Biləsuvar Rayon Məhkəməsi Qərar — İş №3(022)-857/2023

Azərbaycan Respublikası adından QƏRAR Biləsuvar rayonu İş № 3(022)-857/2023 21.08.2023 BİLƏSUVAR RAYON MƏHKƏMƏSİ Mən, Biləsuvar Rayon Məhkəməsinin hakimi X1, Məsləhətçi (iclas katibi) Abdullazadə Həsən Abdulla oğlunun katibliyi ilə, barəsində inzibati xəta haqqında iş üzrə icraat aparılan şəxs Şəxs iştirakı ilə, xx.xx.1984-cü ildə Biləsuvar şəhərində anadan olmuş, Azərbaycan Respublikasının vətəndaşı, orta təhsilli, Biləsuvar şəhəri, C.Məmmədquluzadə küçəsində yaşayan Şəxs barəsində Biləsuvar Rayon Polis Şöbəsindən Azərbaycan Respublikası İnzibati Xətalar Məcəlləsinin (İXM) 342.1.3-cü və 333.1 -ci maddəsi ilə daxil olmuş inzibati xəta haqqında materiala açıq məhkəmə iclasında baxaraq MÜƏYYƏN ETDİ: İnzibati xəta haqqında materialdan görünür ki, Şəxs xx.xx.2023-cü il tarixdə saat 07:15 radələrində etibarnamə əsasında idarə etdiyi ** BG *** dövlət qeydiyyat nişanlı “Runna minik” markalı avtomobili ilə Biləsuvar şəhəri, M.İbrahimov küçəsində hərəkətdə olarkən YPX-nin əməkdaşları onu saxlamış və bu zaman Şəxs sərxoş olduğu müəyyən edilmişdir.Qeyd olunanlara əsasən Şəxs barəsində Biləsuvar Rayonu Yol Patrul xidməti inspektoru polis baş serjantı X3 tərəfindən İXP seriyalı № ******* saylı İnzibati xəta haqqında protokol tərtib olunmuş və baxılması üçün Biləsuvar Rayon Məhkəməsinə göndərilmişdir. Şəxs məhkəməyə ərizə təqdim edərək barəsində İXM-in 342.1.3-cü və 333.1 -ci maddəsi ilə özünü təqsirli bilərək göstərmişdir ki, hazırda əməlindən peşimandır, bir də belə əməllərə yol verməyəcəyinə söz verir. xx.xx.2023-cü il tarixdə evdə günorta yeməyi yeyərkən bir qədər spirtli içki içmişdir. xx.xx.2023-cü il tarixdə idarə etdiyi avtomobillə Biləsuvar şəhəri M.İbrahimov küçəsində hərəkətdə olarkən YPX-nin əməkdaşları onu saxlamış və bu zaman onun sərxoş olması müəyyən edilmişdir. Odur ki, əməlindən peşiman olmasını nəzərə alıb barəsində cərimə növündə cəza təyin edilməsini xahiş etdi. İş materiallarında olan yol hərəkəti qaydaları və yol hərəkəti təhlükəsizliyinin təmin edilməsi qaydaları əleyhinə olan qaydaların pozulması ilə əlaqədar digər inzibati xətalarla bağlı Biləsuvar Rayonu Yol Patrul xidməti inspektoru polis baş serjantı X3 tərəfindən İXP seriyalı № ******* saylı İnzibati xəta haqqında protokoldan görünür ki, Şəxs nəqliyyat vasitəsini sərxoş vəziyyətdə idarə etmişdir. İş materiallarına əlavə edilmiş xx.xx.2023-cü il tarixli 411 saylı tibbi müayinə aktından görünür ki, müayinə nəticəsində Şəxs spirtli içki qəbul etdiyi, yüngül dətəcəli sərxoş olduğu aşkar edilmişdir. “Yol hərəkəti haqqında” qanunun 37-ci maddəsinin 8-ci bəndinin tələbinə görə mexaniki nəqliyyat vasitəsinin sürücüsü hərəkət təhlükəsizliyi üçün qorxu törədən alkoqol, narkotik vasitələr, psixotrop maddələr və ya güclü təsir göstərən digər maddələrin istifadə edilməsi nəticəsində diqqəti və çevikliyi azaldan dərman vasitələrinin təsiri altında nəqliyyat vasitəsini idarə etməməlidir. Göründüyü kimi, Şəxs “Yol hərəkəti haqqında” qanunun 37-ci maddəsinin 8-ci bəndi ilə üzərinə vəzifə olaraq qoyulmuş hərəkət təhlükəsizliyi üçün qorxu törədən alkoqoldan istifadə edərək, nəqliyyat vasitəsini idarə etməməli olduğu halda, həmin hərəkəti ilə qanunla qorunan ictimai münasibətlərə qəsd edən, təqsirli və hüquqa zidd əməl törətmişdir. Məhkəmə iş üzrə toplanmış sübutların və onların məcmusunun tam, hərtərəfli və obyektiv baxılmasına əsaslanmaqla belə nəticəyə gəlir ki, Şəxs İXM-in 333.1-ci maddəsində nəzərdə tutulmuş inzibati xətanın törədilməsində təqsirliliyi inzibati xəta haqqında protokol və tibbi müayinə aktı ilə tam sübuta yetirilmiş və onun əməli düzgün olaraq İXM-in 333.1-ci və 342.1.3-cü maddəsi ilə tövsüf edilmişdir. Şəxs hərəkətlərinə münasibətdə əməlin inzibati xəta olmasını aradan qaldıran hallar, həmçinin inzibati məsuliyyətdən azad edilməsi üçün əsaslar yoxdur. Buna görə də, onun təqsiri tam sübuta yetirildiyinə görə inzibati məsuliyyətə cəlb edilməli və tənbeh edilməlidir. Məhkəmə Şəxs inzibati tənbeh təyin etmək məsələsini həll edərkən qanunun aşağıdakı prinsip və müddəalarını rəhbər tutur. İXM-in 9.1-ci maddəsinə əsasən inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına və inzibati xətanı törətməkdə təqsirli bilinənin şəxsiyyətinə uyğun olmalıdır. İXM-in 31.2-ci maddəsinə əsasən Şəxs inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakterizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Məhkəmə hesab edir ki, Şəxs məsuliyyətini yüngülləşdirən hallar onun əməlindən səmimi peşmançılığı, ailədə yeganə qazanc gətirən olmasıdır. Şəxs məsuliyyətini ağırlaşdıran hallar isə yoxdur. Məhkəmə hesab edir ki, Şəxs təqsirləndirildiyi İXM-in 333.1-ci maddəsində inzibati xətanın tərkib əlaməti kimi xətanın sərxoş halda törədilməsi nəzərdə tutulduğundan tənbeh təyin edilərkən bu hal İXM-in 33.3-cü maddəsinə əsasən məsuliyyəti ağırlaşdıran hal kimi nəzərə alınmamalıdır. İnzibati xətalar haqqında işin məhkəmə iclasında tədqiq olunmuş hallarını, habelə Şəxs tərəfindən İXM-in 333.1-ci və 342.1.3-cü maddələrində nəzərdə tutulan inzibati xətaların törədildiyini nəzərə alaraq hesab edirəm ki, Şəxs barəsində İXM-in 333.1-ci maddəsi ilə nəzərdə tutulan inzibati tənbeh tədbiri tətbiq edilməlidir. Belə ki, İXM-in 333.1ci və 342.1.3-cü maddələrinin müqayisəli tədqiqindən görünür ki, İXM-in 333.1-ci maddəsi ilə daha ciddi inzibati tənbeh tədbiri nəzərdə tutulmuşdur. Məhkəmə işin bütün hallarını nəzərə alıb hesab edir ki, ona təqsirləndirildiyi maddənin sanksiyasında nəzərdə tutulmuş inzibati cərimə növündə inzibati tənbeh təyin edilməsi daha məqsədəmüvafiqdir. Yuxarıda göstərilənlərə əsasən və İXM-in 3, 9, 30, 31, 40, 43, 48-51, 76, 84, 114- 117, 128-130-cu maddələrini rəhbər tutaraq QƏRARA ALDİM: Şəxs Azərbaycan Respublikası İnzibati Xətalar Məcəlləsinin 342.1.3-cü və 333.1-ci və maddələri ilə nəzərdə tutulmuş inzibati xətaların törədilməsində təqsirli bilinsin. Azərbaycan Respublikası İnzibati Xətalar Məcəlləsinin 34.3-cü maddəsi tətbiq olunmaqla, Şəxs barəsində Azərbaycan Respublikası İnzibati Xətalar Məcəlləsinin 333.1ci maddəsi ilə 400 (dörd yüz) manat məbləğində cərimə tətbiq edilsin. Qərarın surəti rəsmi qaydada verildiyi vaxtdan 10 (on) gün müddətində qərarı qəbul etmiş məhkəmə vasitəsilə Şirvan Apellyasiya Məhkəməsinə şikayət və ya protest verilə bilər. Hakim Nüsrət Mirzəyev