Qəbələ Rayon Məhkəməsi Qərar — İş №3(025)-580/2023

Azərbaycan Respublikası adından QƏRAR Qəbələ şəhəri İş № 3(025)-580/2023 13.11.2023 QƏBƏLƏ RAYON MƏHKƏMƏSİ Hakim Əliyev Abbas Baba oğlunun sədrliyi, Əbdürəhimova Fəridə Arif qızının katibliyi, İnzibati xəta haqqında protokol tərtib edən şəxs Qəbələ RPŞ İTB-nin sahə rəisi, polis kapitanı X1, barəsində inzibati icraat aparılan şəxs Şəxs iştirakları ilə 30 aprel 1970-ci ildə Oğuz rayonu Şirvanlı kəndində anadan olmuş, Azərbaycan Respublikası vətəndaşı, evli, orta təhsilli, Şrvanlı kənd tam orta məktəbində işləyən, Oğuz rayonu Şirvanlı kəndində qeydiyyatda olan və yaşayan Şəxs barəsində Azərbaycan Respublikasının İXM-nin 590.1-ci maddəsi ilə Azərbaycan Respublikası Daxili İşlər Nazirliyi Qəbələ rayon Polis Şöbəsindən daxil olmuş inzibati xəta haqqında iş materiala açıq məhkəmə iclasında baxaraq, MÜƏYYƏN ETDİ: Məhkəmənin icraatına 25 oktyabr 2023-cü il tarixdə Azərbaycan Respublikası Daxili İşlər Nazirliyi Qəbələ RPŞ İTB-nin sahə rəisi, polis kapitanı X4 tərəfindən Şəxs barəsində tərtib olunmuş inzibati xəta haqqında (İXH) protokol və ona əlavə edilmiş sənədlər daxil olmuşdur. İXH protokolda göstərilir ki, Şəxs xx.xx.2023-cü il tarixdə Qəbələ rayonu, Məmmədağalı kəndi ərazisində mülki ov silahının saxlanması qaydasını pozmuşdur. Bununla da, onun barəsində Azərbaycan Respublikasının İXM-nin 590.1-ci maddəsi ilə inzibati xətanın törətməsini nəzərdə tutan MN ******* nömrəli, 21 oktyabr 2023-cü il tarixli həmin inzibati xəta haqqında protokol tərtib olunmuşdur. Məhkəmə iclasında inzibati xəta haqqında protokolu tərtib etmiş Qəbələ RPŞ İTBnin sahə rəisi, polis kapitanı X4 göstərdi ki, Şəxs xx.xx.2023-cü il tarixdə Qəbələ rayonu, Məmmədağalı kəndi ərazisində mülki ov silahının saxlanması qaydasını pozmuşdur. Həmin fakt üzrə Şəxs barəsində tərəfindən Azərbaycan Respublikası İXM-nin 590.1-ci maddəsi ilə inzibati xəta haqqında protokol tərtib olunmuşdur. Məhkəmə iclasında barəsində inzibati xəta haqqında iş üzrə icraat aparılan Şəxs özünü Azərbaycan Respublikası İXM-nin 590.1-ci maddəsi ilə təqsirli bilərək izahatında göstərdi ki, xx.xx.2023-cü il tarixdə səhər radələrində Oğuz rayon Molalı kənd sakini Ramin adlı şəxs ona zəng edib demiş ki, Qəbələ rayon Şəfili kənd sakini X9 ov etməklə bağlı lisenziya almış və birlikdə Qəbələ rayonu ərazisində ov etməyi bildirmişdir. Onunla razılaşmış, özünə məxsus ij markalı, 16 kalibirli, tək lülə, 07939 nömrəli yivsiz lüləli ov silahı və patrondaş və üzərində 12 ədəd patronu götürüb yola çıxmışdır. Özünə məxsus Vaz 21015 markalı **-SN-*** dövlət qeydiyyat nişanlı avtomobillə həmkəndlisi Ədalət Rzayevi götürüb Qumlaq yolu adlanan yerə gəlmişlər. Orada Ramini də götürüb Qəbələ rayon Nohurqışlaq kəndinə gəlmişlər. Oraya İlqar və digər şəxslər öz avtomobilləri ilə ora gəlmişlər. Onların avtomobillərinin arxası ilə öz avtomobili ilə Qəbələ rayonu Məmmədağalı kəndi ərazisində meşəlik adlanan əraziyə gəlmişlər. Orada o və orada olan şəxslər silahlarını çıxartmışlar və piyada meşə ərazisi gəzməyə başlamışlar. Meşəlik ərazidə o və digər 2 nəfər Ədalət və o biri adını bilmədiyi şəxslə meşə ərazisində ov etmək üçün gəzməyə başlamışlar. Meşə ərazisində gəzərkən silahı yığılı vəziyyətdə olsa da, silaha patron qoymamışdır. Təxminən 2 və ya 3 saat meşə ərazisində gəzdikdən sonra hamısı meşə ərazisində bir yerə toplaşmışlar. Silahını söküb çexola qoyaraq avtomobilə qoymuş və yemək yeməyə başlamışlar. Orada yeməklə bərabər araq spirtli içkisi qəbul etmişdir. Yeməklərini yeyib meşə içərisi ilə avtomobillə gələn vaxt polis əməkdaşları onları saxlamış və polis şöbəsinə gətirmişlər. O, içkili olduğu üçün ona məxsus avtomobili Ramin idarə edirmiş. İ Qarabağ müharibəsi iştirakçısı olmaqla İİ qrup əlil olmasının nəzərə alınmasını və barəsində yüngül inzibati tənbeh tətbiq edilməsini xahiş etdi. Məhkəmə, Azərbaycan Respublikası Daxili İşlər Nazirliyi Qəbələ RPŞ İTB-nin sahə rəisi, polis kapitanı X4 tərəfindən tərtib edilmiş MN ******* nömrəli, 21 oktyabr 2023-cü il tarixli inzibati xəta haqqında protokolu nəzərdən keçirib, sübutlara məcmu halda hüquqi qiymət verərək hesab edir ki, Şəxs Azərbaycan Respublikası İnzibati Xətalar Məcəlləsinin 590.1-ci maddəsində nəzərdə tutulan əməli işin digər materialları ilə tam sübuta yetirilir. İş materiallarında olan Qəbələ RPŞ-nin İTB-nin sahə polis rəisi, polis baş leytenantı Rübail Əbdürəhimov tərəfindən Qəbələ RPŞ-nin rəisi, polis polkovniki Fəxrəddin Abbasova ünvanlanmış xx.xx.2023-cü il tarixli Raportdan görünür ki, xx.xx.2023-cü il tarixdə Qəbələ rayonu, Məmmədağalı kəndində meşəlik ərazidə bir neçə nəfər şəxsin ov etməsi barədə məlumat daxil olmuşdur. Məlumat əsasında İTB-nin sahə polis nəfəri, polis baş serjantı Anar Həmidovla birlikdə dərhal həmin əraziyə getmişlər. Bir qədər sonra həmin ərazidə 3 ədəd minik avtomobilinin və 9 nəfər şəxsin olmasını görmüşlər. Onlar həmin şəxslərə yaxınlaşaraq özlərini təqdim etdikdən sonra onlardan müvafiq sənədləri təqdim etmələrini xahiş etmişlər. Lakin həmin şəxslər bütün zəruri sənədləri təqdim etməmişlər. Buna görə də araşdırma zərurəti yarandığı üçün adları onları sonradan məlum olan X10, X5, X2, X3, X6, X9, Şəxs, X8 və X7, onlarda olan 8 ədəd mülki ov tüfəngi, həmin tüfənglərə aid sursatlar, Mitsubishi L200 markalı **-CH-***, Mercedes ML-350 markalı **-EH-***, VAZ 21015 markalı **-NS-*** dövlət nömrə nişanlı avtomobillər və 4 ədəd ov iti PPX əməkdaşlarının iştirakı ilə rayon polis şöbəsinə gətirilərək Növbətçi Hissəyə təhvil verilmişdir. İş materiallarında olan 21 oktyabr 2023-cü il tarixli “Mülki ov silahının və ov alətlərinin təhvil götürülməsi və növbətçi hissəyə təhvil verilməsi” barədə aktlardan görünür ki, Şəxs götürülmüş 1 (bir) ədəd İj markalı, 16 kalibirli, tək lülə, 07939 nömrəli mülki ov silahı, patrondaş və 12 ədəd patron növbətçi hissəyə təhvil verilmişdir. İş materiallarında olan Azərbaycan Respublikası Daxili İşlər Nazirliyi Oğuz Rayon Polis Şöbəsi tərəfindən verilmiş 19-2006 nömrəli şəhadətnamənin surətindən görünür ki, 1 (bir) ədəd İj markalı, 16 kalibirli, tək lülə, 07939 nömrəli mülki ov silahı Şəxs verilmişdir. Azərbaycan Respublikası İXM-in 3-cü maddəsində inzibati məsuliyyətin əsasları müəyyən edilmişdir. Həmin maddənin tələbinə əsasən, yalnız həmin Məcəllə ilə nəzərdə tutulmuş inzibati xətaların törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizlik) törətmiş şəxs inzibati məsuliyyətə cəlb olunur və tənbeh edilir. Azərbaycan Respublikası İXM-in 4-cü maddəsinə əsasən, bu Məcəllə insan və vətəndaş hüquqlarına və azadlıqlarına hörmət edilməsi, qanunçuluq, qanun qarşısında bərabərlik, təqsirsizlik prezumpsiyası, ədalətlilik və inzibati xətaların qarşısının alınması prinsiplərinə əsaslanır. Azərbaycan Respublikası İXM-in 6.1-ci maddəsinə əsasən, inzibati xətalara görə inzibati tənbeh həmin Məcəlləyə uyğun olaraq tətbiq edilir. Azərbaycan Respublikası İXM-in 9.1-ci maddəsinə əsasən, inzibati xəta törətmiş şəxs haqqında tətbiq edilən tənbeh ədalətli olmalıdır, yəni inzibati xətaların xarakterinə, onun törədilməsi hallarına uyğun, qanuni və əsaslı olmalıdır. Azərbaycan Respublikası İXM-in 12.1-ci maddəsinə əsasən, həmin Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Azərbaycan Respublikası İXM-in 21-ci maddəsinə əsasən, inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Azərbaycan Respublikası İXM-in 590.1-ci maddəsinə əsasən, müvafiq icra hakimiyyəti orqanından xüsusi icazə almış şəxslər tərəfindən mülki silahın və ya onun üçün döyüş sursatının saxlanılması, daşınması və ya satılması qaydalarının pozulmasına görə - silah və döyüş sursatı müsadirə edilməklə və ya edilməməklə əlli manatdan yetmiş manatadək məbləğdə cərimə edilir. Məhkəmə, barəsində inzibati xəta haqqında iş üzrə icraat aparılan şəxs Şəxs əməlindən peşman olmasını məsuliyyətini yüngülləşdirlən hal kimi nəzərə alır. Barəsində inzibati xəta haqqında iş üzrə icraat aparılan şəxs Şəxs əməlində inzibati xətaya görə məsuliyyəti ağırlaşdıran hallar müəyyən olunmadı. Beləliklə, inzibati tənbeh tədbiri tətbiq edərkən məhkəmə inzibati xətanın xarakterini, təqsirin dərəcəsini, barəsində inzibati xəta haqqında işüzrə icraat aparılan şəxsin ailə və maddi vəziyyətini və işin digər hallarını nəzərə alaraq hesab edir ki, Şəxs barəsində ov tüfəngi müsadirə edilməməklə cərimə növündə inzibati tənbeh tətbiq edilməlidir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 40, 43, 48-51, 61, 106-109, 128-130-cu maddələrini rəhbər tutaraq, məhkəmə Qərara aldı: Şəxs Azərbaycan Respublikası İnzibati Xətalar Məcəlləsinin 590.1-ci maddəsində nəzərdə tutulmuş inzibati xəta törətməkdə təqsirli bilinsin və inzibati xətanın bilavasitə obyekti olmuş 1 (bir) ədəd İj markalı, 16 kalibirli, tək lülə, 07939 nömrəli mülki ov silahı müsadirə edilməməklə barəsində 70 (yetmiş) manat inzibati cərimə tənbeh növü tətbiq edilsin. Qəbələ Rayon Polis Şöbəsində saxlanılan 1 (bir) ədəd İj markalı, 16 kalibirli, tək lülə, 07939 nömrəli mülki ov silahı, patrondaş və 12 ədəd patron Şəxs qaytarılsın. Qərarın icrası Qəbələ rayon İcra və probasiya şöbəsinə həvalə edilsin. Qərarın surəti təqdim edildiyi və ya alındığı gündən 10 gün müddətində Şəki Apellyasiya Məhkəməsinə Qəbələ Rayon Məhkəməsi vasitəsi ilə şikayət verilə bilər. Sədrlik edən: Abbas Əliyev