Quba Rayon Məhkəməsi Qərar — İş №3(027)-845/2025

Azərbaycan Respublikası adından QƏRAR Quba şəhəri İş № 3(027)-845/2025 22.09.2025 QUBA RAYON MƏHKƏMƏSİ Hakim Kamilli Günel Hakim qızının sədrliyi, Xudaverdiyev Elşad Mütəllim oğlunun katibliyi, Şikayət verən X2 iştirakı ilə Azərbaycan Respublikası Quba RPŞ-nin YPX-nin TP ******* nömrəli, xx.xx.2025-ci il tarixli inzibati tənbeh vermə haqqında qərarının ləğv edilməsi barədə X4 tərəfindən verilmiş şikayətə açıq məhkəmə iclasında baxaraq, məhkəmə MÜƏYYƏN ETDİ : X1 Rayon Məhkəməsinə müraciət edərək, Quba RPŞ-nin YPX-nin TP ******* nömrəli, xx.xx.2025-ci il tarixli qərarının ləğv edilməsi və iş üzrə icraata xitam verilməsi barədə qərar qəbul edilməsini xahiş etmişdir. Ərizə onunla əsaslandırılmışdır ki, mən 16 avqust 2025-ci il tarixdə səhər saat 06-55 radələrində, idarə etdiyi Vaz 099 markalı ** BX *** dövlət qeydiyyat nömrəli metanik rəngli jiqulu maşını ilə, həyat yoldaşını Quba rayonunun Zərdabi qəsəbəsindən Xaçmaz Quba avtomobil yolu ilə Quba şəhəri istiqamətinə apararkən, yolun ötmə ərazisində hərəkət edən başqa bir maşını keçərək, yolun sağ tərəfinə döndüyü vaxt, qarşı tərəfdən 665 nömrəli dövlət yol patrul xidməti maşınını idarə edən yol patrul xidməti əməkdaşının saxla işarəsi verməsini görüb, maşında həyat yoldaşı olduğu üçün əl ilə qayıdıram işarəsi verib, idarə etdiyi maşınını yolun sağ hissəsi ilə hərəkət etməyə başlamışdır. Bu vaxt 665 nömrəli dövlət yol patrul xidməti maşınını idarə edən polis kiçik serjantı X7, idarə etdiyi maşını ilə əks istiqamətə dönərək, onun idarə etdiyi maşının arxası ilə hərəkət etməyə başladı. Bu səbəbdən də o, idarə etdiyi maşınını, Xaçmaz Quba yolunun Nərimankənd yoluna dönən ərazisindən bir neçə metr irəli sürərək sağ tərəfdə Quba şəhər istiqamətində saxlamış, və maşından düşərək, onu saxlayan yol polis əməkdaşına yaxınlaşıb bildirmiş ki, maşınında həyat yoldaşı var, onu işə qoyub qayıdır və bu səbəbdən də idarə etdiyi maşınımı dərhal saxlamamışdır. Lakin 665 nömrəli dövlət yol patrul xidməti maşınını idarə edən polis kiçik serjantı X7, ona bildirdi ki, sən tabeçilik göstərməyib maşınını saxlamamısan. Onu da qeyd edir ki, mən Xaçmaz Quba yolu ilə hərəkət edərkən, yol hərəkəti qaydaqsını əsla pozmamış və yolun ağ rəngli qırıq qırıq olan hissəsində, qanuna müvafiq olaraq ötmə əməliyyatını həyata keçirmişdir. Buna baxmayaraq onu qanunsuz olaraq saxlamış Quba rayon polis şöbəsinin yol patrul xidmətinin inspektoru, polis kiçik serjantı X7, ona oldu deyib uzaqlaşdı və o, yolunu davam etdirmişdir. Təxminən saat 07-28 dəqiqədə, istifadə etdiyi mobil telefonuna vatsapla "SMS" vasitəsi ilə məlumat gəldi ki, guya o, Azərbaycan Respublikasının İnzibati xətalar məcəlləsinin 327.2-ci maddəsinin tələblərini pozaraq ötmə əməliyyatını etmişdir. Bu tamamilə qanuna zidd və əsassız bir qərardır. Belə ki, adı qeyd olunan Quba rayon polis şöbəsinin yol patrul xidmətinin inspektoru, polis kiçik serjantı X7 ona sübut etsin ki, o, yolun konkret olaraq hansı hissəsində ötmə əməliyyatı etmişdir. Məhkəmə iclasında şikayət verən X4 ərizənin məzmununa uyğun izahat vermiş və qərarın ləğv edilməsini xahiş etmişdir. İşə baxılmasının yeri və vaxtı barədə qərarından şikayət verilən Azərbaycan Respublikası Quba RPŞ-nin YPX-ya məlumat verilsə də, nümayəndəsinin məhkəmə iclasında iştirakını təmin etməmiş və səbəbləri barədə məlumat verməmişdir. Məhkəmə işə, qərarından şikayət verilən orqanın nümayəndəsinin iştirakı olmadan baxılmasını mümkün hesab etmişdir. Məhkəmə şikayəti və təqdim olunmuş inzibati xəta materialını tədqiq edərək hesab edir ki, qərardan verilmiş şikayət təmin edilməlidir. Belə ki, iş materiallarında olan Quba RPŞ-nin YPX-nin TP ******* nömrəli, xx.xx.2025-ci il tarixli inzibati tənbeh vermə haqqında qərardan görünür ki, X3 Azərbaycan Respublikasının İnzibati Xətalar Məcəlləsinin 327.2-ci maddəsində nəzərdə tutulan inzibati xətanı törətməkdə təqsirli bilinib, barəsində 100 (bir yüz) manat cərimə cəzası tətbiq edilmişdir. “Yol hərəkəti haqqında” AR Qanununun 69-cu maddəsinin Vİ hissəsinin 1-ci bəndinə əsasən 1.1 — əks istiqamətli nəqliyyat axınlarını ayırır və yolların təhlükəli yerlərində hərəkət zolaqlarının sərhədini, yolun hərəkət hissəsinin giriş qadağan edilən sərhədlərini, nəqliyyat vasitələrinin duracaq yerlərinin sərhədlərini və avtomagistrallara aid edilməyən yolların hərəkət hissəsinin kənarlarını göstərir; 1.6 — əks istiqamətli və ya eyni istiqamətli nəqliyyat axınlarını ayıran 1.1 və ya 1.11 nişanlanma xətlərinə yaxınlaşma barədə xəbərdarlıq edir (yaxınlaşma xətti — cizgilərinin uzunluğu onların aralarındakı məsafədən üç dəfə böyük olan qırıq xətlər-üfiqi nişanlanma (yolun uzununa nişanlama) xətlərinə aiddir. “Yol hərəkəti haqqında” AR Qanununa əsasən ötmə - hərəkət etdiyi zolağı dəyişməklə hərəkətdə olan bir və ya bir neçə nəqliyyat vasitəsini ötüb keçməkdir. Azərbaycan Respublikası İXM-nin 327.2-ci maddəsinə əsasən, svetoforun və ya nizamlayıcının qadağanedici işarəsi verilərkən hərəkətin davam etdirilməsinə, 3.1 “Giriş qadağandır” yol nişanının tələblərinin və ya sərnişin daşıma, əks istiqamətli hərəkət zolağına çıxmaqla ötmə və ya manevr etmə, yolayrıcını keçmə qaydalarının pozulmasına, ümumi istifadədə olan nəqliyyat vasitələrinin, yaxud adamlar daşınan yük avtomobillərinin sərnişinlərlə yanacaqdoldurma məntəqəsinə daxil olmasına, 1.1, 1.3 və 1.11 üfüqi nişanlanma xətlərinin tələblərinə riayət etməyərək sola və ya geriyə dönməyə, yaxud maneəni kənardan keçməyə görə-səksən manat məbləğində cərimə edilir. Azərbaycan Respublikası İXM-nin 12-ci maddəsinə əsasən bu Məcəllə ilə qorunan ictimai münasibətlərə qəsd edən, hüquqazidd olan, təqsirli sayılan (qəsdən və ya ehtiyatsızlıq üzündən törədilən) və inzibati məsuliyyətə səbəb olan əməl (hərəkət və ya hərəkətsizlik) inzibati xəta hesab olunur. Azərbaycan Respublikası İXM-nin 8.2-ci maddəsinə əsasən inzibati məsuliyyətə cəlb olunmuş şəxs öz təqsirsizliyini sübut etməyə borclu deyildir. Həmin Məcəllənin 8.3-cü maddəsinə əsasən inzibati məsuliyyətə cəlb olunan şəxsin təqsirli olması barəsində şübhələr onun xeyrinə həll edilir. Hazırki iş üzrə müvafiq sübutların təqdim edilməsi məqsədilə məhkəmə iclasının bir dəfə təxirə salınmasına baxamayaraq, məhkəməyə şikayətçi X2 AR İXM-in 327.2-ci maddəsində nəzərdə tutulan inzibati xətanı törətməsi ilə bağlı hər hansı bir sübut təqdim edilməmişdir. Qeyd olunan hallar inzibati tənbeh haqqında qərar qəbul edilmiş şəxsin təqsirli olmasını şübhə altına aldığından, məhkəmə hesab edir ki, həmin şübhələr onun xeyrinə həll edilməlidir. Beləliklə də, məhkəmə hesab edir ki, Azərbaycan Respublikası Quba RPŞ-nin YPXnin TP ******* nömrəli, xx.xx.2025-ci il tarixli inzibati tənbeh vermə haqqında qərarı ləğv edilməli və iş üzrə icraata xitam verilməlidir. Azərbaycan Respublikasının İXM-nin 53.1.2-ci maddəsinə əsasən inzibati xəta tərkibi olmadıqda inzibati xəta haqqında iş üzrə icraata xitam verilir. Azərbaycan Respublikası İXM-nin 134.1.3-cü maddəsinə əsasən inzibati xəta haqqında iş üzrə qərardan verilən şikayətə və ya protestə baxılaraq bu Məcəllənin 135.1.5-1-ci maddəsində nəzərdə tutulduğu hallarda qərarı ləğv edərək inzibati xəta haqqında iş üzrə icraata xitam verilməsi haqqında qərar qəbul edilir. Azərbaycan Respublikası İXM-nin 135.1.5-1-ci maddəsinə əsasən bu Məcəllənin 53cü maddəsində nəzərdə tutulmuş halların müəyyən olunması inzibati xəta haqqında iş üzrə qərarın ləğv edilməsi və ya dəyişdirilməsi üçün əsasdır. Yuxarıda göstərilənlərə əsasən və Azərbaycan Respublikası İXM-nin 128-137-ci maddələrini rəhbər tutaraq, məhkəmə Qərara aldı: Şikayət təmin edilsin. Azərbaycan Respublikası Quba RPŞ-nin YPX-nin TP ******* nömrəli, xx.xx.2025-ci il tarixli inzibati tənbeh vermə haqqında qərarı ləğv edilsin və həmin inzibati xəta haqqında iş üzrə icraata Azərbaycan Respublikasının İXM-nin 53.1.2-maddəsinə əsasən xitam verilsin. Qərarın surəti rəsmi qaydada verildiyi vaxtdan 10 (on) gün müddətində Quba Rayon Məhkəməsi vasitəsilə və ya birbaşa Sumqayıt Apellyasiya Məhkəməsinə apellyasiya şikayəti verilə bilər. Hakim: Günel Kamilli