəsdən törədilmiş xəta hesab olunur. İXM-in 528.1-ci maddəsinin tələbinə görə məhkəmə və ya digər orqanların qərarlarının icrası ilə əlaqədar icra məmurunun qanuni tələblərinin yerinə yetirilməməsinə və ya icra məmuru tərəfindən müəyyən olunmuş müddətdə borclunu müəyyən hərəkətləri etməyə və ya müəyyən hərəkətləri etməkdən çəkinməyə məcbur edən icra sənədinin üzrsüz səbəbdən icra edilməməsinə görə fiziki şəxslər beş yüz manatdan min manatadək məbləğdə cərimə edilir və ya işin hallarına görə, pozuntunu törədənin şəxsiyyəti nəzərə alınmaqla, bir ayadək müddətə inzibati həbs tətbiq olunur, vəzifəli şəxslər min iki yüz manatdan iki min beş yüz manatadək məbləğdə, hüquqi şəxslər üç min manatdan beş min manatadək məbləğdə cərimə edilir. İşin məhkəmə iclasında tədqiq edilmiş hallarından, inzibati xəta haqqında protokolu tərtib etmiş Biləsuvar Rayon İcra və Probasiya Şöbəsinin icra məmurunun və borclu Şəxs izahatından görünür ki, Əliyev X3 rayon Notariat Ofisinin 8İ-5109 saylı və 8İ-1693 saylı icra qeydlərinə əsasən icra məmuru tərəfindən icraata başlanılmasından məlumatlı olmuş və müəyyən ödənişlər etmiş, lakin onun hərəkətləri qəsdlə əhatə olunmamış və qərəzli xarakter daşımır. “İcra haqqında” Qanunun 44.1-ci maddəsinin tələbinə görə məcburi icra tədbirlərinin tətbiqinin əsasları aşağıdakılardır: bu Qanunla müəyyən edilmiş qaydada tərtib olunmuş icra sənədinin icra məmuruna təqdim olunması; icra məmuru tərəfindən icraata başlamaq haqqında qərarın qəbul edilməsi; könüllü icra üçün icra məmuru tərəfindən borcluya verilmiş müddətin keçməsi. Bundan başqa, Biləsuvar rayon Notariat Ofisinin 8İ-5109 və 8İ-1693 saylı icra qeydlərinə icra sənədinin icrasının təmini məqsədi ilə Şəxs icra məmuru tərəfindən lazımi şərait yaradılmamış, bütün imkanlar tükənmədən Şəxs barəsində inzibati xəta haqqında protokol tərtib olunmaqla məhkəməyə təqdim edilmişdir. “Azərbaycan Respublikası İnzibati Xətalar Məcəlləsinin 528.1-ci maddəsinin həmin Məcəllənin 9.2 və 35-ci maddələri baxımından şərh edilməsinə dair” Azərbaycan Respublikası Konstitusiya Məhkəməsi Plenumunun 04 sentyabr 2018-ci il tarixli qərarında göstərilmişdir ki, məhkəmə və digər orqanların qərarlarının icrası ilə əlaqədar icra məmurunun qanuni tələblərinin yerinə yetirilməməsi mütləq inzibati həbslə nəticələnməməli, icra məmurları müxtəlif qanuni vasitələrlə məhkəmə aktlarının icrasının təmin edilməsi üçün şərait yaratmalı və yalnız bütün imkanlar tükəndikdən sonra inzibati və cinayət təsiri tədbirlərindən istifadə etməlidirlər. Azərbaycan Respublikası İnzibati Xətalar Məcəlləsinin 53.1-ci maddəsinə əsasən aşağıdakı hallarda inzibati xətalar haqqında işlər üzrə icraat başlanıla bilməz, başlanmış icraata isə xitam verilir: 53.1.7. barəsində inzibati xəta haqqında iş üzrə icraat aparılan şəxsə aid eyni fakt üzrə inzibati tənbeh etmək haqqında hakimin, səlahiyyətli orqanın (vəzifəli şəxsin) qərarı olduqda, yaxud inzibati xəta haqqında işə xitam verilməsi barəsində ləğv edilməmiş qərar olduqda, habelə həmin fakt üzrə cinayət işi başlamaq haqqında qərar olduqda; Həmin Məcəllənin 114.2.1-ci maddəsinin tələbinə görə bu Məcəllənin 53-cü maddəsində nəzərdə tutulan hallardan biri mövcud olduqda inzibati xəta haqqında iş üzrə icraata xitam verilməsi haqqında qərar çıxarılır. İşin müəyyən edilmiş hallarından görünür ki, barəsində inzibati xəta haqqında icraat aparılan şəxs Şəxs Azərbaycan Respublikası Cinayət Məcəlləsinin 178.2.2 və 178.2.4-cü maddələri ilə məhkəmə məsuliyyətinə verilmişdir. İş materiallarına əlavə edilmiş Biləsuvar Rayon Məhkəməsinin 27 iyun 2024-cü il tarixli 1(022)-88/2024 saylı qərarından görünür ki, təqsirləndirilən şəxs qismində Şəxs barəsində komisyon stasionar məhkəmə-psixiatrik ekspertizası təyin edilmişdir. Məhkəmə işin yuxarıda qeyd olunan hallarını nəzərə alaraq hesab edir ki, Şəxs əməlində Azərbaycan Respublikası İnzibati Xətalar Məcəlləsinin 528.1-ci maddəsinin tərkibi olmadığına görə onun barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə olan inzibati xəta haqqında material üzrə icraata xitam verilməlidir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 53, 114, 115, 117, 129 və 130-cu maddələrini rəhbər tutaraq QƏRARA ALDİM: Şəxs barəsində Azərbaycan Respublikası İnzibati Xətalar Məcəlləsinin 528.1-ci maddəsi ilə olan inzibati xəta haqqında iş üzrə icraata xitam verilsin. Qərardan 10 gün müddətində Biləsuvar Rayon Məhkəməsi vasitəsi ilə Şirvan Apellyasiya Məhkəməsinə apellyasiya şikayəti və ya protesti verilə bilər. X6