Qəbələ Rayon Məhkəməsi Qərar — İş №3(025)-32/2024

Azərbaycan Respublikası adından QƏRAR Qəbələ şəhəri İş № 3(025)-32/2024 30.01.2024 QƏBƏLƏ RAYON MƏHKƏMƏSİ Hakim Əliyev Abbas Baba oğlunun sədrliyi, Əbdürəhimova Fəridə Arif qızının katibliyi, İnzibati xəta haqqında protokol tərtib edən şəxs Qəbələ RPŞ İTB-nin sahə rəisi, polis baş leytenantıX1nun, barəsində inzibati icraat aparılan şəxs Şəxs Arzu oğlunun iştirakları ilə Şəxs Arzu oğlu – 16 avqust 1979-cu ildə Qəbələ rayonu, Vəndam qəsəbəsində anadan olmuş, Azərbaycan Respublikası vətəndaşı, evli, orta təhsilli, işsiz, Qəbələ rayonu, Vəndam qəsəbəsində qeydiyyatda olan və yaşayan Şəxs Arzu oğlunun barəsində Azərbaycan Respublikasının İXM-nin 590.2-ci maddəsi ilə Azərbaycan Respublikası Daxili İşlər Nazirliyi Qəbələ rayon Polis Şöbəsindən daxil olmuş inzibati xəta haqqında iş materialına açıq məhkəmə iclasında baxaraq, məhkəmə MÜƏYYƏN ETDİ: Məhkəmənin icraatına 19 yanvar 2024-cü il tarixdə Azərbaycan Respublikası Daxili İşlər Nazirliyi Qəbələ RPŞ İTB-nin sahə rəisi, polis baş leytenantı X1 tərəfindən Şəxs Arzu oğlu barəsində tərtib olunmuş inzibati xəta haqqında (İXH) protokol və ona əlavə edilmiş sənədlər daxil olmuşdur. İXH protokolda göstərilir ki, Şəxs Arzu oğlu müvafiq icra hakimiyyəti orqanından xüsusi icazə almadan qanunsuz olaraq mülki ov tüfəngini saxlamışdır. Bununla da, onun barəsində Azərbaycan Respublikasının İXM-nin 590.2-ci maddəsi ilə inzibati xətanın törətməsini nəzərdə tutan MN ******* nömrəli, 13 yanvar 2024-cü il tarixli həmin inzibati xəta haqqında protokol tərtib olunmuşdur. Məhkəmə iclasında Qəbələ RPŞ İTB-nin sahə rəisi, polis baş leytenantı X1 göstərdi ki, Şəxs Arzu oğlu müvafiq icra hakimiyyəti orqanından xüsusi icazə almadan qanunsuz olaraq mülki ov tüfəngini saxlamışdır. Həmin fakt üzrə Şəxs Arzu oğlu barəsində tərəfindən Azərbaycan Respublikası İXM-nin 590.2-ci maddəsi ilə inzibati xəta haqqında protokol tərtib olunmuşdur. Məhkəmə iclasında barəsində inzibati xəta haqqında iş üzrə icraat aparılan Şəxs Arzu oğlu özünü Azərbaycan Respublikası İXM-nin 590.2-ci maddəsi ilə təqsirli bilərək izahatında göstərdi ki, o, 1 həftə əvvəl Qəbələ rayon Nic qəsəbəsindəki Nic bazarı adlanan bazardan 1 baş dana heyvanını 850 manata alaraq yaşadığı Qəbələ rayon Vəndam qəsəbəsinə gətirmişdir. Həmin dana heyvanı isə gətirdiyi gün qaçıb getmişdir. O gündən etibarən həmin dana heyvanını axtarmışdır. Eləcə də onun ölmüş babasından yadigar qalma 16 kalibrli, bala qundaq nömrəsi 023230 olan, qundaq nömrəsi AA 7666 olan və lülə nömrəsi Д 47666 olan təklülə İJ markalı ov tüfəngi də vardır ki, o, xx.xx.2024-cü il tarixdə Qəbələ rayon Vəndam qəsəbəsindəki meşəlik sahəyə dana heyvanını axtarmağa gedən zaman həmin tüfəngi də özü ilə birlikdə götürmüşdür. Heyvanını axtarmağa isə qohumu Aydın Feyruzlu ilə birlikdə getmişdir. Saat təxminən 22 radələrində isə onların yanına piyada şəkildə hərəkətdə olduqlarını görən Qəbələ RPŞ-nin PPX əməkdaşları gəlmişlər, onları tüfənglə bağlı sorğu sual etmişlər. O da tüfəngin sənədinin olmadığını və babasından yadigar qaldığını bildirmişdir.Şəxs Arzu oğlu sonda isə əməlindən peşman olduğunu, bir daha özündə qanunsuz silah saxlamayacağına söz verib, barəsində daha yüngül inzibati tənbeh verilməsini məhkəmədən xahiş etdi. Məhkəmə, Azərbaycan Respublikası Daxili İşlər Nazirliyi Qəbələ RPŞ İTB-nin sahə rəisi,polis baş leytenantı X1 tərəfindən tərtib edilmiş MN ******* nömrəli, 13 yanvar 2024-cü il tarixliinzibati xəta haqqında protokolu nəzərdən keçirib, sübutlara məcmu halda hüquqi qiymət verərək hesab edir ki, Şəxs Arzu oğlunun Azərbaycan Respublikası İnzibati Xətalar Məcəlləsinin 590.2-ci maddəsində nəzərdə tutulan əməli özünün Qəbələ rayon Polis şöbəsində vermiş olduğu izahatı və işin digər materialları ilə tam sübuta yetirilir. İş materiallarında olan 13 yanvar 2024-cü il tarixli “mülki ov silahının götürülməsi və Növbətçi hissəyə təhvil verilməsi” barədə aktlardan görünür ki, Şəxs Arzu oğlundan 1 (bir) ədəd “İJ” markalı, tək lülə, 16 kalibrli, qundaq nömrəsi Д 47666, bala qundaq nömrəsi 023230 və lülə nömrəsi Д 47666 olan mülki ov silahı götürülmüş və növbətçi hissəyə verilmişdir. Azərbaycan Respublikası İXM-in 3-cü maddəsində inzibati məsuliyyətin əsasları müəyyən edilmişdir. Həmin maddənin tələbinə əsasən, yalnız həmin Məcəllə ilə nəzərdə tutulmuş inzibati xətaların törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizlik) törətmiş şəxs inzibati məsuliyyətə cəlb olunur və tənbeh edilir. Azərbaycan Respublikası İXM-in 4-cü maddəsinə əsasən, bu Məcəllə insan və vətəndaş hüquqlarına və azadlıqlarına hörmət edilməsi, qanunçuluq, qanun qarşısında bərabərlik, təqsirsizlik prezumpsiyası, ədalətlilik və inzibati xətaların qarşısının alınması prinsiplərinə əsaslanır. Azərbaycan Respublikası İXM-in 6.1-ci maddəsinə əsasən, inzibati xətalara görə inzibati tənbeh həmin Məcəlləyə uyğun olaraq tətbiq edilir. Azərbaycan Respublikası İXM-in 9.1-ci maddəsinə əsasən, inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına uyğun, qanuni və əsaslı olmalıdır. Azərbaycan Respublikası İXM-in 12.1-ci maddəsinə əsasən, həmin Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Azərbaycan Respublikası İXM-in 21-ci maddəsinə əsasən, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Azərbaycan Respublikası İXM-in 590.2-ci maddəsinə əsasən, müvafiq icra hakimiyyəti orqanından xüsusi icazə almamış şəxslər tərəfindən mülki silahın və ya onun üçün döyüş sursatının əldə edilməsi, saxlanılması, daşınması, başqa şəxslərə verilməsi və ya satılmasına görə silah və döyüş sursatı müsadirə edilməklə səksən manatdan yüz manatadək məbləğdə cərimə edilir. Beləliklə, inzibati tənbeh tədbiri tətbiq edərkən məhkəmə inzibati xətanın xarakterini, təqsirin dərəcəsini və işin digər hallarını nəzərə alaraq hesab edir ki, Şəxs Arzu oğlu barəsində inzibati xətanın bilavasitə obyekti olmuşov tüfəngi müsadirə edilməklə cərimə növündə inzibati tənbeh tətbiq edilməlidir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 40, 43, 48-51, 61, 106-109, 128-130-cu maddələrini rəhbər tutaraq, məhkəmə Qərara aldı: Şəxs Arzu oğlu Azərbaycan Respublikası İnzibati Xətalar Məcəlləsinin 590.2-ci maddəsində nəzərdə tutulmuş inzibati xəta törətməkdə təqsirli bilinib, inzibati xətanın bilavasitə obyekti olmuş 1 (bir) ədəd “İJ” markalı, tək lülə, 16 kalibrli, qundaq nömrəsi Д 47666, bala qundaq nömrəsi 023230 və lülə nömrəsi Д 47666 olan mülki ov silahı müsadirə edilməklə, 80 (səksən) manat məbləğdə cərimə edilsin. 1 (bir) ədəd “İJ” markalı, tək lülə, 16 kalibrli, qundaq nömrəsi Д 47666, bala qundaq nömrəsi 023230 və lülə nömrəsi Д 47666 olan mülki ov silahı müsadirə edilərək Azərbaycan Respublikası DİN-nin MTTBİ-nin Mərkəzi Bazasına (anbarına) təhvil verilsin. Qərarın icrası Qəbələ rayon İcra və probasiya şöbəsinə həvalə edilsin. Qərarın surəti təqdim edildiyi və ya alındığı gündən 10 gün müddətində Şəki Apellyasiya Məhkəməsinə Qəbələ Rayon Məhkəməsi vasitəsi iləşikayət verilə bilər. Hakim: Abbas Əliyev