Quba Rayon Məhkəməsi Qərar — İş №3(027)-853/2020

Azərbaycan Respublikası adından QƏRAR Quba şəhəri İş № 3(027)-853/2020 05.10.2020 QUBA RAYON MƏHKƏMƏSİ Hakim Həsənov Rahim Təşəkkül oğlunun sədrliyi, X2 oğlunun katibliyi, Zərərçəkmiş şəxslər Zərərçəkmiş şəxs1 və Şeqolyova Qönçəgül Sadıq qızının, Barəsində inzibati xəta haqqında iş üzrə icraat aparılan Şəxs iştirakı ilə, xx xxxxxx 1957-ci il tarixdə Quba rayonu, Küpçal kəndində anadan olmuş, Azərbaycan Respublikasının vətəndaşı, subay, Quba rayonu, Küpçal-Qışlaq kəndində qeydiyyatda olan və yaşayan (Fərdi İdentifikasiya Nömrəsi xxxxxxx) Şəxs haqqında Azərbaycan Respublikası İnzibati Xətalar Məcəlləsinin 157-ci maddəsi ilə Quba rayon Polis Şöbəsindən daxil olmuş inzibati xəta haqqında materiala baxaraq, m ü ə y y ə n e t d i: Quba rayon Polis Şöbəsindən daxil olan inzibati xəta haqqında materiala əsasən, Şəxs xx xxxx 2020-ci il tarixdə Quba rayonu, Küpçal-Qışlaq kəndində yaşadığı evdə aralarında şəxsi münasibətlər zəminində yaranmış mübahisə zamanı qardaşı Zərərçəkmiş şəxs1 və onun həyat yoldaşı Şeqolyova Qönçəgül Sadıq qızını döymüşdür. Bununla bağlı Quba rayon Polis Şöbəsinin İTB-nin sahə rəisi Əhməd Əhmədov tərəfindən Şəxs barəsində xx xxxxxxx 2020-ci il tarixdə Azərbaycan Respublikası İnzibati Xətalar Məcəlləsinin 157-ci maddəsi ilə inzibati xəta haqqında MN ******* nömrəli protokol tərtib olunaraq, baxılması üçün Quba Rayon Məhkəməsinə göndərilmişdir. Məhkəmə iclasında barəsində inzibati xəta haqqında iş üzrə icraat aparılan Şəxs bildirdi ki, Zərərçəkmiş şəxs1 onun doğma qardaşı, Şeqolyova Qönçəgül Sadıq qızı isə onun həyat yoldaşıdır. xx xxxx 2020-ci il tarixdə Quba rayonu, Küpçal-Qışlaq kəndindəyaşadığı evdə qardaşı Zərərçəkmiş şəxs1 və Şeqolyova Qönçəgül Sadıq qızı ilə aralarında şəxsi münasibətlər zəminində mübahisə yaranmışdır. Mübahisə zamanı Zərərçəkmiş şəxs1 onu söyüb təhqir etmiş, həyat yoldaşı Şeqolyova Qönçəgül Sadıq qızı da ona qoşulmuşdur. O, əlində olan taxta çubuqla onların üstünə gedərək, onlara həmin çubuqla vuraraq itələyib onları evin həyətindən çıxıb getməsini tələb etmişdir. Həmin şəxslər isə onu söyüb təhqir etmişlər. Qeyd edilənləri nəzərə alaraq, barəsində ədalətli qərar qəbul edilməsini xahiş etdi. Məhkəmə iclasında Zərərçəkmiş şəxs1 bildirdi ki, Şəxs onun doğma bacısıdır. xx xxxx 2020-ci il tarixdə Quba rayonu, Küpçal-Qışlaq kəndində yaşadığı evdə bacısı Şəxs ilə aralarında şəxsi münasibətlər zəminində mübahisə yaranmışdır. Mübahisə zamanı Pəri əlində olan ağac budağı ilə dəfələrlə onun bədəninin müxtəlif nahiyələrinə vuraraq onu döymüşdür. O, bacısı Pəri Şahmirzəyevi vurmamış və təhqir etməmişdir. Göstərilənləri nəzərə alaraq, Şəxs barəsində inzibati qaydada tədbir görülməsini xahiş etdi. Məhkəmə iclasında zərərçəkmiş şəxs Şeqolyova Qönçəgül Sadıq qızı bildirdi ki, Şəxs onun baldızıdır. xx xxxx 2020-ci il tarixdə Quba rayonu, Küpçal-Qışlaq kəndində yaşadığı evdə baldızı Şəxs ilə aralarında şəxsi münasibətlər zəminində mübahisə yaranmışdır. Mübahisə zamanı Pəri əlində olan ağac budağı ilə onun sağ qol nahiyəsinə və bədəninin müxtəlif nahiyələrinə vuraraq onu döymüşdür. Pəri onu söyüdyünə görə o da cavab olaraq Pərini söyüb təhqir etməmişdir. Göstərilənləri nəzərə alaraq, Şəxs barəsində inzibati qaydada tədbir görülməsini xahiş etdi. Məhkəmə iclasında iştirak edən Quba RPŞ-nin İTB-nin sahə rəisi Əhməd Əhmədov göstərilən xüsusatları təsdiq edərək protokolun onun tərəfindən tərtib edildiyini bildirdi. Məhkəmə izahatları dinləyib, iş materiallarını araşdıraraq hesab edir ki, Şəxs Azərbaycan Respublikası İnzibati Xətalar Məcəlləsinin 157-ci maddəsində nəzərdə tutulmuş inzibati xətanı törətməsində təqsirli olması sübuta yetirilir, ona görə də onun əməli Azərbaycan Respublikası İnzibati Xətalar Məcəlləsinin həmin maddəsi ilə düzgün tövsif edilmişdir. Belə ki, iş materiallarında olan Quba RPŞ-nin TQ-nun təhqiqatçısı X1 tərəfindən qəbul edilmiş cinayət işinin başlanmasının rədd edilməsi barədə xx xxxxxx 2020-ci il tarixli qərarından görünür ki, Şəxs xx xxxx 2020-ci il tarixdə Quba rayonu, Küpçal-Qışlaq kəndində yaşadığı evdə aralarında şəxsi münasibətlər zəminində yaranmış mübahisə zamanı qardaşı Zərərçəkmiş şəxs1 və onun həyat yoldaşı Şeqolyova Qönçəgül Sadıq qızını döymüşdür. Göründüyü kimi, Şəxs əməlində cinayət tərkibi deyil, Azərbaycan Respublikası İnzibati Xətalar Məcəlləsinin 157-ci maddəsinin, yəni döymə inzibati xətasının tərkibi vardır. Ona görə də Şəxs barəsində cinayət işinin başlanılması rədd edilmiş, qərarın surəti Şəxs barəsində Azərbaycan Respublikası İXM-nin 157-ci maddəsi ilə inzibati tədbir görülməsi üçün Quba RPŞ-nin İTB-nə göndərilmişdir. Azərbaycan Respublikası İnzibati Xətalar Məcəlləsinin 157-ci maddəsinə əsasən döymə və sair zorakı hərəkətlərlə qəsdən fiziki ağrı yetirməyə görə məsuliyyət nəzərdə tutulmuşdur. Azərbaycan Respublikası İnzibati Xətalar Məcəlləsinin 3-cü maddəsinin tələbinə görə yalnız bu Məcəllə ilə nəzərdə tutulmuş inzibati xətanın törədilməsində təqsirli hesab edilən və inzibati xəta tərkibinin bütün digər əlamətlərini daşıyan əməli (hərəkət və ya hərəkətsizliyi) törətmiş şəxs inzibati məsuliyyətə cəlb olunur. Həmin Məcəllənin 21-ci maddəsinə əsasən inzibati tənbeh məsuliyyət tədbiridir və inzibati xəta törədən şəxsi qanunlara əməl edilməsi ruhunda tərbiyələndirmək, habelə həm inzibati xəta törətmiş şəxs, həm də başqa şəxslər tərəfindən yeni inzibati xəta törədilməsinin qarşısını almaq məqsədi daşıyır. Azərbaycan Respublikası İnzibati Xətalar Məcəlləsinin 31.2-ci maddəsinə əsasən Fiziki və ya vəzifəli şəxslər barəsində inzibati tənbeh tətbiq edilərkən, xətanın xarakteri, inzibati xəta törədən şəxsin şəxsiyyətini xarakterizə edən hallar, onun təqsirinin dərəcəsi, əmlak vəziyyəti, habelə məsuliyyəti yüngülləşdirən və ağırlaşdıran hallar nəzərə alınır. Göründüyü kimi Şəxs Azərbaycan Respublikası İnzibati Xətalar Məcəlləsinin 157-ci maddəsində nəzərdə tutulmuş inzibati xətanı törətməsi məhkəmə araşdırması zamanı öz təsdiqini tapmışdır. Şəxs əməlində inzibati məsuliyyəti yüngülləşdirən və ağırlaşdıran hallar müəyyən edilməmişdir. Məhkəmə Şəxs törətmiş olduğu inzibati xətanın xarakterini, onun təqsirinin dərəcəsini, şəxsiyyətini nəzərə alaraq hesab edir ki, Şəxs 300 (üç yüz) manat miqdarında cərimə növündə tənbeh edilməlidir. Yuxarıda göstərilənlərə əsasən və Azərbaycan Respublikası İnzibati Xətalar Məcəlləsinin 32, 33, 114, 115, 117-ci maddələrini rəhbər tutaraq, məhkəmə q ə r a r a a l d ı: Şəxs Azərbaycan Respublikası İnzibati Xətalar Məcəlləsinin 157-ci maddəsində nəzərdə tutulmuş inzibati xətanı törətməkdə təqsirli bilinib, barəsində 300 (üç yüz) manat məbləğində cərimə növündə inzibati tənbeh tətbiq edilsin. Qərarın surəti təqdim edildiyi və ya alındığı gündən 10 (on) gün müddətində qərarı qəbul etmiş hakim vasitəsilə və ya Sumqayıt Apellyasiya Məhkəməsinə apellyasiya şikayəti və protesti verilə bilər. Sədrlik edən: Rahim Həsənov