Qəbələ Rayon Məhkəməsi Qərar — İş №3(025)-11/2024

Azərbaycan Respublikası adından QƏRAR Qəbələ şəhəri İş № 3(025)-11/2024 29.01.2024 QƏBƏLƏ RAYON MƏHKƏMƏSİ Hakim İsayev Elman Bəhruz oğlunun sədrliyi, məhkəmə iclasının katibi Tahirova Ləman Kamran qızının katibliyi, Azərbaycan Respublikası DİN-nin Qəbələ RPŞ-nin DYPB-nin YPXİ-nin polis baş serjantı X1 və barəsində inzibati xəta haqqında iş üzrə icraat aparılan şəxs Şəxs iştirakları ilə, xx.xx.1990-cı ildə Qəbələ rayonu, Həmzəlli kəndində anadan olmuş, Qəbələ rayonu, Həmzəlli kəndində qeydiyyatda olan Şəxs barəsində Azərbaycan Respublikası İnzibati Xətalar Məcəlləsinin 333.1-ci maddəsi üzrə tərtib olunmuş inzibati xəta haqqında protokola iş materialları ilə birlikdə açıq məhkəmə iclasında baxaraq, məhkəmə MÜƏYYƏNETDİ: Azərbaycan Respublikası DİN-nin Qəbələ rayonu Yol patrul xidməti inspektoru polis baş serjantı X2 tərəfindən Şəxs barəsində tərtib edilmiş xx.xx.2023-cü il tarixli, İXP ******* saylı inzibati xəta haqqında protokoluna görə Şəxs 11 dekabr 2023-cü il tarixdə, saat 21:50 radələrində “Opel Astra” markalı, ** DC *** dövlət qeydiyyat nişanlı nəqliyyat vasitəsini idarə edərkən yol patrul xidmətinin əməkdaşı tərəfindən saxlanılmış və bu zaman onun avtomobili sərxoş halda idarə etdiyi məlum olmuşdur. Məhkəmə iclasında inzibati protokolu tərtib edən şəxs Qəbələ RPŞ-nin DYPB YPXİ-nin polis baş serjantı X2 izahatında göstərmişdir ki, xx.xx.2023-cü il tarixdə saat 21:30 radələrində Qəbələ şəhər, Həzi Aslanov küçəsində xidmətdə olarkən ** DC *** dövlət qeydiyyat nişanlı avtomobil 1.3 üfüqi nişanın tələbini pozaraq sola dönmüşdür. Həmin avtomobil tərəflərindən saxlanılmış, baxış keçirilərkən sürücünün sərxoş halda avtomobili idarə etdiyi şüphələr doğurmuşdur. Alkotestr vasitəsilə yoxlanılmış spirtli içki qəbul etdiyi müşahidə olunmuşdur. Sürücü alkotesterin nəticələri ilə razı olmadığına görə Qəbələ Rayon Mərkəzi Xəstəxanasına aparılmış, orada da həkim tərəfindən tibbi müayinədən keçirilmiş və spirtli içki qəbul etdiyi məlum olmuşdur. Daha sonra barəsində İnzibati xəta haqqında protokol tərtib edilmiş və baxılması üçün məhkəməyə göndərilmişdir. Məhkəmə iclasında barəsində inzibati xəta haqqında iş üzrə icraat aparılan şəxs Şəxs Azərbaycan Respublikası İnzibati Xətalar Məcəlləsinin 333.1-ci maddəsi ilə özünü təqsirli bilməyərək izahatında göstərmişdir ki, 2020-ci ildə müharibədə iştirak etdikdən sonra əsəblərində narahatçılıq yarandığından sakitləşdirici dərmanlar qəbul edir. Bu səbəbdən ümumiyyətlə spirtli içki qəbul etmir. xx.xx.2023-cü il tarixdə idarə etdiyi “Opel Astra” markalı, ** DC *** dövlət qeydiyyat nişanlı nəqliyyat vasitəsi ilə Qəbələ şəhərində hərəkətdə olarkən saxlanılmışdır. Yol patrul inspektoru ona yaxınlaşmış, sərxoş vəziyyətdə olduğunu ondan şüphələndiyinə görə alkotestr vasitəsi ilə yoxlamışdır. İlk yoxlanışda onun içkili olmadığı görsənmişdir. Daha sonra inspektor xidməti avtomobilinə getmiş və qayıdanda içkili olduğunu bildirmişdir. İnspektorla razılaşmamış və Qəbələ Rayon Mərkəzi Xəstaxanasında yoxlanılmasını xahiş etmişdir. Onlar xəstaxanaya getmiş 4-5 dəfə yoxlama aparılmış və onun içkili olmadığı aşkar olunmuşdur. Onlar ona aparatda problem yarandığını və onun bayırda gözlədiyini bildirmişlər. Təxminən 5 dəqiqə bayırda gözləmiş, sonra ona aparatın düzəldiyini bildirmişlər. Daha sonra onu yoxlamışlar və müayinənin nəticəsi başa düşmədiyi 0.117 promil olduğu aşkar olunmuşdur. Sonda isə qeyd edilənləri nəzərə alaraq iş üzrə ədalətli qərar verilməsini məhkəmədən xahiş etmişdir. Məhkəmə, tərəflərin izahatını dinləyib və iş materiallarını araşdıraraq hesab edir ki, barəsində inzibati xəta haqqında iş üzrə icraat aparılan şəxsin inzibati xətanı törədilməsində təqsirliliyi sübuta yetirilmədiyindən inzibati xəta haqqında iş üzrə icraata xitam verilməlidir. Belə ki, iş materiallarını nəzərdən keçirərkən müəyyən edilir ki, Şəxs barəsində inzibati xəta haqqında protokolun tərtib edilməsinə əsas “Sərxoşluq vəziyyətinin tibbi müayinəsi” haqqında 11 dekabr 2023-cü il tarixli, 202 saylı akt olmuşdur. Aktda qeyd edilmişdir ki, “alkoqol qəbulu faktı müəyyənləşsədə, sərxoşluq əlamətləri aşkarlanmadı”. Bundan başqa, qeyd edilən aktdan və inzibati xəta haqqında protokoldan aydın olur ki, sərxoşluq vəziyyətinin müayinəsi zamanı hal şahidlərinin iştirakı təmin edilməmiş, bununla bağlı müvafiq qeydlər aparılmamışdır. Həmçinin Şəxs müayinə aktını almağına dair hissəni imzalamamış, həmçinin barəsində inzibati xəta haqqında iş üzrə icraat aparılan şəxs tərəfindən imzalamaqdan imtina edildiyi halda bu barədə müvafiq qeyd aparılmamışdır. Azərbaycan Respublikası İnzibati Xətalar Məcəlləsinin 69.2 və 69.3-cü maddələrinin tələblərinə görə şəxsi axtarış, əşyaların yoxlanılması, nəqliyyat vasitəsinə baxış, əşyaları və sənədləri götürmə, eləcə də sərxoşluq vəziyyətinin müayinəsi aparılarkən hal şahidlərinin iştirakı məcburidir. Hal şahidləri onların iştirakı ilə həyata keçirilən prosessual hərəkətləri, onların məzmununu və nəticəsini protokolda öz imzası ilə təsdiq edirlər. Hal şahidlərinin inzibati xəta haqqında iş üzrə icraatda iştirak etmələri protokolda qeyd edilir. İnzibati Xətalar Məcəlləsinin 96.2-ci maddəsinə görə nəqliyyat vasitəsini idarə edən şəxsin sərxoş vəziyyətdə olmasını güman etməyə kifayət qədər əsas olduqda, onun sərxoşluq vəziyyətinin müəyyən edilməsi üçün xüsusi texniki vasitələrdən istifadə edilir. Həmin şəxs sərxoş vəziyyətdə olub-olmamasının xüsusi texniki vasitədən istifadə edilməklə müəyyən edilməsindən imtina etdikdə və ya xüsusi texniki vasitə ilə müayinənin nəticəsi ilə razılaşmadıqda, tibbi müayinəyə aparılır. Bu Məcəlləinin 96.3-cü maddəsinə əsasən nəqliyyat vasitəsini idarə etməkdən kənarlaşdırma barədə və sərxoşluq vəziyyətini müəyyən etmək üçün xüsusi texniki vasitələrdən istifadə etmək və ya tibbi müayinəyə göndərmək barədə protokol tərtib olunur və həmin sənədin surəti barəsində belə tədbir tətbiq edilən şəxsə verilir. Həmin Məcəlləsinin 96.5-ci maddəsinə görə nəqliyyat vasitəsini idarə etməkdən kənarlaşdırma barədə və sərxoşluq vəziyyətini müəyyən etmək üçün xüsusi texniki vasitələrdən istifadə etmək və ya tibbi müayinəyə göndərmək haqqında protokol onu tərtib etmiş vəzifəli şəxs, habelə nəqliyyat vasitəsini idarə etməkdən kənarlaşdırılan və sərxoşluq vəziyyətini müəyyən etmək üçün barəsində xüsusi texniki vasitələrdən istifadə edilən və ya tibbi müayinəyə göndərilən sürücü tərəfindən imzalanır. Sürücü protokolu imzalamaqdan imtina etdikdə, bu barədə protokolda müvafiq qeyd aparılır. Sürücünün izahat vermək və protokolun məzmunu barədə öz mülahizələrini təqdim etmək, habelə protokolu imzalamaqdan imtina etməsinin səbəblərini göstərmək hüququ vardır. Onun bu izahatı və mülahizələri protokola əlavə olunur. Protokolun surəti sürücüyə təqdim edilir. Sözügedən Məcəllənin 96.6-cı maddəsinə əsasən sərxoşluq vəziyyətini müəyyən etmənin tibbi müayinəsi barədə akt müvafiq protokola əlavə olunur. Lakin iş materiallarından aydın olur ki, yol patrul xidmətinin əməkdaşı tərəfindən Şəxs barəsində inzibati xəta haqqında protokol tərtib edilərkən qanunvericiliyin yuxarıda qeyd olunan tələblərinə riayət edilməmiş, yol patrul xidmətinin əməkdaşı tərəfindən E.Şəxs barəsində nəqliyyat vasitəsini idarə etməkdən kənarlaşdırma və sərxoşluq vəziyyətini müəyyən etmək üçün xüsusi texniki vasitələrdən istifadə etmək və ya tibbi müayinəyə göndərmək barədə protokol tərtib edilmədən şəxs tibbi müayinədən keçirilmişdir. Bundan başqa, barəsində icraat aparılan Şəxs izahatında bildirmişdir ki, saxlanılan zaman inspektor tərəfindən alkotestr vasitəsilə sərxoşluq dərəcəsi yoxlanılmış, ilk yoxlanışda sərxoşluq halı müəyyən olunmasa da, təkrar yoxlanışdan sonra 0.163 promil göstərici müəyyən olunmuşdur. Bu göstərici ilə razı olmadığından Qəbələ RMX-da müayinə edilmiş və ona spirtli içki qəbul etdiyini bildirilmişdir. Göründüyü kimi, Şəxs barəsində inzibati xəta haqqında iş üzrə icraat aparılarkən qəbul edilmiş qərar üçün əsas olan məqamlar qanunvericiliyin tələb etdiyi çərçivədə hərəkətlər edilmədən həyata keçirilmişdir ki, bu hal isə sərxoşluq hallarının müəyyən edilməsi prosesinin obyektiv və qərəzsiz şəkildə aparılmasını, müayinədən keçirilən şəxsin ümumiyyətlə sərxoş olub-olmamasını şübhə altına alır. İnzibati Xətalar Məcəlləsinin 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 8-ci maddəsinə əsasən barəsində inzibati xəta haqqında iş üzrə icraat aparılan şəxsin təqsiri bu Məcəllədə nəzərdə tutulmuş qaydada sübuta yetmədikdə və bu, inzibati xəta haqqında iş üzrə icraata baxmış hakimin, səlahiyyətli orqanın (vəzifəli şəxsin) qüvvəyə minmiş qərarı ilə müəyyən edilmədikdə o, təqsirsiz hesab edilir. İnzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. İnzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. Bu Məcəllənin 53.2-ci maddəsinin tələbinə görə hər hansı şəxs barəsində başlanılmış inzibati xətalar haqqında işlər üzrə icraata, həmçinin onun inzibati xəta törədilməsinə aidiyyəti olmadıqda və ya təqsirliliyi sübuta yetirilmədikdə, o cümlədən təqsirliliyin sübuta yetirilməsində qanuna zidd olaraq əldə edilmiş sübutlardan istifadə edildikdə xitam verilir. Qeyd edilən Məcəllənin 105.1-ci maddəsinə görə bu Məcəllənin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. Azərbaycan Respublikası İnzibati Xətalar Məcəlləsinin 114.2.1-ci maddəsinə əsasən inzibati xəta haqqında işə baxılarkən bu Məcəllənin 53-cü maddəsində nəzərdə tutulan hallardan biri mövcud olduqda inzibati xəta haqqında iş üzrə icraata xitam verilməsi haqqında qərar çıxarılır. Beləliklə məhkəmə göstərilənləri nəzərədən keçirərək hesab edir ki, Şəxs tərəfindən Azərbaycan Respublikası DİN-nin Qəbələ RPŞ-nin DYPB-nin YPXİ-nin polis baş serjantı X2 tərəfindən xx.xx.2023-cü il tarixli, İXP ******* saylı inzibati xəta haqqında protokolunda göstərilən inzibati xətanı törədilməsində təqsirliliyi sübuta yetirilmədiyindən iş üzrə icraata xitam verilməlidir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 53, 106-109, 114 və 128-130-cu maddələrini rəhbər tutaraq, məhkəmə QƏRARAALDİ: Şəxs barəsində Azərbaycan Respublikası İnzibati Xətalar Məcəlləsinin 333.1-ci maddəsi ilə başlanılmış iş üzrə icraata təqsirliliyi sübuta yetirilmədiyindən xitam verilsin. Qərardan, onun surəti rəsmi qaydada verildiyi vaxtdan 10 (on) gün müddətində Qəbələ Rayon Məhkəməsi vasitəsilə Şəki Apellyasiya Məhkəməsinə şikayət verilə bilər. Hakim: Elman İsayev