Qəbələ Rayon Məhkəməsi Qərar — İş №3(025)-5/2025

Azərbaycan Respublikası adından QƏRAR Qəbələ şəhəri İş № 3(025)-5/2025 21.01.2025 QƏBƏLƏ RAYON MƏHKƏMƏSİ Qəbələ Rayon Məhkəməsinin hakimi Qənbərov Ülvi Oktay oğlunun sədrliyi, Məmmədova Gülanə Elmdar qızının katibliyi, Qəbələ rayon İcra və Probasiya şöbəsinin rəisi vəzifəsini müvəqqəti icra edəb İ dərəcəli ədliyyə qulluqçusu X1, zərərçəkmiş şəxslər, Zərərçəkmiş şəxs1 və Zərərçəkmiş şəxs2, barəsində inzibati xəta haqqında iş üzrə icraat aparılan şəxs Şəxs,ə müdafiəçi Vəkil iştirakı ilə, xx.xx.1963-cü ildə Qəbələ rayonu, Dızaxlı kəndində anadan olmuş, AR vətəndaşı, evli, Qəbələ rayonu, Dızaxlı kəndində qeydiyyatda olan Şəxs barəsində AR İXM-nin 528.1-ci maddəsi ilə olan inzibati xəta haqqında iş üzrə icraatın materiallara açıq məhkəmə iclasında baxaraq MÜƏYYƏNETDİ: Şəxs barəsində AR İXM-nin 528.1-ci maddəsi ilə ondan ötrü inzibati xəta haqqında protokol (xx.xx.2025-ci il tarixli MN 1748954) tərtib olunmuşdur ki, o, Qəbələ rayon Dızaxlı kəndi ərazisində aparılmış torpaq islahatına dair yerquruluşu xəritəsinə əsasən su arxı kimi istifadə edilən ərazinin yerləşdiyi Qəbələ rayonu Yeni Dızaxlı bələdiyyəsinin mülkiyyətində olan torpaq sahəsini açması barədə Qəbələ Rayon Məhkəməsinin 08 iyun 2023-cü il tarixli 2(025)-33/2023 saylı icra sənədi üzrə tələbi icra məmuru tərəfindən müəyyən edilmiş müdətdə üzürsüz səbəbdən icra etməmişdir. Barəsində inzibati xəta haqqında Protokol tərtib olunmuş şəxs Şəxs göstərmişdir ki, o, Qəbələ rayon Dızaxlı kəndi ərazisində aparılmış torpaq islahatına dair yerquruluşu xəritəsinə əsasən su arxı kimi istifadə edilən ərazinin yerləşdiyi Qəbələ rayonu Yeni Dızaxlı bələdiyyəsinin mülkiyyətində olan torpaq sahəsini açması barədə Qəbələ Rayon Məhkəməsinin 08 iyun 2023-cü il tarixli 2(025)- 33/2023 saylı icra sənədi üzrə tələbi yerinə yetirməkdən boyun qaçırtmamışdır. Belə ki, su yolu əvvəlcə qaydalara əməl olunmadan açılmış və qazılan torpaq kütləsi arxın ətrafına qalaqlanmadığından yağıntı zamanı qurunt suları daşaraq ona məxsus olan həyətyanı sahəni basmışdır. Suyun həyətyanı sahədən çıxarılması məqsədilə su yolunu müvəqqəti olaraq bağlasa da, növbəti dəfə icra məmurlarının iştirakı ilə lazımi qaydada açılmışdır. Zərərçəkmiş şəxslər Zərərçəkmiş şəxs1 və Zərərçəkmiş şəxs2 Qəbələ Rayon Məhkəməsinin 08 iyun 2023-cü il tarixli 2(025)-33/2023 saylı icra sənədinin tam olaraq icra edildiyini bildirmişlər. İşdə olan Qəbələ Rayon Məhkəməsinin xx.xx.2023-cü il tarixli 2(025)-33/2023 nömrəli icra vərəqəsinə əsasən Qəbələ rayon Dızaxlı kəndi ərazisində aparılmış torpaq islahatına dair yerquruluşu xəritəsinə əsasən su arxı kimi istifadə edilən ərazinin yerləşdiyi Qəbələ rayonu Yeni Dızaxlı bələdiyyəsinin mülkiyyətində olan torpaq sahəsi Şəxs tərəfindən açılmalıdır. İşdə olan Qəbələ Rayon İcra və Probasiya Şöbəsinin xx.xx.2023-cü il tarixli “İcraata başlamaq haqqında” Qərarının surətinə əsasən Qəbələ Rayon Məhkəməsinin xx.xx.2023-cü il tarixli 2(025)-33/2023 nömrəli icra sənədi üzrə icraat başlanılmış və borcluya 10 gün müddətində icranı könüllü qaydada təmin etməsi təklif edilmişdir. İşdə olan AR-nın ƏN Qəbələ Rayon İcra və Probasiya şöbəsi tərəfindən verilmiş xx.xx.2023-cü il tarixli 185958/2023-11-9-003 nömrəli bildirişin surətinə əsasən borclu Şəxs Qəbələ Rayon Məhkəməsinin xx.xx.2023-cü il tarixli 2(025)-33/2023 nömrəli icra sənədi üzrə tələbi 10 gün müddətində könüllü qaydada təmin etməsi tələb olunmuşdur. AR İXM-nin 3-cü maddəsinə əsasən yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 76.1-ci maddəsinə əsasən inzibati xətanın olub-olmamasını, inzibati xəta törədən şəxsin təqsirini və işin düzgün həlli üçün əhəmiyyətli olan digər halları müəyyən etmək üçün hakimin, səlahiyyətli orqanın (vəzifəli şəxsin) əsaslana bildiyi hər cür faktik məlumatlar inzibati xətalar haqqında işlər üzrə sübutlar sayılır. Bu məlumatlar maddi sübutlarla, barəsində inzibati xəta haqqında iş üzrə icraat aparılan şəxsin, zərər çəkmiş şəxsin, şahidlərin izahatları ilə, digər sənədlərlə, xüsusi texniki vasitələrin göstəriciləri ilə, müvafiq icra hakimiyyəti orqanının müəyyən etdiyi orqanın (qurumun) informasiya sistemində, habelə digər dövlət informasiya sistemlərində (ehtiyatlarında) aşkar olunan məlumatlarla, ekspertin rəyi ilə, inzibati xəta haqqında protokolla, bu Məcəllə ilə müəyyən edilmiş digər protokollarla müəyyən edilir. Həmin Məcəllənin 84.1-ci maddəsinə əsasən inzibati xətalar haqqında işlərə baxan hakim, səlahiyyətli orqan (vəzifəli şəxs) işin bütün hallarının məcmusunun hərtərəfli, tam və obyektiv surətdə baxılmasına əsaslanan öz daxili inamı ilə sübutları qiymətləndirir. Həmin Məcəllənin 528.1-ci maddəsinə əsasən icra sənədindəki tələbin üzrsüz səbəbdən icra məmuru tərəfindən müəyyən olunmuş müddətdə icra edilməməsinə və ya icra məmurunun məhkəmə və ya başqa dövlət orqanlarının qərarlarının icrası ilə əlaqədar digər qanuni tələblərinin yerinə yetirilməməsinə görə inzibati məsuliyyət nəzərdə tutulmuşdur. Məhkəmədə tədqiq olunmuş sübutlara əsasən müəyyən edilmişdir ki, Şəxs Qəbələ Rayon Məhkəməsinin xx.xx.2023-cü il tarixli, 2(025)-33/2023 saylı icra sənədini tam şəkildə icra etmişdir. AR İXM-nin 53.0.2-ci maddəsinə əsasən inzibati xəta tərkibi olmadıqda inzibati xətalar haqqında işlər üzrə icraat başlanıla bilməz, başlanmış icraata isə xitam verilir. Həmin Məcəllənin AR İXM-nin 105.1-ci maddəsinə əsasən Bu Məcəllənin 53-cü maddəsində nəzərdə tutulmuş hallardan hər hansı biri olduqda, icraatında inzibati xəta haqqında iş olan hakim və ya səlahiyyətli orqan (vəzifəli şəxs) inzibati xəta haqqında işin icraatına xitam verilməsi haqqında qərar qəbul edir. Məhkəmə tədqiq olunmuş sübutlara qiymət verərək hesab edir ki, Qəbələ Rayon Məhkəməsinin xx.xx.2023-cü il tarixli, 2(025)-33/2023 saylı icra sənədi Şəxs tərəfindən tam şəkildə icra olunduğundan əməlində inzibati xəta tərkibi yoxdur. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 43, 50, 114, 115, 117, 130 və 138-ci maddələrini rəhbər tutaraq Q Ə R A R A A L D İ: Şəxs barəsində Azərbaycan Respublikası İXM-nin 528.1-ci maddəsi ilə olan inzibati xəta haqqında iş üzrə icraata xitam verilsin. Qərardan 10 (on) gün müddətində Qəbələ Rayon Məhkəməsi vasitəsi ilə Azərbaycan Respublikası Şəki Apellyasiya Məhkəməsinə apellyasiya şikayəti verilə bilər. Hakim: Ülvi Qənbərov